ᑐᓴᕋᑦᓴᓕᕆᔩᑦ

2019 ᓄᓇᕗᑦ ᑐᙵᕕᒃ ᐊᖓᔪᖅᑳᑉ ᐱᓕᐅᓯᐊᕐᑎᑦᑎᒍᑎᖓ

2019 ᓄᓇᕗᑦ ᑐᙵᕕᒃ ᐊᖓᔪᖅᑳᑉ ᐱᓕᐅᓯᐊᕐᑎᑦᑎᒍᑎᖓ

 (ᐊᒃᑐᕙ 23, 2019 – ᑲᖏᖅᖠᓂᕐᒥ, ᓄᓇᕗᑦ) ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓᑦ ᐊᓗᑭ ᑰᑦᑎᖅ ᐱᓕᐅᓯᐊᕐᑎᑦᑎᓚᐅᕐᒪᑦ ᐱᖓᓱᓂᒃ ᓄᓇᕗᖕᒥ ᐃᓄᖕᓂᒃ ᐆᒥᖓ ᓄᓇᕗᒐᑦ ᑐᙵᕕᒃᑯᑦ ᐊᖓᔪᖅᑳᖓᑕ ᐱᓕᐅᓯᐊᕐᑎᑦᑎᒍᑎᖓᓂᒃ ᓂᕆᕕᔾᔪᐊᑎᓪᓗᒋᑦ ᓄᓇᖅᑲᑎᒌᑦ ᑲᖏᖅᖠᓂᕐᒥ ᑕᕝᕙᓂ ᓄᓇᕗᑦ ᑐᙵᕕᒃᑯᑦ ᐊᕐᕌᒍᓕᒫᕐᓯᐅᑎᒥᓂᒃ ᑲᑎᒪᒻᒪᑕ ᑕᒪᑐᒪᓂ ᐱᓇᓱᐊᕈᓯᕐᒥ.

ᓄᓇᕗᒐᑦ ᑐᙵᕕᒃᑯᑦ ᐊᖓᔪᖅᑳᖓᑕ ᐱᓕᐅᓯᐊᕐᑎᑦᑎᒍᑎᖓ ᐊᑑᑎᖃᕐᒪ ᐃᓕᓴᕐᓯᒍᑕᐅᓪᓗᓂ ᐊᒻᒪᓗ ᖁᕕᐊᓱᒍᑕᐅᓂᖓᓄᑦ ᓄᓇᕗᖕᒥ ᐃᓄᐃᑦ ᐱᒻᒪᕆᐅᔪᒥᒃ ᐃᑲᔪᓐᓂᖃᖅᓯᒪᔪᓂᒃ ᐱᕙᓪᓕᐊᑎᑦᑎᓂᕐᒧᑦ ᐊᒻᒪ ᐃᓕᖅᑯᓯᑐᖃᒃᑯᑦ ᐱᕚᓪᓕᕈᑎᓂᒃ ᐃᓄᖕᓄᑦ. ᐱᓕᐅᓯᐊᕐᑐᑦ 2019-ᒥ ᓄᓇᕗᑦ ᑐᙵᕕᒃᑯᑦ ᐊᖓᔪᖅᑳᖓᑦᑕ ᐱᓕᐅᓯᐊᕐᑎᑦᑎᒍᑎᖓᓂ ᐱᓕᐅᓯᐊᖅᑐᑦ ᐅᑯᐊᖑᕗᑦ ᔮᒃ ᖃᕐᕖᒃᑐᖅ, ᓂᓚᐅᓚᖅ ᒥᐊᕆᐊᒻ ᐊᒡᓘᒃᑲᖅ ᐊᒻᒪ ᑎᐊᕙᓐ ᒪᓂᖅ.  ᔮᒃ ᖃᕝᕖᑦᑐᖅ ᐊᒻᒪᓗ ᓂᓚᐅᓚᖅ ᒥᐊᕆᐊᒻ ᐊᒡᓘᒃᑲᖅ ᑲᑎᒪᖃᑕᐅᔪᑦ ᓄᓇᕗᑦ ᑐᙵᕕᒃᑯᑦ ᐊᕐᕌᒍᓕᒫᕐᓯᐅᑎᖓᓂᒃ ᑲᑎᒪᑎᓪᓗᒋᑦ ᐊᒻᒪ ᑐᓂᔭᐅᓚᐅᕐᑐᑦ ᐊᒻᒪᓗ ᐱᓕᐅᓯᐊᓂᒥᓂᒃ ᐱᓪᓗᑎᒃ.

“ᐅᐱᒍᓱᓪᓚᕆᒃᐳᖓ ᐃᓕᓴᕐᓯᒍᑎᖃᖅᖢᖓ ᑖᒃᑯᓂᖓ ᐃᓄᖕᓂᒃ ᓯᕗᓕᕐᑎᐅᓂᕐᒥᓂᒃ ᑕᑯᒃᓴᐅᑎᑦᑎᓯᒪᔪᓂᒃ ᓄᓇᕗᖕᒥᐅᓄᑦ ᐃᓄᖕᓄᑦ. ᐱᒻᒪᕆᐅᕗᖅ ᖁᕕᐊᓲᑎᒋᓗᒋᑦ ᐃᑲᔪᖃᑦᑕᕐᓂᖏᑦ ᖃᓄᐃᖏᓂᕐᓴᐅᖁᓪᓗᒋᑦ ᓄᓇᕗᖕᒥᐅᑦ” ᐅᖃᖅᑐᖅ ᐊᖓᔪᖅᑳᖅ ᑰᑦᑎᖅ. “ᐅᐱᒋᕙᕗᑦ ᑲᒪᒋᔪᓐᓇᕐᓯᒪᔭᖏᑦ ᐊᒻᒪᓗ ᐃᓕᓴᕆᓗᒋᓪᓗ ᐱᔾᔪᑎᖏᑦ ᐊᒻᒪ ᐱᓂᐊᕐᓂᕆᓯᒪᔭᖏᑦ ᐊᑐᓂᑦ ᖃᓄᐃᙱᑦᑎᐊᓂᕐᒧᑦ ᐃᒻᒥᓐᓄᑦ ᐊᒻᒪᓗ ᓄᓇᖅᑲᑎᒥᓄᑦ.”

ᔮᒃ ᖃᕝᕖᑦᑐᖅ (ᖃᖏᖅᖠᓂᕐᒥᐅᖅ) ᐃᓐᓇᕆᔭᐅᔪᑦ ᐱᓕᕆᓐᓇᕐᓂᖓᓄᑦ ᓄᓇᒥᓂ ᐊᒻᒪᓗ ᓄᓇᕗᖕᒥ. ᔮᒃ ᐃᓕᓴᐃᓯᒪᕗᑦ ᐃᓅᓱᒃᑐᓂᒃ ᐃᓄᖕᓂ ᐊᖑᓇᓱᓐᓂᕐᒥᒃ ᐊᒻᒪᓗ ᐊᖑᓇᓱᒍᓯᓂᒃ; ᐱᒻᒪᕆᐅᔪᒥᕐ ᐅᐱᒋᔭᖃᖅᑐᖅ ᓄᓇᑦᑎᓐᓂᒃ ᐊᒻᒪᓗ ᓂᕐᔪᑎᓂᒃ; ᖃᓄᕐᓗ ᐱᔭᕆᔭᑦᑎᐊᕐᓯᒪᓂᕐᒥᒃ ᐃᒻᒥᒃᑯᓪᓗ ᐱᓇᓱᐊᕈᓐᓇᓂᕐᒥᒃ ᓄᓇᒦᓪᓗᓂ. ᒥᔅᑕ ᖃᕐᕖᒃᑐᖅ ᐊᑭᓕᕐᓱᕐᑕᐅᓇᓂ ᐃᓕᓐᓂᐊᕐᕕᓃᐸᒃᑐᖅ, ᐃᓕᓴᐃᓪᓗᓂ ᐃᓅᓱᒃᑐᓂᒃ ᐃᓄᐃᑦ ᐃᓕᖅᑯᓯᖏᓐᓂᒃ ᖃᐅᔨᒪᓂᖏᓐᓂ ᐊᒻᒪᓗ ᑎᓕᐅᕆᕙᒃᑐᓂᒃ ᐃᓅᓱᒃᑐᓂᒃ ᐃᓕᓴᒍᑎᒋᔭᒥᓂᒃ ᐱᒻᒪᕆᖃᖁᓪᓗᓂᒋᑦ. ᔮᒃ ᒪᐃᔭᒋᔭᐅᖃᑦᑕᕐᓯᒪᔪᑦ ᐊᒻᒪᓗ ᓄᓇᓕᖕᒥ ᑲᑎᒪᔨᐅᖃᑦᑕᕐᓯᒪᓪᓗᑎ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.

ᓂᓚᐅᓚᖅ ᒥᐊᕆᐊᒻ ᐊᒡᓘᒃᑲᖅ (ᐅᕐᓱᖅᑑᕐᒥᐅᖅ) ᐃᓅᓯᓕᒫᕐᒥᓂ ᓯᕗᒧᒋᐊᕐᑎᑦᑎᓐᓇᖃᑦᑕᕐᓯᒪᔪᖅ ᐃᓄᐃᑦ ᐃᓕᖅᑯᓯᖏᓐᓂᒃ ᐊᒻᒪᓗ ᐅᖃᐅᓯᓕᕆᓂᕐᒥᒃ. ᓂᓚᐅᓚᖅ ᑲᒪᔨᐅᖃᑦᑕᕐᓯᒪᕗᖅ ᑐᑭᓕᐅᕈᑎᓂᒃ ᓇᑦᑎᓕᖕᒥᐅᑦ ᐅᖃᐅᓯᖏᑦ ᐊᑐᖅᑐᒋᑦ ᐅᖃᓕᒫᒐᒃᓴᕐᑕᖃᓐᓂᐊᕐᒪᑦ ᐃᓄᒃᑎᑑᖓᔪᓂᒃ. ᓂᐱᖃᖅᑎᐅᓪᓗᓂ ᐃᓄᐃᑦ ᐅᖃᐅᓯᖏᓐᓄᑦ, ᒥᔅ ᐊᒡᓘᒃᑲᖅ ᐃᓐᓇᕆᔭᐅᓪᓗᓂ ᐅᔨᒪᔨᒻᒪᕆᐅᔪᖅ ᐃᓕᓴᐃᓂᕐᒧᑦ ᐱᕈᕐᕕᑯᓐᓂ ᐊᒻᒪ ᑲᑎᒪᔨᐅᖃᑕᐅᓪᓗᓂ ᐃᓄᐃᑦ ᐅᖃᐅᓯᖏᓐᓂᒃ ᑕᐃᒎᓯᓕᐅᖅᑎᓄᑦ, ᑲᑎᒪᔨᐅᓂᕐᒥᒍᑦ ᖃᐅᔨᒪᓂᕐᒥᓂᒃ ᐃᓄᐃᑦ ᐅᖃᐅᓯᖏᓐᓂᒃ ᐃᓕᓴᑎᑦᑎᔪᓐᓇᐸᒃᑐᖅ. ᐃᒃᓯᕙᐅᑕᕆᔭᐅᖃᑦᑕᕐᓯᒪᔪᑦ ᐃᓄᐃᑦ ᖃᐅᔨᒪᔭᑐᖃᖏᓐᓄᑦ ᑲᑎᒪᔨᓄᑦ, ᖃᐅᔨᒪᔨᒋᐅᔪᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᑐᐊᒐᓄᑦ ᐊᒪ ᐃᓄᐃᑦ ᐃᓅᖃᑎᒌᓐᓂᖏᓐᓂᒃ ᑲᑐᔾᔨᖃᑎᒌᖏᓐᑦ ᐊᒻᒪᓗ ᓄᓇᕗᖕᒥ ᐃᓐᓇᐃᑦ ᐋᖅᑭᒃᓱᐃᒋᐊᕐᑏᑦ ᐱᕋᔭᒃᓯᒪᔪᓂᒃ ᑲᑎᒪᔨᕋᓛᖏᓐᓄᑦ.

ᑎᐊᕙᓐ ᒪᓂᒃ (ᖃᐅᓯᐅᑦᑐᒥᐅᑕᖅ) ᐃᓅᓱᒃᑐᑦ ᐊᖑᑦ ᐱᓪᓗᐊᑕᕆᔭᖃᖅᑐᑦ ᐃᓄᐃᑦ ᐱᐅᓯᖏᓐᓂᒃ ᐊᒻᒪ ᐊᔾᔨᓕᐅᕆᔨᐅᓪᓗᓂ. ᒥᔅᑕ ᒪᓂᒃ ᐊᐅᓪᓚᑎᓕᒃ ᕿᒻᒥᓂᒃ ᑲᑎᑦᑐᒋᑦ 9-ᓂᒃ ᕿᒻᒥᓕᒃ, ᐅᓄᕐᓯᒋᐊᕈᒫᕐᑐᓂᒋᓪᓗ. ᕿᒻᒥᓂᒃ ᐊᐅᓪᓚᑎᖃᕆᐊᓕᓚᐅᕐᓯᒪᔪᑦ  ᐃᑲᔪᕐᑕᐅᓪᓗᓂ ᐃᓚᓐᓇᒥᓄᑦ ᐊᒻᒪᓗ ᐃᓚᔮᒥᓄᑦ, ᐊᒻᒪᓗ ᖃᕆᓴᐅᔭᒃᑯᑦ ᑕᑯᕋᓐᓈᐸᒃᑐᓂ ᑕᕐᕆᔭᕈᑎᓂᒃ ᐊᖑᓇᓱᖑᐊᖅᑐᓂᒃ ᖄᓈᕐᒥᐅᓂᖑᒃᖑ. ᐃᓅᓱᒃᑑᓪᓗᓂ, ᐃᓕᓴᓪᓗᓂ ᐊᒻᒪᓗ ᐊᑑᑎᖃᖅᑎᑦᑐᓂᒋᑦ ᐃᓄᐃᑦ ᐃᓕᖅᑯᓯᖏᑦ ᖃᐅᔨᒪᓂᖏᓪᓗ, ᑎᐊᕙᓐ ᑕᑯᕐᕈᔾᔨᔪᒪᓲᖅ ᑲᒪᒋᔭᕆᐊᒃᓴᖅ ᖁᕕᐊᒋᔭᒥᓂᒃ, ᓴᓇᔪᓐᓇᕐᑕᒥᓂᒃ ᐊᒻᒪᓗ ᖃᐅᔨᒪᔭᒥᓂᒃ ᐊᒻᒪ ᐱᓇᓱᐊᕐᑐᓂ ᐸᕐᓇᒍᑎᒥᒃ ᐊᐅᓪᓚᑦᓯᔪᒪᓂᕐᒥᒃ ᐊᐅᓪᓚᕈᔾᔨᔨᐅᓂᕐᒧᑦ ᓇᖕᒥᓂᖅ ᐱᓕᕆᕕᖕᒥᓂᒃ. ᑭᖑᓂᐊᒍᑦ ᒪᖃᐃᑦᑎᐊᓚᐅᕐᑐᓂ, ᑎᐊᕙᓐ ᑕᑯᔭᐅᔪᓐᓇᕐᑐᑦ ᐱᓱᒃᑐᓂ ᐅᓂᐊᕐᑐᓂ ᖃᒧᑏᓐᓂᒃ ᐸᔪᑦᑎᕆᓪᓗᓂ ᓂᕿᓂᒃ ᓄᓇᖅᑲᑎᒥᓄᑦ.

ᐊᖓᔪᖅᑳᖅ ᑰᑦᑎᖅ ᐅᖃᖅᑲᓐᓂᕆᓪᓗᓂ, “ᑖᒃᑯᐊ ᐱᖓᓱᐃᑦ ᐱᕕᐊᕆᔭᒃᓴᑦᑎᐊᕙᑦ ᑕᒪᑦᑎᓐᓄᓕᒫᖅ. ᖁᔭᓐᓇᒦᒃ ᔮᒃ, ᓂᓚᐅᓚᖅ ᐊᒻᒪᓗ ᑎᐊᕙᓐ ᐃᑲᔪᕐᓯᒪᓂᒃᓯᓐᓄᑦ ᓄᓇᕗᖕᒥ ᐃᓅᖃᑎᒌᓄᑦ ᐊᒻᒪᓗ ᐃᓕᒃᕕᒃᓴᖃᑦᑎᑎᑎᓪᓗᓯ ᐅᕙᑦᑎᓐᓂᒃ”

ᐊᑐᓂᑦ ᐱᓕᐅᓯᐊᖅᑎᑕᐅᖃᐅᕗᑦ $500.

-30-

ᑐᑭᓯᒋᐊᒃᑲᓐᓂᕈᒪᒍᕕᑦ ᖃᐅᔨᒋᐊᕈᓐᓇᕐᐳᑎᑦ:

ᖃᔮᒻ ᐃᐊᓪᔅᕗᑦ
ᐊᖓᔪᖅᑳᖑᓂᕐᓴᖅ ᑐᓴᐅᒪᖃᑦᑕᐅᑎᓂᕐᒧᑦ ᖃᐅᔨᒪᔨᓕ
ᓄᓇᕗᑦ ᑐᙵᕕᒃ ᑎᒥᒐ

ᒪᓚᐃᔭ ᒥᑭᔾᔪᒃ
ᑐᖏᓕᖓ ᑐᑭᒧᐊᒃᑎᑦᑎᔨᐅᑉ − ᑐᓴᐅᒪᖃᑦᑕᐅᑎᓕᕆᔨᒃᑯᑦ
ᓄᓇᕗᑦ ᑐᙵᕕᒃ ᑎᒥᖓ