ᐃᓕᖅᑯᓯᕗᑦ, ᐅᖃᐅᓯᕗᓪᓗ ᐱᒻᒪᕆᐅᕗᑦ ᐊᓂᖅᓵᓱᕋᑉᑕᑐᒥᐊᖅ. ᐃᓕᓐᓂᐊᖅᑎᑦᓯᓂᖅ ᐱᒻᒪᕆᐅᕗᖅᑕᐅᖅ. ᐅᒃᐱᕈᓱᒃᑐᖓ ᐃᓕᓐᓂᐊᕐᓂᖅ ᓄᖃᓱᐃᑦᑑᖕᒪᑦ, ᖁᑦᓯᖕᓂᓕᖕᒥ 12-ᒥ ᐱᐊᓂᑲᓗᐊᕈᑉᑕ ᑕᐃᑲᓂ ᐃᓕᓐᓂᐊᕐᓂᕗᑦ ᓄᖅᑲᓚᖏᑐᖅ. ᐃᓄᐃᑦ ᐱᖅᑯᓯᖏᑦᓂ ᐱᒡᒍᒃᑎᑦᓯᓂᐊᕐᓂᖓ ᐊᑐᓛᖑᔪᖅ. ᔫᓯ ᐊᒪᐅᔭᖅ ᑯᓱᒐᖅ ᐃᓅᓯᓗᒃᑖᒥᓂ ᐊᑐᖅᖢᓂ ᓄᓇᕗᒻᒥ ᐱᕚᓕᖅᑎᑦᓯᓂᓗᓚᐅᖅᑐᖅ. ᒪᓕᒐᒃᓴᖅ ᐃᓄᓕᒫᓄ, ᐊᒃᓱᕈᓚᐅᕐᒪᑦ ᐃᓄᐃᑦ ᐱᔾᔪᑎᒋᖢᒋ. ᐅᒃᐱᕈᓱᒃᑐᖓ ᐃᖅᑲᐅᒪᔭᐅᔭᕆᐊᖃᖅᒪᑦ ᐊᒪᐅᔭᐅᑉ ᐱᖅᑯᓯᖏ ᐊᒥᓱᑦ ᐅᑭᐅᑦ ᖄᖏᖅᓯᒪᓕᕋᓗᐊᖅᐸᑕ.
ᐃᓕᓐᓂᐊᖅᑎᑦᓯᔨᐅᓂᕐᒧᑦ ᐃᓕᓐᓂᐊᕐᓂᐊᖅᑐᖓ. ᐅᕙᒻᓄ ᑖᒻᓇ ᐱᒋᐊᕈᑕᐅᔪᖅ ᐃᓄᖕᓂ ᐃᑲᔪᕐᓂᕐᒥᒃ ᓯᕗᓂᒃᓴᑉᑎᑦᓂ. ᐅᑭᐅᖅ 1-ᒧ ᐊᖏᒐᐅᓯᒪᔪᖓ, 4-ᖑᑉᒪᑕ ᐅᑭᐅᑦ ᐃᓕᓐᓂᐊᖅᕕᒃᓴᑦ ᐃᓕᓐᓂᐊᖅᑎᑦᓯᔨᐅᓂᕐᒧᑦ. ᐅᕙᒻᓂᒃ ᐅᒃᐱᕆᔪᖓ ᐱᐊᓂᖕᓂᐊᕋᒃᑯ ᑕᒪᓐᓇ ᐃᓕᓐᓂᐊᕐᓂᐅᔪᖅ. ᐱᐊᓂᑲᓗᐊᕈᒃᑯ ᐃᓕᓐᓂᐊᖅᑎᑦᓯᔨᐅᓂᖅ ᖁᑦᓯᓕᑲᓂᕈᒪᔭᕋ ᐃᓕᓐᓂᐊᕐᓂᕋ ᖁᕝᕙᓯᓐᓂᕐᓴᒥᒃ ᐃᓕᓐᓂᐊᕋᔅᓴᐅᓂᕋᖅᑕᐅᔪᒥᒃ. ᐃᓕᓐᓂᐊᒑᓂᒃᓯᒪᓕᕈᒪ ᐃᑲᔪᕐᓂᐊᖅᖢᖓ ᐃᓄᖕᓂ. ᐃᓄᐃᑦ ᖃᐅᔨᒪᔭᑐᖃᖏᑦ ᐊᑐᕐᓗᒋᑦ ᐃᓕᓐᓂᐊᖅᑎᑦᓯᒍᒪᕗᖓ ᐊᑐᓛᖑᖕᒪᑕ ᖃᐅᑕᒫ ᐃᓅᓯᑉᑎᓂ. ᐅᒃᐱᕈᓱᑦᓯᐊᖅᑐᖓ ᐊᒪᐅᔭᐅᑉ ᐊᒃᓱᕈᕐᓂᖓ ᑲᔪᓯᔭᕆᐊᖃᖅᒪᑦ ᐃᖅᑲᐅᒪᐃᓐᓇᕐᓗᒍ.
ᐃᓄᓕᒫᑦ ᖃᐅᔨᒪᓇᔭᖅᐸᑕ ᑭᓇᐅᖕᒪᖔᕐᒦᒃ, ᓇᑭ ᐱᖕᒪᖔᑖ, ᑭᑑᖕᒪᖓᑖ, ᐊᒻᒪ ᑐᑭᓯᐊᓂᕐᒥᒃ ᐃᓅᓯᕐᒥᓂ ᐱᖃᖅᐸᑕ ᓄᓇᑦᓴᐅᓂᖅᓴᐅᓇᔭᖅᑐᖅ. ᐅᐱᒍᓱᖕᓂᕐᒥᓪᓗ ᑐᑭᓯᐊᓂᖅᓴᐅᓗᑎᑦ. ᐅᑉᓗᒥ, ᑕᒫᓃᒐᔭᖏᐳᒍᑦ ᐃᓄᐃᑦ ᐊᒪᐅᔭᒃᑯᑎᑐᑦ ᐊᒃᓱᕈᖏᓚᐅᖅᐸᑕ. ᐊᒥᓲᖕᒪᑕ ᐃᓄᐃᑦ ᓄᓇᕐᔪᐊᕐᒥ ᐅᖓᓯᒃᓯᑕᖏᑐᑦ ᓄᓇᖏᑦ ᐱᔾᔪᑎᒋᖢᒋᑦ, ᐃᓄᒃᑎᒍ ᐅᖓᓯᖕᓂᕆᔭᑉᑎᓂ ᖁᔭᓕᔭᕆᐊᖃᖅᐳᒍ. ᐱᕙᓕᐊᒐᓗᐊᖅᖢᓂ ᓄᓇᕗᑦ ᐱᕚᓕᖅᓯᒪᓕᕐᒪᑦ ᐱᒋᐊᓕᓵᓚᐅᖅᑎᓪᓗᒍ. ᓱᓇᒥᐊᑦ ᐱᐊᓂᒃᑑᓗᐊᕐᒪᑕ ᐃᓄᓕᒫᑦ ᖃᐅᔨᒪᔪᑦ ᐃᑲᔪᖅᑎᒌᒃᖢᓂ. ᐃᑲᔪᖅᑎᒌᒡᓗᑕ ᐊᒃᓱᕈᐃᓇᕈᑉᑕ ᓄᓇᕗᒻᒥ ᐱᔪᑎᖃᕐᓗᑕ ᐱᐊᓂᒍᓐᓇᖅᑐᒍᑦ. ᐃᓅᓯᓕᒫᒻᓂ ᐱᕚᓕᖅᑎᑦᓯᓇᓱᖕᓂᐊᖅᐳᖓ ᐃᓄᖕᓄᑦ ᑕᒪᓃᑐᓄᑦ. ᑕᐃᒪ ᐃᓄᖕᓄᑦ ᐱᕚᓕᕈᑎᓂᒃ ᑎᑎᕋᖅᓯᒪᔪᓂᒃ ᒪᓕᒐᖃᖅᐳᑦ ᓄᓇᕗᑦ ᑐᙵᕕᒃᑯᑦ; ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓚᒐᐅᔪᒥ. ᑐᑭᓯᐊᔭᕋ ᐃᓕᓐᓂᐊᓚᐅᕋᑉᑕ ᐊᕐᕌᓂ NLCA ᐱᔾᔪᑎᒋᖢᒍ.
ᐃᓄᒃᑎᑑᕐᓂᖅ ᐅᖃᐅᓯᕗᑦ ᐱᒻᒪᕆᐅᔪᖅ. ᐊᒥᓱᑦ ᐅᑉᓗᒥᐅᓕᖅᑐᖅ ᒪᒃᑯᒃᑐᑦ, ᐃᓐᓇᓇᒡᓛᑦ ᖃᑉᓗᓈᑐᐃᓐᓇᖅ ᐅᖃᖅᑕᓕᕐᒪᑕ, ᐃᓄᒃᑎᑐᑦ ᑐᑭᓯᐊᖏᓕᖅᖢᑎᒡᓗ. ᑕᐃᒪ ᐃᑲᔪᖅᑎᒌᒡᓗᑕ ᐃᓄᒃᑎᑑᕐᓂ ᐱᒡᒍᒃᓯᕚᓕᑲᓐᓂᖅᑑᓗᐊᖅᑐᖅ. ᓯᕗᓕᖅᑎ ᐄᕙ ᐋᕆᐊᒃ ᐅᖃᓚᐅᕐᒪᑦ 300-ᓂᒃ ᐃᓄᒃᑎᑐᑦ ᐃᓕᓐᓂᐊᖅᑎᑦᓯᔨᓂᒃ ᓄᓇᕗᑦ ᐱᔭᕆᐊᖃᖅᑐᖅ ᓄᓇᑖᕈᑎᒦᑦᑐᖅ ᐱᒍᐊᕋᔭᕈᑉᑎᒍ. ᐃᓄᒃ ᐊᑕᐅᓯᖅ ᐊᑦᔭᕈᖅᑎᑦᓯᔪᓐᓇᕐᒪᑦ ᑕᐃᒪ ᐱᑦᑕᐅᔭᕐᓗᓂ ᐃᓄᒃᑎᑑᕐᓂᖅ ᐱᒍᒃᑎᒍᓐᓇᖅᑐᖅ. ᐃᓐᓇᑐᖃᕗᑦ ᓄᓇᕗᒻᒥ ᓄᖑᓴᓕᖅᖢᑎᒡᓗ ᐊᕐᕌᒍᑕᒫᑦ, ᓯᕗᓕᐅᖅᑎᓂ ᒪᑭᑐᖃᕆᐊᖃᓕᕐᒪᑦ. ᐋᕿᒃᓯᒍᒪᒍᑉᑕ ᓱᓇᒥᐊᕐᒥ ᓂᐸᐃᒥᐊᕐᓗᑕ, ᓱᓕᕆᖏᒥᐊᕐᓗᑕᓗ ᐋᕿᓚᖏᒪ ᐃᖕᒥᓂᒃ, ᓴᐱᕐᓂᖅ ᐊᑐᖏᑉᒪᑦ ᒪᑯᒃᑐᑦ ᒪᑭᒋᐊᕆᐊᖃᓕᖅᑐ ᐅᑉᓗᒥᐅᓕᖅᑐᖅ. ᐃᓄᐃᑦ ᐃᑲᔪᖅᑎᒌᒡᓗᑎ ᐊᔪᖏᑐᑦ ᖃᐅᔨᒪᔪᑦ, ᓱᓇᒥᐊᕐᓂ ᐱᐊᓂᒍᓐᓇᖅᑐᖅ ᐱᒋᐊᖅᑕᖓᓂ ᑭᓇᒥᐊᖅ, ᐃᖕᒥᓂ ᐅᒃᐱᕈᓯᖕᓂᖃᒥᐊᖅᐸᑦ, ᕿᕕᓂᐊᕐᓂᖃᖏᓗᓂᓗ. ᐃᑲᔪᖅᑎᒌᒡᓗᑕ ᐃᓄᒃᑎᑑᕐᓂᖅ, ᐱᖅᑯᓯᕗᓪᓗ ᐱᔾᔪᑎᒋᓗᒋᑦ ᐃᑲᔪᖅᑎᒌᓕᖅᑕ.
ᐊᒪᐅᔭᖅ ᑯᓱᒐᖅ ᐃᑲᔪᑦᓯᐊᓚᐅᖅᐳᖅ ᐃᓄᖕᓂ, ᑲᔪᓯᑏᓐᓇᕐᓗᒍ ᐳᐃᒍᒐᐅᓚᖏᑐᖅ, ᐃᑲᔪᖅᑐᖅᐸᕋ ᑕᒪᓐᓇ ᐃᓄᒃᑎᑑᕐᓂᖅ, ᐱᖅᑯᓯᕗᓪᓗ ᐱᒻᒪᕆᐅᑉᒪᑕ ᐃᑲᔪᖅᑎᒌᒡᓗᑕ ᓄᓇᕗᑦ ᐱᐅᓂᖅᓴᖑᒃᑲᓂᖅᑑᓗᐊᖅᑐᖅ. ᐃᓅᓯᓕᒫᒻᓂ ᑕᒪᓐᓇ ᑲᔪᓯᑎᓐᓂᐊᖅᐸᕋ, ᐊᒪᐅᔭᐅᑉ ᖁᕕᐊᒋᓚᐅᕐᒪᒍ ᖁᕕᐊᒋᔭᕋᑦᑕᐅᖅ. ᐅᐱᒋᕙᕋ ᒪᑦᓈᖅᐸᕋᓗ ᔫᓯ ᐊᒪᐅᔭᖅ ᑯᓱᒐᖅ ᐊᒃᓱᕈᖅᖢᓂ ᕿᕕᖏᑕᐃᓐᓇᓚᐅᖅᒪᑦ.
