ᑐᓴᕋᑦᓴᓕᕆᔩᑦ

ᐃᓄᐃᑦ ᐃᓚᒋᔭᐅᔪᑦ ᑲᓇᑕᒥᐅᓄᑦ ᑲᑎᒪᔭᖅᑐᖅᓯᒪᔪᓄᑦ ᓇᓄᐃᑦ ᑎᑭᐅᑎᕕᒋᕙᑦᑕᖏᓐᓂᒃ ᑲᑎᒪᓂᕐᒥ

ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᖓᑕ ᑐᒡᓕᐊ ᔭᐃᒥᓯ ᐃᑦᑐᓗᒃ ᐅᖃᖅᑲᐅᔪᖅ ᐅᓪᓗᒥ ᑲᓇᑕ ᓯᕗᓕᕐᓂᖓᓂᒃ ᑲᑎᑦᓯᕙᓪᓕᐊᓂᕐᒧᑦ ᖃᓪᓗᓈᑦ ᖃᐅᔨᓴᖅᑎᕐᔪᐊᖏᑕ ᐊᒻᒪᓗ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ, ᑕᐃᔭᐅᖃᑦᑕᕐᒥᔪᓂᒃ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ ᐊᓯᖏᓐᓂ ᐊᐅᓚᑦᓯᕕᖃᐅᖅᑐᓂ, ᓇᓄᓕᕆᓂᕐᒧᑦ ᐊᐅᓚᑦᓯᔾᔪᑎᒃᓴᓂ ᓄᓇᕐᔪᐊᖅ ᐅᑭᐅᖅᑕᖅᑐᓕᒫᖓᓂ. ᐃᑦᑐᓗᒃ ᐅᖃᖅᑲᐅᔪᖅ ᐃᓚᒋᔭᐅᓂᕐᒥᓄᑦ ᑲᓇᑕᒥᐅᓄᑦ ᑲᑎᒪᔭᖅᑐᖃᑕᐅᓯᒪᔪᓂᒃ ᓇᓄᐃᑦ ᑎᑭᐅᑎᕕᒋᕙᑦᑕᖏᓐᓂᒃ ᑲᑎᒪᓂᕐᒥ ᐃᖃᓗᓐᓂ ᐱᓇᓱᐊᕈᓯᑦᑎᓐᓂ.

ᐃᑦᑐᓗᒃ ᐅᖃᖅᑲᐅᔪᖅ ᐅᐱᒍᓱᒋᐊᒃᑲᓂᕐᓂᕐᒥᓂᒃ ᑲᒪᒋᔭᐅᒋᐊᕐᓂᖏᓐᓂᒃ ᐊᓯᖏᓐᓄᑦ ᓇᓄᐃᑦ ᑎᑭᐅᑎᕕᒋᖃᑦᑕᖅᑕᖏᓐᓄᑦ ᐅᖃᐅᓯᐅᒋᐊᒃᑲᓐᓂᕐᓂᖓᓄᑦ ᐱᖕᒪᕆᐅᑎᑕᐅᓪᓗᓂ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᑦ ᓇᓄᓕᕆᓂᕐᒥᒃ. ᓇᓄᐃᑦ ᑎᑭᐅᑎᕕᒋᖃᑦᑕᖅᑕᖏᑦ ᐃᓚᒋᔭᐅᓪᓗᑎᒃ ᑕᓪᓕᒪᑦ ᓄᓇᕐᔪᐊᒥ ᐅᑭᐅᖅᑕᖅᑐᖓᓂ ᓄᓇᓕᕐᔪᐊᑦ ᓇᓄᖃᖃᑦᑕᖅᑐᑦ, ᐃᓚᒋᔭᐅᓪᓗᑎᒃ ᑲᓇᑕ, ᐊᑯᑭᑦᑐᑦ, ᓄᐊᕗᐃ, ᐅᓛᓴᒃᑯᑦ ᐊᒻᒪᓗ ᒥᐊᓕᒐᑦ ᓄᓇᖓ. ᑖᒃᑯᐊᓕᒫᑦ ᑕᓪᓕᒪᑦ ᓇᓄᖃᖃᑦᑕᕐᓂᐅᔪᑦ ᐊᑎᓕᐅᓚᐅᖅᓯᒪᔪᑦ ᐊᖏᖃᑎᒌᒍᒻᒥᒃ ᓄᖑᐊᑎᑦᓯᑦᑕᐃᓕᒪᒍᑎᒃᓴᓂᒃ ᓇᓄᕐᓂᒃ 1973-ᒥ ᑐᕌᒐᖃᖅᑐᑎᒃ ᑕᕝᕗᖓᑦᓴᐃᓐᓇᖅ ᑐᕌᖓᔪᒥᒃ ᐱᓕᕆᒋᐊᖃᕐᓂᕐᒥᒃ ᐊᐅᓚᑦᓯᔾᔪᑎᒃᓴᓂᒃ ᓇᓄᓕᕆᓂᕐᒧᑦ ᓄᓇᒋᔭᒥᒍᑦ.

“ᐃᓄᐃᑦ ᐊᑯᓂᐊᓗᒃ ᐃᓱᒫᓘᑎᖃᖃᑦᑕᖅᓯᒪᒻᒪᑕ ᐊᒃᑐᐃᓂᕐᓗᒍᑕᐅᖃᑦᑕᖅᓯᒪᓂᖏᓐᓂᒃ ᖃᓪᓗᓈᑦ ᖃᐅᔨᓴᖅᑎᕐᔪᐊᖏᑕ ᖃᐅᔨᓴᐅᓯᖏᑦ ᓇᓄᕐᓂᒃ. ᓄᓇᕗᑦ ᒐᕙᒪᖓ ᒫᓐᓇ ᖃᐅᔨᓇᓱᐊᖅᑐᖅ ᖃᓄᐃᓕᒍᑕᐅᓗᐊᓐᖏᓂᖅᓴᒃᑯᑦ ᖃᐅᔨᓴᕈᓯᕐᓂᒃ ᐊᑐᖅᑕᐅᖃᑦᑕᕈᓐᓇᖅᑐᓂᒃ,” ᐅᖃᓚᐅᖅᑐᖅ ᐃᑦᑐᓗᒃ. ᐅᖃᐅᔾᔨᓚᐅᕐᒥᔪᖅ ᓇᓄᐃᑦ ᑎᑭᐅᑎᕕᒋᖃᑦᑕᖅᑕᖏᓐᓄᑦ ᐱᓇᓱᐊᖃᑎᒌᑦᑐᓄᑦ ᖃᐅᔨᓇᓱᐊᖁᔨᓪᓗᓂ ᖃᐅᔨᓴᕈᓯᕐᓂᒃ ᖃᓄᐃᓕᒍᑕᐅᓗᐊᓐᖏᓂᖅᓴᐅᒍᓐᓇᖅᑐᓂᒃ ᓇᓄᐃᑦ ᖃᐅᔨᓴᖅᑕᐅᓂᖏᓐᓄᑦ.

ᓇᓄᐃᑦ ᑎᑭᐅᑎᕕᒋᖃᑦᑕᖅᑕᖏᓐᓄᑦ ᐱᓇᓱᐊᖃᑎᒌᑦᑐᑦ ᑲᑎᒪᓂᖓᓂ, ᐃᑦᑐᓗᒃ ᐊᒻᒪᓗ ᐊᖏᔪᖅᑲᐅᑏᑦ ᐊᓯᖏᓐᓃᖔᖅᑐᑦ ᐃᓄᐃᑦ ᓄᓇᖏᓐᓂᒃ ᓄᓇᑖᖅᓯᒪᔪᓂᒃ ᑲᑐᔾᔨᖃᑎᒌᑦ ᑲᓇᑕᒥ ᑲᑎᒪᖃᑎᖃᓚᐅᕐᒥᔪᑦ ᓄᓇᒥᐅᑕᕐᓂᒃ ᓴᐳᔾᔨᓯᒪᒋᐊᖅᑏᑦ ᑲᑎᒪᔨᖏᓐᓂᒃ, ᒥᐊᓕᒐᒃᑯᓃᓐᖔᖅᑐᑦ ᒐᕙᒪᓅᖓᓐᖏᑦᑐᑦ ᑎᒥᐅᔪᑦ ᐊᑭᕋᖅᑐᖃᑦᑕᖅᑐᑦ ᓇᓐᓄᖃᑦᑕᖅᑐᓂᒃ. ᐃᑦᑐᓗᒃ ᐅᖃᐅᓯᖃᕈᓐᓇᓚᐅᖅᑐᖅ ᐃᓱᒫᓘᑕᐅᔪᓂᒃ ᐃᓄᖕᓂᒃ ᑭᒡᒐᖅᑐᐃᓂᒃᑯᑦ, ᓇᓗᓇᐃᖅᓯᒋᐊᖃᓯᐅᑎᒍᓐᓇᓚᐅᕆᓪᓗᓂ ᓈᖕᒪᖏᓐᓂᖓᓂᒃ ᐊᒃᑐᐃᓂᖃᖅᓯᒪᓂᖓ ᓴᖅᑭᐅᒪᑎᑦᓯᓂᖏᓐᓄᑦ ᐆᒪᔾᔪᑎᒃᓴᕆᔭᐅᔪᓂᒃ ᓇᓐᓄᑦᑕᐅᖃᑦᑕᖅᑐᓂᒃ ᐃᓄᖕᓄᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: