ᐃᕐᖐᓐᓇᖅ ᓴᖅᑭᖅᑕᐅᔭᕆᐊᓕᒃ
ᑐᙵᕕᒃᑯᑦ ᐃᓄᑑᔭᕆᐊᓕᓐᓄᑦ ᐃᑲᔫᑎᖏᑦ
(ᔭᓐᓄᐊᓕ 7, 2022) ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ) ᐊᑐᐃᓐᓇᐅᑎᑦᓯᒻᒪᑕ ᐃᑲᔫᑎᒃᓴᓂᒃ ᐃᓄᓐᓄᑦ ᓇᓗᓇᐃᖅᑕᐅᓯᒪᔪᓄᑦ ᓄᕙᔾᔪᐊᕐᓇᖃᕆᐊᖏᑦ−19−ᒥᒃ, ᐃᓄᑑᔭᕆᐊᖃᖅᑎᑕᐅᔪᑦ 14-ᓂᒃ ᐅᓪᓗᓂᒃ ᖃᐅᔨᔭᐅᓯᒪᔪᓂᒃ ᐊᑎᓕᐅᕐᕕᑦᑎᒍᑦ ᖃᓂᑦᓴᖅᑐᒥᓂᐅᒋᐊᖏᑦ ᐊᒻᒪᓗ ᓄᓇᕗᒻᒥ ᓄᓇᓕᒻᒦᑦᑐᓄᑦ ᐆᒪᔪᒥᒃ ᓄᕙᔾᔪᐊᓇᖅᑕᓕᓐᓂ-19. ᒪᓕᒃᑕᐅᔭᕆᐊᖃᒻᒪᕆᑉᐳᑦ ᐃᖢᐊᖅᓴᐃᔨᓄᑦ ᐊᑐᖅᑕᐅᖁᔭᐅᔪᑦ ᓇᓗᓇᐃᖅᑕᐅᓯᒪᔪᑦ ᓄᓇᕗᑦ ᐃᖢᐊᖅᓴᐃᔨᒻᒪᕆᖓᓄᑦ (CPHO) ᐃᓚᒋᔭᐅᓪᓗᑎᒃ ᐃᓗᒻᒥᐅᖃᑎᒌᓕᒫᑦ ᓇᒧᙶᔭᕆᐊᖃᖅᑎᑕᐅᙱᓐᓂᖏᑦ ᓇᓗᓇᐃᖅᑕᐅᓐᓂᕈᕕᑦ ᓄᕙᔾᔪᐊᕐᓇᖅ−19−ᖃᕆᐊᑦᓴᕕᑦ ᐅᕝᕙᓘᓐᓃᑦ ᐃᓄᑑᔭᕆᐊᖃᕐᓂᕋᖅᑕᐅᓯᒪᓗᑎᑦ ᖃᐅᔨᔭᐅᓯᒪᔪᓂᒃ ᐊᑎᓕᐅᕐᕕᑦᑎᒍᑦ ᖃᓂᑦᓴᖅᑐᒥᓂᐅᒋᐊᑦᓴᕕᑦ ᐅᕝᕙᓘᓐᓃᑦ ᐃᖢᐊᙱᔾᔪᑕᐅᖃᑦᑕᖅᑐᓂᒃ ᖃᓄᐃᒍᑎᖃᕈᕕᑦ ᓄᕙᔾᔪᐊᕐᓇᓕᓐᓄᑦ-19.
ᐃᓄᑑᒋᐊᓕᓐᓄᑦ ᐃᑲᔫᑏᑦ ᐃᑲᔫᑎᒃᓴᓕᐊᖑᓯᒪᔪᑦ ᓄᓇᕗᒻᒥ ᐃᓄᓐᓄᑦ ᐊᖏᕐᕋᖅᓯᒪᐃᓐᓇᖁᓪᓗᒋᑦ. ᐃᓗᓕᖏᑦ ᐃᑲᔫᑏᑦ ᑎᑎᕋᖅᓯᒪᔪᒃᑯᑦ ᖃᐅᔨᑎᑦᓯᒍᑕᐅᓯᒪᔪᓂᒃ ᑐᙵᕕᒃᑯᓐᓄᑦ ᑐᓂᔭᐅᓯᒪᔪᓂᒃ ᐊᒻᒪᓗ ᐋᖅᑭᓱᖅᑕᐅᓯᒪᓂᐊᖅᑐᑦ ᒪᓕᓪᓗᒋᑦ
ᓂᕿᒋᔭᐅᒋᐊᓖᑦ ᐃᓪᓗᒥᐅᖃᑎᒌᓄᑦ, ᖃᑦᓯᐅᓂᖏᑦ ᐃᓐᓇᐃᑦ ᓱᕈᓰᓪᓗ ᐃᓪᓗᒥᐅᖃᑎᒌᑦ ᐊᒻᒪᓗ ᓄᑕᖅᑲᑦ ᐊᑐᕆᐊᓕᖏᑦ ᓇᓗᓇᐃᖅᑕᐅᓯᐊᕐᓗᑎᒃ.
ᓄᓇᓕᓐᓄᑦ ᓇᓗᓇᐃᖅᑕᐅᓯᒪᕕᐅᔪᓄᑦ ᓄᕙᔾᔪᐊᕐᓇᖅᑕᖃᕆᐊᖏᑦ, ᐃᓄᑑᔭᕆᐊᓕᓐᓄᑦ ᐃᑲᔫᑎᓂᒃ ᑐᒃᓯᕋᐅᑏᑦ ᐊᑎᓕᐅᖅᑕᐅᓯᒪᔭᕆᐊᑐᙱᑦᑐᑦ ᐃᖢᐊᖅᓴᐃᔨᒧᑦ. ᑕᒪᕐᒥᒃ ᐊᓯᓕᒫᖏᑦ ᓄᓇᕗᒻᒥ ᓄᓇᓖᑦ ᐊᒻᒪᓗ ᐃᓄᐃᑦ ᓄᓇᕗᑦ ᓄᓇᖓᑕ ᓯᓚᑖᓃᑦᑐᑦ ᓇᓗᓇᐃᖅᑕᐅᓯᒪᓂᖓᓂᒃ ᐊᑎᓕᐅᖅᑕᐅᒋᐊᓖᑦ ᐃᖢᐊᖅᓴᐃᔨᒧᑦ. ᑐᓴᖅᑎᑦᓯᒍᑕᐅᔪᓕᒫᑦ ᑲᙳᓇᖅᑎᑕᐅᓂᐊᖅᑐᑦ ᐊᓯᖅᑯᕝᕕᖃᙱᑦᑐᒥᒃ. ᐃᓄᑑᔭᕆᐊᖃᖅᑎᑕᐅᔪᓄᑦ ᐃᑲᔫᑏᑦ ᐊᑭᓕᖅᓱᑕᐅᙱᑦᑐᓄᑦ ᐃᑲᔫᑎ. ᑐᙵᕕᒃᑯᑦ ᐃᓄᑑᔭᕆᐊᓕᓐᓄᑦ ᐃᑲᔫᑎᖏᑦ ᓴᖅᑭᖅᑕᐅᓚᐅᖅᑐᑦ ᑲᓇᑕ ᒐᕙᒪᒃᑯᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓄᑦ ᐃᑲᔫᑎᒃᓴᓄᑦ ᑮᓇᐅᔭᖅᑑᑎᒃᓴᓂᒃ.
ᑲᙳᓇᖅᑎᑕᐅᒋᐊᖃᕐᓂᖓᓄᑦ, ᓱᓇᒃᑯᑖᑦ ᐃᑲᔫᑏᓪᓗ ᑐᓂᔭᐅᔾᔮᖏᑦᑐᑦ ᐊᒃᑐᖅᑕᐅᓯᒪᔪᑦ ᑭᓇᑐᐃᓐᓇᖅ/ᑭᒃᑯᑐᐃᓐᓇᐃᑦ ᖃᐅᔨᒃᑲᐃᖏᓐᓂᖏᓐᓂ ᑕᑕᑎᕆᓚᐅᙱᓐᓂᖏᓐᓂ ᐃᓄᑑᔭᕆᐊᖃᕐᓂᕐᒧᑦ ᐃᑲᔫᑎᓂᒃ ᑐᒃᓯᕋᐅᑎᓂᒃ. ᑐᒃᓯᕋᐅᑏᑦ ᑕᑕᑎᕆᐊᓖᑦ ᐸᐃᑉᐹᒨᖅᑕᐅᒍᓐᓇᖅᑐᑦ ᐅᕝᕙᓘᓐᓃᑦ ᑕᑕᑎᖅᑕᐅᓗᑎᒃ ᖃᕆᓴᐅᔭᒃᑯᑦ ᐱᔭᐅᓗᑎᒃ ᐅᕙᙵᑦ https://covid19.tunngavik.com/nti-isolation-kit-form/
ᖃᐅᔨᒪᒋᑦ, ᓱᓇᒃᑯᑖᑦ ᐃᑲᔫᑏᓪᓗ ᐊᑯᓂᐅᑐᐃᓐᓇᕆᐊᖃᕐᓂᖏᓐᓂᒃ ᐊᒥᓱᕐᖑᐸᓪᓕᐊᓂᖏᓐᓄᑦ ᓄᕙᔾᔪᐊᕐᓇᓖᑦ−19-ᒥᒃ ᓄᓇᕗᒻᒥ, ᓄᓇᓖᑦ ᓂᐅᕕᕐᕕᖏᑕ ᐃᑲᕐᕋᖏᑦ ᐊᒻᒪᓗ ᐱᔾᔪᑕᐅᓗᓂ ᓯᓚ ᐊᒻᒪᓗ ᐊᓯᖏᑦ ᐱᓕᕆᐊᒃᓴᓅᖓᔪᑦ ᓄᓇᕗᒻᒥ ᓂᐅᕕᐊᒃᓴᖃᖃᑦᑕᖅᑐᓂ. ᐱᓕᕆᖃᑎᒻᒪᕆᒋᔭᕗᑦ ᐱᓇᓱᐊᖃᑎᕗᑦ ᐊᒻᒪᓗ ᑎᒍᒥᐊᖅᑏᑦ ᐸᔪᑦᑎᕆᒍᑎᒃᓴᑎᓐᓂᒃ ᐃᓄᑑᔭᕆᐊᓕᓐᓄᑦ ᐃᑲᔫᑎᓂᒃ. ᑐᙵᕕᒃᑯᑦ ᑲᒪᕙᓪᓕᐊᖏᓐᓇᖅᑐᑦ ᐊᖏᖅᑕᐅᕙᓪᓕᐊᔪᓂᒃ ᑐᒃᓯᕋᐅᑎᓂᒃ ᑕᑕᑎᕋᑦᓴᒃᑯᑦ ᑐᓂᔭᐅᕙᓪᓕᐊᓂᖏᑦ ᒪᓕᑦᑐᒋᑦ. ᑐᙵᕕᒃᑯᑦ ᐱᓕᕆᔨᖏᑦ ᐊᒻᒪᓗ ᓂᐅᕕᕐᕕᐅᕙᑦᑐᑦ ᐊᑐᓂᑦ ᓄᓇᓕᓐᓂ ᖁᔭᒋᕚᑎᑦ ᑐᑭᓯᐊᓂᕆᔭᕐᓂᒃ ᕿᓄᐃᓵᕐᓂᕆᔭᕐᓂᓪᓗ ᐅᑕᖅᑭᓯᐊᕐᓂᒃᑯᑦ.
ᐃᓪᓗᒥᐅᖃᑎᓐᓂᒃ ᐃᑲᔫᓯᐊᖅᑐᖃᕇᕐᓂᖅᑲᑦ ᐃᓄᑑᔭᕆᐊᖃᖅᑎᑕᐅᔪᓄᑦ ᐃᑲᔫᑎᒥᒃ, ᑐᒃᓯᕋᒃᑲᓐᓂᕈᑎᒋᔪᓐᓇᔾᔭᖏᑕᑎᑦ ᑖᒃᑯᓄᙵᑦᓴᐃᓐᓇᖅ ᐅᓗᓄᑦ.
ᑐᑭᓯᒋᐊᒃᑲᓐᓂᕈᒪᒍᕕᑦ ᑐᙵᕕᒃᑯᑦ ᓇᒧᙶᔭᕆᐊᖃᙱᑦᑐᓄᑦ ᐃᑲᔫᑎᒃᓴᖏᓐᓂᒃ, ᖃᐅᔨᒋᐊᕈᓐᓇᖅᑐᑎᑦ ᐊᑭᖃᙱᑦᑐᒧᑦ 1-888-924-3757 ᐅᕝᕙᓘᓐᓃᑦ ᐃᕐᖐᓐᓈᕈᑖᓄᑦ COVID-19@tunngavik.com ᐅᕝᕙᓘᓐᓃᑦ ᑐᓴᕆᐊᒃᑲᓐᓂᕈᓐᓴᕐᒥᔪᑎᑦ ᐃᑭᐊᖅᑭᕕᒻᒧᑦ ᐅᕗᖓ covid19.tunngavik.com.
ᑐᑭᓯᒋᐊᒃᑲᓂᕐᕕᒃᓴᖅ:
ᑭᐅᕆᓐ ᕙᓚᐅᕋᑎ
ᑐᑭᒧᐊᒃᑎᑦᑎᔨᒧᑦ ᑭᖑᕝᕕᐅᑎᓯᒪᔪᖅ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᙵᕕᒃ ᑎᒥᖓ
ᐅᖄᓚᐅᑖ: (867) 975-4900/ᐊᑭᖃᙱᑦᑐᖅ: 1-888-924-3757
www.tunngavik.com
