ᑐᓴᕋᑦᓴᓕᕆᔩᑦ

ᐊᑐᖅᑕᐅᑲᐃᓐᓇᕐᓂᐊᖅᑐᑦ ᕿᓚᓗᒐᕐᓄᑦ ᓂᕕᑲᑖᑦ ᐊᑐᐊᒐᑦ ᐊᖏᖅᑕᐅᔪᑦ

ᓄᓇᕗᑦ ᑐᓐᖓᕕᒃ ᑎᒥᖓᑦ (ᑐᓐᖓᕕᒃᑯᑦ) ᑐᒡᓕᐊ ᐊᖓᔪᖅᑳᑉ ᔭᐃᒻᔅ ᐃᑦᑐᓗᒃ ᐅᓪᓗᒥ ᑐᓴᖅᑎᑦᑎᔪᖅ ᑖᒃᑯᐊ ᓄᒃᑎᕆᔪᓐᓇᕐᓂᕐᒧᑦ ᐊᑐᐊᒐᑦ ᐊᑐᓕᖅᑎᑕᐅᔪᑦ ᐃᓚᒋᓪᓗᓂᒋᑦ ᑲᑎᑕᐅᓯᒪᔪᑦ ᐃᖃᓗᓕᕆᓂᕐᒧᑦ ᐊᐅᓚᑦᓯᔾᔪᑕᐅᓂᐊᖅᑐᑦ ᐸᕐᓇᐅᑏᑦ ᕿᓚᓗᒐᕐᓄᑦ ᐅᖓᕝᕙᕆᐊᖅᑕᐅᔪᑦ ᑕᐃᑯᖓ ᓄᒃᑎᖅᑕᐅᓪᓗᑎᒃ 2015 ᐊᐅᔭᖓᓂ ᕿᓚᓗᒐᕐᓇᖓᓄᑦ ᑕᐃᑲᓐᖓᑦ ᑕᓯᐅᔭᕐᔪᐊᑉ ᕿᓚᓗᒐᖏᓐᓂᒃ.

ᓄᓇᕗᑦ ᑐᓐᖓᕕᒃᑯᑦ, ᓄᓇᓖᑦ ᐊᖑᓇᓱᐊᕐᓂᕐᒧᑦ ᑲᑐᔾᔨᖃᑎᒌᖏᑦ ᐊᒻᒪ ᐊᕕᒃᑐᖅᓯᒪᔪᓂ ᐆᒪᔪᓕᕆᔩᑦ ᑲᑐᔾᔨᖃᑎᒌᖏᑦ ᐱᓕᕆᖃᑎᖃᖅᑐᑦ ᓄᓇᕗᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ ᐊᒻᒪ ᐃᖃᓗᓕᕆᔨᓂᒃ, ᐃᒪᕐᒥᐅᑕᐅᑕᓕᕆᔨᒃᑯᓐᓂᓪᓗ ᑕᓪᓕᒪᓄᑦ ᐊᕐᕌᒎᓂᐊᖅᑐᓄᑦ ᐋᖅᑭᒃᓱᐃᓗᑎᒃ ᑲᑎᑎᖅᓯᒪᔪᓂᒃ ᐃᖃᓗᓕᕆᓂᕐᒧᑦ ᐊᐅᓚᓯᔾᔪᑎᒃᓴᓂᒃ ᐸᕐᓇᐅᑎᓂᒃ.

“ᓴᖅᑭᑎᑦᓯᒍᒪᔪᑦ ᑖᒃᑯᐊ ᐸᕐᓇᐅᑏᑦ ᐃᒃᐱᒍᓱᑦᓯᐊᕐᓗᑎᒃ ᐱᔪᓐᓇᐅᑎᓂᒃ ᐊᒻᒪ ᐊᔪᓐᖏᔾᔪᑕᐅᔪᓂᒃ ᐃᓄᖕᓄᑦ ᐊᑖᒍᑦ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂ ᐊᒻᒪ ᐃᓚᓕᐅᔾᔨᓪᓗᑎᒃ ᑐᓐᖓᕕᒋᓪᓗᒋᑦ ᐃᓄᐃᑦ ᖃᐅᔨᒪᔭᑐᖃᖏᑦ ᐊᒻᒪ ᖃᓪᓗᓈᑦ ᖃᐅᔨᓴᕈᓯᖏᑦ,” ᐅᖃᖅᑐᖅ ᐃᑦᑐᓗᒃ. “ᑕᒪᓐᓇ ᑐᓴᕈᒥᓇᖅᑐᖅ ᐃᓄᖕᓄᑦ ᐊᖑᓇᓱᒃᑎᓄᑦ. ᐱᔪᓐᓇᖅᑎᑦᓯᔪᖅ ᐃᓄᖕᓂᑦ ᐃᓚᒋᔭᐅᓕᕐᓗᑎᒃ ᐊᐅᓚᑕᐅᓂᖏᓐᓄᑦ ᕿᓚᓗᒐᕐᓇᐅᔪᑦ, ᑕᒪᒃᑯᐊ ᐊᑐᖅᑕᐅᖏᓐᓂᑯᑦ ᓂᕕᑲᑖᑦ ᓄᒃᑎᖅᑕᐅᔪᓐᓇᕐᓗᑎᒃ ᐊᕐᕌᒍᒧᑦ ᐊᑕᐅᓯᕐᒧᑦ ᐊᒻᒪ ᐅᓄᖅᓯᕚᓪᓕᕈᑕᐅᓗᑎᒃ ᕿᓚᓗᒐᖅᑕᐅᔪᓐᓇᖅᑐᓂᒃ ᑕᓯᐅᔭᕐᔪᐊᑉ ᕿᓚᓗᒐᖏᓐᓂᒃ. ᑕᐃᒪᓐᓇ ᑕᐅᑐᓐᖑᐊᓚᐅᕋᑦᑕ ᐆᒪᔪᕐᓂᒃ ᐊᐅᓚᑦᓯᔾᔪᑎᖃᕐᓂᕐᒧᑦ ᐊᖏᖃᑎᒌᒐᓱᐊᕈᑎᖃᖅᑎᓪᓗᑕ ᓄᓇᑖᕈᑎᓂᒃ ᑭᒡᒐᖅᑐᖅᑐᒋᑦ ᐃᓄᐃᑦ,” ᐅᖃᖅᑐᖅ ᐃᑦᑐᓗᒃ.

ᑲᑎᓪᓗᒋᑦ 82 ᐊᑐᑕᐅᖏᓐᓂᑯᑦ ᓂᕕᑲᑖᑦ ᓄᒃᑎᖅᑕᐅᓂᐊᖅᑐᑦ ᐊᕐᕌᒍᐊᓄᑦ 2015 ᐃᓚᓕᐅᔾᔭᐅᓗᑎᒃ ᑕᒡᕗᖓ ᐊᕐᕌᒍᒧᑦ ᑲᑎᓪᓗᒋᑦ ᐊᓐᖑᑕᐅᔪᓐᓇᖅᑐᑦ ᐅᓄᕐᓂᖏᑦ 147 ᑲᑎᓪᓗᒋᑦ 239 ᕿᓚᓗᒐᐃᑦ ᑕᓯᐅᔭᕐᔪᐊᑉ ᕿᓚᓗᒐᖏᓐᓂᒃ. ᑕᒪᒃᑯᐊ ᐊᒥᖅᑳᕈᑕᐅᓂᐊᖅᑐᑦ ᓄᓇᓕᓕᒫᓄᑦ ᐊᖑᓇᓱᒍᓐᓇᖅᑎᑕᐅᓗᑎᒃ ᑕᒡᕙᓐᖓᑦ ᕿᓚᓗᒐᕐᓂᒃ. ᑐᖔᒍᑦ ᐊᑐᓕᖅᑕᐅᓚᐅᖅᑎᓐᓇᒋᑦ ᓄᒃᑎᕆᔪᓐᓇᕐᓂᕐᒧᑦ ᐊᑐᐊᒐᑦ, ᐊᑐᖅᑕᐅᖏᓐᓂᑯᑦ ᓂᕕᑲᑖᑦ ᐅᑎᖅᑎᑕᐅᖃᑦᑕᓚᐅᖅᑐᑦ ᐃᒪᕐᒥᐅᑕᓕᕆᔨᒃᑯᓐᓄᑦ ᐊᒻᒪ ᐃᓄᐃᑦ ᔭᒐᐃᓪᓗᑎᒃ ᐊᑐᑕᐅᖏᓐᓂᑯᓂᒃ ᓂᕕᑲᑖᓂᒃ. ᐊᑖᒍᑦ ᓄᑖᑉ ᐊᐅᓚᑦᓯᔾᔪᑕᐅᓂᐊᖅᑑᑉ, ᐊᕕᒃᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ ᐱᓯᒪᐃᓐᓇᕈᓐᓇᕐᓂᐊᖅᑐᑦ ᐊᑐᖅᑕᐅᖏᓐᓂᑯᓂᒃ ᓂᕕᑲᑖᓂᒃ ᐊᕐᕌᒍᒃᑲᓐᓂᕐᒧᑦ ᑐᓂᔭᐅᒃᑲᓐᓂᕐᓗᑎᒃ ᐊᖑᓇᓱᒃᑏᑦ ᑲᑐᔾᔨᖃᑎᒌᖏᓐᓄᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: