ᐃᕐᖐᓐᓇᖅ ᓴᖅᑭᖅᑕᐅᔭᕆᐊᓕᒃ
ᓂᕆᐅᖕᓂᖅ, ᓂᕆᐅᒋᔭᖃᑦᓯᐊᕐᓂᖅ ᐊᒻᒪᓗ ᐸᕐᓇᐅᑦ ᐳᕙᓪᓗᖕᓇᖃᕈᓐᓃᕈᑎᒃᓴᖓᓄᑦ ᓄᓇᕗᑦ
ᒫᑦᓯ 24 ᓄᓇᕐᔪᐊᒥ ᐳᕙᓪᓗᓂᕐᒧᑦ (TB) ᐅᓪᓗᖓ
“ᑖᓐᓇ ᓄᓇᕐᔪᐊᒥ ᐳᕙᓪᓗᓇᕐᒧᑦ ᐅᓪᓗᖅ ᓂᕆᐅᒋᔭᒃᓴᖃᕐᓂᕐᒧᑦ ᓂᕆᐅᒋᔭᖃᑦᓯᐊᓂᕐᒧᓪᓗ ᐳᕙᓪᓗᖕᓇᖃᕈᓐᓃᕈᑎᒃᓴᖓᓄᑦ ᓄᓇᕗᑦ ᐱᕕᒃᓴᑦᓯᐊᖑᕗᖅ − ᐅᕙᑦᑎᓐᓄᑦ, ᕿᑐᕐᖓᑎᓐᓄᑦ ᐊᒻᒪᓗ ᑭᖑᕚᕆᓂᐊᖅᑕᑎᓐᓄᑦ,” ᐅᖃᓚᐅᖅᑐᖅ ᓄᓇᕗᑦ ᑐᓐᖓᕕᒃ ᑎᒥᖓᑕ (ᑐᓐᖓᕕᒃ) ᐊᖓᔪᖅᑳᖓ ᐊᓗᑭ ᑰᑦᑎᖅ. “ᑕᒪᓐᓇ ᐱᓕᕆᐊᒃᓴᕆᒐᒃᑯ ᑲᒪᒋᓂᐊᕐᐸᕋ ᓇᓗᓇᐃᕐᓯᕕᒋᓗᒋᑦ ᓄᓇᕗᒻᒥ ᐃᓄᐃᑦ ᒫᓐᓇ ᐃᖅᑲᓇᐃᔭᐅᑎᒃᓴᖃᓕᕋᑦᑕ ᐳᕙᓪᓗᑦᑐᖃᕐᒪᖔᖅ ᖃᐅᔨᓴᕈᑎᒃᓴᒥᒃ ᐊᒻᒪᓗ ᒪᒥᓴᐅᑎᒃᓴᒥᒃ ᑕᒪᓐᓇ ᓄᓇᓕᖁᑎᑦᑎᓐᓂ ᓴᖅᑭᐅᒪᐃᓐᓇᑎᓪᓗᒍ, ᐊᑏ ᓄᖑᑎᓚᐅᕐᓚᕗᑦ ᐳᕙᓪᓗᓐᓂᖅ ᑲᑐᔾᔨᓂᒃᑯᑦ! ᓄᓇᕗᒻᒥᐅᑦ ᖃᐅᔨᓴᖅᑕᐅᖃᑦᑕᖁᕙᒃᑲ ᑖᑦᓱᒧᖓ ᒪᒥᓴᖅᑕᐅᒍᓐᓇᖅᑐᒧᑦ ᐋᓐᓂᐊᒧᑦ.”
ᑐᓐᖓᕕᒃᑯᑦ ᐊᖏᕈᑎᖃᕐᓯᒪᕗᑦ ᓯᕗᒧᐊᒃᑎᑦᑎᕙᓪᓕᐊᓂᕐᒥᒃ ᐃᖅᑲᓇᐃᔮᑦᑎᓐᓂᒃ ᐋᖅᑭᒍᑎᒃᓴᖓᓂᒃ ᓂᕆᔭᒃᓴᖃᑦᓯᐊᖃᑦᑕᖏᓐᓂᐅᑉ ᐅᑎᖅᑎᑦᓯᓂᒃᑯᑦ ᓂᕿᖃᖃᑦᑕᕈᑎᒋᓯᒪᔭᑦᑎᓐᓂᒃ, ᐃᓪᓗᓕᕆᓂᕐᒧᑦ ᐊᒻᒪᓗ ᐊᔪᕐᓴᕐᓂᖅ ᐃᑯᓪᓚᐅᒥᒍᑎᒃᓴᖏᓐᓂᒃ; ᑖᒃᑯᐊᓕᒫᑦ ᓇᓗᓇᐃᖅᑕᐅᓯᒪᕗᑦ ᐃᑲᔪᓂᕐᓗᖃᑦᑕᕐᓂᖏᓐᓂᒃ ᖁᑦᓯᓗᐊᓕᕐᓂᖏᓐᓄᑦ ᓇᓗᓇᐃᖅᑕᐅᓯᒪᓂᖏᓐᓂᒃ ᐳᕙᓪᓗᑦᑐᑦ. ᐃᖅᑲᓇᐃᔮᕆᓐᓇᓂᐊᕐᐸᕗᑦ ᑲᑐᔾᔨᓗᑕ ᐱᓇᓱᐊᖃᑎᕗᓪᓗ ᓴᕐᖓᑎᑦᓯᑲᓐᓂᕈᑎᒃᓴᓂᒃ ᐃᓅᖃᑎᒌᓄᑦ ᐱᓗᖅᑯᑕᐅᕙᑦᑐᓂᒃ ᖃᓄᐃᓐᓇᖅᑐᓄᑦ ᐃᓗᓯᑦᑎᒍᑦ ᐃᓅᓪᓗᑕ.
ᐊᕐᕌᒍᓂ ᓄᓇᕐᔪᐊᒥ ᐳᕙᓪᓗᓇᖕᒧᑦ ᐅᓪᓗᖓᓂ, ᐃᓄᐃᑦ ᑕᐱᕇᑦ ᑲᓇᑕᒥ ᐊᒻᒪᓗ ᒐᕙᒪᑐᖃᒃᑯᑦ ᑲᑐᔾᔨᓪᓗᑎᒃ ᑐᓴᖅᑎᑦᓯᓚᐅᖅᑑᒃ ᐊᖏᕈᑎᖃᕐᓯᒪᓂᕐᒥᒃ ᑭᐱᔭᐅᖁᓪᓗᒍ ᖃᓄᐃᒍᑕᐅᕙᑦᑐᖅ ᐃᓄᓐᓄᑦ ᐳᕙᖕᓗᓂᕐᒧᑦ ᐃᓘᓐᓈᓂ ᐃᓄᐃᑦ ᓄᓇᖓᓂ ᐊᑉᕚᓂ ᐊᕐᕌᒍᐊᓂ 2025, ᐊᒻᒪᓗ ᐳᕙᒡᓗᖕᓇᖃᕈᓐᓃᑎᓪᓗᒍ ᐊᕐᕌᒍᐊᓂ 2030. ᑮᓇᐅᔭᖅᑑᑎᒃᓴᓂ 2018 ᑭᖑᓂᐊᒍᑦ $27.5 ᒥᓕᔭᓐ ᐱᒋᐊᕈᑎᒃᓴᒫᓕᐊᖑᓚᐅᖅᑐᑦ ᐃᓄᐃᑦ ᐳᕙᖕᓗᖃᑦᑕᕐᓂᖏᑦ ᓄᖑᑕᐅᓇᓱᐊᖁᓪᓗᒍ. ITK ᓴᖅᑮᓚᐅᖅᑐᑦ ᐃᓄᐃᑦ ᐳᕙᖕᓗᓂᕐᒧᑦ ᓄᖑᑎᑕᐅᒍᑎᒃᓴᖓᓄᑦ ᑐᓐᖓᕕᒃᓴᖓᓂᒃ ᑏᓰᒻᕙ 2018−ᒥ ᐃᓚᒋᔭᐅᓂᐊᖅᑐᓂ ᑕᑉᕗᖓ ᓄᓇᕗᒻᒨᖓᔪᖅ ᐊᐅᓚᔾᔭᐃᒋᐊᕈᑎᒃᓴᒧᑦ ᐸᕐᓇᐅᑦ ᑕᖅᑭᕆᓂᐊᖅᑕᑎᓐᓂ ᐊᑯᓂᐅᓐᖏᑦᑐᖅ, ᐋᖅᑭᑦᓱᐃᖃᑎᒌᒍᑕᐅᓚᐅᖅᑐᖅ ᑐᓐᖓᕕᒃᑯᓐᓄᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓄᑦ ᑲᑐᔾᔨᓪᓗᑎᒃ.
ᑐᑭᓯᒋᐊᒃᑲᓂᕐᕕᒃᓴᖅ:
ᕗᕌᓐᑯ ᐳᓯᒥ
ᑐᑭᒧᐊᒃᑎᑦᑎᔨᐅᓚᐅᐱᓪᓚᑦᑐᖅ ᑐᓴᒪᐅᔾᔪᑎᓕᕆᓂᕐᒧᑦ
ᓄᓇᕗᑦ ᑐᓐᖓᕕᒃ ᑎᒥᖓ
ᐅᖄᓚᐅᑖ: (867) 975-4914
ᐊᑭᖃᓐᖏᑦᑐᖅ: 1-888-646-0006
www.tunngavik.com
