ᐱᖁᓯᖅᓱᐃᔪᖅ ᐃᑲᔪᖅᑎ ᐱᕕᒃᓴᖃᕈᑕᐅᔪᖅ ᓄᓇᕗᒻᒥ ᐃᓄᖕᒧᑦ, ᐅᑭᐅᓕᖕᒧᑦ 18-35, ᒪᓕᑲᑕᖃᑦᑕᕐᓂᕐᒥᒃ ᓄᓇᕗᑦ ᑐᙵᕕᒃ ᑎᒥᖓᑕ ᐊᖓᔪᖅᑳᖓᓂᒃ ᒪᕐᕉᓐᓂ ᐊᖓᔪᖅᑲᐅᑏᑦ ᑲᑎᒪᓂᖏᓐᓂ.
ᐸᕐᓇᓂᕐᒧᑦ ᑲᑎᒪᓂᕐᓄᑦ, ᐃᓚᒋᔭᐅᔪᖅ ᑲᑎᒪᔪᓃᖃᑦᑕᓂᐊᖅᑐᖅ ᐃᖅᑲᓇᐃᔭᖅᑏᑦ ᑐᑭᓯᑎᑦᓯᒋᐊᕈᑎᖏᓐᓂ ᐊᖓᔪᖅᑳᒧᑦ, ᑐᑭᓯᒃᑲᓐᓂᕈᑎᑦᓴᓂᒃ ᐊᒻᒪᓗ ᐱᓇᓱᐊᒐᐅᔪᑦ ᐃᓗᓕᖏᓐᓂᒃ ᐋᔩᕋᕈᑕᐅᖃᑦᑕᓂᐊᖅᑐᓂᒃ ᑲᑎᒪᓂᕐᓂ.
ᐃᓚᒋᔭᐅᔪᖅ ᑲᑎᒪᔪᓃᖃᑦᑕᓂᐊᖅᑐᖅ ᑐᓵᔭᖅᑐᖅᓯᒪᓗᓂ. ᐊᑐᓪᓚᑦᑖᕐᓗᒍ ᑐᑭᓯᓂᐊᕐᒪᑦ ᖃᓄᖅ ᑲᑎᒪᓃᑦ ᐊᐅᓚᓂᖃᓲᖑᒻᒪᖔᑕ, ᑐᑭᓯᒃᑲᓂᕐᓗᑎᒃ ᐊᔾᔨᒌᙱᑦᑐᓂᒃ ᓯᕗᓕᖅᑎᐅᔾᔪᓯᕐᓂᒃ ᐃᓚᒋᔭᐅᔪᓂᒃ ᐊᒻᒪᓗ ᑐᑭᓯᒃᑲᓂᕐᓗᑎᒃ ᐊᑐᐊᒐᕐᓂᒃ, ᐱᓕᕆᐊᑦᓴᓂᒃ ᐊᒻᒪᓗ ᐱᔨᑦᓯᕈᑎᓂᒃ ᑐᓂᔭᐅᖃᑦᑕᖅᑐᓂᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ.
ᑭᖑᓂᐊᒍᑦ ᑲᑎᒪᓂᖃᓚᐅᖅᑎᓪᓗᒋᑦ, ᐃᓚᐅᔪᖅ ᑐᑭᓯᓂᐊᖃᑎᖃᖃᑦᑕᕈᓐᓇᓂᐊᖅᑐᖅ ᑖᒃᑯᑑᓗᑎᒃ ᐊᖓᔪᖅᑳᒥᒃ, ᑐᕋᐃᓐᓇᖅᑐᒥᒃ ᐅᖃᐅᓯᖃᕈᓐᓇᖃᑦᑕᕐᓗᑎᒃ ᐱᓕᕆᐊᖑᔪᓄᑦ ᐋᔩᕋᕈᑕᐅᓕᖅᑎᓪᓗᒋᑦ ᑲᑎᒪᓂᕐᓂ, ᐊᒻᒪᓗ ᐅᖃᐅᓯᑦᓴᓂᒃ ᓂᓪᓕᐊᒍᑎᖃᕐᓗᑎᒃ ᐊᒻᒪᓗ ᐃᑉᐱᒋᒋᐊᙵᖅᑕᒥᓂᒃ ᐊᑐᓚᐅᖅᑕᒥᓂᒃ ᐱᖅᑯᓯᖅᓱᐃᓂᕐᒥᓂ ᐃᑲᔪᖅᑎᐅᓪᓗᓂ.
ᐱᐊᓂᓚᐅᕐᓗᓂ ᐃᑲᔪᖅᑎᐅᓂᕐᒥᒃ, ᐃᓚᒋᔭᐅᔪᖅ ᓂᕆᐅᒋᔭᐅᔪᖅ ᑎᑎᕋᕐᓂᐊᕐᓂᖓᓂᒃ ᐅᓂᒃᑳᒥᒃ. ᐅᓂᒃᑳᓃᒋᐊᓕᒃ ᐊᑐᓚᐅᖅᑕᓂ, ᐃᓚᒋᔭᐅᓗᑎᒃ ᐊᑦᓱᕈᕐᓇᖅᑐᓂᒃ (ᐃᑉᐱᓇᖅᑐᓂᒃ/ᐃᓱᕐᕆᐅᑎᓂᒃ/ᐊᑐᕆᐊᓕᖕᓂᒃ/ᐊᓯᖏᓐᓂᓪᓗ) ᐊᑐᓚᐅᖅᑕᒥᓂᒃ, ᖁᕝᕙᑲᓐᓂᕈᑎᒋᓚᐅᖅᑕᓕᒫᒥᓂᒃ, ᖃᐅᔨᓚᐅᖅᑕᒥᓂᒃ ᐊᑐᖅᑕᒥᒍᑦ, ᐊᒻᒪᓗ ᐃᑲᔪᑎᑐᐃᓐᓇᕆᐊᓕᓐᓂᒃ ᐃᓚᒋᔭᐅᓚᐅᕐᓂᕐᒥᓄᑦ ᐱᓕᕆᐊᒧᑦ ᐃᖕᒥᒨᖓᔪᓂᒃ ᐊᒻᒪᓗ/ᐅᕝᕙᓘᓐᓃᑦ ᐱᓇᓱᐊᕋᕆᔭᒥᓄᑦ ᐃᓅᓯᕐᒥᓂ.
ᐃᓚᒋᔭᐅᔪᖅ ᑐᓂᔭᐅᓂᐊᖅᑐᖅ ᑲᑎᒪᐅᓯᐊᒥᒃ ᐃᓚᒋᔭᐅᓂᕐᒥᓄᑦ, ᐊᒻᒪᓗ ᖃᖓᑦᑕᐅᑎᓕᒫᖏᑦ ᐊᑭᓕᖅᓱᖅᑕᐅᓗᑎᒃ ᑐᙵᕕᒃᑯᓐᓂᒃ.
ᑎᑭᒐᓱᐊᕐᓂᖓ ᑕᓪᓕᕐᒥᖅ, ᕕᕝᕗᐊᓕ 23rd, 2024.
