ᑐᓴᕋᑦᓴᓕᕆᔩᑦ

ᐃᓄᑐᐊᒃᑯᕕᒻᒦᒋᐊᓕᓐᓄᑦ ᐃᑲᔫᑏᑦ ᑭᒃᑯᑐᐃᓐᓇᕐᓄᑦ ᐊᒃᑐᖅᑕᐅᓯᒪᔪᓄᑦ ᓄᕙᔾᔪᐊᕐᓇᖅ−19-ᒧᑦ

(ᒪᐃ 3, 2021 – ᐃᖃᓗᐃᑦ, ᓄᓇᕗᑦ) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᐃᓚᒋᐊᖅᓯᒪᓕᖅᑕᖓ ᐃᓄᑐᐊᒃᑯᕕᒻᒦᒋᐊᓕᓐᓄᑦ ᐃᑲᔫᑎᒃᓴᑦ ᓄᓇᕗᒻᒥ ᐃᓄᐃᑦ ᐊᖏᕐᕋᖅᓯᒪᒍᓐᓇᖁᓪᓗᖏᑦ.

ᐃᓄᐃᑦ 14-ᓂᒃ ᐅᓪᓗᓂᒃ ᐃᓄᑐᐊᒃᑯᕕᒻᒦᑦᑐᑦ ᒫᓐᓇ ᐃᓄᑐᐊᒃᑯᕕᒻᒦᑦᑐᓄᑦ ᐃᑲᔫᑎᓂᒃ ᐸᔪᑦᑕᐅᒍᓐᓇᓕᖅᑐᑦ ᐃᓚᒋᔭᖏᑦ ᐊᖏᕐᕋᒥᓃᑦᑐᑦ ᓄᓇᓕᓐᓂ. ᐃᓚᒋᔭᐅᓪᓗᑎᒃ ᐋᓐᓂᐊᕐᕕᓕᐊᖅᓯᒪᔪᑦ ᐊᒻᒪᓗ ᒪᓕᑦᑎᖏᑦ ᐃᓄᑐᐊᒃᑯᕕᒻᒦᒋᐊᖃᖅᑎᓪᓗᒋᑦ ᐃᓚᒋᔭᐅᓪᓗᑎᒃ ᐃᖃᓗᓐᓅᖅᓯᒪᔪᑦ ᐊᒻᒪᓗ ᐋᓐᓂᐊᕐᕕᓕᐊᖅᑐᓄᑦ ᐃᓄᑐᐊᒃᑯᕕᓐᓂ ᖃᓪᓗᓈᓂ. ᑖᓐᓇ ᐃᓚᒋᐊᕈᑕᐅᔪᖅ ᒫᓐᓇ ᐱᓕᕆᐊᒧᑦ, ᐃᓄᑐᐊᒃᑯᕕᒻᒦᑦᑐᓄᑦ ᐃᑲᔫᑏᑦ ᑐᓂᔭᐅᖃᑦᑕᖅᑐᑦ ᓄᓇᕗᒻᒥ ᐃᓄᐃᑦ ᓇᓗᓇᐃᖅᑕᐅᓯᒪᔪᑦ ᓄᕙᔾᔪᐊᕐᓇᖃᕆᐊᖏᑦ−19-ᒥᒃ ᐅᕝᕙᓘᓐᓃᑦ ᐃᓄᑐᐊᒃᑯᕕᒻᒦᒋᐊᖃᖅᑎᑕᐅᔪᑦ 14-ᓂᒃ ᐅᓪᓗᓂᒃ ᖃᐅᔨᓴᖅᑕᐅᓂᖏᓐᓂ ᓇᓗᓇᐃᖅᑕᐅᓯᒪᑎᓪᓗᒋᑦ ᑲᓲᒪᑦᓯᔪᒥᓂᐅᓇᓱᐊᒋᔭᐅᓗᑎᒃ ᓄᕙᔾᔪᐊᓇᖅᑐᓕᒻᒥᒃ.

“ᓄᓇᕗᒻᒥ ᐃᓄᐃᑦ ᒪᓕᑦᓯᐊᖁᔭᒻᒪᕆᒃᑲ ᑎᓕᓯᔾᔪᑎᖏᓐᓂᒃ ᐃᖢᐊᖅᓴᐃᔨᕐᔪᐊᑉ,” ᐅᖃᖅᑐᖅ ᐊᓗᑭ ᑰᑦᑎᖅ, ᐊᖓᔪᖅᑳᖓ ᑐᙵᕕᒃᑯᑦ. “ᐊᖏᕐᕋᖅᓯᒪᓗᑎᑦ, ᒪᑐᐊᖅᓯᒪᓗᑎᑦ, ᐊᒡᒐᑎᑦ ᐅᐊᓴᖃᑦᑕᕐᓗᒋᑦ ᐊᒻᒪᓗ ᐊᔪᙱᒃᑯᕕᑦ, ᐃᓱᒪᒃᓴᖅᓯᐅᕈᑎᖃᕐᓗᑎᑦ ᑲᐱᔭᐅᓂᕐᒥᒃ. ᑲᐱᔭᐅᓚᐅᖅᑐᖓ ᑲᐱᔭᐅᒍᓐᓇᖅᓯᑐᐊᕋᒪ.”

ᐃᓄᑐᐊᒃᑯᕕᒻᒦᑦᑐᓄᑦ ᐃᑲᔫᑏᑦ ᐃᑲᔫᑎᒃᓴᒫᓕᐊᖑᓯᒪᒧᑦ ᓄᓇᕗᒻᒥ ᐃᓄᐃᑦ ᐊᖏᕐᕋᖅᓯᒪᖁᓪᓗᒋᑦ. ᐃᑲᔫᑎᓃᑦᑐᑦ ᐃᑲᔫᑎᒃᓴᑦ ᐃᓄᓐᓄᑦ ᓂᕿᒃᑯᑦ, ᓴᓗᒻᒪᖅᓴᐅᑎᒃᑯᑦ ᐊᒻᒪᓗ ᐱᐊᕋᖅᓯᐅᑏᑦ. ᓱᓇᑐᐃᓐᓇᐃᑦ ᐊᔾᔨᒌᖃᑦᑕᑦᔮᖏᑦᑐᑦ ᐃᓪᓗᒥᐅᖃᑎᒌᑦ ᒪᓕᓪᓗᒋᑦ ᐊᒻᒪᓗ ᖃᐅᔨᒪᔾᔪᑏᑦ ᑐᓂᔭᐅᓯᒪᔪᑦ ᑐᙵᕕᒃᑯᓐᓄᑦ.

ᓄᓇᓕᓐᓄᑦ ᓄᕙᔾᔪᐊᓇᖅᑐᑖᖅᓯᒪᔪᓄᑦ, ᓇᓗᓇᐃᖅᑕᐅᓂᖓ ᐃᖢᐊᖅᓴᐃᔨᒧᑦ ᐊᑐᕆᐊᑐᙱᑦᑐᖅ. ᒫᓐᓇ, ᑕᕝᕗᖓ ᐃᓚᒋᔭᐅᔪᑦ ᐃᖃᓗᐃᑦ, ᑭᙵᐃᑦ ᐊᒻᒪᓗ ᑲᖏᕐᖠᓂᖅ. ᐊᓯᓕᒫᖏᑦ ᓄᓇᕗᑦ ᓄᓇᓕᖏᑦ ᐊᒻᒪᓗ ᐃᓄᐃᑦ ᓄᓇᖃᖅᑐᑦ ᓄᓇᕗᑦ ᓄᓇᖓᑕ ᓇᓗᓇᐃᖅᑕᐅᓯᒪᓂᖓᑕ ᓯᓚᑖᓂ ᐊᑎᓕᐅᖅᑕᐅᓯᒪᒋᐊᓖᑦ ᐃᖢᐊᖅᓴᐃᔨᒧᑦ.

ᑐᑭᓯᒋᐊᒃᑲᓂᕐᕕᒃᓴᖅ ᑐᙵᕕᒃᑯᑦ ᐃᓄᑐᐊᒃᑯᕕᒻᒦᒋᐊᓕᓐᓄᑦ ᐃᑲᔫᑎᓄᑦ ᐱᓕᕆᐊᒧᑦ, ᐃᕐᖐᓐᓈᕈᑎᒃᑯᑦ ᑎᑎᕋᕐᓗᑎᑦ ᐅᕗᖓ COVID-19@tunngavik.com ᐅᖄᓚᓗᑎᓪᓘᓐᓃᑦ 1-888-236-5400. ᑐᓴᖅᑎᓯᔾᔪᑕᐅᔪᓕᒫᑦ ᐊᓯᖅᑯᕝᕕᖃᙱᑦᑐᒥᒃ ᑲᙳᓇᖅᑎᑕᐅᓂᐊᖅᑐᑦ.

ᑐᙵᕕᒃᑯᑦ ᐃᓄᑐᐊᒃᑯᕕᒻᒦᒋᐊᓕᓐᓄᑦ ᐃᑲᔫᑎᖏᑦ ᐋᖅᑭᑦᑕᐅᓚᐅᖅᑐᑦ ᑲᓇᑕ ᒐᕙᒪᖓᑕ ᓄᓇᖃᖅᑳᖅᓯᒪᔪᑦ ᓄᓇᖏᓐᓄᑦ ᐃᑲᔫᑎᒃᓴᓂᒃ ᑮᓇᐅᔭᖃᖅᑎᑕᐅᓪᓗᑎᒃ.

-30-

ᑐᑭᓯᒋᐊᒃᑲᓂᕐᕕᒃᓴᖅ:

ᒪᓚᐃᔭ ᒥᑭᔾᔪᒃ

ᑐᑭᒧᐊᒃᑎᑦᑎᔨᐅᓂᕐᒥᒃ ᑐᓴᐅᒪᔾᔪᑎᓕᕆᔨᒃᑯᓐᓂ ᐃᓕᓐᓂᐊᖅᑐᖅ

ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-646-0006

www.tunngavik.com

 

Download (PDF, 146KB)

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: