ᐱᓇᓱᐊᕈᓯᐅᓚᐅᖅᑐᒥ ᑕᒻᒪᕐᓯᒪᔪᕐᓯᐅᑎᕐᔪᐊᑉ ᐊᓪᓚᑉᕕᖓ (OAG) ᓴᖅᑮᓚᐅᖅᑐᖅ ᐅᓂᒃᑳᒥᒃ ᐃᑲᔪᖅᑕᐅᔭᕆᐊᖃᕐᓂᖏᓐᓅᖓᔪᓂᒃ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᖅᑎᓂᒃ ᐊᒻᒪᓗ ᐃᓐᓇᕐᓂᒃ ᐃᓕᓴᕙᑦᑐᓂᒃ. ᓄᓇᕗᑦ ᑐᓐᖓᕕᒃ ᑎᒥᖓ (ᑐᓐᖓᕕᒃ) ᖁᐊᕐᓵᕐᓯᒪᕗᑦ ᑕᑭᓗᐊᕐᓂᖏᓐᓄᑦ ᐊᐳᖅᑕᕈᑕᐅᕙᑦᑐᑦ ᐃᓄᐃᑦ ᓵᓐᖓᖃᑦᑕᖅᑕᖏᑦ ᐃᓕᓐᓂᐊᕇᕋᓱᐊᖅᑎᓪᓗᒋᑦ ᐃᓕᓐᓂᐊᕐᓯᒪᒍᑕᐅᔭᕆᐊᓕᓐᓂᒃ.
“ᐊᒃᓱᒻᒪᕆᐊᓗᒃ ᖁᓅᕐᒥᖅᐳᖓ ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᕐᑐᓄᑦ ᐃᓂᕐᓯᒍᑕᐅᔪᓐᓇᕐᑐᖅ ᒍᕋᐃᑦ 12-ᒥ ᖃᓪᓗᓈᑎᑐᑦ ᐅᖃᐅᓯᖅ ᐃᓂᕐᓯᒌᒍᑕᐅᔪᓐᓇᕐᑐᑑᖕᒪᑦ,” ᐅᖃᖅᑐᖅ ᐊᖓᔪᖅᑳᖓᑦ ᑐᙵᕕᒃᑯᑦ ᐊᓗᑭ ᑰᑦᑎᖅ. “ᓄᓇᕗᑦ ᐱᓐᖑᖅᑎᑕᐅᓚᐅᖅᑎᓪᓗᒍ ᐃᓄᐃᑦ ᓂᕆᐅᓚᐅᕐᒪᑕ ᐃᓄᒃᑐᑦ ᐃᓕᓴᐃᔾᔪᓯᖃᓐᓂᐊᕐᓂᖓᓂᒃ ᒪᓕᓪᓗᒋᑦ ᐃᓄᐃᑦ ᖃᐅᔨᒪᔭᑐᖃᖏᑦ.”
“ᑖᓐᓇ ᐅᓂᒃᑳᓕᐊᕆᔭᐅᓯᒪᔪᖅ ᓴᖅᑭᕐᒪᑦ ᐊᑕᐅᑦᑎᑯᓪᓗᐊᖅ ᐱᓕᕆᕕᖓᑦ ᐃᓕᓐᓂᐊᕐᓂᓕᕆᔨᒃᑯᑦ ᐊᔪᙱᓂᕐᑖᑲᓐᓂᕋᓱᐊᕐᑎᓪᓗᒋᑦ ᐊᐅᓚᑕᐅᓂᖏᓐᓄᑦ ᓄᓇᕗᖕᒥ ᐃᓕᓐᓂᐊᕐᕖᑦ ᐊᖅᑯᑎᒋᓪᓗᒍ ᐱᖁᔭᒃᓴᖅ 25,” ᐅᖃᖅᑐᖅ ᑰᑦᑎᖅ. “ᑭᓯᐊᓂᓗ ᐅᓪᓗᒥᐅᔪᖅ ᑲᔪᓯᑎᑦᓯᕙᓪᓕᐊᒐᑎᒃ ᒫᓐᓇ ᐱᓕᕆᐊᒃᓴᒥᓂᒃ. ᓄᓇᕗᑦ ᒐᕙᒪᒃᑯᖏᑦ ᐱᓕᕆᖃᑎᖃᖁᒐᓗᐊᕐᐸᒃᑲᑦ ᑐᙵᕕᒃᑯᓐᓂᒃ ᑲᒪᒋᔭᐅᒋᐊᕈᓐᓇᕈᑎᖏᓐᓂᒃ ᐃᓕᓐᓂᐊᕐᓂᓕᕆᓂᐅᑉ ᑐᐊᕕᕐᓇᓇᓕᕐᒪᓪᓗ.”
ᑐᙵᕕᒃᑯ ᐃᖅᑲᓇᐃᔭᖃᑎᖃᐃᓐᓇᕈᒪᖃᑦᑕᕐᓯᒪᕗᑦ ᓄᓇᕗᑦ ᒐᕙᒪᒃᑯᖏᓐᓂᒃ ᑲᒪᒋᔭᐅᒋᐊᖃᓕᕐᓂᖓᓄᑦ ᐱᔭᓐᓂᖏᒃᑲᓗᐊᕐᑎᓪᓗᒍ ᐃᓕᓐᓂᐊᕐᓂᓕᕆᓂᖅ. ᒫᓐᓇᕋᑖᖑᔪᔪᖅ, ᑐᙵᕕᒃᑯᑦ ᐱᓕᕆᖃᑎᖃᖃᑦᑕᕐᓯᒪᒻᒪᑕ ᐊᖅᑯᑎᒋᓪᓗᒋᑦ ᐃᓄᐃᑦ ᑲᓇᑕᐅᓪᓗ ᒐᕙᒪᒃᑯᖏᑦ ᑲᑎᒪᔨᕋᓛᖏᑦᑎᒍᑦ ᒐᕙᒪᑐᖃᒃᑯᓐᓂᒃ ᑮᓇᐅᔭᓂᒃ ᐱᓇᓱᐊᕐᑐᑎᒃ ᐳᐃᒍᖅᑕᐅᕙᓪᓕᐊᖁᓇᒍ ᐃᓄᒃᑐᑦ ᐅᖃᓪᓚᓪᓗᑎᒃ ᐃᓕᓴᐃᔨᖃᕈᓐᓇᓂᕐᒧᑦ, ᐅᓄᕐᓯᒋᐊᖁᓪᓗᒋᓪᓗ ᐃᓄᐃᑦ ᐃᓕᓴᐃᔩᑦ ᐊᒻᒪ ᐱᕚᓪᓕᖅᑕᐅᑦᑎᐊᖁᓪᓗᒍ ᐃᓕᓐᓂᐊᕐᑐᑦ ᐃᓂᕐᓯᔪᓐᓇᖁᓪᓗᒋᑦ ᐃᓕᓐᓂᐊᕐᑕᒥᓂᒃ ᓄᓇᕗᖕᒥ.
ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᕇᕈᑎᑖᕆᔭᐅᓲᑦ ᐊᒻᒪᓗ ᐃᓕᓐᓂᐊᑲᓐᓂᕕᓐᓂ ᐃᓕᓐᓂᐊᕐᓃᑦ ᐊᑐᖅᑕᐅᔭᕆᐊᖃᕐᒪᑕ ᐃᖅᑲᓇᐃᔭᕈᓐᓇᕐᓯᖁᓪᓗᒋᑦ ᒐᕙᒪᓂ ᐊᒻᒪᓗ ᓇᖕᒥᓂᖁᑎᓕᓐᓂ. ᐊᕙᑎᐅᓚᐅᖅᑐᓂ ᐊᕐᕌᒍᓂ, ᐳᓴᖓᒍᑦ ᐃᓄᐃᑦ ᐃᖅᑲᓇᐃᔭᖅᑐᑦ ᒐᕙᒪᓂ 50%−ᖏᓐᓃᑐᐃᓐᓇᐃᓇᕐᒪᑦ ᐅᔾᔨᓇᖅᑐᖃᕋᓂ ᐱᕙᓪᓕᐊᒻᒪᖔᖅ ᖁᑦᓯᓂᕐᓴᓃᑦᑐᓂ ᐃᖅᑲᓇᐃᔮᓂ ᐊᒻᒪᓗ ᓯᕗᓕᖅᑎᓂ.
ᑐᙵᕕᒃᑯᓐᓄᑦ ᑐᓐᖓᓱᑦᑎᑕᐅᓚᐅᕐᐳᖅ ᐊᑕᖐᔪᒥᒃ ᐅᓂᒃᑳᖓ OAG ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓂᒃ ᖃᓄᖅᑑᕆᐊᖁᔨᓯᒪᒻᒪᑦ ᐃᖅᑲᓇᐃᔭᖃᑎᖃᖁᔭᐅᓪᓗᑎᒃ ᐱᓕᕆᖃᑎᒥᓂᒃ ᑲᒪᒋᐊᕈᓐᓇᖁᓪᓗᒋᑦ ᑐᐊᕕᕐᓇᕐᓂᖓᓄᓪᓗ ᐃᓕᓐᓂᐊᕐᓂᓕᕆᓂᕐᒧᑦ ᐱᔾᔪᑕᐅᔪᑦ.
-30-
ᑐᑭᓯᒋᐊᒃᑲᓐᓂᕈᓐᓇᕐᐳᑎᑦ:
ᒪᓚᐃᔭ ᒥᑭᔾᔪᒃ
ᑐᖏᓕᖓ ᑐᑭᒧᐊᒃᑎᑦᑎᔨᐅᑉ ᑐᓴᐅᒪᔾᔪᑎᓕᕆᔨᒃᑯᓐᓂ
ᓄᓇᕗᑦ ᑐᓐᖓᕕᒃ ᑎᒥᖓ
ᖃᔮᖅ ᐃᐊᔅᕗᐊᑦ, ᑐᓴᐅᒪᔾᔪᑎᓕᕆᓂᕐᒧᑦ ᖃᐅᔨᒪᔨᑕᖅ
ᐊᖓᔪᖅᑳᖅ ᐊᓗᑭ ᑰᑦᑎᖅ ᐊᓪᓚᑉᕕᖓᓂ
