ᑐᓴᕋᑦᓴᓕᕆᔩᑦ

ᓄᓇᕗᖕᒥ ᐃᓄᐃᑦ ᐅᖃᖅᑐᑦ ᒐᕙᒪᑐᖃᒃᑯᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓄᑦ ᐱᖁᔭᒃᓴᖅ ᐊᓯᔾᔨᓪᓗᐊᕆᐊᓕᒃ ᐃᓄᐃᑦ ᐱᖃᓯᐅᔾᔭᐅᖁᔭᖏᑦ ᓴᖅᑭᖁᓪᓗᒋᑦ

(ᐃᖃᓗᐃᑦ, ᕕᕗᐊᕆ 5, 2019) — ᓄᓇᕗᑦ ᑐᙵᕕᒃᑯᑦ, ᑎᒥᐅᔪᖅ ᑭᒡᒐᑐᐃᓪᓗᓂ ᐃᓄᖏᓐᓂᒃ ᓄᓇᕘᑉ, ᖁᓅᕐᒥᓇᕐᓂᕋᐃᓪᓗᑎᒃ ᐱᓪᓗᒋᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᓐᓂᒃ ᐱᖁᔭᒃᓴᖅ ᐅᓪᓗᒥ ᓴᖅᑭᑕᐅᖅᑲᐅᑎᓪᓗᒍ ᒐᕙᒪᑐᖃᒃᑯᓐᓂᒃ ᑲᓇᑕᐅᑉ ᑲᑎᒪᕕᔾᔪᐊᖓᓂ, ᐊᒻᒪᓗ ᐱᖁᔭᒃᓴᙳᐸᓪᓕᐊᓕᕐᑎᓪᓗᒍ ᑲᒪᕙᒋᔭᐅᕙᓪᓕᐊᒍᑕᐅᓯᒪᓂᖓ.

ᐃᓄᒃᑐᑦ ᐃᓕᑕᕆᔭᐅᔾᔪᑎᖃᖅᓯᒪᔪᖅ ᒐᕙᒪᒃᑯᖏᑎᒍᑦ ᓄᓇᕘᑉ. ᓄᓇᕗᑦ ᐃᓚᒋᔭᐅᖃᑕᐅᖕᒪᑦ ᐃᓄᐃᑦ ᓄᓇᖓᓐᓄ, ᐃᓄᖕᓄᑦ ᓄᓇᒋᔭᐅᔪᓂ ᑲᓇᑕᒥ. ᐃᓄᐃᑦ ᓄᓇᖓᑦ ᐊᖏᓛᖑᖕᒪᑦ ᐃᓚᒋᔭᐅᓪᓗᓂ ᑲᓇᑕᒧᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᑐᖃᕐᒥᓂᒃ − ᐃᓄᒃᑐᑦ ᐊᑐᖅᑐᑎᒃ, ᖃᓪᓗᓈᑎᑑᙱᑦᑐᖅ ᐅᕝᕙᓗ ᐅᐃᕖᑎᑑᙱᑦᑐᖅ − ᓯᕗᓪᓕᐊᓪᓗᓂ ᐅᖃᐅᓯᕆᔭᐅᒻᒪ ᐃᓄᒋᐊᓐᓂᕐᓴᓄᑦ ᓄᓇᕗᖕᒥ.

ᑕᐃᒪᓐᓇᓴᐃᓐᓇ ᐅᖃᐅᓯᖃᖅᑲᐅᒻᒥᔪᑦ ᐃᓄᐃᑦ ᑕᐱᕇᑦ ᑲᑕᓇᒥ, ᑲᓇᑕᓕᒫᕐᒥ ᐃᓄᐃᑦ ᑎᒥᖓ, ᓄᓇᕗᑦ ᑐᒥᕕᒃᑯᑦ ᐊᖓᔪᖅᑳᖓᑦ ᐊᓗᑭ ᑰᑦᑎᖅ ᐅᖃᖅᑲᐅᔪᖅ “ᑖᓐᓇ ᐱᖁᔭᒃᓴᖅ ᐃᓚᑰᓗᐊᖅᑐᖅ. ᐱᑕᖃᙱᑦᑐᖅ ᓯᕗᒧᒋᐊᒃᑲᓐᓂᕈᑎᒃᓴᓂᒃ. ᑭᓯᐊᓂ ᐃᓕᓴᕐᓯᔾᔪᑕᐅᑐᐃᓐᓇᕐᑐᖅ: ᐅᖃᐅᓯᐅᒃᑲᓐᓂᑐᐃᓐᓇᕐᑐᑎᒃ ᐱᑕᖃᕇᖅᑐᑦ ᑲᓇᑕᐅᑉ ᑐᙵᕕᔾᔪᐊᖓᒍᑦ ᒪᓕᒐᖏᓐᓃᒃᑐᓂᒃ ᐊᒻᒪᓗ ᓄᓇᕐᔪᐊᕐᒥ ᑲᑐᔾᔨᖃᑎᒌᑦ ᐱᓂᐊᕐᓂᕋᕈᑎᒋᓯᒪᔭᖏᓐᓂᒃ; ᐊᒻᒪ ᓴᖅᑮᒍᑕᐅᓪᓗᓂ ᒐᕙᒪᒃᑯᑦ ᐃᖅᑲᓇᐃᔭᕐᑎᖏᓐᓄᑦ ᐱᓕᕆᕕᖕᒥ ᑕᐃᔭᐅᓪᓗᓂ ᓄᓇᖃᖅᑳᖅᓯᒪᔪᑦ ᐅᖃᕈᓯᖏᓐᓄᑦ ᑲᑎᒪᔨᓂᒃ.” ᖃᐅᔨᒪᔨᐅᓪᓗᑎᒃ ᑲᑎᒪᔨᐅᔪᑦ, ᐅᒡᒍᐊᓇᕐᑐᖅ ᐱᒻᒪᕆᐅᑎᑕᐅᖕᒪᑕ ᐱᖁᔭᒃᓴᑎᒍᑦ.

ᐱᖁᔭᒃᓴᖅ ᖄᖏᓐᓇᐃᖕᒪᑦ ᐊᑑᑎᖃᑦᑎᐊᕈᓐᓇᕐᑐᓂᒃ ᐃᓄᐃᑦ ᓯᕗᓪᓕᕐᐹᖑᑎᑕᖏᓐᓂᒃ ᖃᐅᔨᒪᔭᐅᒃᑲᑦᑕᐅᑦᑎᐊᓚᐅᕐᑐᑦ ᒐᕙᒪᑐᖃᒃᑯᓐᓄᑦ. ᐅᑯᐊᖑᕗᑦ:

• ᖃᓄᐃᓕᖓᓕᕐᓂᖏᑦ ᐅᓪᓗᒥᐅᔪᖅ ᐃᓄᒃᑐᑦ ᐅᖃᐅᓯᖅ ᐃᓄᐃᑦ ᓄᓈᓐᓂ ᐱᓪᓗᒋᑦ ᒐᕙᒪᑐᖃᒃᑯᑦ ᒪᓕᒐᖏᑦ ᐊᒻᒪᓗ ᐱᓕᕆᐊᖏᑦ;
• ᐊᑑᑎᖃᖅᑎᑕᐅᓂᖓ ᐃᓄᒃᑐᑦ ᒐᕙᒪᑐᖃᒃᑯᑦ ᐱᓕᕆᕕᖏᓐᓂᒃ ᐊᒻᒪᓗ ᐱᔨᑦᑎᕈᑎᖏᓐᓂᒃ ᐃᓄᐃᑦ ᓄᓇᖓᓐᓂ ᐊᒻᒪᓗ ᓇᓂᑐᐃᓐᓇᖅ ᐃᓄᐃᑦ ᐃᓄᒋᐊᓐᓂᖏᑦ ᑕᐃᒪᓐᓇ ᐱᔭᕆᐊᖃᕐᑎᓪᓗᒋᑦ;
• ᐱᑐᐃᓐᓇᐅᖏᑎᑕᐅᕕᖃᖏᓪᓗᑎᒃ ᑲᒪᒋᔭᕆᐊᖃᓐᓂᖏᑦ ᐳᕋᕕᓐᓯᓂ, ᓄᓇᕗᖕᒥ ᐊᒻᒪᓗ ᓄᓇᓖᑦ ᒐᕙᒪᒋᔭᖏᑦ, ᐃᑲᔪᕐᓯᕐᑕᐅᖁᓪᓗᒋᑦ ᐃᓄᒃᑐᑦ ᐱᓕᕆᔾᔪᑏᑦ ᐊᒻᒪᓗ ᐱᔨᑦᑎᕈᑏᑦ ᐅᑯᓄᖓ ᐃᓕᓐᓂᐊᕐᓂᓕᕆᓂᕐᒧᑦ, ᐋᓐᓂᐊᖃᓐᓇᖏᓐᓂᓕᕆᕐᒧᑦ ᐊᒻᒪᓗ ᐊᐅᓚᑕᐅᓂᖓᓄᑦ ᐃᖅᑲᖅᑐᐃᕕᓕᕆᔨᒃᑯᑦ;
• ᐊᑑᑎᖃᖅᑎᑕᐅᓂᖓ ᐃᓄᒃᑐᑦ ᒐᕙᒪᑐᖃᒃᑯᑦ ᑭᓇᒃᑯᑐᐃᓐᓇᕐᓄᑦ ᐱᔨᑦᑎᕈᑎᖏᓐᓄᑦ;
• ᒪᓕᒐᑦ ᐊᐅᓚᑦᓯᒍᑕᐅᒐᔭᕐᑐᑦ ᒐᕙᒪᑐᖃᒃᑯᑦ ᑮᓇᐅᔭᓕᕆᓂᕐᒧᑦ ᐃᑲᔪᕈᑎᖏᑦ ᐃᓄᒃᑐᑦ ᐅᖃᐅᓯᓕᕆᓂᕐᒧᑦ;
• ᐱᓕᕆᖃᑕᐅᓂᖏᑦ ᐃᓄᐃᑦ ᑭᒡᒐᑐᖅᑎᐅᔪᑦ ᑎᒥᐅᔪᓄᑦ ᐊᐃᕙᔾᔪᑎᖃᖅᑎᓪᓗᒋᑦ ᒐᕙᒪᐅᖃᑎᒌᒃᑐᑦ ᐊᖏᕈᑎᓂᒃ ᐱᓪᓗᒍ ᐃᓄᒃᑐᑦ ᐅᖃᐅᓯᖅ; ᐊᒻᒪᓗ,
• ᖃᖓᒃᑰᖓᔭᕆᐊᖃᓐᓂᕆᒐᔭᕐᑕᖏᑦ ᐊᑐᓕᕐᑎᑕᐅᓂᒃᓴᐅᔪᑦ, ᑕᑎᖃᓪᓗᑎᒃ ᓈᖕᒪᒃᑐᓂᒃ ᐱᖁᔭᓂᒃ ᐊᒻᒪᓗ ᐊᓯᖏᓐᓂᒃ.
• “ᑖᓐᓇ ᐱᖁᔭᒃᓴᖅ ᐱᐅᔫᒐᓗᐊᖅ”, ᐅᖃᖅᑲᐅᔪᖅ ᒥᔅ. ᑰᑦᑎᖅ. “ᐱᔾᔪᑕᐅᔪᑦ ᐱᒻᒪᕆᐅᔪᑦ ᐳᐃᒍᖅᑕᐅᖁᓇᒍ ᐅᖃᐅᓯᕐᐳᑦ ᐱᒡᒐᓇᕐᓂᕋᖅᑕᐅᔪᓅᖅᑕᐅᑐᐃᓐᓇᑎᓪᓗᒋᑦ. ᐱᔪᒪᒐᓗᐊᕋᑦᑕᓕ ᐱᓂᐊᕐᓂᕋᕈᑎᓂᒃ ᐊᒻᒪᓗ ᓴᖅᑭᑕᐅᒍᑎᒋᒐᔭᕐᑕᖏᓐᓄᑦ ᓯᕗᓂᑦᑎᓐᓂᒃ ᐊᑑᑎᖃᕈᓐᓇᕐᓯᒪᙱᑦᑐᓄᑦ ᐊᑐᐊᒐᓐᓄᑦ ᐱᖃᓯᐅᔾᔭᐅᓗᓂ ᐳᐃᒍᖅᓯᒪᓕᓚᐅᕐᑎᓪᓗᒋᑦ ᐅᖃᐅᓯᑐᖃᕐᒥᓂᒃ ᐊᐅᓪᓚᕐᑎᑕᐅᓪᓗᑎᖑᒃ ᐃᓕᓐᓂᐊᕆᐊᖅᑎᑕᐅᕙᓚᐅᕐᑐᓄᑦ.”
ᑐᙵᕕᒃᑯᑦ ᐅᖃᖅᑲᐅᔪᑦ ᖁᕕᐊᓱᙱᓐᓂᕋᖅᑐᑎᒃ ᑲᒪᒋᔭᐅᕙᓪᓕᐊᓂᕆᓚᐅᕐᑕᖓᓄᑦ ᐱᖁᔭᒃᓴᓕᐊᖑᓕᕐᑎᓪᓗᒍ ᐊᒻᒪ ᓴᖅᑭᑕᐅᑎᓪᓗᒍ ᒐᕙᒪᒃᑯᓐᓂᑦ, ᐊᒻᒪᓗ ᐃᓗᓕᖏᑦ ᐃᓚᑰᓗᐊᕐᑎᓪᓗᒋᑦ.
“ᑕᐃᒪᐃᒃᑲᓗᐊᕐᑎᓪᓗᒍ ᐅᖃᐅᓯᐅᖃᑦᑕᕐᓯᒪᓂᖓ ‘ᓴᖅᑮᖃᑎᒌᒍᓐᓇᕐᓂᖅ’ ᑖᓐᓇ ᐱᖁᔭᒃᓴᖅ ᑕᑯᒃᓴᐃᓂᖃᙱᑎᐊᕐᒪᑦ ᐃᓄᐃᑦ ᐱᖃᑕᐅᒍᑎᒋᓯᒪᔭᖏᓐᓂᒃ, ᐊᒃᓱᕈᕈᑎᖃᐃᓐᓇᕋᓗᐊᕐᑎᓪᓗᑕ ᐱᓕᕆᖃᑎᒌᓐᓂᕐᒥᒃ,” ᐅᖃᖅᑲᐅᔪᖅ ᑐᙵᕕᒃᑯᑦ ᐊᖓᔪᖅᑳᖓᑦ. “ᐊᒻᒪ ᐅᖃᕋᒪ ᐱᖃᑕᐅᓚᐅᙱᓐᓂᕋᐃᓪᓗᖓ, ᐱᖃᑕᐅᓚᐅᙱᓇᑦᑕ.”

ᑐᙵᕕᒃᑯᑦ ᖃᐅᔨᒪᕗᑦ ᐊᓪᓚᐃᑦ ᐊᒻᒪᓗ ᖃᓪᓗᓈᖓᔪᑦ ᐅᖃᐅᓯᑐᖃᒻᒥᓂᑦᑕᐅᖅ ᐳᐃᒍᐃᕙᓪᓕᐊᒻᒪᑕ ᐱᔾᔪᑕᐅᓂᖓ ᐊᒻᒪ ᓯᕗᓪᓕᖅᐹᖑᑎᑕᐅᓂᖓᓂᒃ. ᐃᑲᔪᕐᓯᓂᖃᑦᑎᐊᖅᑐᑦ ᒪᓕᒐᖅᑎᒎᖓᑎᑕᐅᓪᓗᑎᒃ ᐊᑑᑎᖃᕈᑎᒃᓴᖏᑦ.

ᑐᙵᕕᒃᑯᑦ, ᐱᓕᕆᖃᑎᖃᖅᑐᑎᒃ ᐃᓄᐃᑦ ᑕᐱᕇᒃᑯᓐᓂᒃ ᐊᒻᒪᓗ ᐊᓯᖏᓐᓂᒃ ᐃᓄᖕᓂᒃ ᑭᒡᒐᕐᑐᐃᔪᓂᒃ ᑎᒥᓂ, ᐱᓕᕆᖃᑕᐅᒻᒪᕆᒍᒪᕗᑦ ᑲᓇᑕᐅᑉ ᑲᑎᒪᕕᔾᔪᐊᖓᑕ ᑲᑎᒪᔨᕋᓛᒃᑯᖏᑦᑎᒍᑦ ᑲᒪᒋᔭᐅᕙᓪᓕᐊᔪᓂᒃ ᕿᒥᕐᕈᓂᐊᕐᓗᑎᒃ ᐱᖁᔭᒃᓴᓃᒃᑐᓂᒃ. ᑐᙵᕕᒃᑯᑦ ᑐᓴᐅᒪᑎᑦᑎᐊᓐᓂᐊᕐᐳᑦ ᐃᓄᖕᓂᒃ ᐊᒻᒪᓗ ᐊᓯᖏᓐᓂᒃ ᑲᓇᑕᒥᐅᑕᓂᒃ ᐱᓪᓗᒋᑦ ᑐᑭᓕᐅᕈᑎᒋᓯᒪᔭᖏᑦ ᐊᒻᒪᓗ ᐊᑐᓕᕈᒪᔭᖏᑦ.

ᐊᖓᔪᖅᑳᖅ ᑰᑦᑎᖅ ᐅᖃᖅᑲᐅᔪᑦ ᑐᙵᕕᒃᑯᑦ ᐃᑲᔪᕐᓂᕆᓯᒪᔭᖏᑦ ᑲᓇᑕᐅᑉ ᑲᑎᒪᕕᔾᔪᐊᖓᓂ ᕿᒥᕐᕈᓂᐅᔪᑦ ᐃᓚᖃᓐᓂᐊᕐᐳᑦ ᑎᓕᐅᕈᑎᓂᒃ ᒥᓂᔅᑕᐅᔪᓄᑦ ᐊᓯᔾᔨᕈᑕᐅᖁᔭᐅᔪᓂᒃ ᐱᖁᔭᒃᓴᒥ ᑲᓇᑕᐅᑉ ᑲᑎᒪᕕᔾᔪᐊᖓᓂᒃ ᕿᒥᕐᕈᔭᐅᓂᖃᓕᕐᐸᑕ, ᐋᖅᑭᒋᐊᕈᑕᐅᔭᕆᐊᓕᓐᓂᒃ ᐊᒻᒪᓗ ᐃᖅᑲᒋᔭᖃᓪᓗᑎᒃ ᐃᓄᐃᑦ ᓯᕗᓪᓕᖅᐹᖑᑎᑕᖏᓐᓂᒃ.

-30-

ᑐᑭᓯᒋᐊᒃᑲᓐᓂᕈᓐᓇᕐᐳᑎᑦ:

ᐳᕌᓐᑯ ᐳᓴᐃᒥ
ᑐᑭᒧᐊᒃᑎᑦᑎᔨᐅᑲᐃᓐᓇᕐᑐᖅ ᑐᓴᐅᒪᖃᑦᑕᐅᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ