ᑐᓴᕋᑦᓴᓕᕆᔩᑦ

ᐊᕐᕌᒍᑕᒫᖅᓯᐅᑎᖓᓂᒃ ᑲᑎᒪᕐᔪᐊᕐᓂᖃᖅᑎᓪᓗᒋᑦ ᐃᓚᒋᔭᐅᔪᑦ ᑲᔪᓯᑎᑦᓯᕗᑦ ᓄᓇᒦᓐᖔᖅᑐᓄᑦ ᑮᓇᐅᔭᓕᐊᑦ ᐊᑐᐊᒐᖓᓂᒃ

ᓄᓇᕗᑦ ᑐᙵᕕᒃᑯᑦ ᐊᖏᔪᖅᑳᖓ ᑳᑎ ᑕᐅᑐᙱ ᐅᓪᓗᒥ ᓇᓗᓇᐃᖅᓯᔪᖅ ᓄᓇᒦᓐᖔᖅᑐᓄᑦ ᑮᓇᐅᔭᓕᐊᑦ ᐊᑐᐊᒐᖓ ᐊᑐᓕᖅᑎᑕᐅᓂᖓᓂᒃ ᐱᖁᔨᕗᖔᕈᑎᓕᐊᖓᒍᑦ ᐃᓚᒋᔭᐅᔪᑦ ᐊᕐᕌᒍᑕᒫᖅᓯᐅᑎᖓᓂᒃ ᑲᑎᒪᕐᔪᐊᕐᓂᖃᖅᑎᓪᓗᒋᑦ ᐃᖃᓗᑦᑑᑎᐊᒥ.

ᐊᑐᐊᒐᖅ ᑐᕌᒐᖃᖅᑐᖅ ᓇᓗᓇᖏᑦᑐᒥᒃ, ᐊᐅᓚᑦᓯᐊᖅᑐᒥᒃ ᐊᒻᒪ ᐊᖏᖃᑎᒌᒍᑕᐅᓯᒪᔪᒥᒃ ᐊᑐᐊᒐᖃᕐᓗᑎᒃ ᐊᑐᖅᑕᐅᓂᐊᕐᓗᓂ ᑮᓇᐅᔭᓕᐅᕋᓱᐊᕐᓂᕐᒧᑦ ᐃᑲᔫᑎᒃᓴᓂᒃ ᐅᔭᖃᓐᓂᐊᖅᑐᓂ ᓄᓇᕗᒻᒥ. ᐊᑐᐊᒐᖅ ᑐᕌᖓᑐᐃᓐᓇᖏᓚᖅ ᐅᔭᕋᓐᓂᐊᓂᕐᒧᑦ. ᓄᓇᕗᑦ ᑐᙵᕕᒃᑯᑦ ᐊᑐᐊᒐᖃᕇᖅᑐᑦ ᓄᓇᒦᖔᖅᑐᑦ ᐱᕙᓪᓕᐊᓂᖏᓐᓄᑦ ᐃᓚᒋᓪᓗᒋᑦ ᐅᔭᕋᓐᓂᐊᓂᕐᒧᑦ ᐊᑐᐊᒐᖅ, ᓄᖑᓱᐃᑦᑐᓕᕆᓂᕐᒧᑦ ᐊᑐᐊᒐᖅ, ᐊᒻᒪ ᐊᑐᐊᒐᐃᑦ ᒪᓕᒐᐃᓪᓄ ᐃᓄᐃᑦ ᓄᓇᖁᑎᖏᑕ ᐊᑐᖅᑕᐅᓂᖏᓐᓄᑦ. ᑖᒃᑯᐊ ᐊᑐᐊᒐᐃᑦ ᐊᐅᓚᑦᓯᒍᑕᐅᖏᓐᓇᕐᓂᐊᖅᐳᑦ ᓄᓇᕗᑦ ᑐᙵᕕᒃᑯᑦ ᐋᔩᕋᕐᓂᖏᓐᓄᑦ ᕿᓂᖅᓴᕐᓂᕐᒧᑦ ᐊᖏᕈᑎᖏᓐᓄᑦ ᐅᕝᕙᓘᓐᓃᑦ ᐃᓗᓕᖏᓐᓄᑦ. ᐱᔾᔪᑎᖃᖅᑐᖅ ᓄᓇᒦᓐᖔᖅᑐᓄᑦ ᑮᓇᐅᔭᐊᓕᑦ ᐊᑐᐊᒐᖓ ᐊᓯᔾᔨᕈᑕᐅᔾᔮᖏᑦᑐᖅ ᒫᓐᓇ ᐊᑐᖅᑕᐅᖃᑦᑕᖅᑐᓂᒃ.

ᑖᓐᓇ ᐊᑐᐊᒐᖅ ᓄᓇᒦᓐᖔᖅᑐᓄᑦ ᑮᓇᐅᔭᓕᐊᓄᑦ, ᖃᓄᕐᓗ ᐊᐅᓚᑕᐅᒐᔭᕐᓂᖓ, ᑐᓂᐅᖅᑲᖅᑕᐅᓂᖏᑦ ᐊᑐᖅᑕᐅᓂᖏᓪᓗ ᓂᖏᖅᑕᐅᔪᑦ ᐃᓄᐃᑦ ᓄᓇᖁᑎᖏᓐᓂᒃ ᐊᒻᒪ ᑮᓇᐅᔭᓕᐊᑦ ᐅᖅᓱᐊᓗᖕᒧᑦ ᒐᓯᒧᓪᓗ ᐱᕙᓪᓕᐊᓂᐅᔪᓂ. ᑖᒃᑯᐊ ᐊᒡᓃᑯ-ᐄᒍ ᐅᔭᕋᓐᓂᐊᖅᑏᑦ ᐊᒻᒪ ᐊᐳᑦᑎᓈᖅᑐᒥ ᒎᓗᓯᐅᖅᑐᑦ ᐱᕙᓪᓕᐊᓕᓚᐅᖅᑎᓐᓇᒋᑦ, ᐅᔭᕋᓐᓂᐊᖅᑐᖃᖃᑦᑕᓚᐅᖏᒻᒪᑦ ᐃᓄᐃᑦ ᓄᓇᖁᑎᖏᓐᓂ ᓄᓇᕗᒻᒥ. ᐊᐳᑦᑎᓈᖅᑐᖅ ᓯᕗᓪᓕᖅᐹᒥ ᐃᓄᖕᓄᑦ ᓂᖏᖅᑕᕐᕕᐅᓂᐊᕐᒪᑦ ᐅᔭᕋᓐᓂᐊᕐᓂᒃᑯᑦ,” ᐅᖃᖅᑐᖅ ᑕᐅᑐᙱ.

ᐊᑐᐊᒐᖅ ᐊᑕᖐᓯᒪᓂᐊᑐᖅ ᓂᖏᖅᑕᕐᓂᐅᔪᓂᒃ ᐅᔭᕋᓐᓂᐊᕐᓂᓕᒫᓂ ᐃᓄᐃᑦ ᓄᓇᖁᑎᖏᓐᓂ, ᐃᓚᖃᖅᑐᑎᒃ ᓂᖏᖅᑕᕐᓂᖅ ᐋᔩᕋᕈᑕᐅᔪᑦ ᓄᓇᕗᑦ ᑐᙵᕕᒃᑯᓐᓂ ᐊᒻᒪ ᐅᔭᕋᓐᓂᐊᖅᑎᓂ, ᓂᖏᖅᑕᕐᓂᕆᔭᐅᕙᒃᑐᑦ ᒐᕙᒪᑐᖃᒃᑯᓐ ᐅᔭᕋᓐᓂᐊᓂᕐᒧᑦ ᐊᑐᖅᑐᐊᕐᓂᖏᓐᓄᑦ ᐊᑐᖅᑕᐅᓂᐊᑐᖅ. ᑖᓐᓇᓗ 12 ᐳᓴᓐᑎᒥᒃ ᑖᒃᓰᔭᓚᐅᖅᑎᓪᓗᒋᑦ ᓂᖏᖅᑕᕈᑕᐅᔪᑦ, ᑕᒪᓐᓇᓗ ᑐᙵᕕᒃᑯᓐᓂ ᐃᓕᔭᐅᓚᐅᖅᓯᒪᓪᓗᓂ 1993-ᒥ, ᒥᑭᓂᖅᐹᕆᔪᓐᓇᖅᑕᖓ ᓂᖏᖅᑕᕐᓂᕐᒧᑦ.

ᐊᑐᐊᒐᖅ ᐊᑐᓕᕆᐊᓯᓯᒪᔪᖅ ᐃᐳᕈ 1-ᒥ, 2011. ᑕᒪᓐᓇ ᑐᑭᖃᖅᐳᖅ ᓄᓇᒦᓐᖔᖅᑐᓄᑦ ᑮᓇᐅᔭᓕᐊᑦ ᐃᓗᐊᓃᖃᓯᐅᑎᕗᑦ ᐊᑐᐊᒐᐅᑉ ᒫᓐᓇ ᑮᓇᐅᔭᐃᑦ ᐊᕐᕌᒍᐊᓄᑦ ᐊᑭᓕᖅᑕᐅᔪᒫᖅᑐᑎᒃ ᐃᓛᒃᑰᖅᑐᒧᑦ ᑮᓇᐅᔭᒃᑯᕕᖕᒧᑦ ᐃᓕᔭᐅᓕᕐᒥᓗᑎᒃ ᓄᓇᒦᓐᖔᖅᑐᓄᑦ ᑮᓇᐅᔭᓕᐊᑦ ᐸᐸᑦᓯᔨᖏᓐᓄᑦ.

ᓄᓇᒦᓐᖔᖅᑐᓄᑦ ᑮᓇᐅᔭᓕᐊᓂ ᐸᐸᑦᓯᔩᑦ ᐊᐅᓚᑕᐅᓂᐊᖅᐳᑦ 7-ᖑᔪᓄᑦ ᐸᐸᑦᓯᔨᓄᑦ ᐅᑯᐊᖑᓗᑎᒃ ᐊᖏᔪᖅᑳᖏᑦ ᓄᓇᕗᑦ ᑐᙵᕕᒃ ᑎᒥᖓᑦᑕ ᐊᒻᒪ ᐊᕕᒃᑐᖅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᐱᖓᓱᑦ ᐃᖕᒥᒃᑰᖅᑐᑦ ᐸᐸᑦᓯᔩᑦ. ᑖᒃᑯᐊ ᐱᖓᓱᑦ ᐃᖕᒥᒃᑰᖅᑐᑦ ᐸᐸᑦᓯᔨᐅᓂᐊᖅᑐᑦ ᐊᔪᖏᑦᑐᒻᒪᕆᐅᓂᐊᖅᐳᑦ ᐱᓕᕆᖃᑦᑕᖅᓯᒪᓗᑎᒃ ᖃᐅᔨᒪᖕᒪᕆᓪᓗᑎᒃ ᑎᒃᑯᐊᖅᑕᐅᓗᑎᒃ ᓄᓇᕗᑦ ᑐᙵᕕᒃᑯᑦ/ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦᑕ ᐊᖏᔪᖅᑲᐅᑎᖏᓐᓄᑦ.

ᑮᓇᐅᔭᐃᑦ ᐸᐸᑦᓯᔨᒃᑯᓐᓂ ᐊᐅᓚᑕᐅᓂᐊᖅᐳᑦ ᐃᓛᒃᑰᖓᓗᑎᒃ ᐊᐅᓚᓂᕐᒧᑦ ᐸᐸᑕᐃᑦ ᐊᒻᒪ ᐊᑎᖃᖃᑕᐅᔪᓄᑦ ᐸᐸᑕᐃᑦ. ᐊᕐᕙᓪᓗᐊᖏᑦ (50%) ᓄᓇᒦᓐᖔᖅᑐᓄᑦ ᑮᓇᐅᔭᓕᐊᑦ ᐊᐅᓚᓂᕐᒧᑦ ᐸᐸᑕᓄᐊᕐᓂᐊᑐᑦ ᐊᒻᒪ 50% ᐊᑎᖃᖃᑕᐅᔪᓄᑦ ᐸᐸᑕᓅᕐᓂᐊᖅᑐᑦ.

ᑐᓂᐅᖅᑲᖅᑕᐅᓂᖏᓐᓄᑦ ᐋᖅᑭᒃᓯᒪᔪᖅ ᐊᑐᖅᑕᐅᓂᐊᑐᖅ ᐃᒪᐃᓕᖓᔪᖅ: 30 ᐳᓴᓐᑎᖓ ᓄᓇᕗᑦ ᑐᙵᕕᒃ ᑎᒥᖓᓐᓄᑦ; 10 ᐳᓴᓐᑎᖓ ᐃᓛᒃᑰᑦ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ; ᐊᒻᒪ 40 ᐳᓴᓐᑎᖓ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᒪᓕᒡᓗᒋᑦ ᐃᓄᒋᐊᓐᓂᖏᑦ. ᒫᓐᓇ ᐃᓄᖃᕐᓂᖏᑦ ᐃᓛᒃᑯᑦ ᐊᕕᒃᑐᖅᓯᒪᔪᑦ, ᖃᓂᒋᔮᓃᑦᑐᑦ ᐅᑯᐊ ᓄᓇᕗᑦ ᑐᙵᕕᒃᑯᑦ 30 ᐳᓴᓐᑎ; ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᑦ 30 ᐳᓴᓐᑎ, ᑭᕙᓪᓕᖅ 21 ᐳᓴᓐᑎ; ᕿᑎᕐᒥᐅᑦ 18 ᐳᓴᓐᑎ.

ᑮᓇᐅᔭᓕᐊᑦ ᐊᐅᓚᓂᕐᒧᑦ ᐸᐸᑕᐅᔪᓂ, ᐃᓚᓐᖓᐅᑎᓚᐅᖅᑎᓪᓗᒋᑦ ᐊᐅᓚᕐᓂᑦᒧ ᐊᑭᓕᕆᐊᓖᑦ, ᑐᓂᐅᖅᑲᖅᑕᐅᖃᑦᑕᓂᐊᖅᐳᑦ ᐊᕐᕌᒍᑕᒫᑦ ᒪᓕᒡᓗᒋᑦ ᑐᓂᐅᖅᑲᐃᓂᕐᒧᑦ ᐋᖅᑭᒃᑕᐅᓯᒪᔪᒥᒃ. ᑮᓇᐃᔭᑦ ᑐᓂᐅᖅᑲᖅᑕᐅᑐᐃᓐᓇᕆᐊᖃᖅᐳᑦ ᒪᓕᒡᓗᒍ ᐋᖅᑭᒃᑕᐅᓯᒪᔪᖅ. ᑮᓇᐅᔭᓕᐊᑦ ᐊᑎᖃᖃᑕᐅᔪᓄᑦ ᐸᐸᑦᓯᔨᒃᑯᓐᓂᒃ ᑐᓂᐅᖅᑲᖅᑕᐅᑐᐃᓐᓇᕆᐊᖃᖅᐳᑦ ᐊᕐᕌᒍᑕᒫᑦ ᑮᓇᐅᔭᐃᑦ ᐅᖓᑖᓅᖅᐸᑕ $100 ᒥᓕᐊᓐ. ᑖᓐᓇ ᐊᑭᓖᔾᔪᑕᐅᓚᐅᖅᓯᒪᔮᖏᓚᖅ ᐊᑐᖅᑐᐊᕐᕕᐅᓗᓂᓘᓐᓃᑦ ᑮᓇᐅᔭᖅ.

ᐃᓛᒃᑯᑦ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓱᒪᓕᐅᖅᑎᓪᓗᐊᑕᐅᓂᐊᖅᐳᑦ ᐊᑐᖅᑕᐅᓂᖏᓐᓄᑦ ᐸᐸᑕᐅᔪᑦ (ᒪᓕᒡᓗᒋᑦ ᐊᑭᓕᖅᓱᐃᓂᕐᒧᑦ ᐋᖅᑭᒃᑕᐅᓯᒪᔪᑦ) ᐊᕕᒃᑐᖅᓯᒪᓂᖏᓐᓂᒃ. ᐊᑭᓕᐅᑕᐅᔪᑦ ᐱᔾᔪᑎᖃᕐᓂᐊᖅᐳᑦ ᑕᒪᒃᑮᓐᓂᒃ ᖃᓂᒃᑐᒧᑦ ᐊᑯᓃᖅᑐᒧᓪᓗ ᐃᑲᔫᑎᖃᖁᓪᓗᒋᑦ, ᐊᑐᖅᑕᐅᔪᓐᓇᖅᖢᑎᒃ ᑮᓇᐅᔭᑎᒍᑦ, ᐃᓅᓯᕐᒧᑦ, ᐃᓕᖅᑯᓯᕐᒧᑦ ᐊᕙᑎᒧᑦ ᐊᓯᖏᓐᓄᓪᓘᓐᓃᑦ.

ᐊᖏᖅᑕᐅᓯᒪᒃᐸᑕ ᑭᓯᐊᓂ ᓄᓇᕗᑦ ᑐᙵᕕᒃᑯᓐᓄᑦ ᐃᓚᒋᔭᐅᔪᓄᑦ, ᐊᑭᓕᐅᑕᐅᔪᑦ ᐊᑐᖅᑕᐅᓂᐊᖏᓚᑦ ᓄᓇᕗᑦ ᑐᙵᕕᒃᑯᓐᓂ ᐅᕝᕙᓗᓐᓃᑦ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᒐᕙᒪᒃᑯᓐᓄᑦ ᐱᓕᕆᐊᓪᓗᐊᑕᐅᓂᐊᖅᑎᓪᓗᒋᑦ.

ᖃᓄᐃᑦᑐᑐᐃᓐᓇᒃᑯᑦ, ᑮᓇᐅᔭᐃᑦ ᐊᑭᓕᐅᑕᐅᓂᐊᖅᑎᓪᓗᒋᑦ (ᐊᔾᔨᐸᓗᐊᓂᓪᓘᓐᓃᑦ) ᓄᓇᕗᑦ ᑐᙵᕕᒃᑯᓐᓂ ᐅᕝᕙᓘᓐᓃᑦ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐃᓄᓐᓄᑦ ᐊᑎᖃᖃᑕᐅᔪᓄᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᑎᒍ ᐊᖏᖅᑕᐅᓯᒪᔭᕆᐊᖃᕐᓂᐊᖅᐳᑦ 75 ᐳᓴᓐᑎᖏᓐᓄᑦ ᓄᓇᕗᑦ ᑐᙵᕕᒃᑯᓐᓄᑦ ᐃᓚᒋᔭᐅᔪᓂ.

ᐊᑐᐊᒐᖅ ᐃᓚᖃᕆᕗᖅ ᓂᖏᖅᑕᖅᑕᐅᔪᑦ ᐊᐅᓚᑕᐅᓂᖏᑦ ᐊᒻᒪ ᓄᐊᑕᐅᓂᕆᔭᖏᑦ ᒐᕙᒪᑐᖃᒃᑯᓐᓂ ᐊᑖᓂ ᓄᓇᑦᓯᐊᑉ-ᓄᓇᕗᑦ ᐅᔭᕋᓐᓂᐊᓂᕐᒧᑦ ᐊᑐᐊᒐᖏᓐᓂ, ᐊᐅᓪᓛᖅᑕᐅᓂᖏᓪᓗ ᓄᓇᕗᑦ ᑐᙵᕕᒃᑯᓐᓄᑦ, ᐊᑐᓕᖅᑎᑕᐅᓯᒪᔪᓂ ᓄᓇᒦᓐᖔᖅᑐᑦ ᐊᑐᖅᑐᐊᖅᑕᐅᓂᖏᑦ ᐃᓄᐃᑦ ᓄᓇᖁᑎᖏᓐᓂ ᓄᓇᕗᑦ ᑐᙵᕕᒃᑯᑦ ᑎᒍᒥᐊᖅᑕᖏᓐᓄᑦ ᓄᓇᒦᓐᖔᖅᑐᓄᑦ ᐱᔪᓐᓇᐅᑎᓂ.

ᐊᔾᔨᖓ ᓄᓇᒦᓐᖔᖅᑐᓄᑦ ᑮᓇᐅᔭᓕᐊᑦ ᐊᑐᐊᒐᖓᑕ ᐊᑐᐃᓐᓇᐅᔪᖅ ᓄᓇᕗᑦ ᑐᙵᕕᒃᑯᑦ ᐃᑭᐊᕐᕆᕕᖓᓐᓂ.

ᐊᑐᐊᒐᖅ ᐱᐊᓂᒃᑕᐅᔪᖅ ᐊᕐᕌᒎᓐᓂᒃ ᒪᕐᕉᓐᓂᒃ ᐱᓕᕆᐊᖑᓐᓇᖅᓯᒪᑎᓪᓗᒍ ᓄᓇᕗᑦ ᑐᙵᕕᒃᑯᓐᓂ/ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦᑕ ᐊᖏᔪᖅᑲᐅᑎᖏᓐᓂ, ᓄᓇᓕᓕᕆᔩᑦ, ᑮᓇᐅᔭᓕᕆᔩᑦ ᐊᒻᒪ ᒪᓕᒐᓂᐊᓂᕐᒧᑦ ᐃᖅᑲᓇᐃᔭᖅᑏᑦ ᖃᐅᔨᒪᔨᑕᐃᓪᓗ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: