(ᔫᓂ 18, 2020 – ᐃᖃᓗᐃᑦ, ᓄᓇᕗᑦ) ᒪᐃ 28, 2020 ᓄᓇᕗᑦ ᑐᙵᕕᒃᑯᑦ ᑎᒥᖓᑦ (ᑐᙵᕕᒃᑯᑦ) ᓈᖕᒪᓴᙱᓐᓂᕋᖅᑐᓂᒃ ᑎᑎᕋᔪᒻᒪᑕ ᒥᔅᑕ. ᐴᓈᓐ ᑎ ᕙᕆᐊᓈᔅᒧᑦ (Mr. Fernand de Barennes), ᑎᒃᑯᐊᖅᑕᐅᓯᒪᔪᖅ ᓄᓇᕐᔪᐊᕐᒥ ᓄᓇᓖᑦ ᑲᑐᔾᔨᖃᑎᒌᖏᓐᓄᑦ ᐅᕕᓂᖃᑎᒌᙱᑦᑐᑦ ᐃᓄᐃᓴᓛᖑᔪᑦ ᐃᓱᒫᓗᒋᔭᐅᓂᖏᓐᓄᑦ ᐱᓕᕆᔪᖅ ᑎᑎᕋᕐᕕᖓᓂ ᑲᒥᓴᓇᐅᑉ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓂᒃ ᐱᓕᕆᔪᓄᑦ ᔩᓃᕙᒥ, ᓱᕕᑦᓱᓚᓐᒥ.
ᑐᙵᕕᒃᑯᑦ ᓈᖕᒪᓴᙱᔾᔪᑎᒥᓂᒃ ᑎᑎᖅᑲᖓ ᓇᓗᓇᐃᕆᔪᒻᒪ ᑖᒃᑯᐊ ᑲᓇᑕ ᑲᒪᒋᔭᕆᐊᓕᖕᒥᓂᒃ ᑲᒪᓯᒪᙱᓐᓂᖏᓐᓄ ᐊᒻᒪ ᑲᒪᒋᐊᓚᐅᕐᓯᒪᙱᓐᓂᖏᓐᓄᑦ ᑲᒪᒋᔭᐅᖁᓯᒪᔭᓂᒃ ᓄᓇᕐᔪᐊᕐᓕᒫᕐᒥ ᑲᒪᒋᔭᐅᖁᔭᐅᓯᒪᔪᓂᒃ ᐱᓪᓗᒋᑦ ᐃᓄᐃᑦ ᐃᒻᒥᒍᑦ ᐃᓕᖅᑯᓯᖃᕐᒪᑕ ᐊᒻᒪ ᐅᖃᓪᓚᐅᓯᖃᖅᑐᑎᒃ ᐃᓄᒋᐊᙱᓂᕐᐹᖑᓪᓗᑎᓪᓗ ᐊᑐᕐᓗᒍ ᓄᓇᕐᔪᐊᓕᒫᕐᒥ ᑎᓕᓯᒍᑕᐅᕙᒃᑐᓄᑦ ᑲᓇᑕᐅᓪᓗ ᐊᑎᓕᐅᖅᑎᐅᖃᑎᐅᓯᒪᓪᓗᓂ ᑎᓕᔾᔪᑎᓂᒃ.
ᐱᓗᐊᖅᑐᒥᒃ, ᑲᓇᑕ ᑲᒪᔪᓐᓇᖏᒻᒪᑕ, ᐊᒻᒪ ᑲᒪᓇᓱᐊᓚᐅᕐᓯᒪᓇᑎᒃ, ᐊᑑᑎᖃᓪᓚᕆᒃᑐᓂᒃ ᐱᔨᑦᑎᕈᑎᓂᒃ ᐃᓄᖕᓄᑦ ᐅᖃᓪᓚᐅᓯᑦᑎᒍᑦ, ᐃᓄᒃᑐᑦ, ᐱᖃᓯᐅᑎᓪᓗᒍ ᐃᓄᒃᑐᑦ ᐅᖃᐅᓯᖅ ᐃᓕᓴᐃᒍᑕᐅᓂᖓ, ᐋᓐᓂᐊᖃᓐᓇᖏᑦᑐᓕᕆᓂᒃᑯᑦ ᐱᔨᑦᑎᕈᑏᑦ, ᐊᐅᓚᑦᓯᔾᔪᑕᐅᔪᑦ ᐃᖅᑲᖅᑐᐃᕕᓕᕆᔨᒃᑯᑦ, ᐊᒻᒪᓗ ᐊᓯᖏᓐᓂᒃ ᑭᓇᒃᑯᑐᐃᓐᓇᕐᓄᑦ ᐊᑐᐃᓐᓇᐅᔪᓂᒃ ᒐᕙᒪᒃᑯᑦ ᐱᓕᕆᔾᔪᑎᖏᓐᓂᒃ ᐊᒻᒪ ᐱᔨᑦᑎᕈᑎᖏᓐᓂᒃ. ᑕᒪᓐᓇ ᐅᕕᓂᖃᑎᒋᔭᐅᙱᓂᑦᑎᓐᓄᑦ ᐱᑦᑎᐊᕐᑕᐅᕙᙱᓐᓂᕗᑦ ᐊᑑᑎᖃᓪᓚᕆᒃᑐᓂᒃ ᐱᔨᑦᑎᕈᑎᑎᒍ ᐃᓅᔪᓐᓃᓚᕿᔾᔪᑕᐅᔪᓐᓇᕐᒪ ᐊᒻᒪ ᐃᓄᖕᓄᑦ ᐃᓅᔪᓐᓂᓚᕿᔾᔪᑎᐅᓯᒪᓪᓗᓂ.
ᐊᑑᑎᖃᓗᐊᕐᑐᑦ ᐱᔨᑦᑎᕈᑏᑦ ᐊᑐᐃᓐᓇᐅᑎᑕᐅᔭᕆᐊᖃᓪᓚᕆᒃᑐᑦ ᑕᐃᒪᓐᓇᓪᓗᐊᖅ ᐱᔭᐅᓗᑎᒃ ᑲᒪᔾᔪᑎᐅᕙᒃᑐᑦ ᐃᓄᒋᐊᓐᓂᕐᓴᓄᑦ ᑲᓇᑕᒥᐅᑕᓄᑦ ᐅᖃᓪᓚᒍᓯᓕᓐᓄᑦ ᑲᓇᑕᒥ ᐃᓕᑕᕆᔭᐅᓯᒪᔫᓐᓂᒃ ᒪᕐᕈᐃᖑᒻᒪᑎᒃ ᐃᓕᑕᕆᔭᐅᓯᒪᔪᑦ ᐅᖃᐅᓰᒃ.
“ᓄᓇᕐᔪᐊᕐᒥ ᓇᓗᓇᐃᔭᕈᑕᐅᓯᒪᑦᑎᐊᕐᑐᑦ ᑭᓇᒃᑯᑐᐃᓐᓇᕐᓄᑦ ᐱᔪᓐᓇᐅᑏᑦ ᐅᖃᖅᓯᒪᒻᒪᑕ ᑭᓇᑐᐃᓐᓇᖅ ᓱᓇᐅᑎᑕᐅᔭᕆᐊᖃᓐᓂᖓ ᑐᙵᕕᐅᖕᒪᑦ ᑭᓇᒃᑯᑐᐃᓐᓇᕐᓄᑦ ᐱᔪᓐᓇᐅᑎᖏᓐᓄᑦ. ᐃᓕᑕᕐᓯᒋᐊᖃᓕᖅᑐᖅ ᑲᓇᑕ ᑲᒪᒋᔭᖃᓐᓂᕐᒥᓂᒃ ᓴᐳᑎᓯᒪᔭᕆᐊᖃᓐᓂᕐᒥᓂᒃ ᐃᓄᐃᑦ ᐃᓅᓯᖏᓐᓂᒃ ᐊᒻᒪ ᐃᒻᒥᑯᑦ ᐅᖃᓪᓚᒍᓯᖃᓐᓂᖏᓐᓂᒃ. ᐃᓄᐃᑦ ᐃᓅᔭᕆᐊᖃᖅᑐᑦ ᓱᓇᖁᑎᖃᕐᔫᒥᓗᑎᒃ,” ᐅᖃᖅᑐᖅ ᐊᓗᑭ ᑰᑦᑎᖅ, ᐊᖓᔪᖅᑳᖓᑦ ᑐᙵᕕᒃᑯᑦ.
ᓄᓇᕗᖕᒥ ᐃᓄᖏᑦ ᐊᒃᓱᕈᖃᑦᑕᕐᓯᒪᒻᒪᑕ ᐊᓐᓂᕐᑕᐅᖃᑦᑕᕐᓯᒪᓪᓗᑎᒃ ᐃᓅᓯᕐᒥᓂ, ᐊᒻᒪᓗ ᐃᓄᐃᑦ ᐅᖃᐅᓯᖏᑦ ᐃᓕᖅᑯᓯᖏᓪᓗ, ᐱᑦᑎᐊᖅᑕᐅᕙᒐᑎᒃ ᐃᓄᐃᑦ ᐊᔾᔨᒌᙱᑐᒃᑯᑦ ᖃᓪᓗᓈᙳᖅᑎᑕᐅᓇᓱᐊᕐᓂᒃᑯᑦ ᐊᑐᐊᒐᓕᐊᑎᒍᑦ, ᒪᓕᒐᓕᐊᑎᖑᑦ ᐊᒻᒪ ᑲᒪᔾᔪᓯᐅᕙᒃᑐᑎᒍᑦ, ᐅᓪᓗᒥᒧᑦ ᑕᒪᓐᓇ ᐱᑕᖃᐃᓐᓇᕐᒪᑦ, ᐊᒻᒪ ᑲᓇᑕ ᐋᖅᑭᒍᑕᐅᔪᓐᓇᕐᑐᓂᒃ ᑲᒪᒋᐊᕈᑎᖃᖅᓯᒪᙱᓐᓂᖏᓐᓄᒃ ᓱᕋᒃᑎᕆᔾᔪᑕᐅᓯᒪᔪᓂᒃ.
ᑐᙵᕕᒃᑯᑦ ᐃᒪᓐᓇᐃᖁᔨᕗᑦ ᑲᓇᑕ ᐊᑐᓕᕐᑎᑦᑎᖁᓪᓗᒋᑦ ᐊᑑᑎᖃᑦᑎᐊᕈᓐᓇᕐᑐᓂᒃ ᒪᓕᒐᓐᓂ ᐊᒻᒪ ᐊᓯᖏᓐᓂᒃ ᑲᒪᒋᐊᕈᑕᐅᔪᓐᓇᕐᑐᓂᒃ ᐊᑑᑎᖃᖅᑐᓄᑦ ᐱᔨᑦᑎᕈᑎᐅᕙᒃᑐᓄᑦ ᐃᓄᖕᓄᑦ ᐅᖃᐅᓯᖏᑦ ᐊᑑᑎᖃᖅᑎᑕᐅᓗᑎᒃ, ᓴᐳᑎᔭᐅᓯᒪᔾᔪᑎᖃᓪᓗᑎᒃ ᐃᓄᐃᑦ ᐃᒻᒥᒃᑯᑦ ᐃᓕᖅᑯᓯᖃᕐᒪᑕ ᐅᖃᐅᓯᖃᖅᑐᑎᓪᓗ ᐊᒻᒪᓗ ᐱᑦᑎᐊᙱᒍᑕᐅᕙᒃᑐᓂᒃ ᐋᖅᑭᒋᐊᕈᑎᒃᓴᓂᒃ ᐊᒻᒪ ᐊᓯᖏᓐᓂᒃ ᐃᓚᐃᓐᓈᖅᑕᐅᒍᑎᒋᕙᒃᑕᖏᓐᓂᒃ.
ᐱᔪᓐᓇᕐᐳᑎᑦ ᐊᔾᔨᖏᓐᓂᒃ ᑐᙵᕕᒃᑯᑦ ᓈᖕᒪᓴᙱᓐᓂᕋᖅᑐᓂᒃ ᑎᑎᖅᑲᖏᓐᓂ ᑎᒃᑯᐊᖅᑕᐅᓯᒪᔪᒧᑦ ᓄᓇᕐᔪᐊᕐᒥ ᓄᓇᓖᑦ ᑲᑐᔾᔨᖃᑎᒌᖏᓐᓄᑦ ᐅᕕᓂᖃᑎᒌᙱᑦᑐᑦ ᐃᓄᐃᓴᓛᖑᔪᑦ ᑎᑎᕋᕐᕕᖓᓂ ᑲᒥᓴᓇᐅᑉ
www.tunngavik.com
-30-
ᑐᑭᓯᒋᐊᒃᑲᓂᕐᕕᒃᓴᖅ:
ᒪᓚᐃᔭ ᒥᑭᔾᔪᒃ
ᑐᑭᒧᐊᒃᑎᑦᑎᔨᕈᖅᓴᖅᑐᖅ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑎᑯᑦ: 867-975-4900 1-888-646-0006
