ᐹᓪ ᐃᓅᓕᓚᐅᑐᖅ 1956-ᒥ ᐃᒡᓗᓕᐅᑉ ᖃᓂᒋᔮᓂ. ᑕᐃᑲᓂ ᓄᓇᖃᓚᐅᑐᖅ ᐊᕐᕌᒍᑖᕋᓱᐊᕐᓂᕐᒥ 10-ᓂᒃ. ᐊᐅᓪᓛᓕᖅᖢᑎᒃ ᐃᒡᓗᓕᒻᒧᑦ, ᓄᓇᒋᓚᐅᖅᑐᓂᐅᒃ ᐊᕐᕌᒍᑖᕋᓱᐊᕐᓂᕐᒥ 20-ᓂᒃ. ᖃᑕᓐᖑᑎᒌᑦ ᐊᐅᓪᓛᓕᓚᐅᕐᒥᔪᑦ ᓇᐅᔮᓄᑦ ᓂᖏᐅᖓᓂᒃ ᓇᔪᕆᐊᖅᑐᖅᖢᑎᒃ. ᐹᓪ ᓱᓕ ᑕᐃᑲᓂ ᓄᓇᖃᖅᑐᖅ ᓄᓕᐊᖓᓗ ᐊᒻᒪ 7 ᕿᑐᕐᖓᖏᑦ.
ᐹᓪ ᓯᕗᓪᓕᖅᐹᒥ ᓴᓇᓐᖑᐊᕆᐅᓚᐅᑐᖅ ᐊᕐᕌᒍᖃᖅᖢᓂ 5-ᓂᒃ. ᐃᖕᒥᓂᒃ ᐃᓕᑦᑎᓚᐅᑐᖅ, ᐊᓯᒥᓂᒃ ᑕᐅᑐᖃᑦᑕᖅᖢᓂ. “ᐃᖕᒥᓗᐊᑐᐊᖅ. ᐃᓕᓯᒪᔪᖓ ᐊᖑᓇᓱᐊᕐᓂᒃᑯᑦ. ᑕᐅᑐᒃᑐᒋᑦ ᓯᓚᑎᓐᓃᑦᑐᑦ. ᐊᖑᓇᓱᐊᓕᕋᐃᒐᒪ, ᖃᐅᔨᓴᖃᑦᑕᖅᑕᒃᑲ ᓂᕐᔪᑏᑦ. ᓂᕐᔪᑎᓕᒫᑦ.”
ᑭᒃᑯᑐᐃᓐᓇᐃᑦ ᐱᔪᒪᖃᑦᑕᖅᑐᑦ ᓴᓇᔭᓐᓂᒃ. ᐊᑖᑕᒐ ᐊᑯᓂ ᐊᐅᓪᓚᖅᓯᒪᕙᓚᐅᕐᒪᑦ-ᐊᖑᓇᓱᐊᖅᖢᓂ. ᒥᑭᒋᐊᕐᓂᐊᖅᖢᓂ ᑎᕆᒐᓂᐊᕐᓂᒃ. ᐃᓚᐅᖏᒐᐃᒐᒪ, ᓴᓇᖑᐊᖅᐸᓚᐅᖅᑐᖓ ᑮᓇᐅᔭᓕᐅᕋᓱᐊᖅᖢᖓ ᖃᑕᓐᖑᑎᓐᓄᑦ, ᐊᖑᓇᓱᐊᖃᑕᐅᖏᑐᐊᕈᒪ. ᐅᑭᐅᓪᓚᕆᒃᑯᑦ.”
ᐹᓪ ᓴᓇᓐᖑᐊᑦᑕᖅᑐᖅ ᐊᔾᔨᒌᖏᑦᑐᓂᒃ ᐆᒪᔪᖑᐊᓂᒃ ᑮᓇᓐᖑᐊᓂᓪᓗ, ᑭᓯᐊᓂ ᖁᕕᐊᒋᓂᖅᐹᕆᕙᒃᑕᖏᑦ ᑐᒃᑐᓐᖑᐊᑦ. ᓴᓇᐅᒐᖏᑦ ᑕᑯᔭᐅᔪᓐᓇᖅᑐᑦ ᐊᒥᓱᓂ ᐊᖏᕐᕋᕆᔭᐅᔪᓂ ᐊᒻᒪ ᑐᒃᓯᕌᖑᕙᒃᖢᓂ ᓇᑭᑐᐃᓐᓇᖅ, ᐃᓚᒋᓪᓗᒋᑦ Fehley Fine Arts Gallery ᑐᕌᓐᑐᒥ ᐊᒻᒪ ᔫᑎ ᐴᕐᒃ ᑕᑯᔭᒐᖃᕐᕕᒃ ᕗᔨᓐᓂᐊᒥ ᐊᒻᒪ ᓅᕙᔅᑰᓴᒥ. ᐊᒥᓱᓂᒃ ᓴᓇᖁᔭᐅᖃᑦᑕᖅᓯᒪᔪᖅ ᐃᓚᖃᖅᖢᓂ ᑐᓂᕐᕈᑎᒃᓴᐃᑦ ᑲᓇᑕᐅᑉ ᐊᖏᔪᖅᑳᖏᓐᓄᑦ ᕗᕋᐃᔭᓐ ᒪᓪᕈᓂ ᐊᒻᒪ ᔮᓐ ᑯᕆᑦᑎᐊᓐ, ᐊᒻᒪ ᑭᐃᓐ ᑭᒡᒐᑐᖅᑎᖓ ᐊᐃᑐᕆᐊᓐ ᑲᓛᒃᓴᓐ. 2000-ᖑᑎᓪᓗᒍ, ᓴᓇᖑᐊᖁᔭᐅᓚᐅᕐᒥᔪᖅ ᐊᕿᒡᒋᖑᐊᒥᒃ ᓇᓗᓇᐃᒃᑯᑕᐅᖃᑕᐅᓂᐊᖅᑐᒥᒃ ᒪᓕᒐᓕᐃᕐᕕᕐᔪᐊᒥ ᐃᖃᓗᓐᓂ, ᐊᒻᒪ 1999-ᖑᑎᓪᓗᒍ ᐃᓚᒋᔭᐅᓚᐅᕐᒥᔪᖅ ᓴᓇᖃᑕᐅᓪᓗᓂ ᓄᓇᕗᑦ ᐃᖅᓱᒐᖓᓂᒃ. ᖃᐃᖁᔭᐅᓯᒪᓚᐅᕐᒥᔪᖅ ᐃᓚᐅᖁᔭᐅᓪᓗᓂ -ᐅᓂᒃᑳᑦ ᐅᔭᕋᓐᓂ, ᖃᐃᖁᔭᐅᖏᓐᓇᐸᒃᑐᓂᓗ ᓄᓇᕗᒻᒥ ᓴᓇᓐᖑᐊᖅᑏᑦ ᐊᕐᕌᒍᑕᒫᑦ ᓴᖅᑭᔮᖅᑎᑦᓯᓂᖏᓐᓄᑦ.
ᓴᓇᓐᖑᐊᖏᒐᐃᒐᒥ, ᐹᓪ ᖁᕕᐊᒋᔭᖃᖅᑐᖅ ᕿᒧᒃᓯᖏᓐᓂᒃ, ᐊᓯᕙᕐᓂᖅ, ᓴᓇᓂᖅ. “ᓱᓇᑐᐃᓐᓇᐃᑦ. ᐃᓅᓯᕋ ᖁᕕᐊᒋᔭᕋ.”
