ᑐᓴᕋᑦᓴᓕᕆᔩᑦ

ᐃᓄᐃᑦ ᒥᑭᓂᖅᓴᓂᒃ ᓇᖕᒥᓂᖃᖅᑐᑦ ᑲᑎᒪᓂᖏᑦ ᐃᖃᓗᖕᓂ

ᐃᓄᐃᑦ ᒥᑭᓂᖅᓴᓂᒃ ᓇᖕᒥᓂᖃᖅᑐᑦ ᑲᑎᒪᓂᖏᑦ ᐋᖅᑭᒃᑕᐅᔪᑦ ᓄᓇᕗᑦ ᑐᓐᖓᕕᒃᑯᓐᓄᑦ. ᐱᐊᓂᖅᑲᐅᔪᑦ ᐃᖃᓗᖕᓂ ᐅᓪᓗᒥ.

 

ᐅᖓᑖᓄᑦ 30 ᐃᓄᐃᑦ ᒥᑭᓂᖅᓴᓂᒃ ᓇᖕᒥᓂᖃᖅᑐᑦ ᓇᑭᑐᐃᓐᓇᖅ ᓄᓇᕗᒥ ᐅᐸᐅᑎᓯᒪᖅᑲᐅᔪᑦ ᒪᕐᕉᖕᓄᑦ ᐅᓪᓘᖕᓄᑦ ᐅᖃᐅᓯᖃᖅᑐᑎᒃ ᐊᔾᔨᒌᓐᖏᑦᑐᓂᒃ ᐱᓪᓗᒍ ᓄᓇᕗᒥ ᑮᓇᐅᔭᓕᐅᕐᓂᖅ, ᐃᓚᐅᓪᓗᑎᒃ ᐊᑐᓕᖅᑎᑕᐅᓂᖓ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂ ᐋᑎᑯ 24 ᐊᒻᒪ ᐊᕕᒃᑐᖅᓯᒪᓂᐅᔪᑦ ᒐᕙᒪᖏᑦᑕ ᑳᓐᑐᕌᒃᑎᑦᓯᖃᑦᑕᕐᓂᖏᓐᓄᑦ ᐃᓕᖅᑯᓯᐅᔪᑦ ᐊᒻᒪ ᐊᑐᖅᑕᐅᕙᒃᑐᑦ, ᐱᓗᐊᖅᑐᒥᒃ ᓄᓇᕗᒥ ᓇᖕᒥᓂᖃᖅᑐᓄᑦ ᐃᑲᔫᑏᑦ ᐊᑐᐊᒐᑦ ᐊᒻᒪ ᓄᓇᕗᑦ ᑐᓐᖓᕕᒃᑯᑦ ᐃᓄᖕᓄᑦ ᓇᖕᒥᓂᕆᔭᐅᔪᓄᑦ ᑎᑎᖅᑕᐅᓯᒪᕕᐊ.

 

ᑲᑎᒪᔭᖅᑐᖃᑕᐅᔪᑦ ᐅᖃᓚᐅᖅᑐᑦ ᐃᓱᒫᓘᑎᖃᒻᒪᕆᖕᓂᕋᖅᑐᑎᒃ ᐊᒻᒪ ᓈᒻᒪᒃᓴᕋᑎᒃ ᓄᓇᕗᑦ ᒐᕙᒪᖏᑦᑕ ᐊᑐᓕᖅᑎᑦᓯᓂᖏᑦ ᑖᒃᑯᓂᖓ ᓄᓇᕗᒥ ᓇᖕᒥᓂᖃᖅᑐᓄᑦ ᐃᑲᔫᑏᑦ ᐊᑐᐊᒐᖏᓐᓂᒃ ᐊᒻᒪ ᓈᒻᒪᖏᔾᔪᑎᖃᕐᓂᖓᓂᒃ ᐃᓚᖓᒍᑦ ᑖᒃᑯᐊ ᐊᑐᐊᒐᐃᑦ ᓇᖕᒥᓂᖅ.  ᑲᑎᒪᔭᖅᑐᖅᓯᒪᔪᑦ ᐊᐱᖅᓲᑎᖃᓚᐅᕐᒥᔪᑦ ᓈᒻᒪᒃᑲᓗᐊᕐᒪᖔᑦ ᓄᓇᕗᑦ ᑐᓐᖓᕕᒃᑯᑦ ᐱᓕᕆᐊᖓᑦ ᐊᒻᒪ ᐃᓕᖅᑯᓯᕆᕙᒃᑕᖏᑦ ᐱᔾᔪᑎᒋᓪᓗᒋᑦ ᐃᑲᔪᕈᑎᖏᑦ ᐃᓄᖕᓄᑦ ᓇᖕᒥᓂᖃᖅᑐᓄᑦ ᐊᑕᓂᖃᖅᑎᓪᓗᒋᑦ ᓄᓇᕗᑦ ᒐᕙᒪᖏᑦᑕ ᑳᓐᑐᕌᒃᑎᑦᓯᓂᕐᒧᑦ ᐃᓕᖅᑯᓯᒋᕙᒃᑕᖏᑦ.  ᑕᒪᓐᓇ ᑲᑎᒪᓂᖅ ᓴᖅᑭᑎᑦᓯᓚᐅᖅᑐᖅ ᑎᑎᖅᓯᒪᔪᓂᒃ ᐊᑐᓕᖁᔭᒃᓴᓂᒃ ᑖᒃᓇᓐᖓᑦ ᑲᑎᒪᔭᖅᑐᖅᓯᒪᔪᓂᒃ ᑖᒃᑯᓄᖓ ᓄᓇᕗᑦ ᑐᓐᖓᕕᒃᑯᓐᓄᑦ ᐊᒻᒪ ᓄᓇᕗᑦ ᒐᕙᒪᖏᓐᓄᑦ.

 

“ᓄᓇᕗᑦ ᑐᓐᖓᕕᒃᑯᑦ ᐋᖅᑭᒃᓱᐃᓚᐅᖅᑐᑦ ᑕᒪᑐᒥᖓ ᑲᑎᒪᓂᐅᔪᒥᒃ ᐃᓄᐃᑦ ᓇᖕᒥᓂᖃᖅᑐᑦ, ᖃᐅᔨᒪᓂᖅᐹᖑᔪᑦ ᐱᔾᔪᑎᒋᓪᓗᒋᑦ ᑳᓐᑐᕌᒃᑎᑦᓯᖃᑦᑕᕐᓂᖏᓐᓄᑦ ᐊᑐᐊᒐᑦ ᐊᒻᒪ ᐃᓕᖅᑯᓯᕆᕙᒃᑕᖏᑦ, ᓂᓪᓕᕈᓐᓇᖁᓪᓗᒋᑦ ᐃᓱᒫᓘᑎᒥᓂᒃ ᐊᒻᒪ ᐊᑐᓕᖁᔭᒃᓴᓕᐅᕐᓗᑎᒃ ᐱᐅᓯᕚᓪᓕᕈᑕᐅᔪᒃᓴᓂᒃ.  ᓄᓇᕗᑦ ᑐᓐᖓᕕᒃᑯᑦ ᖁᔭᓐᓇᒦᖅᑐᑦ ᑲᑎᒪᔭᖅᑐᓚᐅᖅᑐᓂᒃ ᐱᕕᒃᓴᖃᖅᑎᑦᓯᔪᓐᓇᓚᐅᕐᓂᖏᓐᓄᑦ ᑕᒪᑐᒧᖓ ᐱᓕᕆᐊᒃᓴᖃᒻᒪᕆᒃᑲᓗᐊᖅᑐᑎᒃ ᐃᓚᐅᔪᑦ ᑲᑎᒪᔪᓄᑦ.  ᓄᓇᕗᑦ ᒐᕙᒪᖏᑦᑕ ᒫᓐᓇ ᑳᓐᑐᕌᒃᑎᑦᓯᓂᕐᒧᑦ ᐊᑐᐊᒐᖏᑦ ᐊᒻᒪ ᐃᓕᖅᑯᓯᕆᕙᒃᑕᖏᑦ ᐱᒻᒪᕆᐅᔪᓂᒃ ᐱᐅᓯᕚᓪᓕᕆᐊᖃᒻᒪᕆᒃᑐᑦ ᐊᒻᒪ ᓄᓇᕗᑦ ᑐᓐᖓᕕᒃᑯᑦ ᓇᓗᓇᐃᖅᑐᑦ ᑲᔪᓯᓂᐊᓂᕐᒥᓂᒃ ᕿᒥᕐᕈᓗᑎᒃ ᑲᑐᔾᔨᖃᑎᒌᑦ ᐃᓗᐊᓂ ᑲᒪᒍᓯᕆᕙᒃᑕᒥᓂᒃ ᐊᒻᒪ ᐱᓕᕆᐊᖃᕐᓗᑎᒃ ᐋᖅᑭᒋᐊᕈᑕᐅᔪᒃᓴᓂᒃ,” ᐅᖃᖅᑐᖅ ᓄᓇᕗᑦ ᑐᓐᖓᕕᒃᑯᑦ ᑐᑭᒧᐊᒃᑎᑦᑎᔨᒋᑲᐃᓐᓇᖅᑕᖓᑦ ᐋᑐ ᔪᐊᓐ.

 

ᔪᐊᒃᑯᓐ ᓇᓗᓇᐃᖅᑐᖅ ᑕᒪᒃᑯᐊ ᐃᓱᒫᓘᑕᐅᔪᑦ ᐅᖃᐅᓯᕆᓛᕐᓂᕋᖅᑐᒋᑦ ᓄᓇᕗᑦ ᑐᓐᖓᕕᒃᑯᑦ ᑲᑎᒪᔨᖏᓐᓄᑦ ᑲᑎᒪᓕᖅᐸᑕ ᐊᐅᒍᓯ 2012.  ᓄᓇᕗᑦ ᑐᓐᖓᕕᒃᑯᑦ ᓴᖅᑭᑎᑦᓯᓂᐊᕐᒥᔪᑦ ᐃᓱᒫᓘᑕᐅᔪᓂᒃ ᕿᒥᕐᕈᓂᖃᓕᕈᑎᒃ ᑖᒃᑯᓂᖓ ᓄᓇᕗᒥ ᓇᖕᒥᓂᖃᖅᑐᓄᑦ ᐃᑲᔫᑏᑦ ᐊᑐᐊᒐᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: