ᓴᒃᑯᑕᐅᑲᐅᑎᒋᔭᕆᐊᓕᒃ
(ᒪᐃ 6, 2024 – ᐃᖃᓗᐃᑦ, ᓄᓇᕗᑦ) ᕿᔅᓵᓇᒻᒪᕆᑦᑐᒥᒃ ᓄᓇᕗᑦ ᑐᙵᕕᒃᑯᑦ ᑎᒥᖓ ᑐᓴᓚᐅᖅᑐᑦ ᐃᓅᒍᓐᓃᖅᑐᒥᓂᐅᓂᖓᓂᒃ ᓛᔭᕋᔅ ᐋᕆᐊᒃ ᒥᑎᒪᑕᓕᖕᒥᐅᖅ. ᓇᓪᓕᒋᕙᑦᑎᒌᕈᒪᕙᕗᑦ ᖃᑕᙳᑎᓂᖏᑦ, ᐱᖃᑎᖏᑦ, ᐊᒻᒪᓗ ᓄᓇᓕᐅᔪᖅ.
ᒥᔅᑕ ᐋᕆᐊᒃ ᐊᖓᔪᖅᑳᖑᓚᐅᖅᓯᒪᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᖕᓂᒃ ᐊᒻᒪᓗ ᓄᓇᕗᑦ ᑐᙵᕕᒃ ᑎᒥᖓᓄᑦ ᑲᑎᒪᔨᐅᖃᑕᐅᓪᓗᓂ 1996-ᒥ ᑎᑭᑦᑐᒍ 1998−ᒧᑦ. ᓯᕗᓂᐊᒍᑦ ᐊᔾᔨᒌᙱᑦᑐᓂᒃ ᐃᖅᑲᓇᐃᔮᓂᑦ ᐃᖅᑲᓇᐃᔭᓚᐅᖅᓯᒪᔪᖅ ᓄᓇᕗᑦ ᑐᙵᕕᒃ ᑎᒥᖓᓂᒃ, ᑐᑭᒧᐊᑦᑎᑦᑎᔨᐅᓚᐅᖅᓯᒪᒋᕗᖅ ᐱᕙᓪᓕᐊᔪᓕᕆᔨᒃᑯᓐᓄᑦ ᐊᒻᒪᓗ ᑐᑭᒧᐊᑦᑎᑦᑎᔨᐅᓪᓗᓂ ᑐᓴᐅᒪᔪᓕᕆᔨᒃᑯᓐᓄᑦ.
ᒥᔅᑕ ᐋᕆᐊᒃ ᐊᑯᓂᐊᓗᒃ ᐃᖅᑲᓇᐃᔮᖃᕐᓂᑰᕗᖅ ᑐᓵᔨᐅᓪᓗᓂ ᐊᒻᒪᓗ ᑐᑭᓕᐅᕆᔨᐅᓪᓗᓂ. ᐃᖅᑲᓇᐃᔭᓚᐅᖅᓯᒪᔪᖅ ᐃᓄᐃᑦ ᑕᐱᕇᒃᓴᑦ ᑲᓇᑕᒥ (ᐃᓄᐃᑦ ᑕᐱᕇᒃᓴᑦ ᑲᓇᑕᒥ, ᒫᓐᓇ ᑕᐃᔭᐅᕙᓕᖅᑐᖅ ᐃᓄᐃᑦ ᑕᐱᕇᑦ ᑲᓇᑕᒥ) 1976-ᒥ ᑎᑭᑦᑐᒍ 1980−ᒧᑦ, ᑐᑭᓕᐅᕆᔨᐅᓚᐅᖅᓯᒪᓪᓗᓂ 1976-ᒥ ᑲᑎᒪᔨᐅᖃᑎᒌᑦᑐᓄᑦ ᐃᓄᐃᑦ ᑕᐱᕇᒃᓴᑦ ᑲᓇᑕᒥ ᑲᑎᒪᔨᖏᖕᓄᑦ ᐊᒻᒪᓗ ᓄᓇᑦᓯᐊᕐᒥ ᓄᓇᑖᕐᓂᕐᒧᑦ ᑲᑎᒪᔨᕋᓛᒃᑯᓐᓄᑦ, ᐅᖃᖃᑎᒌᒋᐊᙵᓕᖅᑐᒥᓂᐅᑎᓪᓗᒋᑦ ᓄᑖᕐᒥᒃ ᐅᑭᐅᖅᑕᖅᑐᒥ ᑲᓇᑕᑉ ᐊᕕᑦᑐᖅᓯᒪᔪᑖᕋᓱᐊᓕᖅᑎᓪᓗᒋᑦ ᓄᓇᕗᙳᕋᔭᖅᑐᒥᒃ.
ᒥᔅᑕ ᐋᕆᐊᒃ ᐅᐸᒍᑎᓯᒪᓚᐅᖅᓯᒪ 1993-ᒥ ᐊᑎᓕᐅᖅᑕᐅᓂᖓᑕ ᓄᓇᕗᑦ ᓄᓇᑖᕐᓂᕐᒧᑦ ᐊᖏᕈᑎᖓᓂᒃ, ᐊᒻᒪᓗ ᐊᑎᓕᐅᕈᓯᖃᖅᑐᖅ ᑎᑎᖅᑲᒥᒃ ᑕᐅᑐᑦᑎᐅᓪᓗᓂ ᑭᒡᒐᖅᑐᐃᔪᖅ ᐃᓄᖕᓂᒃ ᓄᓇᕗᒻᒥ ᓄᓇᑖᕕᒋᓯᒪᔭᖓᓄᑦ. ᒫᓐᓇᒫᖑᓂᖅᓴᕐᓗ, ᒥᔅᑕ ᐋᕆᐊᒃ ᓯᕗᓪᓕᖅᐸᐅᓪᓗᓂ ᐊᖓᔪᖅᑳᕆᔭᐅᓚᐅᖅᑐᖅ ᓄᓇᕗᒻᒥ ᐃᓐᓇᒻᒪᕇᑦ ᑲᑐᔾᔨᖃᑎᒌᖏᖕᓄᑦ, ᖃᑭᒍᑎᒃᓴᓕᐅᙱᑦᑐᑦ ᐃᓐᓇᒻᒪᕆᐅᔪᓂᑦ ᑭᒡᒐᖅᑐᐃᔩᑦ ᑲᑐᔾᔨᖃᑎᒌᖓ.
ᒥᔅᑕ ᐋᕆᐊᒃ ᐃᖅᑲᐅᒪᔭᐅᑦᑎᐊᕐᓂᐊᕐᒥᔪᖅ ᐱᙳᐊᕈᒪᐅᓂᖓᓂᒃ, ᐱᓗᐊᖅᑐᒍ ᕼᐋᑭᖅᑎᓂᒃ ᑭᒡᒐᖅᑐᐃᔨᒻᒪᕆᐅᓪᓗᓂ. ᑕᑯᔭᐅᖏᓐᓇᕈᔪᒃᐸᓚᐅᖅᑐᖅ ᐃᑲᔪᖅᑐᐃᓪᓗᓂ ᓄᓇᓕᖓᓂ ᐱᙳᐊᖅᑐᓂᑦ, ᐊᒻᒪᓗ ᐅᐸᒍᑎᓯᒪᖃᑦᑕᓚᐅᕐᓂᖓ ᑭᙴᒪᒋᔭᐅᓂᐊᖅᑐᖅ ᐊᒥᓱᓄᑦ ᐃᓅᖃᑎᒋᕙᓚᐅᖅᑕᖏᖕᓄᑦ. ᓄᓇᕗᑦ ᑐᙵᕕᒃ ᑎᒥᖓ ᐃᓚᒥᓂᒃ ᐱᖃᑎᒥᓂᓗ ᕿᔅᓵᖃᑎᖃᖅᑐᑦ ᒥᔅᑕ ᐋᕆᐊᑉ ᐃᓅᒍᓐᓃᓚᐅᕐᓂᖓᓂᒃ.
-30-
ᐱᕙᓪᓕᐊᔪᓕᕆᔨᒃᑯᓐᓄᑦ ᖃᐅᔨᒃᑲᕋᒃᓴᖅ:
ᑭᐊᕙᓐ ᖃᑉᓗᑦᓯᐊᖅ
ᑐᑭᒧᐊᑦᑎᑦᑎᔨ ᑐᓴᐅᒪᔪᓕᕆᔨᒃᑯᓐᓄᑦ
ᓄᓇᕗᑦ ᑐᙵᕕᒃ ᑎᒥᖓ
