ᑐᓴᕋᑦᓴᓕᕆᔩᑦ

2009/10 ᐊᕐᕌᒍᑕᒫᖅᓯᐅᑏᑦ ᐅᓂᒃᑳᑦ ᐱᓪᓗᒋᑦ ᖃᓄᐃᓐᓂᖏᑦ ᐃᓄᐃᑦ ᐃᓕᖅᑯᓯᖏᑦ ᐊᒻᒪ ᐃᓅᖃᑎᒌᖕᓂᖏᓐᓄᑦ ᓴᖅᑭᑎᑕᐅᔪᑦ

(ᐊᒃᑑᕝᕙ 12, 2011 –ᐃᖃᓗᐃᑦ ᓄᓇᕗᑦ) ᓄᓇᕗᑦ ᑐᓐᖓᕕᒃᑯᑦ ᐊᖓᔪᖅᑳᖓᑦ ᑳᑎ ᑕᐅᑐᓐᖏ ᐅᓪᓗᒥ ᓴᖅᑭᑎᑦᓯᖅᑲᐅᔪᖅ ᑖᒃᑯᓂᖓ 2009/10 ᐊᕐᕌᒍᑕᒫᖅᓯᐅᑏᑦ ᐅᓂᒃᑳᑦ ᐱᓪᓗᒋᑦ ᖃᓄᐃᓐᓂᖏᑦ ᐃᓄᐃᑦ ᐃᓕᖅᑯᓯᖏᑦ ᐊᒻᒪ ᐃᓅᖃᑎᒌᖕᓂᖏᓐᓄᑦ, ᑕᐃᔭᐅᔪᖅ: ᐃᓄᐃᑦᐅᖃᐅᓯᖏᑦ ᓄᓇᕗᒥ. ᑖᒃᑯᐊ ᐅᓂᒃᑳᑦ ᓇᓗᓇᐃᔭᐃᔪᑦ ᒫᓐᓇ ᖃᓄᐃᓐᓂᖓᓂᒃ ᐃᓄᐃᑦ ᐅᖃᐅᓯᖏᑦ ᓄᓇᕗᓕᒫᒥ ᐊᒻᒪ ᐱᑕᖃᖅᑎᑦᓯᓪᓗᑎᒃ ᐆᒃᑑᑕᐅᔪᓐᓇᖅᑐᓂᒃ ᖃᓄᖅ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᑦ ᓄᓇᕐᔪᐊᓂ ᐅᖃᐅᓯᕐᒥᓂᒃ ᐅᑎᑦᑎᑦᕚᓪᓕᕆᐊᖃᒻᒪᕆᖕᓂᖏᓐᓂᒃ.

“ᐅᖃᐅᓰᑦ ᐊᓪᓗᕆᐊᕈᑕᐅᖕᒪᑕ ᓴᓐᖏᔪᒧᑦ ᐃᓕᖅᑯᓯᕆᔭᐅᔪᒧᑦ ᐊᒻᒪ ᐃᓅᖃᑎᒋᖕᓂᕐᒧᑦ. ᐃᓄᐃᑦ ᓇᓗᓇᐃᖅᓯᓯᒪᐃᓐᓇᖅᑐᑦ ᐊᕐᕌᒍᑲᓴᖕᓄᑦ 40-ᓄᑦ ᓴᐳᔾᔨᓯᒪᓂᖅ ᐃᓄᐃᑦ ᐅᖃᐅᓯᖏᓐᓂᒃ ᐱᒻᒪᕆᐅᔪᖅ ᓯᕗᒻᒧᐊᑦᓯᐊᖁᓪᓗᒋᑦ ᐃᓄᐃᑦ ᐃᖕᒥᓂᒃ ᒪᑭᒪᒐᓱᐊᕐᓂᕐᒧᑦ.” ᐅᖃᖅᑐᖅ ᑕᐅᑐᓐᖏ.

ᑕᐅᑐᓐᖏ ᑎᓕᐅᕆᔪᖅ ᒪᓕᒐᓕᐅᖅᑎᓂᒃ ᐊᒻᒪ ᓄᓇᕗᒧᑦ ᒪᓕᒐᓕᐅᖅᑎᕐᔪᐊᒥᒃ ᓕᐅᓇ ᐊᒡᓘᒃᑲᖅ ᐅᖃᓕᒫᖁᓪᓗᒋᑦ ᑖᒃᑯᓂᖓ ᐅᓂᒃᑳᓕᐊᕆᓯᒪᔪᓂᒃ ᐊᒻᒪ ᑎᓕᐅᖅᑐᒋᑦ ᒐᕙᒪᐅᔪᑦ ᖃᓄᐃᓕᐅᕆᐊᖁᑎᑲᑲᐅᑎᒋᖁᓪᓗᒋᑦ ᐃᓄᐃᑦ ᐅᖃᐅᓯᖏᑦᑕ ᐅᑎᖅᑎᑕᐅᔾᔪᑎᒃᓴᖏᓐᓂᓐᓄᑦ ᐱᓕᕆᐊᓂᒃ.

ᑖᒃᑯᐊ ᐊᕐᕌᒍᑕᒫᖅᓯᐅᑏᑦ ᐅᓂᒃᑳᑦ ᐊᕐᕌᒍᑕᒫᑦ ᓴᖅᑭᖃᑦᑕᕆᐊᖃᕐᒪᑕ ᒪᓕᒡᓗᒍ ᐋᑎᑯ 32.3.4 ᑖᒃᑯᓇᓂ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂ. ᐱᑕᖃᕆᐊᖃᖅᑎᑕᐅᖕᒪᑦ ᐋᑎᑯ 32−ᒧᑦᑦ, ᑖᒃᑯᐊ ᐅᓂᒃᑳᑦ ᓴᖅᑭᑎᑕᐅᓂᐊᖅᑐᑦ ᓄᓇᕗᑦ ᒪᓕᒐᓕᐅᕐᕕᐊᓂ ᐊᒻᒪ ᑲᓇᑕᐅᑉ ᒪᓕᒐᓕᐅᕐᕕᒡᔪᐊᖓᓂ. ᑕᒫᓂ ᐅᑭᐊᒃᓵᖑᓂᐊᖅᑐᒥ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ:
ᐅᖓᓯᒃᑐᒥᒃ ᐊᑭᖃᖏᑦᑐᖅ: