ᐃᖅᑲᓇᐃᔮᑦᓴᑦ

ᐊᐅᓚᑦᓯᔨ, ᓯᓚ ᐊᓯᔾᔨᖅᐸᓪᓕᐊᓂᖓᓄᑦ

ᐊᖓᔪᖄᖃᕐᓗᑎᑦ ᑐᑭᒧᐊᒃᑎᑎᔨᒥᒃ ᖃᐅᔨᓴᖅᑎᑦ, ᐅᔾᔨᖅᑐᖅᑎᑦ ᖃᐅᔨᓴᖅᑕᐅᔪᓂᒃ ᐊᒻᒪ ᖃᓄᐃᓕᖓᓂᐊᕐᓂᖓᓄᑦ ᖃᐅᔨᓴᖅᑕᐅᔪᖅ, ᐊᐅᓚᑦᓯᔨᐅᓂᐊᖅᑐᖅ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᓕᕆᐊᖃᕐᓂᐊᖅᐳᖅ ᓯᕗᓕᖅᑎᐅᓗᓂ ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦᑕ ᓯᕗᓪᓕᖅᐸᐅᖁᔭᖏᓐᓂᒃ ᓯᓚᐅᑉ ᐊᓯᔾᔨᖅᐹᓪᓕᐊᓂᖓᓄᑦ ᐱᔾᔪᑎᖃᖅᑐᓂᒃ ᐊᒻᒪ ᐱᓕᕆᐊᖃᕐᓗᓂ ᐃᑲᔪᖅᑐᐃᓂᕐᒧᑦ, ᑭᒡᒐᖅᑐᐃᓂᕐᒧᑦ, ᐊᑐᐊᒐᕐᓂᒃ ᓇᓗᓇᐃᔭᐃᓂᕐᒧᑦ ᐊᒻᒪ ᖃᐅᔨᓴᕐᓂᖅ ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ ᐱᓕᕆᖃᑕᐅᖁᓪᓗᒋᑦ ᑕᒪᒃᑯᓂᖓ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᔾᔪᑎᖃᖅᑐᓂᒃ. ᐃᖅᑲᓇᐃᔭᖅᑎᑖᕆᔭᐅᓂᐊᕈᕕᑦ; ᓯᕗᓕᖅᑎᐅᓂᐊᖅᐳᑎᑦ ᐱᓕᕆᐊᖃᕐᓗᑎᑦ ᐱᕙᓪᓕᐊᑎᑎᓂᕐᒧᑦ ᐊᑐᓕᖅᑎᑎᓂᕐᒧᑦ ᓄᑖᓂᒃ ᓄᓇᕗᒥ ᐃᓄᖕᓄᑦ−ᐱᓕᕆᐊᕆᔭᐅᓯᒪᔪᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐸᕐᓇᐅᑎᒃᓴᓂᒃ ᐊᒻᒪ ᑕᒪᕐᒥᒃ ᐱᓕᕆᐊᑦ ᓄᓇᕗᑦ ᑐᓐᖓᕕᒃᑯᓐᓄᑦ ᑲᒪᒋᔭᐅᓂᐊᖅᑐᓂᒃ. ᖃᐅᔨᒪᑎᒋᔭᐅᓂᐊᖅᐳᑎᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦᑕ ᐱᒍᒪᔭᖏᓐᓂᒃ ᓄᓇᕗᒥ, ᑲᓇᑕᒥ ᓯᓚᕐᔪᐊᒥᓗ ᖃᓄᐃᓕᐅᕈᑎᒃᓴᓂᒃ ᓯᓚ ᐊᓯᔾᔨᖅᐸᓪᓕᐊᓂᖓᓂ ᐋᖅᑭᒐᓱᐊᕈᑎᒃᓴᓂᒃ ᓱᖏᐅᑎᔭᐅᒋᐊᖃᖅᑐᓂᒡᓗ. ᐱᓕᕆᔨᑖᕆᔭᐅᓂᐊᕐᓗᑎᑦ ᐊᓯᖏᓐᓂᒃ ᐱᓕᕆᕕᖕᓂᒃ ᐱᓕᕆᖃᑎᖃᓪᓚᕆᖕᓂᐊᖅᐳᑎᑦ, ᐊᕕᒃᑐᖅᓯᒪᓂᐅᔪᓂᒃ ᐱᓕᕆᕕᖕᓂᒃ, ᒐᕙᒪᓂᒃ, ᑲᑐᔾᔨᖃᑎᒌᓂᒃ, ᓄᓇᓕᖕᓂᒃ, ᑲᓇᑕᐅᑉ ᒐᕙᒪᒃᑯᖏᑦᑕ ᐱᓕᕆᕕᖏᓐᓂᒃ ᐊᒻᒪ ᒐᕙᒪᒃᑯᓐᓂᒃ ᐊᐅᓪᓛᑦᓯᐊᖅᑐᓂᒃ ᐊᑲᐅᔪᓂᒃ ᐱᓕᕆᐊᖃᖁᓪᓗᒍ ᐊᑐᐊᒐᓂᒃ ᐱᕙᓪᓕᐊᔭᐅᑦᓯᐊᖁᓪᓗᒋᑦ ᐊᑐᖅᑕᐅᑦᓯᐊᖁᓪᓗᒋᓪᓗ. ᐊᐅᓚᑦᓯᖃᑦᑕᕐᓂᐊᖅᐳᑎᑦ ᐱᕙᓪᓕᐊᑎᑕᐅᓂᖏᓐᓄᑦ, ᐊᑐᓕᖅᑎᑕᐅᕙᓪᓕᐊᓂᖏᓐᓄᑦ ᖃᓄᐃᓕᖓᓂᖓᓄᑦ ᖃᐅᔨᔭᐅᓯᒪᓕᖅᑐᑦ ᐊᑐᐊᒐᐃᑦ, ᐸᕐᓇᒃᓯᒪᒍᑎᖏᑦ ᐊᒻᒪ ᐱᓕᕆᐊᒃᓴᐃᑦ ᓯᓚᐅᑉ ᐊᓯᔾᔨᖅᐹᓪᓕᐊᓂᖓᓄᑦ ᐱᔾᔪᑎᖃᖅᑐᑦ, ᐃᓚᐅᑎᑕᐅᓗᑎᒃ ᓯᓚᐅᑉ ᐊᓯᔾᔨᖅᓯᒪᓕᕐᓂᖓᓄᑦ ᖃᓄᐃᓕᖓᒍᑕᐅᓕᖅᑐᑦ, ᓱᖏᐅᑎᒍᑎᑦ ᐊᒻᒪ ᐋᖅᑭᒃᓱᖅᑕᐅᒍᑎᖏᑦ; ᐱᓕᕆᐊᖃᕐᓗᑎᑦ ᑕᒪᐃᑎᒍᑦ ᖃᓄᐃᓕᖓᓂᐊᕐᒪᖔᑕ ᐱᕙᓪᓕᐊᑎᑎᓗᑎᒃ ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ ᐊᒻᒪ ᐸᕐᓇᒃᓯᒪᒍᑎᒃᓴᖏᑦ ᐋᖅᑭᒃᓱᐃᒐᓱᒡᓗᑎᒃ ᓯᓚ ᐊᓯᔾᔨᖅᐸᓪᓕᐊᓂᖓᓄᑦ ᐱᔾᔪᑎᖃᖅᑐᓂᒃ ᓯᕗᓪᓕᖅᐸᐅᔪᑦ; ᓯᕗᓕᖅᑎᐅᓂᐊᖅᐳᑎᑦ ᑲᒪᔨᐅᓗᑎᓪᓗ ᓯᓚᐅᑉ ᐊᓯᔾᔨᖅᐸᓪᓕᐊᒍᑎᖏᓐᓂᒃ ᑐᓴᐅᒪᑎᑎᒍᑎᖃᕐᓗᑎᑦ, ᐃᑲᔪᖅᑕᐅᒋᐊᖃᕐᓂᖅᓴᓂᒃ ᐃᑲᔪᕐᓂᖅ ᐊᒻᒪ ᐅᖃᓪᓚᐅᑎᖃᖃᑦᑕᕐᓂᖅ ᐱᓕᕆᕕᐅᑉ ᐃᓗᐊᓄᑦ ᐊᒻᒪ ᓯᓚᑖᓄᑦ. ᐊᒻᒪ ᓯᕗᓕᖅᑎᐅᓗᓂ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᑮᓇᐅᔭᓕᕆᓂᕐᒧᑦ ᐊᒻᒪ ᐃᖅᑲᓇᐃᔭᖅᑐᓕᕆᓂᕐᒧᑦ ᐊᐅᓚᑦᓯᔨᐅᓂᕐᒧᑦ ᐊᒻᒪ ᑭᒡᒐᖅᑐᐃᓗᓂ ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ ᐊᒻᒪ ᐱᓕᕆᕕᖓ ᐊᔾᔨᒌᖏᑦᑐᑦ ᓄᓇᓕᖕᓂ/ᓄᓇᓕᑦ ᐊᕕᒃᑐᖅᓯᒪᓂᖏᑦᑕ ᐊᖓᔪᖄᖃᕐᕕᖕᒥ/ᑲᓇᑕᒥᓗ ᑲᑎᒪᔨᕋᓛᖏᓐᓂ, ᑲᑎᒪᓂᕆᔭᐅᔪᓂᓗ ᐊᒻᒪ ᐱᓕᕆᐊᖃᖅᑐᓂ ᐱᔾᔪᑎᖃᖅᖢᑎᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ. ᐋᖅᑭᒃᓱᐃᓂᐊᖅᐳᑎᑦ ᐱᓕᕆᖃᑎᖃᕐᓂᐊᖅᐳᑎᑦ ᐱᓕᕆᖃᑎᖃᐃᓐᓇᕐᓗᑎᓪᓗ ᐊᓯᖏᓐᓂᒃ ᐱᓕᕆᕕᐅᔪᓂᒃ ᐊᓯᖏᓐᓂᒡᓗ, ᑲᑐᔾᔨᖃᑎᒌᓂᒃ ᐊᒻᒪ ᑐᓴᐅᒪᑎᑎᓗᑎᑦ ᑭᒃᑯᑐᐃᓐᓇᕐᓄᑦ ᐊᒻᒪ ᐃᓕᓐᓂᐊᖅᓯᒪᐃᓐᓇᕐᓗᑎᑦ ᖃᐅᔨᒪᔭᐅᒋᐊᓕᖕᓂᒃ, ᐱᔭᕆᐊᑐᔪᓂᒡᓗ ᐊᒻᒪ ᑎᑎᖃᓕᕆᒍᑎᒃᓴᓂᒃ.

 

ᐊᐱᖅᓱᖅᑕᐅᓂᐊᕈᕕᑦ ᐱᓕᕆᐊᒃᓴᒧᑦ; ᐃᓕᓐᓂᐊᕌᓂᒃᓯᒪᒋᐊᖃᖅᐳᑎᑦ Master’s Degree-ᖑᓂᕋᖅᑕᐅᔪᒥᒃ ᑕᐃᒪᓐᓇ ᐱᔾᔪᑎᖃᖅᑐᓂᒃ ᐅᑭᐅᓂᒡᓗ ᒪᕐᕉᖕᓂᒃ ᐱᓕᕆᐊᕆᓯᒪᓗᒍ; ᐅᕙᓘᓐᓃᑦ ᖁᑦᓯᖕᓂᖅᓴᒥᒃ ᐃᓕᓐᓂᐊᕌᓂᒃᓯᒪᓗᓂ ᓯᓚᑦᑐᖅᓴᕐᕕᔪᐊᒥ  Bachelor’s Degree−ᖑᓂᕋᖅᑕᐅᔪᒥᒃ ᑕᐃᒪᓐᓇ ᐃᓕᓐᓂᐊᕐᕕᓪᓚᕆᖕᒥ ᐅᑭᐅᓄᑦ ᓯᑕᒪᓄᑦ ᐱᓕᕆᐊᕆᓯᒪᓗᓂᐅᒃ; ᐅᕙᓘᓐᓃᑦ ᓯᓚᑦᑐᖅᓴᕐᕕᖕᒥ ᓇᓗᓇᐃᒃᑯᑕᖅᑖᖅᓯᒪᓗᓂ ᑕᐃᒪᓐᓇ ᐱᓕᕆᓯᒪᓂᕐᒧᑦ ᐅᑭᐅᓂᒃ 7−ᓂᒃ ᐊᐅᓚᑦᓯᔨᐅᕙᓪᓕᐊᖃᑕᐅᓯᒪᓪᓗᓂ. ᖃᐅᔨᒪᑦᓯᐊᕆᐊᖃᖅᐳᑎᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐊᒻᒪ ᖃᓄᖅ ᐃᒃᐱᖕᓂᐊᒍᑕᐅᔪᑦ, ᖃᐅᔨᓴᕈᑎᑦ, ᓱᖏᐅᑎᒍᑎᑦ ᐊᒻᒪ ᐋᖅᑭᒃᓱᖅᑕᐅᒍᑎᑦ ᓄᓇᕗᒥ. ᑐᑭᓯᐅᒪᑦᓯᐊᕐᓗᓂ ᑲᓇᑕᐅᑉ, ᖃᓪᓗᓈᑦ ᓄᓇᖓᓐᓂ ᐊᕕᒃᑐᖅᓯᒪᔪᑦ ᐊᒻᒪ ᓇᓪᓕᐊᑐᐃᓐᓇᐃᑦ ᐅᑭᐅᖅᑕᖅᑐᒥ ᐱᖓᓱᓂ ᓄᓇᓕᑦ ᐱᖁᔭᖏᓐᓂᒃ, ᐊᖏᕈᑎᖏᓐᓂᒡᓗ, ᐱᓕᕆᐊᖏᓐᓂᒡᓗ ᐊᒻᒪ ᐱᓕᕆᐊᕆᒋᐊᖃᖅᑕᖏᓐᓂᒃ ᐱᔾᔪᑎᒋᓪᓗᒍ ᓯᓚᐅᑉ ᐊᓯᔾᔨᖅᐸᓪᓕᐊᓂᖓ ᐃᓚᐅᓪᓗᑎᒃ ᑐᑭᓯᐅᒪᑦᓯᐊᕐᓗᓂ ᓯᓚᕐᔪᐊᒥ ᑲᑐᔾᔨᖃᑎᒌᑦ UN ᐊᒻᒪ ᐊᓯᖏᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᖃᓄᐃᓕᖓᒍᑕᐅᔪᑦ ᐊᖏᕈᑕᐅᓯᒪᔪᓪᓗ ᐊᒻᒪ ᖃᓄᖅ ᑐᑭᖃᕐᓂᖏᓐᓄᑦ ᑲᓇᑕᒥᐅᓄᑦ ᐊᒻᒪ ᓄᓇᕗᒥ ᐊᑐᐊᒐᓄᑦ ᐊᒻᒪ ᑮᓇᐅᔭᓕᐅᕈᑎᓄᑦ. ᐊᐅᓚᑦᓯᔨᐅᓂᕐᒧᑦ ᐊᔪᖏᑦᓯᐊᕐᓗᓂ ᐱᕙᓪᓕᐊᑎᑎᔪᓐᓇᕐᓗᓂ ᐊᑐᓕᖅᑎᑎᔪᓐᓇᕐᓗᓂᓗ ᐸᕐᓇᐅᑎᖃᕈᓐᓇᑦᓯᐊᕐᓗᓂᓗ ᓄᑖᓂᒡᓗ ᐱᓕᕆᐊᖃᕈᓐᓇᕐᓗᓂ ᐱᓕᕆᕕᐅᑉ ᐃᓗᐊᓂ, ᐊᒻᒪ ᒥᐊᓂᖅᓯᓗᓂ ᑲᒪᒋᔭᖃᕐᓗᓂ ᐱᓕᕆᔨᓂᒃ, ᑎᑎᕋᕈᓐᓇᑦᓯᐊᕐᓗᓂ ᐅᖃᓪᓚᒍᓐᓇᑦᓯᐊᕐᓗᓂᓗ ᑐᑭᓯᓇᑦᓯᐊᕐᓗᓂ, ᓇᓗᓇᐃᑦᓯᐊᖅᓯᒪᓗᓂ ᑐᓴᖅᑎᑎᑲᐅᑎᒋᕙᒡᓗᓂᓗ ᑕᐃᒪᓐᓇ ᐱᔭᐅᒋᐊᖃᖅᑐᓂᒃ. ᑭᒃᑯᑐᐃᓐᓇᕐᓂᒃ ᐃᓕᓐᓂᐊᖅᑎᑎᖃᑦᑕᕐᓂᑰᒋᐊᖃᖅᐳᑎᑦ, ᐊᒻᒪ ᖃᐅᔨᒃᑲᐃᔪᓐᓇᑦᓯᐊᕐᓗᑎᑦ ᐊᐅᓚᑦᓯᔨᐅᖃᑕᐅᔪᓄᓪᓗ ᐊᑲᐅᖏᓕᐅᕈᑕᐅᔪᓂᒡᓗ ᑲᒪᑦᓯᐊᕐᓗᓂ ᐋᖅᑭᒃᓱᐃᔪᓐᓇᕐᓗᓂ ᐱᕕᒃᓴᖃᖅᑎᑕᐅᓗᓂᓗ ᐱᐊᓂᒃᓯᒪᖃᑦᑕᕆᐊᖃᕐᓗᓂ ᐱᓕᕆᐊᒥᓂᒃ, ᐱᔭᕆᐊᑐᔪᓂᒃ ᑐᑭᓯᐅᒪᒍᑎᓂᒃ ᐊᒥᓱᓂᒃ ᐱᓕᕆᐊᖃᕆᐊᖃᕐᓗᓂ ᐊᐅᓚᑦᓯᑦᓯᐊᕐᓗᓂᓗ ᐱᓕᕆᐊᒃᓴᓕᒻᒪᕆᐅᒐᓗᐊᕐᓗᓂ.

 

ᐃᓄᐃᑦ ᐊᑎᖃᖃᑦᑕᐅᔪᑦ ᓄᓇᕗᑦ ᐊᖏᕈᑎᖓᓐᓂᒃ ᐱᓇᓱᖄᑕᐅᕐᕈᓐᓇᖅᑐᐃᑦ

 

 

ᑮᓇᐅᔭᓕᐊᖓ ᐱᒋᐊᖅᑳᕈᑎᖃᕐᓂᐊᖅᐳᖅ $111,147.00 ᐊᕐᕌᒍᒧᑦ ᐊᒻᒪ (ᑮᓇᐅᔭᓕᐅᕐᓂᖅᓴᐅᓗᓂ ᐊᔪᖏᓕᖅᐸᓪᓕᐊᓂᖓᓄᑦ ᒪᓕᒡᓗᒍ) ᐊᒻᒪ ᐃᑲᔪᑏᑦ ᐊᑐᐃᕐᓇᐅᔪᐃᑦ ᑮᓇᐅᔭᓕᐊᖏᓐᓄᑦ ᒪᓪᓕᒡᓗᑏᑦ ᑕᒻᒪᑯᓄᖓ ᐋᕿᒃᓱᕐᑕᐅᑎᐊᕐᓯᒪᔪᒥ ᐃᖃᓇᐃᔭᕐᑎᐅᔪᓄᑦ ᐃᓐᓇᕐᓯᐅᑕᐅᓂᐊᕐᑐᓂᒃ ᐃᑲᔪᑏᑦ ᐊᒻᒪ ᐃᖃᓇᐃᔭᑏᑦ ᓇᓪᓕᐅᒃᑯᒫᖏᓄᑦ ᐊᒻᒪ ᓄᖃᖓᒍᑕᐅᓂᐊᕐᑐᓂᒃ ᐃᑲᔫᑎᖃᕐᓗᓂ.

 

ᐃᓪᓗᒥᒃ ᐊᒻᒪᓗ ᐃᓪᓗᒧᑦ ᐃᑲᔪᖅᑕᐅᔾᔪᑎ $27,600 ᐊᕐᕌᒍᒧᑦ.

 

ᖃᐅᔨᒋᐊᕐᕈᓐᓇᕐᑐᑎᑦ ᐃᑲᓇᐃᔭᑦᓴᐅᑉ ᐱᓪᓗᒍ ᖃᐅᔨᒋᐊᓪᓗᑏᑦ: 

 

ᐃᖅᑲᓇᐃᔭᖅᑐᓕᕆᔨᒃᑯ

ᓄᓇᕗᑦ ᑐᙵᕕᒃ ᑎᒥᖓ

ᑲᖏᖅᖠᓂᖅ, ᓄᓇᕗᑦ X0C 0G0

ᐅᖄᓚᐅᑎᑖ: 867-645-5440

ᓱᑲᔪᒃᑯᑦ: 867-645-5414

ᒪᑐᕕᑦᓴᖓ ᐅᓪᓗᖅ: ᑎᓴᒻᐱᕆ 2, 2022

 

Download (PDF, 214KB)