ᐃᓄᒃ ᐃᓅᓕᓚᐅᖅᓯᒪᔪᖅ ᓯᑎᐱᕆ 1956-ᒥ ᑲᐊᐃᑉ ᒫᓐᓴᓐᒥ (ᑕᓗᕐᔪᐊᑉ ᖃᓂᒋᔮᓂ). ᐃᓄᒃ ᐃᓕᓐᓂᐊᕆᐊᕋᒥ ᖃᓪᓗᓇᐅᔭᕈᓐᓇᓚᐅᖏᑦᑐᖅ. ᐊᑎᓕᐅᕆᔨᒧᑦ ᐊᐱᕆᔭᐅᒐᒥ ᑭᓇᐅᒻᒪᖔᖅ ᐊᑎᖓ ᑭᐅᓚᐅᑐᖅ “ᐃᓄᒃ” ᑕᐃᓐᓇ ᐅᖃᒃᑲᓂᖅᖢᓂ, “ᖃᐅᔨᒪᔪᖓ ᐃᓅᒐᕕᒃ ᑭᓯᐊᓂ ᐊᑏᑦ ᑭᓇᐅᒻᒪ?” ᐃᓄᒃ ᐃᓅᓪᓗᓂ ᐊᖏᔪᖅᑳᖏᓂᓪᓗ ᐊᑎᖅᑕᐅᓯᒪᓪᓗᓂ ᐃᓄᒻᒥᒃ! ᑕᒪᕐᒥᒃ ᐊᖏᔪᖅᑳᖏᑦ ᓴᓇᓐᖑᐊᖅᑎᐅᓚᐅᖅᑑᒃ. ᐊᑖᑕᖓ ᓵᓕ ᐅᒡᔪᒃ ᓴᓐᖑᐊᖅᑎᐅᓚᐅᑐᖅ, ᐊᒻᒪ ᐊᓈᓇᖓ ᐱᑎᒍᑎ ᐃᓅᔭᓂᒃ ᓴᓇᒋᐊᖓᖅᑎᑎᐅᓯᒪᔪᖅ. ᖃᑕᓐᖑᑎᖏᑦ ᓴᓇᔨᒐᓚᐅᔪᑦ ᐊᒥᓱᑦ ᓴᓇᓐᖑᐊᖅᑎᐅᓪᓗᑎᒃ.
ᐃᓄᒃ ᓴᓇᓐᖑᐊᖃᑦᑕᕆᐊᓯᓚᐅᑐᖅ ᐊᕐᕌᒍᖃᖅᖢᓂ 7-ᓂᒃ. ᓱᕈᓯᐅᓪᓗᓂ ᓴᓇᓐᖑᐊᖅᐸᓚᐅᖅᑐᖅ ᐱᓐᖑᐊᓂᒃ. ᑭᖑᓂᐊᒍᑦ, ᐃᓐᓇᐅᓕᖅᖢᓂ ᓴᓇᓐᖑᐊᓂᕐᒧᑐᐊᖅ ᐱᕈᐃᔪᒪᓚᐅᖏᒻᒪᒋᑦ ᕿᑐᕐᖓᓂ ᐱᔾᔪᑎᒋᓪᓗᒍ ᐊᑯᓂᐅᓂᖓ ᓴᓇᓇᓱᐊᖅᖢᓂ ᐊᒻᒪ ᐊᖑᒪᒍᓐᓇᐃᓕᓚᐅᕐᒪᑦ. 1980-ᖏᑦ ᐱᒋᐊᓕᓴᖅᑎᓪᓗᒋᑦ ᐃᓄᒃ ᓴᓇᓐᖑᐊᖃᑦᑕᕆᐊᓯᓪᓚᕆᓚᐅᑐᖅ. ᐃᓚᖓᓐᓂ ᓴᓇᓐᖑᐊᕋᓱᐊᖅᖢᓂ ᐋᖅᑭᑦᑐᓐᓇᖏᒻᒪᒍ ᐊᑖᑕᒥᓄᐊᕈᑎᓚᐅᓯᒪᔭᖓ. ᐊᑖᑕᖓᑕ ᐅᖃᐅᑎᓪᓗᓂᐅᒃ “…ᐃᓚᓐᖓᒐᓛᓪᓗᒍ ᒪᐅᓇ ᐅᕘᓇᓗ”… ᐅᖃᐅᑎᒡᓗᓂᐅᓪᓗ ᓴᓇᔭᒃᑲ ᐃᔾᔪᐊᓚᐅᑭᑦ “ᑕᐃᒪᐃᑯᕕᑦ ᓯᕗᓂᖃᑦᑎᐊᕈᓐᓇᖅᐳᑎ ᐋᖅᑭᒃᐸᓪᓕᐊᖏᓐᓇᕐᓗᑎᑦ.” ᐃᓄᒃ ᐆᒪᔪᓐᖑᐊᓕᐅᕋᔪᒃᑐᖅ. “ᖁᕕᐊᒋᓪᓚᕆᒃᑕᕋ ᑕᐅᑐᒋᐊᖏᑕ ᓂᕐᔪᑏᑦ ᓇᔪᒐᖏᓐᓂ. ᐆᒪᔪᐃᑦ ᐊᒃᓱᐊᓗᒃ ᐱᐅ ᒋᔭᒃᑲ, ᐊᑯᓂᐊᓗᒃ ᐃᒃᓯᕙᓗᖓ ᑕᐅᑐᒍᓐᓇᖅᑕᒃᑲ ᐃᑲᕐᕋᒐᓴᓐᓂᒃ. ᑕᐅᑐᒍᒪᓂᖅᓴᕆᓲᕆᔭᒃᑲ ᑎᖕᒥᐊᑦ.” ᐃᓅᑉ ᐊᒃᑐᐊᓂᕆᔭᖓ ᓂᕐᔪᑎᓄᑦ ᑕᑯᒃᓴᐅᑎᖃᑦᑕᖅᐹ ᓴᓇᓐᖑᐊᖅᑕᒥᒍᑦ. ᑭᖑᓂᑦᑎᓐᓂ ᓴᓇᕙᓚᐅᑐᖅ ᑐᒑᓂᒃ ᐊᒻᒪ ᐱᖑᔫᑎᑯᓗᓐᓂᒃ.
1995-ᒥ, ᐃᓄᒃ ᐃᓕᓐᓂᐊᓚᐅᓯᒪᔪᖅ ᐊᕐᕌᒎᓐᓄᑦ ᒪᕐᕉᓐᓄᑦ ᐅᑭᐅᖅᑕᖅᑐᒥ ᓯᓚᑦᑐᓴᕐᕕᒃᑯᑦ ᓴᓇᓐᖑᐊᓂᕐᒥᒃ ᐃᖃᓗᒃᑑᑦᑎᐊᕐᒥ (1995-1997) ᐃᓕᓐᓂᐊᖅᖢᓂ ᓴᓇᓐᖑᐊᓂᕐᒥᒃ ᐊᒻᒪ ᓴᕕᕋᔭᒃᓴᓂᒃ. “ᐃᓱᒪᓕᐅᕋᒪ ᐃᓕᓐᓂᐊᕈᒪᓪᓗᖓ ᓴᓇᖃᑦᑕᖅᑕᒃᑲ ᐃᓚᕙᓪᓕᐊᔪᒪᓪᓗᒋᑦ ᑕᒪᒃᑯᐊ ᐱᔾᔪᑎᒋᓪᓗᒋᑦ ᐃᓕᓐᓂᐊᕐᕕᖕᒧᑦ ᐅᑎᕆᐊᖃᓚᐅᖅᑐᖓ. ᖁᕕᐊᒋᓗᐊᓚᐅᕐᒥᔭᖏᑦ ᓴᓇᒋᐊᖏᑕ ᓯᐅᒻᒥᐅᑕᐃᑦ ᓂᕕᖓᔪᑦ ᐊᒻᒪ ᐊᒡᒐᕐᒦᑦ ᒎᓗᒥᒃ ᑕᖅᓴᖃᖅᖢᒋᑦ, ᐊᒻᒪ ᓴᕕᕋᔭᒃᓴᐃᑦ ᑲᑎᑎᖅᖢᒋᑦ ᐊᔾᔨᒋᖏᑕᖏᓐᓄᑦ. ᐊᑐᓲᖑᔪᖅ ᓄᓇᕗᒻᒦᖔᖅᑐᓂᒃ ᐅᔭᕋᓐᓂᒃ ᐊᔾᔨᒌᖏᑦᑐᓂᒃ ᑕᐅᕙᓐᖓᑦ ᑭᒻᒥᕈᕐᒥ ᐊᒻᒪ ᐃᖃᓗᓐᓃᖔᖅᑐᓂᒃ. ᐊᖏᓂᖅᐹᖑᔪᖅ ᐱᓕᕆᐊᕆᓯᒪᔭᖏᓐᓂ ᓄᓇᕗᑦ ᐃᖅᓱᒐᖓ ᑖᓐᓇ ᓄᓇᕗᑦ ᒪᓕᒐᓕᐅᕐᕕᕐᔪᐊᖓᓃᑦᑐᖅ ᐃᖃᓗᓐᓂ. ᓴᓇᓯᒪᖕᒥᔪᖅ ᑕᑭᓂᖃᖅᑐᒥᒃ 9 ᐃᓯᒐᐃᑦ ᓇᓄᓐᖑᐊᒥᒃ ᑖᓐᓇ ᕗᒫᓐᒦᑦᑐᖅ ᑎᑐᕈᐃᑦ ᐆᒪᔪᒃᑯᕕᖓᓂ. ᐃᓅᑉ ᖁᕕᐊᒋᒻᒥᔭᖏᑦ ᓴᓇᔭᕆᐊᖏᑕ ᓯᐅᒻᒥᐅᑕᐃᑦ ᐊᔾᔨᒌᖏᑦᑐᑦ ᐅᔭᕋᖃᑕᐅᖅᖢᑎᒃ ᐅᑭᐅᖅᑕᖅᑐᒦᖔᖅᑐᓂᒃ. ᒫᓐᓇᒫᖅ ᐊᑎᓕᐅᓚᐅᕐᒥᔪᖅ ᑳᓐᑐᕌᒃᒥᒃ Tiffanys-ᑯᓐᓄᑦ ᓅᔪᐊᒃᐱ ᑎᑎᕋᐅᔭᖅᑎᐅᓂᐊᕐᓗᓂ ᕿᑎᕐᒥᐅᓃᖔᖅᑐᓂᒃ.
ᐃᓄᒃ ᓄᓇᖃᖃᑦᑕᖅᓯᒪᔪᖅ ᑕᓗᕐᔪᐊᒥ, ᑯᒑᕐᔪᒻᒥ, ᔭᓗᓇᐃᕝᒥ ᐊᒻᒪ ᐃᖃᓗᒃᑑᑦᑎᐊᕐᒥ, ᐅᑎᕋᑖᖅᓯᒪᓪᓗᓂ ᑕᓗᕐᔪᐊᓄᑦ ᓄᓕᐊᖓᓗ ᑐᐊᑲᔅ ᕿᑐᕐᖓᖏᓪᓗ ᐱᖓᓱᑦ ᐊᕐᕕᓂᓕᓐᓂ. ᐃᓚᐅᖃᑦᑕᖅᓯᒪᔪᖅ ᐅᑭᐅᖅᑕᖅᑐᒥ ᓴᓇᓐᖑᐊᖅᑏᑦ ᖁᕕᐊᓲᑎᖃᖅᑎᓪᓗᒋᑦ ᐃᓅᕕᒻᒥ ᓯᑕᒪᐃᕋᖅᖢᓂ. ᐊᒻᒪ ᓄᓇᕗᒻᒥ ᓴᓇᓐᖑᖅᑏᑦ ᑕᑯᒃᓴᐅᑎᑦᓯᓂᖏᓐᓄᑦ ᑲᖏᖅᖠᓂᕐᒥ, ᐃᖃᓗᒃᑑᑦᑎᐊᕐᒥ ᐊᒻᒪ ᐃᖃᓗᓐᓂ. 2004-ᖑᑎᓪᓗᒍ, ᐃᓄᒃ ᖃᐃᖁᔭᐅᑲᓐᓂᓚᐅᕐᒥᔪᖅ ᑲᖏᖅᖠᓂᕐᒧᑦ. ᑲᑎᒪᔨᐅᓯᒪᓕᑐᖅ ᓄᓇᕗᒻᒥ ᓴᓇᓐᖑᐊᖅᑏᑦ ᑲᑐᔾᔨᖃᑎᒌᖏᓐᓄᑦ (NACA) 1999-ᒥᓂᒃ. ᐃᓄᒃ ᒫᓐᓇ ᐃᖅᑲᓇᐃᔮᖃᖅᑐᖅ ᓈᓚᐅᓯᕆᔭᐅᓂᕐᒥᒃ ᖃᖓᑕᔫᒃᑯᕕᖕᒧᑦ.
