ᑐᓴᕋᑦᓴᓕᕆᔩᑦ

ᐃᓄᐃᑦ ᓯᕗᓕᕐᑏᑦ ᐊᒃᓱᕈᖅᑐᑎ ᑎᓕᐅᕆᒻᒪᑕ ᐊᑐᓕᖅᑕᐅᓕᒃᑲᓐᓂᖁᓪᓗᒍ, ᐳᐃᒍᖅᑕᐅᖁᓇᒍ ᐊᒻᒪᓗ ᓴᐳᑎᔭᐅᓯᒪᖁᓪᓗᒍ ᐃᓄᒃᑐᑦ ᐃᓚᒋᔭᐅᓂᐊᕐᓗᓂ ᓄᓇᕐᔪᐊᓕᒫᕐᒥ ᐊᕐᕌᒍᖓᓂ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐱᒋᐊᖅᑎᑕᐅᑎᓪᓗᒋᑦ ᓄᓇᕐᔪᐊᕐᒥ ᓄᓇᓖᑦ ᑲᑐᔾᔨᖃᑎᒌᖏᑦ ᑲᑎᒪᑎᓪᓗᒋᑦ

ᕕᕗᐊᕆ 1, 2019, ᐊᑑᕚ ᐊᒻᒪ ᓄᐃᐅ ᔪᐊᒃ, ᐃᓄᐃᑦ ᓯᕗᓕᖅᑏᑦ ᓯᑕᒪᐃᓂᑦ ᐃᓄᐃᑦ ᓄᓈᓐᓂᑦ ᑲᓇᑕᒥᑦ: ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓ, ᐊᓗᑭ ᑰᑦᑎᖅ ᓄᓇᕗᖕᒥ, ᒪᑭᕕᒃᑯᑦ ᐊᖓᔪᖅᑳᖓᑦ ᓵᓕ ᒍᐊᑦ ᓄᓇᕕᖕᒥᑦ, ᓄᓇᑦᓯᐊᕙᕗᑦ ᒐᕙᒪᒃᑯᖏᑕ ᐊᖓᔪᖅᑳᖓ ᔫᕼᐊᓇᔅ ᓛᑉᐱ ᓄᓇᑦᓯᐊᕙᕗᖕᒥᑦ, ᐊᒻᒪᓗ ᐃᓄᕕᐊᓗᐃᑦ ᑲᑎᒪᔨᖏᓐᓂᑦ ᐃᒃᓯᕙᐅᑕᖓᑦ ᐊᒻᒪ ᐊᐅᓚᑦᓯᔨᒻᒪᕆᖓᑦ, ᑐᐊᐃᓐ ᓯᒥᑦ ᐃᓄᕕᐊᓗᐃᑦ ᓄᓇᑖᕐᕕᒋᓯᒪᔭᖓᓐᓂᒃ, ᐱᖃᑎᖃᖅᑐᑎᒃ ᐃᓄᐃᑦ ᑕᐱᕇᑦ ᑲᓇᑕᒥ ᐊᖓᔪᖅᑳᖓᓐᓂᒃ ᓇᐃᑕᓐ ᐅᐱᐊᑦ ᐊᒻᒪᓗ ᐃᓄᐃᑦ ᓄᓈᓐᓂᑦ ᑲᑎᒪᔩᖏᑕ ᐊᖓᔪᖅᑳᖓᑦ ᒫᓂᑲ ᐃᐊᓪ−ᑲᓇᔪᖅ, ᐅᓪᓗᒥ ᐃᒫᖅ ᐅᖃᖅᑲᐅᔪᑦ ᐅᐱᒋᔭᖃᖅᑐᑎᒃ ᓴᖅᑭᑕᐅᓂᖓᓂᒃ ᓄᓇᕐᔪᐊᕐᒥ ᐊᕐᕌᒍᖃᖅᑎᑕᐅᓂᖓᓄᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᑕᕝᕙᓂ ᓄᓇᕐᔪᐊᓕᒫᕐᒥ ᓄᓇᓖᑦ ᑲᑎᒪᓂᖓᓐᓂ:

“ᒐᕙᒃᑯᖏᑦ ᑲᓇᑕᐅᖏᑉ ᒫᓐᓇᕋᑖᖑᔪᔪᖅ ᖃᐅᔨᒪᓕᕐᓂᕋᔪᒻᒪᑕ ᐊᑲᐅᙱᑦᑐᒥᒃ ᐊᑦᑐᐃᓯᒪᓂᕆᓯᒪᔭᖏᓐᓂᒃ ᒐᕙᒪᒋᔭᐅᖃᑦᑕᕐᓯᒪᔪᑦ ᓯᕗᓂᑦᑎᓐᓂ ᐊᑐᐊᒐᖏᑦ ᐊᒻᒪᓗ ᑲᓇᑕᐅᑉ ᐃᓐᓄᐃᓯᒪᓂᖓᓄᑦ ᐃᒪᓐᓇᐃᒍᑕᐅᓕᕐᓯᒪᓂᖓᓄᑦ ᐅᓪᓗᒥᐅᔪᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ, ᐱᖃᑕᐅᓪᓗᓂ ᐃᓄᒃᑐᑦ. ᑖᓐᓇ ᑐᙵᓱᒃᑎᓇᒻᒪᕆᒃᑐᖅ ᖃᐅᔨᒪᓕᕐᓂᕋᖅᓯᒪᓂᖏᑦ ᐊᒻᒪᓗ ᐱᒻᒪᕆᐅᖕᒪ ᐊᓯᔾᔨᐸᓪᓕᐊᓂᐅᒍᑕᐅᓂᐊᕐᑐᓄᑦ ᐊᐅᓚᑦᑎᔾᔪᓯᓄᑦ ᑲᓇᑕᒥ ᐊᑐᓕᕐᑎᑕᐅᒃᑲᓂᕐᓗᑎᒃ, ᐳᐃᒍᖅᑕᐅᖁᓇᒋᑦ ᐊᒻᒪᓗ ᓴᖅᑭᔮᕐᑎᖃᓐᓂᕐᓗᒋᑦ ᐅᖃᐅᓯᓕᕆᔾᔪᑏᑦ.

“ᓄᓇᕐᔪᐊᕐᒥ ᐊᕐᕌᒍᖃᖅᑎᑕᐅᓂᖓᓄᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᓈᖕᒪᓈᖅᐳᑦ ᒐᕙᒪᒃᑯᖏᑦ ᑲᓇᑕᐅᑉ ᐱᓂᐊᕐᓂᕋᕈᑎᖃᖅᓯᒪᓕᕐᒪᑕ ᓴᖅᑮᖃᑎᖃᕈᒪᓪᓗᑎᒃ ᓄᓇᖃᖅᑳᖅᓯᒪᔪᓂᒃ ᐊᓪᓚᓂᒃ, ᐃᓄᖕᓂᒃ, ᐊᒻᒪᓗ ᖃᓪᓗᓈᖓᔪᑦ ᐅᖃᐅᓯᖏᓐᓄᑦ ᒪᓕᒐᕐᒥᒃ. ᐃᓄᐃᑦ ᐱᖃᑕᐅᑎᓪᓗᒋᑦ ᐊᒻᒪᓗ ᐃᑲᔪᖅᑐᐃᒻᒪᑕ ᑖᑦᓱᒥᖓ ᒪᓕᒐᓕᐊᕆᔭᐅᒋᐊᙵᖅᑐᒥᒃ ᐊᑲᐅᓈᕈᑕᐅᒻᒪᑦ ᓂᕆᐅᒋᔭᐅᖃᑦᑕᕐᓯᒪᔪᒧᑦ ᐱᖁᔭᒃᓴᖅ ᑐᙵᕕᖃᕋᔭᕐᓂᖓᓂ ᐊᔾᔨᐅᖏᓐᓂᖓᓄᑦ ᐊᒻᒪᓗ ᐱᒻᒪᕆᐅᖕᒪᑦ ᐃᓄᒃᑐᑦ ᐱᖁᔭᒃᓴᓃᖃᑕᐅᒃᐸᑦ ᐱᕙᓪᓕᐊᓂᖃᕈᑕᐅᖁᓪᓗᒍ ᐱᑕᖃᕇᖅᑐᓄᑦ ᐃᓄᐃᑦ ᐱᔪᓐᓇᐅᑎᖏᓐᓄᑦ. ᒐᕙᒪᒃᑯᖏᑦ ᑲᓇᑕᐅᑉ ᐱᓕᕆᖃᑎᒌᓐᓇᕐᐸᕗᑦ ᐱᖁᔭᒃᓴᖅ ᐱᖃᓯᐅᔾᔨᓯᒪᖁᓪᓗᒍ ᓂᕆᐅᒋᔭᑦᑎᓐᓂᒃ.

“ᐃᓄᐃᑦ ᓄᓇᓕᖕᓃᒃᑐᑦ ᑲᓇᑕᓕᒫᕐᒥ ᐱᓕᕆᖃᑎᒌᒻᒪᑕ, ᐃᑲᔪᕐᑕᐅᓪᓗᑎᒃ ᐃᓄᐃᑦ ᑎᒥᖁᑎᖏᓐᓂᒃ, ᐅᖃᐅᓯᖅᐳᑦ ᐳᐃᒍᖅᑕᐅᖁᓇᒍ ᐊᒻᒪᓗ ᐊᑑᑎᖃᖅᑎᑕᒻᒪᕆᐅᖁᓪᓗᒍ. ᐱᐅᔪᒥᒃ ᐱᓕᕆᓪᓗᐊᕐᓯᒪᒻᒪᑕ, ᑭᓯᐊᓂ ᐃᓅᑑᑎᔪᓐᓇᖏᓐᓇᑦᑎᖓ ᐊᒻᒪ ᒐᕙᒪᒋᔭᕗᑦ, ᑭᓇᒃᑯᑐᐃᓐᓇᕐᓄᑦ ᐱᔨᑦᑎᕈᑏᑦ, ᐊᒃᓱᒻᒪᕆᐊᓗᒃ ᐃᑲᔪᕐᑐᐃᖁᒐᓗᐊᕐᐸᕗᑦ ᓄᓇᖃᖅᑳᖅᓯᒪᔪᑦ ᐅᖃᐅᓕᕆᔾᔪᑎᖏᓐᓂᒃ, ᓇᓗᓇᒃᑯᑕᑐᐃᓐᓇᐅᖏᓪᓗᓂ.

“ᑕᐃᒪᓐᓇ ᐃᓄᒃᑎᒍᑦ ᓯᕗᓕᕐᑎᐅᓪᓗᑕ, ᐃᓱᒪᖃᑎᒌᒃᐳᒍᑦ ᓄᓇᖃᖅᑳᖅᓯᒪᔪᓄᑦ ᐊᓪᓚᓄᑦ, ᐃᓄᖕᓄᑦ, ᐊᒻᒪᓗ ᖃᓪᓗᓈᖓᔪᓄᑦ ᐅᖃᐅᓯᖏᓐᓄᑦ ᒪᓕᒐᖅ ᐱᖃᓯᐅᔾᔨᓯᒪᔭᕆᐊᖃᖅᐳᖅ ᒪᓕᒐᓐᓂ ᑎᑎᕋᕐᓯᒪᓗᒋᑦ ᓈᖕᒪᒃᑐᒥᒃ ᐃᑲᔪᕐᓯᓂᖃᓪᓗᑎᒃ ᐊᑐᓕᕐᑎᑕᐅᑲᓂᕐᓂᖏᓐᓄᑦ, ᐳᐃᒍᖅᑕᐅᖁᓇᒋᑦ, ᐊᒻᒪᓗ ᓴᖅᑭᔮᕐᑎᑕᐅᓗᑎᒃ ᐃᓄᒃᑐᑦ.

“ᐃᓄᐃᑦ ᓄᓇᖕᓂ ᑲᑎᒪᔨᖏᑦ ᑲᑎᒪᑎᓪᓗᒋᑦ ᑲᑎᒪᕙᒻᒪ ᐅᑭᐅᑦ ᓯᑕᒪᑦ ᓈᔭᕋᐃᒻᒪᑕ; 20`18−ᒥ ᑲᑎᒪᓂᕆᓚᐅᕐᑕᖓᓐᓂ ᐃᓱᒪᑖᓚᐅᕐᒪᑕ ᐅᑦᕿᐊᕕᒃ ᐃᓕᓴᕆᔭᐅᔾᔪᑎᖓᒍᑦ ᐱᖃᓯᐅᔾᔨᓪᓗᑎᒃ ᐃᓕᓐᓂᐊᕐᓂᓕᕆᓂᕐᒥᒃ ᐊᒻᒪᓗ ᐅᖃᐅᓯᓕᕆᓂᕐᒥᒃ. ᑖᓐᓇ ᐃᒪᓐᓇ ᐅᖃᖅᓯᒪᔪᖅ:

“ᐅᖃᐅᓯᖅᐳᑦ ᑐᙵᕕᐅᒻᒪᑦ ᐃᓕᖅᑯᓯᑦᑎᓐᓄᑦ ᐊᒻᒪᓗ ᑭᓇᐅᓂᑦᑎᓐᓄᑦ. ᒪᓕᒐᖅᑎᒍᑦ ᓴᐳᑎᔭᐅᓯᒪᓂᖅ ᐊᒻᒪᓗ ᐊᑐᓕᖅᑎᑕᐅᒃᑲᓂᕐᓂᖅ ᐅᖃᐅᓯᕐᐳᑦ ᑐᐊᕕᕐᓇᕐᒪᑦ ᐊᒻᒪᓗ ᓱᓇᓕᒫᓂᒃ ᐱᒻᒪᕆᐅᓂᕐᐹᖑᓪᓗᓂ. ᐅᖃᐅᓯᖅᐳᑦ ᐳᐃᒍᖅᑕᐅᓂᐊᖏᒃᑯᓂ, ᐃᓄᐃᑦ ᐅᖃᐅᓯᖓᑦᑎᒍᑦ ᐃᓕᓐᓂᐊᕐᕕᓂᒃ ᓴᖅᑭᑕᐅᔪᖃᕆᐊᓕᒃ. ᐃᓕᓴᐃᓂᖃᕈᑕᐅᑦᑎᐊᕈᓐᓇᕐᑐᓂᒃ ᐃᓕᓐᓂᐊᕐᑐᓕᕆᔾᔪᑎᖃᕈᑦᑕ ᓄᑖᓂᒃ ᐃᓕᓴᐃᒍᑎᒃᓴᓂᒃ ᓴᖅᑭᒃᑐᖃᕆᐊᓕᒃ ᐱᓐᓇᕆᔭᑦᑎᓐᓂᒃ, ᐃᓕᖅᑯᓯᑦᑎᓐᓂᒃ ᐊᒻᒪᓗ ᐅᖃᐅᓯᑦᑎᓐᓂᒃ. ᐅᖃᐅᓯᖅᐳᓪᓕ ᐳᐃᒍᖅᑕᐅᓂᐊᙱᒃᑯᓂ ᐊᑑᑎᖃᖅᑎᑕᐅᑦᑎᐊᖏᓐᓇᕈᓂ ᐃᓄᐃᑦ ᐅᖃᐅᓯᖏᑦ ᓯᕗᓪᓕᐅᔭᕆᐊᖅᑲᖅᐳᖅ ᐅᖃᐅᓯᖅᐳᑦ ᐃᓕᓴᐃᒍᑕᐅᓗᓂ ᐃᓕᓐᓂᐊᕐᕕᓂ. ᐅᖃᐅᓯᓕᕆᓂᖅ ᐊᒻᒪ ᐃᓕᓐᓂᐊᕐᓂᓕᕆᓂᖅ ᐃᑲᔪᕐᐳᖅ ᐃᓕᖅᑯᓯᑦᑎᓐᓂᒃ ᐊᒻᒪᓗ ᐃᓄᐃᑦ ᐊᖑᓇᓱᑎᐅᓂᖏᓐᓂᒃ, ᓂᕿᒃᓴᕆᓂᐊᕐᑕᒥᓂᒃ ᐱᐅᓯᕆᒐᑦᑎᒍ ᐃᓕᖅᑯᓯᑦᑎᓐᓂᒃ ᐃᓕᓴᐃᒍᑎᐅᖕᒪᑦ. ᐃᓄᐃᑦ ᓄᓈᓐᓂ ᑲᑎᒪᔩᑦ ᐃᑲᔪᖅᐳᑦ ᓄᓇᖃᖅᑳᖅᓯᒪᔪᑦ ᐊᖑᓇᓱᒍᓯᖏᓐᓂᒃ ᓂᕿᒃᓴᒥᓂᒃ ᐊᒻᒪᓗ ᐱᕚᓪᓕᖁᓪᓗᒍ ᐃᓄᐃᑦ ᐃᓕᖅᑯᓯᕐᒥᒍᑦ ᑲᒪᔾᔪᓯᖏᓐᓂᒃ.”

ᓄᓇᕐᔪᐊᕐᒥ ᐊᕐᕌᒍᖃᖅᑎᑕᐅᓂᖓᓄᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ ᐱᓪᓗᒋᑦ ᐱᕕᖃᕐᕕᐅᕗᖅ ᓯᕗᒧᒋᐊᖅᑎᑕᐅᓗᑎᒃ ᑖᒃᑯᐊ ᐊᒻᒪᓗ ᐊᓯᖏᑦ ᓯᕗᓪᓕᖅᐹᖑᑎᑕ ᑲᓇᑕᓕᒫᕐᒥ ᐊᒻᒪᓗ ᓄᓇᔪᐊᓕᒫᕐᒥ.

ᑐᑭᓯᒋᐊᒃᑲᓐᓂᕈᓐᓇᕐᐳᑎᑦ:

ᐃᓄᐃᑦ ᑕᐱᕇᑦ ᑲᓇᑕᒥ

613-238-8181

ᐃᓄᐃᑦ ᓄᓈᓐᓂ ᑲᑎᒪᔩᑦ ᑲᓇᑕ
(613) 563-2642

ᐃᓄᕕᐊᓗᐃᑦ ᑲᑎᒪᔨᖏᑦ

867.777.7000

ᓄᓇᕗᑦ ᑐᙵᕕᒃ ᑎᒥᖓ

867.975.4955

ᒪᑭᕕᒃᑯ
819-964-2925

ᓄᓇᑦᓯᐊᕙᕗᑦ ᒐᕙᒪᒃᑯᖏᑦ

(709) 896-8582