Pivalialigiyit Havakviit

Angiyuqqangat Nunavut Tunngaviup Timingata katimaqatigiyaa Angiyuqqaryuaq Kanatamut

(August 20, 2009 — Iqaluit, Nunavut) Paul Kaludjak, Angiyuqqangat Nunavut Tunngaviup Timingata, uqaqtuq quviahuktuq katimaqatigigamiuk Angiyuqqaryuaq Harper Iqaluit ippakhaq unnuktumi.

Angiyuqqaq Kaludjak Mary Simon-lu, Angiyuqqaq Inuit Tapiriit Kanatamikunut katimaqatigiyaak Angiyuqqaryuaq Harper Ministaklu Aglukaaq Strahl-lu Angiyuqqaryuap pularniani Ukiuqtaqtumut.

Kaludjak uqaqturlu angiqatigiiktut katimanirmingni huli qanuriliuriaqaqtut pivaallirniaqqat Inuit maniliurnianni inuuhianni. Kaludjak ihumayuq, kavamatuqatkut nalliutimayarialgit piliriakhamingnut Nunavut Nunatarutata Angirutaani. “Atiliuqhimayaqqut angirut Quinlu 1993-mi, maligauyuq nunami, pitjutauyukhautauplunilu tunngaviuluni hivituyumi, havattiarnaqtumik piqatigiikniannik Inuit kavamatkullu,” uqaqhuni. “Kihimi haanngavaktugut ukiunik kinguvaqtunik atuliqtauniani. 16-ni ukiuni aulaliqtugut huli atuliqtauhimanngitulik nakatanik nunatarunmi. Atuliqtaitaunnginiq ikhinnaumayaulimaittuq kitumilliqaak kavamamit.”

Kaludjak uqaqturlu atuliqtaunia Nunavut Nunatarutata Angirutaata malingniaqtuq Angiyuqqaryuap aghuguurnianut Ukiuqtaqtumik nanminiqarnirmut. Hivunirhuuta Nunatarutip Angirutaata ilitarimayuq “tunihivangniannik Inuit Kanataup taimanituqaanut, kinaunianut, nanminiqarnianullu Ukiuqtaqtumik.” Uqaqhunilu Kanataup innia Ukiuqtaqtumi tunngayuq Inuit inniannit. “Palihimat, ilihaiyiit, niuvvayiit kavamanilu havaktut ukiuqtaqtumut tikihimayut Inuit hamani inuungmata,” uqaqhuni. Ilautiyaa nunak Qauyuittuq Auyuitturlu nunannguqhimayuk, Kanatamiuttaqarumaqpiaramik tahamani aviktuqhimayumi.”

Kaludjak uqaqturlu Kanata manikturumi nunanut Ukiuqtaqtumi, nappaqtirilutik aanniarnaittunik pivaaliutimayunik nunanik hamna hivituyumut maniktuutauniaqtuq Kanataup hivuniani. “Manikturniq inungnut nunautiptingnullu hivituyuq, Ukiuqtaqturmiutaukhaarapta aallanit inungnit inuuhimmaarniaqhutalu aimaviptingni nunaqqaptingnilu,” iniqtiqhuni uqaqtuq.

Hivunikhivigenagealik:
Nunavut Tunngaviup Timinga
Hivayautaa:
Hivayaut akiittuq: