ᑐᓴᕋᑦᓴᓕᕆᔩᑦ

ᑲᓇᐅᑉ ᒐᕙᒪᒃᑯᖏᑦ ᒪᒥᐊᒃᑐᒃ ᖁᑦᑎᑦᑐᒧᑦ ᐊᐅᓪᓛᖅᑕᐅᓂᑯᓄᑦ

ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓ ᐹᓪ ᖃᓗᔾᔭᖅ ᐅᓪᓗᒥ ᖁᕕᐊᒍᓱᑦᑐᖅ ᐃᓄᓕᕆᔨᑐᖃᒃᑯᑦ ᒥᓂᔅᑕᖓᓐᓂᒃ ᔮᓐ ᑕᓐᑲᓐ ᒪᒥᐊᓐᓂᕆᖅᑲᐅᔭᖓᓄᑦ ᐃᓄᓐᓄᑦ ᑭᒡᒐᑐᖅᖢᓂ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐊᒥᓱᑦ ᐃᓄᐃᑦ ᖃᑕᓐᖑᑎᒌᑦ ᐊᐅᓪᓛᖅᑎᑕᐅᓚᐅᖅᓯᒪᓂᖏᓐᓄᑦ ᖁᑦᑎᑦᑐᒧᑦ. ᒥᓂᔅᑕ ᑕᓐᑲᓐ ᒪᒥᐊᓐᓂᖃᖅᑲᐅᔪᖅ ᐃᓄᒃᔪᐊᕐᒥ, ᑯᐸᐃᒃ ᑕᕐᕋᖓᓂ ᑕᐃᑲᓐᖓᑦ ᐃᓄᐃᑦ ᐊᐅᓪᓛᖅᑕᐅᓚᐅᖅᓯᒪᑎᓪᓗᒋᑦ ᖃᐅᓱᐃᑦᑐᒧᑦ ᐊᐅᓱᐃᑦᑐᒧᓪᓗ 1953-ᒥ ᐊᒻᒪ 1955-ᒥ. ᐃᓄᐃᑦ ᒥᑦᑎᒪᑕᓕᖕᒥᒃ ᐊᐅᓪᓛᖅᑕᐅᓚᐅᖅᒥᔪᑦ ᑕᐃᒃᓱᒪᓂᒃᓴᐃᓐᓇᖅ.

ᐅᓪᓗᒥ ᒪᒥᐊᓐᓂᐅᔪᖅ ᓴᖅᑮᕗᖅ ᐅᒃᐱᕈᓱᓐᓂᕐᒥᒃ ᐊᒻᒪ ᖃᓱᕚᓪᓕᕈᑕᐅᓂᐊᖅᖢᓂ ᐃᓄᓐᓄᑦ ᐊᐅᓪᓛᖅᑕᐅᓚᐅᖅᑐᓄᑦ, ᐊᒻᒪ ᖃᑕᖑᑎᖏᑦ ᓄᓇᖅᑲᑎᖏᓪᓗ ᐊᒃᓱᕈᖃᑕᐅᓯᒪᒻᒪᑕ ᐊᐃᓪᓛᖅᑕᐅᓂᑯᐃᑦ ᐋᓐᓂᐊᕐᓂᖏᓐᓄᑦ,” ᐅᖃᖅᑐᖅ ᖃᓗᔾᔭᖅ. “ᓯᕗᓪᓕᖅᐹᑦ ᐊᕐᕌᒍᐃᑦ ᐃᓄᓐᓄᑦ ᐊᐅᓪᓛᖅᑕᐅᔪᓄᑦ ᐊᒃᓱᕈᕐᓇᒻᒪᕆᒃᓯᒪᕗᑦ ᐊᓐᓇᐅᒪᓇᓱᐊᕐᓂᖏᓐᓄᑦ ᐃᓄᐃᑦ. ᑲᓇᑕᐅᑉ ᒐᕙᒪᒃᑯᖏᑦ ᓱᓕᓂᕋᖃᑦᑕᕋᓗᐊᖅᑎᓪᓗᒋᑦ, ᐃᑲᔫᑎᒃᓴᐃᑦ ᐊᒥᓲᓚᐅᖏᒻᒪᑕ, ᐊᒻᒪ ᐃᓄᐃᑦ ᐱᕐᓕᕋᖃᑦᑕᓚᐅᖅᑐᑦ, ᖃᑕᓐᖑᑎᒌᑦ ᐊᖏᕐᕈᒥᓄᑦ ᐅᑎᖅᑎᑕᐅᔪᓐᓇᓚᐅᖏᒻᒪᑕ ᐅᑎᕐᓂᐊᕐᓂᕋᖅᑕᐅᓯᒪᒐᓗᐊᖅᑎᓪᓗᒋᑦ ᒐᕙᒪᒃᑯᓐᓂ. ᐊᕐᕌᒍᒐᓛᓗᓐᓂᒃ ᐃᓄᐃᑦ ᐃᓕᓐᓇᓱᐊᓚᐅᖅᑐᑦ ᐃᓄᓇᓱᐊᕐᓂᕐᒥᒃ ᐊᖑᓇᓱᐊᕐᓂᕐᒥᓪᓗ ᖁᑦᑎᑦᑐᒥ. ᑕᑯᒃᓴᐅᑎᑦᓯᕗᖅ ᐃᓄᐃᑦ ᐊᔾᔨᐅᖏᓐᓂᖏᓐᓂᒃ ᐊᒻᒪ ᐃᓄᐃᑦ ᐃᓅᔪᓐᓇᕐᓂᖏᓐᓂᒃ ᖃᐅᔨᒪᓇᖏᑦᑐᒥ ᓄᓇᒥ.”

2009-ᒥ ᑐᙵᕕᒃᑯᑦ ᐊᕐᕌᒍᑕᒫᖅᓯᐅᑎᖓᓂᒃ ᑲᑎᒪᕐᔪᐊᓂᖃᖅᑎᓪᓗᒋᑦ, ᐃᓚᒋᔭᐅᔪᑦ ᐊᖏᖃᑎᒌᒃᑐᐃᓐᓇᐅᓚᐅᖅᑐᑦ ᐱᖁᔨᕗᖔᕈᑎᒥᒃ ᑲᓇᑕᐅᑉ ᒐᕙᒪᒃᑯᖏᑦ ᒪᒥᐊᖁᓪᓗᒋᑦ. “ᓂᕆᐅᒃᐳᒍᑦ ᐅᓪᓗᒥ ᐃᓄᐃᑦ ᒪᒥᐊᕝᕕᐅᓂᕐᒥᒍᑦ ᒪᒥᓴᖅᐸᓪᓕᐊᔪᓐᓇᓂᐊᕐᓂᖏᓐᓂᒃ ᑖᒃᓱᒪᓐᖓᒃ ᖁᐊᖅᓵᓇᒻᒪᕆᒃᑐᒥᒃ ᐊᑐᕆᐊᖃᓚᐅᖅᑕᖓᓂᒃ.” ᐅᖃᖅᑐᖅ ᖃᓗᔾᔭᖅ.

ᑐᙵᕕᒃᑯᑦ ᑮᓇᐅᔭᖃᖅᑎᑦᑎᓯᒪᔪᑦ ᓴᓐᖑᐊᖅᑕᑕᐅᓂᖏᓐᓄᑦ ᒪᕐᕉᒃ ᐃᖅᑲᐅᒪᔾᔪᑎᒃᓵᒃ ᖃᐅᓱᐃᑦᑐᒥ ᐊᐅᓱᐃᑦᑐᒥᓗ ᐊᐅᓪᓛᖅᑎᑕᐅᓯᒪᓂᖏᓐᓄᑦ. ᑖᒃᑯᐊ ᐃᖅᑲᐅᒪᔭᐅᔾᔪᑎᒃᓵᒃ ᓴᖅᑭᑕᐅᓂᐊᖅᑑᒃ ᖁᕕᐊᓲᑎᖃᕐᓗᑎᒃ ᓄᓇᓕᖏᓐᓂᒃ ᐊᐅᓱᐃᑦᑐᒥ ᓯᑎᐱᕆ 8 ᐊᒻᒪ ᖃᐅᓱᐃᑦᑐᒥ ᓯᑎᐱᕆ 10.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: