ᑐᓴᕋᑦᓴᓕᕆᔩᑦ

ᐃᒪᕐᒥᐅᑕᓕᕆᔨᒃᑯᑦ ᐊᑕᖐᔪᒥᒃ ᐳᓛᕆᐊᕈᒪᙱᑦᑐᑦ ᓄᓇᓕᓐᓂᒃ ᐊᒃᑐᖅᑕᐅᓯᒪᔪᓂᒃ

ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᑉ ᑐᒡᓕᐊ ᔭᐃᒥᓯ ᐃᑦᑐᓗᒃ ᓇᓗᓇᐃᖅᓯᔪᖅ ᐅᓪᓗᒥ ᐃᓄᓐᓄᑦ ᓱᓕ ᐃᖅᑲᖅᑐᐃᕕᓕᐊᕈᔾᔨᓂᐊᕐᒪᑕ ᐃᒪᕐᒥᐅᑕᓕᕆᔨᒃᑯᓐᓂᒃ. ᐃᑦᑐᓗᒃ ᐅᖃᖅᑲᐅᔪᖅ ᑐᙵᕕᒃᑯᑦ ᓂᕆᐅᒃᑐᑦ ᒫᓐᓇᒫᒃᑯᑦ ᐃᖅᑲᖅᑐᐃᕕᒃᑯᓐᓂ ᓇᓗᓇᐃᖅᓯᕕᐅᓂᐊᕐᓂᕐᒥᓂᒃ.

ᑐᙵᕕᒃᑯᑦ ᐃᖅᑲᖅᑐᐃᕕᓕᐊᕈᔾᔨᓂᐊᓚᐅᕐᒪᑕ ᐃᒪᕐᒥᐅᑕᓕᕆᔨᒃᑯᑦ ᓯᓚᕐᔪᐊᒥ ᓄᖅᑲᑎᑦᓯᓚᐅᖅᑎᓪᓗᒋᑦ ᑕᐅᖅᓰᒍᑕᐅᔪᓐᓇᕐᓂᖏᓐᓂᒃ ᐊᓪᓚᓐᖑᐊᑦ ᑐᒑᖏᓐᓂᒃ 17-ᖑᔪᓂ ᓄᓇᕗᑦ ᓄᓇᓕᖁᑎᖏᓐᓂ. ᑖᓐᓇ ᓄᖅᑲᑎᑦᓯᒍᑎ ᓇᓗᓇᐃᖅᑕᐅᓚᐅᖅᓯᒪᔪᖅ ᐃᒪᐃᕐᒥᐅᑕᓕᕆᔨᒃᑯᓐᓂ ᐊᑐᕚᒥ ᑎᓯᐱᕆ, 2010-ᖑᑎᓪᓗᒍ, ᖃᐅᔨᒃᑲᐃᓯᒪᔮᖏᑦᑐᑎᒃ ᐊᒻᒪ ᖃᐅᔨᒋᐊᕐᕕᖃᓚᐅᖏᑦᑐᑎᒡᓘᓐᓃᒃ ᐃᓄᓐᓂᒃ ᓄᓇᕗᒻᒥ ᐊᒻᒪ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ.

“ᓄᓇᕗᑦ ᑐᙵᕕᒃᑯᑦ ᐃᖅᑲᖅᑐᐃᕕᒃᑰᕈᔾᔨᓕᓚᐅᖅᑐᑦ ᐃᒪᕐᒥᐅᑕᓕᕆᔨᒃᑯᑦ ᐃᓱᒪᓕᐅᕈᑎᖃᓚᐅᖅᑎᓪᓗᒋᑦ ᓯᓚᕐᔪᐊᒥ ᑕᐅᖅᓰᒍᑕᐅᔪᓐᓇᕐᓂᖏᓐᓄᑦ ᐊᓪᓚᓐᖑᑦ ᑐᒑᖏᓐᓂᒃ ᐊᓯᐊᒎᕐᕕᖃᓚᐅᖏᓇᑦᑕ. ᑕᒪᓐᓇ ᓴᓐᖏᔪᒥᒃ ᖃᓄᐃᓕᒋᐊᕈᑎᒋᔭᕗᑦ, ᑭᓯᐊᓂ ᑐᑭᓯᓇᖅᑐᒥ ᑐᓴᖅᑎᒋᐊᖃᕐᒪᑕ ᐃᒪᕐᒥᐅᑕᓕᕆᔨᒃᑯᑦ ᐃᓄᐃᑦ ᐊᒃᓱᕈᐊᖃᕐᓂᐊᕐᒪᑕ ᐱᔪᓐᓇᐅᑎᖏᓐᓂᒃ ᓄᓇᑖᕈᑎᒋᓯᒪᔭᕗᑦ ᐃᒃᐱᕆᔭᐅᑎᐊᖏᑦᑎᓪᓗᒍ,” ᐅᖃᖅᑐᖅ ᐃᒃᑐᓗᒃ.

ᐃᒪᕐᒥᐅᑕᓕᕆᔨᒃᑯᑦ ᓇᓗᓇᐃᖅᓯᑦᑎᐊᕈᒪᖏᒻᒪᑕ ᖃᓄᐃᑦᑐᓂᒃ ᒪᓕᒃᖢᑎᒃ ᐃᓱᒪᓕᐅᕈᑎᖃᓚᐅᕐᒪᖔᕐᒥᒃ. ᐊᓪᓚᓐᖑᐊᑦ ᐅᓄᕐᓂᖏᑦ ᖃᓄᐃᖏᑦᓯᐊᕐᓂᖏᓐᓂᒃ ᐅᒃᐱᕈᓱᒃᑲᑦᑕ ᓄᓇᕗᒻᒥ.

ᓄᓇᕗᑦ ᑐᙵᕕᒃ, ᓄᓇᓕᓐᓂ ᐊᖑᓇᓱᑦᑐᓕᕆᔨᒃᑯᑦ ᐊᒻᒪ ᐊᕕᒃᑐᖅᓯᒪᔪᓂ ᐆᒪᔪᓕᕆᓂᕐᒧᑦ ᑲᑐᔾᔨᖃᑎᒌᑦ ᑐᒃᓯᕋᖅᓯᒪᔪᑦ ᐃᒪᕐᒥᐅᑕᓕᕆᔨᒃᑯᑦ ᐳᓛᕆᐊᖁᓪᓗᒋᑦ ᐃᓛᒃᑯᑦ 17 ᓄᓇᓖᑦ ᐊᒃᑐᖅᑕᐅᓯᒪᔪᓄᑦ ᓇᓗᓇᐃᖅᓯᔭᖅᑐᕐᓗᑎᒃ ᑕᐅᖅᓰᒍᑕᐅᔪᓐᓇᕐᓂᖏᓐᓄᑦ ᓄᖅᑲᑎᑦᓯᓂᕆᓯᒪᔭᖏᓐᓂᒃ ᐊᒻᒪ ᓇᓗᓇᐃᖅᓯᓗᑎᒃ ᐃᒪᕐᒥᐅᑕᓕᕆᔨᒃᑯᑦ ᐃᓱᒫᓗᑎᖏᓐᓂᒃ ᒫᓐᓇᐅᔪᖅ ᑰᑕᒋᔭᐅᔪᓄᑦ ᐊᓪᓚᓐᖑᐊᓄᑦ. ᐃᒪᕐᒥᐅᑕᓕᕆᔨᒃᑯᑦ ᐊᖏᖅᓯᒪᖏᑦᑐᑦ ᐊᑕᖏᕐᓗᒋᑦ ᐳᓛᕆᐊᖁᔭᐅᓂᕐᒥᓂᒃ ᓄᓇᓕᓐᓄᑦ ᐊᒃᑐᖅᑕᐅᓯᒪᔪᓄᑦ ᑲᑎᒪᑎᑦᓯᓂᐊᖅᖢᑎᒃ 6 ᑐᐃᓐᓇᐅᔪᓂ ᓄᓇᓕᓐᓂ ᑕᕝᕙᓂ ᑕᖅᑭᕆᔭᑦᑎᓐᓂ.