ᑐᒃᓯᕋᐅᓯᐅᖁᔨᒍᑎ

ᓄᓇᕗᑦ ᑐᙵᕕᒃ ᑎᒥᖓ
ᑐᒃᓯᕋᐅᓯᐅᖁᔨᒍᑎ
ᑐᑭᓯᑎᑦᓯᕐᖓᐅᑎ

ᓄᓇᕗᑦ ᑐᙵᕕᒃ ᑎᒥᖓ (ᑐᙵᕕᒃ), ᓄᓇᑖᕐᓂᕐᒧᑦ ᑲᑐᔾᔨᖃᑎᒌᑦ ᐃᓄᓐᓄᑦ ᓄᓇᕗᒻᒥ, ᑐᒃᓯᕋᐅᓯᐅᖁᔨᔾᔪᑎᓕᐅᕐᒪᑕ ᐊᔪᙱᔾᔪᑎᓕᓐᓂᒃ ᑐᒃᓯᕋᖅᑐᓄᑦ ᐊᐅᓚᑦᓯᒍᑎᒃᓴᓂᒃ ᐅᑯᓂᖓ ᐱᓕᕆᐊᓂᒃ (ᑖᒃᑯᐊ “ᐱᓕᕆᐊᑦ”):

ᐱᓕᕆᕝᕕᒃ ᑐᑭᓯᓇᓱᐊᕐᓂᕐᒧᑦ, ᒥᐊᓂᖅᓯᓂᕐᒧᑦ, ᖃᐅᔨᓴᕐᓂᕐᒧᑦ ᑐᑭᓯᑦᓯᐊᑲᓐᓂᕈᒪᒻᒪᑕ ᓄᓇᕗᒻᒥ ᖃᐅᔨᓴᕐᓂᕐᒧᑦ ᐊᐅᓚᑦᓯᔾᔪᑏᑦ ᐋᖅᑭᑦᓯᒪᓂᕆᓲᖏᓐᓂᒃ ᐊᒻᒪᓗ ᖃᐅᔨᒪᔾᔪᑎᒃᓴᓂᒃ ᐃᓄᐃᑦ ᑲᒪᖃᑕᐅᖃᑦᑕᕐᓂᖏᓐᓂᒃ ᐊᔾᔨᒌᙱᑦᑐᓄᑦ ᑐᑭᓯᓇᓱᐊᕐᓂᕐᒧᑦ ᓚᐃᓴᑖᕋᓱᐊᕐᓂᕆᓲᖏᓐᓂᒃ.

A. ᐊᑐᐊᕋᑦᓴᑦ ᑐᒃᓯᕋᖅᑐᓄᑦ

1. ᑐᒃᓯᕋᐅᑏᑦ ᑐᓂᔭᐅᓯᒪᒋᐊᓖᑦ ᑐᙵᕕᒃᑯᓐᓄᑦ ᑭᖑᓂᐊᓂᐅᙱᑦᑐᖅ ᖃᐅᔨᓴᐅᑦ 5 ᐅᓐᓄᓴᒃᑯᑦ ᑲᓇᓐᓇᕐᒥ ᓅᕙᐃᒻᕙ 8, 2021 (ᑖᓐᓇ “ᒪᑐᕕᒃᓴᖓ”) ᐅᕗᖓ:

ᓄᓇᕗᑦ ᑐᙵᕕᒃ ᑎᒥᖓ
ᐅᕗᖓ: ᔩᓐ ᐋᓚᓐ, ᖃᐅᔨᓴᕐᓂᕐᒧᑦ ᖃᐅᔨᒪᔨᑕᒻᒪᕆᒃ (ᑖᓐᓇ “ᖃᐅᔨᒋᐊᕐᕕᒃᓴᖅ”)
3rd ᓇᑎᖓ, ᐃᒡᓗᕗᑦ ᐃᓪᓗᖁᑖ, ᑎᑎᖅᑲᖃᐅᑖ 638
ᐃᖃᓗᐃᑦ, ᓄᓇᕗᑦ X0A 0H0
ᐅᖄᓚᐅᑖ: (867) 975-4950

2. ᑐᑦᓯᕋᐅᑏᑦ ᑐᓂᔭᐅᓯᒪᒋᐊᓖᑦ ᐃᕐᖐᓐᓈᕈᑎᒃᑯᑦ ᐊᑐᖅᑕᐅᓗᑎᒃ ᐅᑯᐊ:

• ᐃᕐᖐᓐᓈᕈᑎᒃᑯᑦ ᐊᐅᓪᓚᖅᑎᑕᐅᓯᒪᔪᖅ ᑐᑦᓯᕋᐅᑦ ᐱᔭᐅᓯᒪᒋᐊᓕᒃ ᐅᓪᓗᖓᓂ ᑐᖔᓂᓘᓐᓃᑦ ᒪᑐᕕᑦᓴᖓᑕ ᐅᓪᓘᑉ ᐃᕐᖐᓐᓈᕈᑎᒃᑯᑦ ᑐᕌᕈᑎᖓᓄ ᓇᓗᓇᐃᖅᑕᐅᓯᒪᔪᒧᑦ ᑖᒃᑯᓇᓂ ᑐᒃᓯᕋᐅᓯᐅᖁᔨᔾᔪᑎᓂ (RFP).
• ᑐᑦᓯᕋᐅᑦ ᐱᔭᐅᓯᒪᒐᓗᐊᕐᒪᖔᖅ ᑐᖔᓂ ᒪᑐᕕᑦᓴᖓᑕ, ᐊᐅᓪᓚᖅᑎᑕᐅᖁᔭᐅᔪᖅ ᐃᕐᖐᓐᓈᕈᑎᒃᑯᑦ ᐊᐅᓪᓚᖅᑎᑕᐅᓗᓂ ᓯᕗᓂᑐᖃᖓᓂ ᒪᑐᕕᑦᓴᖓᑕ, ᐊᒻᒪᓗ ᑐᑦᓯᕋᖅᑐᖅ ᓇᓗᓇᐃᕈᑎᒥᒃ ᐱᔭᐅᓂᖓᓂᒃ ᑭᐅᓗᓂ ᐃᕐᖐᓐᓈᕈᑎᒃᑯᑦ ᐅᖃᓚᐅᑎᒃᑯᓘᓐᓃᑦ ᖃᐅᔨᒋᐊᕈᑎᒋᓗᒍ.

3. ᑐᙵᕕᒃᑯᑦ ᐊᑭᓖᑎᑕᐅᔪᓐᓇᔾᔮᖏᓪᓚᑦ ᐊᑭᓖᑎᑕᐅᒐᓱᐊᕈᑎᒃ, ᐊᔪᐃᓐᓈᖑᓗᑎᒃ ᐅᕝᕙᓘᓐᓃᑦ ᐊᓯᖏᑎᒍᑦ ᐊᐅᓚᓂᐅᔪᑎᒍᑦ ᑭᓱᑐᐃᓐᓇᕐᒥᒃ ᐱᔾᔪᑎᖃᕐᓗᑎᒃ ᐃᕐᖐᓐᓈᕈᑎᒃᑰᑕᐅᓇᓱᐊᖅᑐᖅ ᐊᕝᕕᖅᑯᑕᖃᕐᓂᖅᐸᑦ, ᐱᔭᐅᓯᒪᙱᑉᐸᑦ ᐊᑕᖏᕐᓗᓂ, ᐱᔭᐅᓐᓂᖅᐸᑦ ᑭᖑᓂᐊᒍᑦ ᐅᖃᐅᓯᐅᔫᑉ ᒪᑐᕕᑦᓴᖓᑕ ᖃᐅᔨᓴᐅᑖᓂᒃ ᐅᓪᓗᖓᓂᓪᓗ, ᐅᕝᕙᓘᓐᓃᑦ ᖃᓄᑐᐃᓐᓇᖅ ᐱᔾᔪᑎᖃᕐᓗᓂ.

4. ᑐᙵᕕᒃᑯᑦ ᐃᓱᒪᒃᓴᖅᓯᐅᕈᑎᖃᔾᔮᖏᑦᑐᑦ ᑐᒃᓯᕋᐅᑎᓂᒃ ᐃᒪᐃᑉᐸᑕ:

• ᑐᓂᔭᐅᔪᓂᒃ ᑭᖑᓂᐊᓂ ᒪᑐᕕᑦᓴᖓᑕ ᐅᓪᓗᖓ ᖃᐅᔨᓴᐅᑖᓗ.

• ᑐᓂᔭᐅᔪᓂᒃ ᓇᓗᓇᐃᖅᑕᐅᓯᒪᔫᑉ ᖁᓛᓃᑦᑐᓂ ᐊᓯᐊᓄᑦ ᑐᕌᕈᒻᒧᑦ

ᑭᖑᓂᐊᓂ ᒪᑐᕕᑦᓴᖓᑕ ᐅᓪᓗᖅ, ᑕᐃᒃᑯᑐᐊᑦ ᑭᒃᑰᓂᖏᑦ ᑐᕌᕈᑎᖏᓪᓗ ᑐᒃᓯᕋᖅᑐᑦ ᓴᖅᑭᖅᑕᐅᓂᐊᖅᑐᑦ ᑭᒃᑯᑐᐃᓐᓇᕐᓄᑦ.

5. ᑐᒃᓯᕋᖅᑐᑦ ᑐᕌᕐᕕᖃᕆᐊᓖᑦ ᐊᐱᖅᑯᑎᓕᒫᓂᒃ ᖃᐅᔨᒋᐊᕐᕕᒃᓴᒧᑦ ᐃᕐᖐᓐᓈᕈᑎᒃᑯᑦ. ᐊᐱᖅᓱᕕᒃᓴᐅᖃᑦᑕᓂᐊᖅᑐᖅ ᒪᑐᒐᓱᐊᕐᓂᖓᓂ. ᐊᐱᖅᑯᑏᑦ ᑭᒡᒍᑏᓪᓗ ᐊᑐᐃᓐᓇᐅᑎᑕᐅᓂᐊᖅᑐᑦ ᖃᐃᖅᑯᔭᐅᓯᒪᔪᓄᑦ ᐊᑭᑦᑐᕋᐅᑎᖃᑕᐅᔪᓕᒪᓄᑦ.

6. ᐅᓇ RFP: ᐊᑭᑦᑐᕋᐅᑎᒍᑕᐅᙱᑦᑐᖅ ᐅᕝᕙᓘᓐᓃᑦ ᒪᓂᒪᑎᑦᓯᒍᑕᐅᙱᑦᑐᖅ. ᑐᙵᕕᒃᑯᑦ ᐊᖏᕈᑎᖃᖅᓯᒪᙱᑦᑐᑦ ᑐᒃᓯᕋᐅᑎᓂᒃ ᐅᕝᕙᓘᓐᓃᑦ ᑐᒃᓯᕋᐅᑎᓂᒃ ᑐᓂᓯᓯᒪᔪᓂᒃ ᐊᑦᓯᓂᖅᐹᒥᒃ ᐊᑭᒋᓇᔭᖅᑕᖓᓂᒃ ᐅᕝᕙᓘᓐᓃᑦ ᐊᑭᖓᓂᒃ.

7. ᑐᙵᕕᒃᑯᑦ ᐱᔪᓐᓇᐅᑎᓖᑦ ᓄᖅᑲᑎᑦᓯᓂᕐᒥᒃ ᑖᑦᓱᒥᖓ RFP−ᒥᒃ ᖃᖓᑐᐃᓐᓇᖅ ᐊᒻᒪᓗ ᑐᓂᓯᖔᓕᕐᓗᑎᒃ ᑭᓱᑐᐃᓐᓇᕐᒥᒃ ᐱᔾᔪᑎᖃᕐᓗᑎᒃ ᖃᓄᑐᐃᓐᓇᓕᒫᖅ, ᐊᑭᓖᑎᑕᐅᙱᓪᓗᑎᒃ ᐊᑭᓕᕆᐊᓕᓕᒫᓂᒃ ᐊᒻᒪᓗ ᑐᒃᓯᕋᖅᑐᖅ ᐊᑭᓖᑎᑦᓯᓇᓱᐊᖅᑐᒃᓴᐅᙱᓚᖅ ᑐᙵᕕᒃᑯᓐᓂᒃ ᓴᖅᑭᕈᑕᐅᔪᒥᒃ.

8. ᑳᓐᑐᓛᒃ ᑐᓂᔭᐅᑉᐸᑦ ᓴᖅᑭᖅᑐᒥᒃ ᑕᕝᕙᙵᑦ RFP−ᒥᒃ, ᑐᓂᔭᐅᒋᐊᖃᕐᓂᐊᖅᑐᖅ ᑐᒃᓯᕋᖅᑐᒧᑦ ᑭᐅᒍᓐᓇᑦᓯᐊᓂᖅᐹᒧᑦ ᐊᒻᒪᓗ ᑐᒃᓯᕋᐅᑎᖓᒍᑦ ᑐᓂᓯᓯᒪᑉᐸᑕ ᐱᐅᓂᖅᐹᒥᒃ ᐊᑭᖃᕋᔭᕐᓂᖓᓂᒃ ᑐᙵᕕᒃᑯᓐᓄᑦ. ᑐᒃᓯᕋᖅᑐᖅ “ᑭᐅᖃᑦᑕᕐᓂᖓ” ᑎᑭᐅᑎᓯᒪᓂᖅᐹᖅ ᐊᑐᖅᑕᐅᒋᐊᓕᓐᓄᑦ ᓇᓗᓇᐃᔭᖅᓯᒪᔪᓂ ᑖᒃᑯᓇᓂ RFP ᐊᒻᒪᓗ ᐱᔪᓐᓇᑦᓯᐊᓂᖅᐹᖑᓗᓂ ᐊᐅᓚᑦᓯᓂᕐᒥᒃ ᐱᓕᕆᐊᒃᓴᓕᐊᖑᓯᒪᔪᓕᒫᓂᒃ.

9. ᐋᔩᕋᕈᑕᐅᓂᖓ ᑲᔪᓯᑎᑕᐅᓂᖓᓗ ᑎᑎᕋᖅᓯᒪᔪᒃᑯᑦ ᐊᖏᖃᑎᒌᒍᑎᓂ ᑐᙵᕕᒋᔭᐅᒋᐊᓕᒃ ᑳᓐᑐᓛᓕᐅᕈᑕᐅᓗᓂ. ᑐᒃᓯᕋᖅᑐᖅ ᐱᓇᓱᐊᕆᐊᖃᙱᑦᑐᖅ ᒪᓕᒐᖅᑎᒍᑦ ᐅᕝᕙᓘᓐᓃᑦ ᓇᖕᒥᓂᖅ ᐱᔪᓐᓇᐅᑎᓂᒃ ᐅᕝᕙᓘᓐᓃᑦ ᐱᔪᓐᓇᕈᑕᐅᔪᓂᒃ ᖃᓄᑐᐃᓐᓇᓕᒫᖅ ᑖᒃᑯᑎᒎᓇ RFP−ᑯᑦ ᑳᓐᑐᓛᒃ ᐊᑎᓕᐅᖅᑕᐅᓚᐅᙱᓐᓂᖓᓂ.

10. ᑳᓐᑐᓛᒃ ᐃᓗᓕᖃᕐᓂᐊᖅᑐᖅ ᐊᑦᑐᐊᔪᓂᒃ ᑎᑎᕋᖅᓯᒪᓂᖏᓐᓄᑦ ᑕᕝᕙᓂ RFP, ᐊᖏᖅᑕᐅᔪᒧᑦ ᐊᑭᖃᕋᔭᕐᓂᖓᓄᑦ, ᐊᒻᒪᓗ ᐊᓯᖏᓐᓄᑦ ᒪᓕᒐᑦᓴᕆᔭᐅᔪᓄᑦ ᑐᑭᓯᒪᖃᑎᒌᓐᓂᒃᑯᑦ ᐊᖏᕈᑕᐅᓯᒪᔪᒥᒃ, ᓴᖅᑭᕋᓗᐊᖅᐸᑕ ᐊᖏᖅᑕᐅᓯᒪᔪᒥᒃ ᐊᑭᖃᕋᔭᕐᓂᖓᓂᒃ ᐅᕝᕙᓘᓐᓃᑦ ᓴᖅᑭᖅᑐᒥᒃ ᐋᔩᕋᕈᑕᐅᔪᓂᒃ. ᑐᙵᕕᒃᑯᑦ ᐱᔪᓐᓇᐅᑎᖃᖅᐳᑦ ᐋᔩᕋᕈᑎᖃᕐᓂᕐᒥᒃ ᐋᖅᑭᒋᐊᕈᑎᓂᒃ ᓇᓕᑐᐃᓐᓇᖓᓂᒃ ᑐᒃᓯᕋᖅᑐᒥᒃ ᑐᓂᓯᓯᒪᔪᒥᒃ ᑐᑦᓯᕋᐅᑎᒥᓂᒃ.

11. ᓈᖕᒪᖏᓪᓕᐅᕈᑎᑕᖃᖅᐸᑦ ᑖᑦᓱᒧᖓ RFP−ᒧᑦ ᐊᒻᒪᓗ ᑐᓂᔭᐅᔪᒧᑦ ᑳᓐᑐᓛᒥᒃ, ᑳᓐᑐᓛᒃ ᓴᙱᓂᖅᓴᐅᖏᓐᓇᓂᐊᖅᐳᖅ.

12. ᐋᖅᑭᒋᐊᕈᑎᓕᐊᖑᔪᑦ ᑐᙵᕕᒃᑯᓐᓂᒃ ᑕᕝᕗᖓ RFP−ᒧᑦ ᑐᓂᔭᐅᓂᐊᖅᑐᖅ ᑎᑎᕋᖅᓯᒪᓗᓂ ᐊᒻᒪᓗ ᐊᐅᓪᓚᖅᑎᑕᐅᓗᓂ ᑐᓂᔭᐅᓯᒪᔪᓕᒫᓄᑦ ᑎᑎᕋᖅᓯᒪᔪᓂᒃ.

13. ᑐᙵᕕᒃᑯᑦ ᐊᑭᓖᑎᑕᐅᓂᐊᙱᓚᑦ ᐊᑭᓕᕆᐊᓕᖏᓐᓂᒃ ᐸᕐᓇᑕᐅᓂᖏᓐᓄᑦ ᓴᖅᑭᖅᑕᐅᓂᖏᓐᓄᓘᓐᓃᑦ ᑐᒃᓯᕋᐅᑏᑦ.

14. ᖃᐅᔨᓴᖅᑏᑦ ᑲᑎᒪᔨᕋᓛᑦ ᑐᙵᕕᒃᑯᑦ ᐱᓕᕆᔨᖏᓃᙶᖅᑐᑦ ᐊᒻᒪᓗ/ᐅᕝᕙᓘᓐᓃᑦ ᑳᓐᑐᓛᒃᑕᐅᓯᒪᔪᑦ ᕿᒥᕐᕈᖃᑦᑕᓂᐊᖅᑕᖏᑦ ᑐᒃᓯᕋᐅᑏᑦ. ᑐᙵᕕᒃᑯᑦ ᐊᑕᖏᖅᑐᒥᒃ ᐱᔪᓐᓇᐅᑎᖃᖅᐳᑦ ᓇᓗᓇᐃᕆᓂᕐᒥᒃ ᐱᐅᓈᖅᓯᒪᓂᖏᓐᓂᒃ ᑕᒪᐃᓐᓂᒃ ᑐᒃᓯᕋᐅᑎᓂᒃ ᓇᓕᖅᑯᑦᓯᓂᖅᐹᓂᒃ ᖃᐅᔨᓴᖅᑕᐅᓂᕐᒧᑦ ᒪᓕᒋᐊᓕᓐᓂᒃ ᐃᓚᒋᔭᐅᓗᑎᒃ ᑐᒃᓯᕋᕈᓐᓇᕐᓂᖅ ᑐᑭᓯᒋᐊᒃᑲᓐᓂᕈᑎᒃᓴᒥᒃ ᑕᕝᕙᙵᑦ ᐅᕝᕙᓘᓐᓃᑦ ᐋᔩᕋᕈᑎᖃᕐᓗᑎᒃ ᐊᑕᐅᓯᕐᒥᒃ ᐊᑕᐅᓯᐅᙱᑦᑐᒥᓪᓘᓐᓃᑦ ᑐᒃᓯᕋᖅᑐᓂᒃ.

15. ᑐᒃᓯᕋᖅᑐᑦ ᐋᖅᑭᒋᐊᕆᒍᓐᓇᖅᑐᑦ ᐊᑭᒋᓇᔭᖅᑕᖏᓐᓂᒃ ᓇᓗᓇᐃᖅᓯᒪᔭᒥᓂᒃ ᑎᑭᓪᓗᒍ ᒪᑐᕕᑦᓴᖓᑕ ᐅᓪᓗᖓ ᐊᒻᒪᓗ ᖃᐅᔨᓴᐅᑖ ᐃᕐᖐᓐᓈᕈᑎᒃᑯᑦ ᓱᒃᑲᔪᒃᑯᓘᓐᓃᑦ. ᐊᑭᒋᓇᔭᖅᑕᖏᓐᓂᒃ ᓇᓗᓇᐃᕈᑏᑦ ᐋᖅᑭᒋᐊᖅᑕᐅᒍᓐᓇᖏᑦᑐᑦ ᒪᑐᕕᑦᓴᖓᑕ ᐅᓪᓗᓂ ᑭᓯᐊᓂ ᖁᔭᓈᖅᑕᐅᒍᓐᓇᖅᑐᑦ ᑐᒃᓯᕋᖅᑐᒧᑦ ᖃᖓᑐᐃᓐᓇᖅ ᑐᖔᓂ ᐊᖏᖅᑕᐅᓂᖓᑕ.

16. ᑐᙵᕕᒃᑯᑦ ᑲᔪᖏᖅᓴᐃᕗᑦ ᐊᑐᖁᔨᓪᓗᑎᒃ ᐃᓄᐃᑦ ᐱᖁᑎᖏᓐᓂᒃ/ᐱᔨᑦᓯᕈᑎᖏᓐᓂᒃ/ ᓇᖕᒥᓂᖁᑎᖏᓐᓂᒃ, ᐊᒻᒪᓗ ᐱᓕᖕᒪᒃᓴᐃᓂᕐᒥᒃ ᐃᓄᓐᓂᒃ ᐃᖅᑲᓇᐃᔭᖅᑎᓂᒃ ᐊᒻᒪᓗ ᐋᖅᑭᒋᐊᕈᑎᓕᐅᕐᓂᐊᖅᐳᑦ ᖁᓛᓂ ᑎᑎᕋᖅᓯᒪᔪᓂᒃ ᐱᔾᔪᑎᓪᓗᐊᑕᕐᓂᒃ ᖃᐅᔨᓴᖅᑕᐅᓂᖏᓐᓂ ᑐᒃᓯᕋᖅᓯᒪᔪᑦ.

17. ᑎᑎᕋᖅᑕᐅᓯᒪᔪᑦ ᐊᖏᖅᑕᐅᓯᒪᔪᑦ ᐃᓄᐃᑦ ᓇᖕᒥᓂᖁᑎᖏᑦ ᐱᔭᐅᔪᓐᓇᖅᑐᑦ ᑐᙵᕕᒃᑯᑦ ᐃᓄᐃᑦ ᓇᖕᒥᓂᖁᑎᖏᓐᓂᒃ ᑎᑎᕋᖅᑕᐅᕕᖓᓂ.

18. ᑐᒃᓯᕋᐅᑎᑦ ᓇᐃᓪᓕᒋᐊᖅᑕᐅᓯᒪᒍᓐᓇᖅᑐᑦ. ᑐᒃᓯᕋᖅᑐᑦ ᑐᒃᓯᕋᐅᑎᖏᑦ ᓇᐃᓪᓕᒋᐊᖅᓯᒪᔪᑦ ᓇᓗᓇᐃᖅᓯᒪᑦᓯᐊᖅᑐᓂᒃ ᐅᓂᒃᑳᓕᐅᖁᔭᐅᒍᓐᓇᖅᑐᑦ. ᐅᓂᒃᑳᓕᐅᖁᔭᐅᔪᑦ ᓇᖕᒥᓂᖅ ᐅᓂᒃᑳᓕᐅᕆᐊᖃᕐᓂᕐᒥᓄᑦ ᑐᒃᓯᕋᖅᑐᖅ ᐊᑭᓕᕐᓂᐊᖅᑕᖓ.

19. ᑐᑦᓯᕋᐅᑦ ᐊᒻᒪᓗ ᐃᓚᓕᐅᑎᓯᒪᔪᑦ ᑎᑎᕋᖅᓯᒪᔪᑦ ᑐᓂᔭᐅᔪᑦ ᑐᒃᓯᕋᖅᑐᒧᑦ ᓇᖕᒥᓂᖁᑎᑖᖑᓂᐊᖅᐳᖅ ᑐᙵᕕᒃᑯᓐᓄᑦ ᐊᒻᒪᓗ ᐅᑎᖅᑎᑕᐅᔾᔮᖏᑦᑐᖅ. ᓂᕆᐅᒋᔭᐅᔪᖅ ᓵᓚᒃᓴᖅᑐᖅ ᐊᑭᒋᔭᐅᓇᔭᖅᑐᒧᑦ ᓇᓗᓇᐃᕈᑎ ᓇᓗᓇᐃᖅᑕᐅᒍᓐᓇᖅᑐᖅ ᓅᕙᐃᒻᕙ 26, 2021 ᖃᐅᔨᓴᐅᑦ 5-ᒥ ᑲᓇᓐᓇᕐᒥ.

20. ᓂᐅᕕᕐᕖᑦ ᒪᓂᒪᑎᑕᖏᑦ ᐊᖏᖅᑕᐅᓚᐅᙱᑦᑐᑦ ᑐᓂᔭᐅᓂᐊᖅᑐᑦ ᑎᑎᖅᑲᒃᑯᑦ ᖃᐅᔨᒃᑲᐃᔾᔪᑎᒥᒃ ᖁᓕᒐᓚᓐᓂᒃ ᐱᓕᕆᓐᓇᐃᑦ ᐅᓪᓗᖏᓐᓂᒃ ᓂᕈᐊᕐᕕᐅᓚᐅᖅᑎᓗᒋᑦ.

B. ᒪᓕᒐᑦᓴᑦ ᐊᑐᖅᑕᐅᒋᐊᓕᓐᓄᑦ

ᑲᒪᒋᔭᐅᓯᒪᓂᖓ

ᖃᐅᔨᓴᕐᓂᕐᒧᑦ ᐊᐅᓚᑦᓯᔾᔪᑎᓄᑦ ᐋᖅᑭᑦᓯᒪᓂᖓ ᓄᓇᕗᒻᒥ ᐱᔭᕐᓃᑦᑐᖅ ᐊᒻᒪᓗ ᑲᒪᒋᔭᐅᔪᖅ ᐊᒥᓱᓄᑦ ᖃᐅᔨᓴᕐᓂᕐᒧᑦ ᓚᐃᓴᑖᖅᑎᑦᓯᖃᑦᑕᖅᑐᓄᑦ, ᐊᐅᓚᑕᐅᙱᑐᐃᓐᓇᐃᑦ ᐃᓄᓐᓄᑦ. ᑐᑭᓯᑦᓯᐊᑲᓐᓂᕈᑎᒃᓴᒥᒃ ᖃᓄᖅ ᐃᓄᐃᑦ ᓇᖕᒥᓂᖅ−ᐊᐅᓚᑦᓯᒍᓐᓇᖅᓯᕙᓪᓕᐊᓂᖓ ᓯᕗᒧᐊᒐᔭᕐᒪᖔᖅ ᓄᓇᕗᒻᒥ, ᑐᑭᓯᑦᓯᐊᑲᓐᓂᕐᓂᖅ ᐊᔾᔨᒌᙱᑦᑐᓂᒃ ᖃᐅᔨᓴᕐᓂᕐᒧᑦ ᓚᐃᓴᓂᒃ, ᐱᔪᓐᓇᐅᑎᓂᒃ, ᐊᒻᒪᓗ ᐊᖏᖅᓯᒪᓂᕐᒧᑦ ᐊᐅᓚᓂᐅᔪᓂᒃ ᐊᒻᒪᓗ ᐊᔾᔨᒌᙱᑦᑐᑎᒍᑦ ᑲᒪᒋᔭᐅᓂᖓ ᐃᓄᖕᓄᑦ ᑖᒃᑯᓇᓂ ᐊᐅᓚᓂᐅᔪᓂ ᐱᔭᕆᐊᖃᒻᒪᕆᑉᐳᖅ.

ᐱᓕᕆᐊᖑᓂᖓ

ᑐᓂᔭᐅᔪᖅ ᑐᒃᓯᕋᖅᓯᒪᔪᖅ ᐃᒪᐃᓐᓂᐊᖅᑐᖅ:

1. ᑲᒪᒋᔭᐅᓯᒪᓂᖓᓂᒃ ᑐᑭᓯᓇᓱᐊᕐᓂᖅ ᖃᐅᔨᓴᕈᑕᐅᔪᒧᑦ ᓚᐃᓴᒧᑦ ᐊᐅᓚᑕᐅᓯᒪᓂᖓ ᓄᓇᕗᒻᒥ

2. ᐃᖅᑲᓇᐃᔭᖃᑎᖃᕐᓂᐊᖅᑐᑦ ᑐᙵᕕᒃᑯᓐᓂᒃ ᐊᒻᒪᓗ ᐱᓇᓱᐊᖃᑎᖏᓐᓂᒃ ᐋᖅᑭᑦᓱᐃᓗᑎᒃ ᓇᐃᓈᖅᓯᒪᔪᒥᒃ ᐊᐱᖅᑯᑎᓂᒃ ᖃᐅᔨᓴᕈᑎᓂᒃ ᑐᑭᓯᓇᓱᐊᕐᓂᕐᒧᑦ ᓚᐃᓴᑖᖅᑎᑦᓯᕙᑦᑐᓂᒃ.

3. ᖃᐅᔨᖏᐊᕐᕕᖃᕐᓂᖅ ᓄᓇᕗᒻᒥ ᖃᐅᔨᓴᕐᕕᖕᒥᒃ ᓚᐃᓴᑖᖅᑎᑦᓯᕙᑦᑐᓂᒃ ᓄᐊᑦᓯᒍᑎᒃᓴᓂᒃ ᑐᓴᕈᑎᓂᒃ ᖃᐅᔨᓴᖅᑕᒥᓄᑦ ᓚᐃᓴᑖᖅᑎᑦᓯᓂᕐᒧᑦ ᐊᐅᓚᑦᓯᓂᕐᒥᒃ ᐊᒻᒪᓗ ᑲᒪᖃᑕᐅᓂᖏᓐᓂᒃ ᐃᓄᐃᑦ ᑕᒪᒃᑯᓇᓂ ᐊᔾᔨᒋᙱᑦᑐᓂᒃ ᐊᐅᓚᓂᐅᔪᓂ (ᓲᕐᓗ, ᑐᓴᐅᒪᔾᔪᑎᓕᕆᓂᖅ, ᑐᒃᓯᕋᐅᒻᒥᒃ ᕿᒥᕐᕈᓂᖅ, ᐃᓱᒪᓕᐅᕈᑎᖃᕐᓂᖅ, ᐊᓯᖏᓪᓗ)

4. ᖃᐅᔨᒋᐊᑲᓂᕐᓂᖅ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ/ᓴᓴᐃᔭᑎᓂᒃ ᐱᔭᕆᐊᖃᖅᐸᑦ ᓇᓗᓇᐃᕈᑎᒃᓴᒥᒃ ᑲᒪᔨᒋᔭᐅᓂᖏᓐᓂᒃ ᐊᔾᔨᒌᙱᑦᑐᓄᑦ ᖃᐅᔨᓴᕐᓂᕐᒧᑦ ᓚᐃᓵᑖᖅᑎᑦᓯᓂᕐᒧᑦ ᐊᐅᓚᓂᐅᔪᓂᒃ.

5. ᓄᐊᑦᓯᓂᖅ ᐊᒻᒪᓗ ᑲᑎᖅᓱᐃᓂᖅ ᑐᓴᕈᑎᓂᒃ ᐊᒻᒪᓗ ᐸᕐᓇᓐᓂᖅ ᐅᓂᒃᑳᓕᐅᕐᓂᕐᒧᑦ.

ᑐᒃᓯᕋᖅᑐᖅ(ᑐᑦ)

ᕿᓂᖅᑐᒍᑦ ᖃᐅᔨᒪᓂᓕᓐᓂᒃ ᑳᓐᑐᓛᕋᑦᓴᓂᖅ ᓱᖏᐅᑎᓯᒪᔪᓂᒃ ᖃᐅᔨᓴᕐᓂᕐᒧᑦ ᒪᓕᒐᑦᓴᓂᒃ ᓄᓇᕗᒻᒥ ᐊᒻᒪᓗ ᑲᒪᓯᒪᓂᒃᑯᑦ ᖃᐅᔨᒪᓂᓕᓐᓂᒃ ᐱᐅᓂᖅᐹᓂᒃ ᐱᓕᕆᐊᖃᕈᓐᓇᖅᑐᓂᒃ ᖃᐅᔨᓴᕐᓂᕐᒥᒃ ᓄᓇᕗᒻᒥ.

ᐱᓕᕆᐊᒧᑦ ᐋᖅᑭᑦᓯᒪᔭᐅᑲᐃᓐᓇᖅᑐᑦ/ᐱᕝᕕᒃᓴᖃᕐᕕᐅᔪᑦ

ᓂᕆᐅᒋᔭᐅᔪᑦ ᓯᕗᒧᐊᒃᑎᑕᐅᔪᓐᓇᕐᓂᖏᑦ ᐊᒻᒪᓗ ᐊᒃᑐᐊᔪᑦ ᐱᕕᒃᓴᖃᖅᑎᑕᐅᒍᑎᖏᑦ ᐃᒪᐃᓕᖓᔪᑦ:

1. ᑲᒪᒋᔭᐅᓯᒪᓂᖓᓂᒃ ᕿᒥᕐᕈᓂᖅ ᑐᓂᔭᐅᓯᒪᒋᐊᓕᒃ ᐃᓗᐊᓂ ᒪᕐᕉᒃ ᑕᖅᑮᒃ ᐊᖏᖅᑕᐅᔪᒃᓴᒫᖅ

2. ᐊᐱᖅᓲᑏᑦ ᑎᑎᕋᖅᓯᒪᔪᑦ ᑐᓂᔭᐅᓯᒪᓗᑎᒃ ᑐᓂᐅᖅᑲᖅᑕᐅᖏᓐᓂᖏᓐᓂ

3. ᑎᑎᕋᕆᐊᙵᐅᑎ ᐅᓂᒃᑳᖅ ᑐᓂᔭᐅᓯᒪᒋᐊᓕᒃ ᕕᕝᕗᐊᓕ 14, 2022 ᑐᖔᓂᓘᓐᓃᑦ

4. ᑭᖑᓪᓕᐹᖅᓯᐅᑦ ᐅᓂᒃᑳᓂ ᑐᓂᔭᐅᓯᒪᒋᐊᓕᒃ ᕕᕝᕗᐊᓕ 28, 2022 ᑐᖔᓂᓘᓐᓃᑦ.

C. ᑐᒃᓯᕋᐅᑎᓂᒃ ᖃᐅᔨᓴᕈᑏᑦ

ᖃᐅᔨᓴᖅᑕᐅᓂᖏᓐᓄᑦ ᒪᓕᒋᐊᓖᑦ

ᑐᑦᓯᕋᐅᑏᑦ ᖃᐅᔨᓴᖅᑕᐅᓂᐊᖅᑐᑦ ᒪᓕᒐᑦᓴᓕᐊᖑᓯᒪᔪᑎᒍᑦ ᐅᑯᑎᒎᓇ:

1. ᐱᓕᕆᐊᒧᑦ ᐱᕙᓪᓕᐊᓂᖓ ᐊᒻᒪᓗ ᐱᓕᕆᐊᒃᓴᒧᑦ ᐸᕐᓇᐅᑦ: 20%
2. ᐱᓕᕆᐊᓖᑦ ᖃᐅᔨᒪᓂᖓ, ᐊᔪᙱᓐᓂᖓ ᐱᓕᕆᓯᒪᓂᖓᓗ: 20%
3. ᐊᑭᖏᑦ ᐊᑭᓕᖅᓱᕆᐊᓖᓪᓗ: 30%
4. ᐊᑐᖅᑕᐅᓂᖏᑦ ᐃᓄᐃᑦ ᐃᖅᑲᓇᐃᔭᖅᑏᑦ: 20%
5. ᖃᐅᔨᒪᔮᖑᓂᖓ ᓱᖅᑯᐃᖅᑕᐅᓯᒪᓪᓗᓂ ᐃᓱᓕᕝᕕᒃᓴᓂᒃ ᑲᔪᓯᑦᓯᐊᓲᖑᒋᐊᖓ: 10%
ᑲᑎᓪᓗᖏᑦ: 100% (100 ᓈᓴᐅᑎᖅᓱᐃᔾᔪᑏᑦ)

1. ᐱᓕᕆᐊᒧᑦ ᐱᕙᓪᓕᐊᓂᖓ ᐊᒻᒪᓗ ᐱᓕᕆᐊᒃᓴᒧᑦ ᐸᕐᓇᐅᑦ

ᑐᑦᓯᕋᐅᓯᐅᖅᑐᖅ ᑐᓂᓯᒋᐊᓕᒃ ᐊᑕᖏᖅᑐᓂᒃ ᓇᓗᓇᐃᔭᐅᑎᓂᒃ ᓴᖅᑭᑎᑦᓯᓯᒪᒍᑎᓂᒃ ᐸᕐᓇᑕᒥᓂᒃ ᐅᓂᒃᑳᒥᒃ ᑎᑎᕋᕐᓂᐊᓂᕐᒧᑦ ᓴᖅᑭᔮᖅᑎᑦᓯᔪᓂᒃ ᐅᑯᑎᒎᓇ:

• ᒪᓕᑦᓯᒪᓗᑎᒃ ᒪᓕᒐᑦᓴᓂᒃ ᐊᐅᓚᑦᓯᔾᔪᑎᓂᓪᓗ RFP−ᓄᑦ.
• ᑐᑭᓯᒪᓂᖅ ᐅᓂᒃᑳᓂ ᐊᑐᖅᑕᐅᒋᐊᓕᓐᓂᒃ ᐊᒻᒪᓗ “ᐊᐅᓚᑕᐅᔾᔪᑕᐅᒍᓐᓇᖅᑐᓂᒃ.”
• ᐋᖅᑭᒍᑎᒃᓴᐅᔪᓐᓇᖅᑐᒥᒃ, ᐊᑕᖐᔪᒥᒃ ᑲᒪᒋᔭᖃᕐᓂᕐᒥᒃ ᐱᓕᕆᐊᒥᒃ ᑎᑭᐅᑎᒍᑕᐅᓂᐊᖅᑐᒥᒃ ᐱᓕᕆᐊᒧᑦ ᐊᑐᖅᑕᐅᒋᐊᓕᓐᓂᒃ.
• ᓇᓗᓇᐃᖅᑐᖅᓯᒪᓗᓂ ᐱᓕᕆᐊᒃᓴᓄᑦ ᐸᕐᓇᐅᑦ, ᐃᓚᒋᔭᐅᓗᑎᒃ ᑎᓕᓯᔾᔪᑕᐅᓯᒪᔪᓄᑦ ᐱᐊᓂᒃᑕᐅᒋᐊᓖᑦ ᑲᔪᓯᑎᑕᐅᒍᓐᓇᕐᓗᑎᒃ ᓇᓗᓇᐃᖅᑕᐅᓯᒪᔪᑦ, ᐊᒻᒪᓗ ᐱᓕᕆᐊᖅ ᐊᐅᓚᓂᖏᓐᓂᒃ.

2. ᐱᓕᕆᐊᓖᑦ ᖃᐅᔨᒪᓂᖓ, ᐊᔪᙱᓐᓂᖓ ᐱᓕᕆᓯᒪᓂᖓᓗ

ᑐᒃᓯᕋᖅᑐᖅ ᑐᓂᓯᔭᕆᐊᓕᒃ ᓇᓗᓇᐃᖅᑐᖅᓯᒪᔪᒥᒃ ᐱᓕᕆᐊᒃᓴᒥᒃ ᐱᓕᕆᖃᑎᒌᑦᑐᓄᑦ ᐸᕐᓇᓯᐊᖅᓯᒪᒍᓐᓇᕐᓂᖏᓐᓂᒃ ᐊᐅᓚᑦᓯᒍᓐᓇᕐᓂᖏᓐᓂᓪᓗ ᐱᔪᒐᕐᓇᖅᑐᒥᒃ, ᖃᐅᔨᒋᐊᕐᕕᒃᓴᖃᕐᓗᓂ ᐱᐊᓂᒃᓯᒪᔭᒥᓂᒃ ᑲᔪᓯᓯᒪᔪᓂᒃ ᐱᓕᕆᐊᓂᒃ ᐊᔾᔨᐸᓗᖏᓐᓂᒃ ᑲᒪᒋᓇᓱᐊᖅᑕᖓᑕ. ᑐᒃᓯᕋᖅᑐᖅ ᖃᐅᔨᒃᑲᐃᓯᒪᒋᐊᓕᒃ ᓇᓗᓇᐃᖅᓯᒪᔪᓂᒃ ᐊᔪᙱᔾᔪᑎᖏᓐᓂᒃ, ᖃᐅᔨᒪᓂᖏᓐᓂᒃ ᑲᒪᒋᓯᒪᔭᖏᓐᓂᓪᓗ ᐅᑉᐱᕆᔭᒥᓂᒃ ᓈᖕᒪᒐᔭᕆᐊᖓ ᓂᕈᐊᖅᑕᐅᒋᐊᖃᕈᑎᒋᓗᒍ ᐱᓕᕆᐊᒧᑦ. ᑐᒃᓯᕋᖅᑐᖅ ᐃᓚᓕᐅᔾᔨᖁᔭᐅᕗᖅ ᓇᓗᓇᐃᖅᑐᖅᓯᒪᔪᓂᒃ ᐊᔪᙱᔾᔪᑎᒋᔭᐅᔪᓂᒃ ᐊᑐᓂᑦ ᐱᓕᕆᖃᑕᐅᔪᓂᒃ ᐃᖅᑲᓇᐃᔮᖃᕐᓂᐊᖅᑐᓂᒃ ᐱᓕᕆᐊᒥᒃ.

3. ᐊᑭᖏᑦ ᐊᑭᓕᖅᓲᑏᓪᓗ

ᑐᑦᓯᕋᐅᑎᓃᒋᐊᓕᒃ ᓇᓗᓇᐃᔭᖅᓯᒪᔪᖅ ᐊᑐᕈᒪᔭᐅᔪᓂᒃ ᐊᑭᓕᑦᓴᓕᐅᕆᓂᕐᒧᑦ ᐋᖅᑭᑦᓯᒪᓂᖏᓐᓂᒃ ᐊᒻᒪᓗ ᐃᓚᒋᔭᐅᒋᐊᓕᒃ ᓇᓗᓇᐃᔭᖅᓯᒪᔪᖅ ᐊᑐᖅᑕᐅᖃᑦᑕᓲᖅ ᐊᑭᓕᑦᓴᓕᐅᕈᑎ. ᑐᑦᓯᕋᖅᑐᖅ ᐃᓚᓕᐅᔾᔨᓯᒪᒋᐊᓕᒃ ᓇᓗᓇᐃᔭᖅᓯᒪᔪᓂᒃ ᑎᑎᕋᖅᓯᒪᓂᖏᓐᓂᒃ ᐊᑭᓕᑦᓴᓕᐅᕈᑕᐅᖃᑦᑕᓂᐊᖅᑐᓂᒃ. ᐊᑭᓖᒍᑏᑦ ᓇᓗᓇᐃᖅᑕᐅᓯᒪᒋᐊᓖᑦ ᑲᓇᑕᒥ ᑮᓇᐅᔭᖁᑎᖏᑎᒍᑦ.

ᑖᓐᓇ ᑎᑎᕋᖅᓯᒪᓂᖓ ᒪᓕᒋᐊᓕᓐᓂᒃ ᒪᓕᒋᐊᓕᒃ ᐋᖅᑭᒋᐊᕈᑎᓂᒃ ᐃᓄᐃᑦ ᓇᖕᒥᓂᖁᑎᖏᓐᓄᑦ ᖃᐅᔨᓴᖅᑕᐅᒍᑎᒃᓴᖓᓄᑦ:

1) ᐃᓄᐃᑦ ᓇᖕᒥᓂᖁᑎᖏᑦ, ᑎᑎᕋᖅᑕᐅᓯᒪᔪᑦ ᑐᙵᕕᒃᑯᑦ ᐃᓄᐃᑦ ᓇᖕᒥᓂᖁᑎᖏᓐᓄᑦ ᑎᑎᕋᖅᑕᐅᕕᖓᓂ, ᑐᓂᔭᐅᓂᐊᖅᑐᑦ ᐋᖅᑭᒋᐊᕈᑎᒥᒃ (ᐃᓄᐃᑦ ᓇᖕᒥᓂᖁᑎᖓᓄᑦ ᐋᖅᑭᒋᐊᕈᑎᒥᒃ) 20% ᐊᑭᖏᓐᓄᑦ ᐊᑭᓕᖅᓱᕆᐊᓖᑦ ᑳᓐᑐᓛᒧᑦ ᑐᑦᓯᕋᐅᑎᓂ.
2) ᐃᓄᐃᑦ ᓇᖕᒥᓂᖁᑎᖏᑦ ᑐᓂᓯᒋᐊᓖᑦ ᓇᓗᓇᐃᖅᑐᖅᓯᒪᔪᓂᒃ ᐃᓄᐃᑦ ᓇᖕᒥᓂᖁᑎᖏᓐᓄᑦ ᖃᓄᐃᓕᖓᓂᕐᒥᓂᒃ ᑐᓂᔭᐅᒍᓐᓇᖁᓪᓗᒋᑦ ᐃᓄᐃᑦ ᓇᖕᒥᓂᖁᑎᖏᓐᓄᑦ ᐋᖅᑭᒋᐊᕈᑎᒥᒃ.
3) ᖃᐅᔨᓴᕈᑕᐅᔪᖅ ᐃᓄᐃᑦ ᓇᖕᒥᓂᖁᑎᖏᓐᓄᑦ ᐊᑭᑦᑐᕋᐅᑎᒍᑎᖏᓐᓂᒃ ᐋᖅᑭᒋᐊᕈᑎᓄᑦ:

ᑳᓐᑐᓛᓄᑦ ᑐᒃᓯᕋᐅᑎᓃᖃᑕᐅᒋᐊᓖᑦ ᓇᓗᓇᐃᔭᖅᓯᒪᓗᑎᒃ ᑕᒪᐃᓐᓄᑦ ᑳᓐᑐᓛᒥᒃ ᑐᓂᔭᐅᔪᒧᑦ ᐃᓚᐅᑎᑕᐅᔪᑦ, ᐃᓚᒋᔭᐅᓗᑎᒃ ᐊᑭᖏᑦ ᐊᑭᓕᖅᓲᑏᓪᓗ ᑐᓂᔭᐅᒋᐊᓖᑦ ᑳᓐᑐᓛᒥᒃ ᑐᓂᔭᐅᔪᒧᑦ ᐃᓚᐅᑎᑕᐅᔪᓄᑦ. ᐃᓄᐃᑦ ᓇᖕᒥᓂᖁᑎᖏᓐᓄᑦ ᐋᖅᑭᒋᐊᕈᑎ ᐃᓕᔭᐅᒋᐊᖃᙱᑦᑐᖅ ᐊᕕᑦᑐᖅᑕᐅᓯᒪᓂᖏᓐᓄᑦ ᑳᓐᑐᓛᓂᒃ ᑐᒃᓯᕋᐅᑎᓄᑦ ᐃᖅᑲᓇᐃᔮᖅ ᑳᓐᑐᓛᒥᒃ ᑐᓂᔭᐅᔪᒧᑦ ᐃᓚᐅᑎᑕᐅᔪᓅᖓᓂᐊᖅᐸᑦ ᐃᓄᒻᒧᑦ ᓇᖕᒥᓂᖁᑕᐅᙱᑉᐸᑦ. ᐃᓄᐃᑦ ᓇᖕᒥᓂᖁᑎᖏᓐᓄᑦ ᐋᖅᑭᒋᐊᕈᑏᑦ ᐃᓚᐅᑎᑕᐅᒍᓐᓇᖅᑐᑦ ᑕᐃᒃᑯᓄᖓ ᑳᓐᑐᓛᓄᑦ ᑐᒃᓯᕋᐅᑎᓄᑦ ᐃᓄᐃᑦ ᓇᖕᒥᓂᖁᑎᒋᙱᑕᖏᓐᓄᑦ ᐊᒃᑐᐊᔪᓄᑦ ᐃᓚᖓᒍᑦ ᑳᓐᑐᓛᒧᑦ ᑐᒃᓯᕋᐅᑎᓄᑦ ᐃᖅᑲᓇᐃᔮᖅ ᑐᓂᔭᐅᓂᐊᖅᐸᑦ ᑳᓐᑐᓛᒥᒃ ᐃᑲᔪᖅᑎᓕᒻᒧᑦ ᐃᓚᐅᑎᑦᓯᔪᒧᑦ ᐃᓄᐃᑦ ᓇᖕᒥᓂᖁᑎᖓᓂᒃ.

4. ᐊᑐᕐᓂᖅ ᐃᓄᓐᓂᒃ ᐃᖅᑲᓇᐃᔭᖅᑎᓂᒃ

ᑳᓐᑐᓛᒧᑦ ᑐᑦᓯᕋᐅᑦ ᓴᖅᑭᔮᖅᑎᑦᓯᔪᖅ ᐊᑐᕐᓂᐊᓂᕐᒥᒃ ᐃᓄᓐᓂᒃ ᐃᖅᑲᓇᐃᔭᖅᑎᓂᒃ (ᑐᕋᐃᓐᓇᖅᑐᒥᒃ ᐅᕝᕙᓘᓐᓃᑦ ᑳᓐᑐᓛᒃᑕᐅᓯᒪᔪᖅ−ᐃᑲᔪᖅᑎᖓᒍᑦ) ᑐᓂᔭᐅᓂᐊᖅᑐᖅ 20%-ᒨᖓᔪᒥᒃ ᐃᓘᓐᓈᒍᑦ ᐊᑐᐃᓐᓇᕐᓂᒃ ᓈᓴᐅᑎᖅᓱᐃᒍᑎᓂᒃ. ᑐᓂᔭᐅᒍᓇᖁᓪᓗᒍ ᐋᖅᑭᒋᐊᕈᑎᒥᒃ ᐊᑐᓂᕐᒧᑦ ᐃᓄᓐᓂᒃ ᐃᖅᑲᓇᐃᔭᖅᑎᓂᒃ, ᑳᓐᑐᓛᒃᑯᑦ ᑐᑦᓯᕋᐅᑎᓃᒋᐊᓖᑦ ᓇᓗᓇᐃᖅᑐᖅᓯᒪᔪᑦ ᑖᒃᑯᓄᙵᖓᔪᑦ ᑐᑦᓯᕋᐅᑎᓄᑦ ᐊᑐᕐᓂᐊᓂᕐᒥᒃ ᐃᓄᓐᓂᒃ ᐃᖅᑲᓇᐃᔭᖅᑎᓂᒃ ᑐᑦᓯᕋᐅᓯᐅᖅᑐᖅ ᐊᒻᒪᓗ ᑳᓐᑐᓛᒃᑕᐅᓯᒪᔪᓂᒃ−ᐃᑲᔪᖅᑏᑦ. ᐅᓂᒃᑳᓕᐅᒃᑲᓐᓂᕆᐊᖃᕐᓂᐊᖅᑐᑦ ᑐᓂᔭᐅᔪᒥᒃ ᑐᑦᓯᕋᖅᓯᒪᔪᒥᒃ ᐊᑐᓪᓚᑖᖅᑐᒥᓂᐅᓂᕐᒥᒃ ᐃᓄᓐᓂᒃ ᐃᖅᑲᓇᐃᔭᖅᑎᓂᒃ ᑳᓐᑐᓛᒃ ᑐᓂᔭᐅᓚᐅᖅᑎᓪᓗᒍ ᐊᒻᒪᓗ ᑲᔪᓯᑎᑦᓯᓂᙱᑉᐸᑦ ᑐᑦᓯᕋᐅᑕᐅᔪᒥᒃ ᐃᓄᓐᓂᒃ ᐃᖅᑲᓇᐃᔭᖅᑎᖃᕐᓂᐊᓂᕐᒥᒃ ᐊᑭᓖᑎᑕᐅᒍᓐᓇᖅᑐᖅ. ᐃᓄᐃᑦ ᓇᖕᒥᓂᖁᑎᖏᑦ ᑐᖔᓂ− ᐋᖅᑭᑦᓯᒪᒍᑕᐅᓯᒪᒋᐊᑐᙱᑦᑐᖅ ᑐᓂᔭᐅᒍᓐᓇᕈᑎᒥᒃ ᓈᓴᐅᑎᖅᓱᐃᒍᑎᓂᒃ ᑕᕝᕘᓇ ᓇᓗᓇᐃᔭᖅᓯᒪᓂᖓᒍᑦ.

5. ᖃᐅᔨᒪᔮᖑᓂᖓ ᐃᓱᓕᕝᕕᑦᓴᓂᒃ ᑲᔪᓯᑎᑦᓯᑦᓯᐊᓲᖑᓂᖓᓂᒃ

ᐃᓱᓕᕝᕕᑦᓴᓂᒃ ᑲᔪᓯᑎᑦᓯᑦᓯᐊᓲᖑᓂᖓ ᑭᖑᓪᓕᖅᐹᖅᓯᐅᒻᒥ ᐅᓂᒃᑳᒥ ᐱᖕᒪᕆᐅᔪᖅ. ᑐᑦᓯᕋᐅᑎᖓᒍᑦ ᓴᖅᑭᔮᕆᐊᓕᒃ ᖃᓄᖅ ᑎᒥᐅᔪᖅ ᑎᑭᐅᑎᖃᑦᑕᖅᓯᒪᒻᒪᖔᖅ ᐃᓱᓕᕝᕕᑦᓴᓂᒃ ᐊᒻᒪᓗ ᒪᕐᕉᓐᓂᒃ ᖃᐅᔨᒋᐊᕐᕕᓵᓐᓂᒃ ᓇᓗᓇᐃᕆᓯᒪᓗᓂ.

Download (PDF, 229KB)