Nunavut Tunngavik Nanminilgit pinahuaquyai Inuit tugaqviginit Angutikhaligiyit Katimayiktik tapkuatlu Nunaliit Avikhimanini Uumayuliginiqmut Timingit uqauhigininut atuqpakniqtik qinalukkat qakuqtut, tuugalgit aiviitlu hivuagut tamna inungnik naalaktitiniq atuqtitakhat tapkuat Nunavut Uumayuligiyiqyuatkut Katimayit tatqiqhiut ikaqat. Tamna naalakvik atuqtauniaq Iqaluitni talvani Saptaipa 11-12, 2012, tamnalu tuklikhat pityuhiqni pinguqtauni tapkuat atukaphukninut amihunit tahapkuat Inuit tapkuninga qinalukkat qakuqtut, tuugalgit aiviitlu atugiaqaqtitaigut Nakataani 5.6.25 tapkuat Nunavutagutinut Angigutit.
NTI-kut Tuklia-Angayuqaq James Eetoolook pitquyai atuqpalianit una nakataani piyakhatuqauyugaluaq.
“Atuqtitlugu NUNAVUTAGUTIT angiqatigigahuaqni, Inuit kavamatkutlu naunaiqhi qanuq tapkuat piyaqakaphukni amigaitnit tapkuat qinalukkat qakuqtut, tuugalgit aiviitlu pinguqtauyakhainik. Angigutauyut tapkuat NWMB-kut naunaiqhinikhai uminga qakugu kinguagut uplukhami. Inuit utaqittiaqpiaqhimayut, kihimik tatya iniqtauyaqaliqtuq una nakataani. NTI-kut ukpiguhuktut tapkuat Inuit huniqtailinit piyungnautit tapkununga tamaitnut katitlugit pilaqnit angunahuaqtauni tapkuat qinalukkat qakuqtut, tuugalgit aiviitlu,” uqaqtuq Eetoolook.
Tapkuat NUNAVUTAGUTIT pinguqtitat tahapkuat Inuit pilaqnit pitagauninut angunahuaqnit uumayut pihimakpata katitlugit pilaqnit angunahuaqtauni pinguqtaunit tapkuat amigaitninut uumayut. Tamna piyungnaut hivuliqmik pilaqninut tapkuat amigaitnit uumayut naunaiqtauyut tapkuat naliaknit: 1) tapkuat NWMB-kut pinguqtitai katitlugit pilaqnit angunahuaqnit amigaitni tapkuat amigaitninut pinguqtitugitlu atugiaqakaphukni amigaitni tapkuat kitittugit angunahuaqni amigaitnit piplugit tapkuat Nunavut Uumayunut Angunahuaqni Naunaiyaqni; 2) Tapkuat NWMB-kut pinahugiyai tahapkuat Inuit piyaqaqni tamaita katitlugit pilaqnit angunahuaqtauni pinguqtitai tapkuat NWMB-kut amigaitninut.
Kinguagut tapkuat inungnik naalaktitiniq, tapkuat NWMB-kut naunaiqniaqtai qanuqtut pinguqtitni tapkuat piyungnautit hivuliqmik pilaqnit piyaqaqninutlu amigaitni tahapkuat Inuit tapkununga qinalukkat qakuqtut, tuugalgit. Eetoolook pinahuaquyai Inuit pipkaqni Angutikhaligiyit, Nunaliit Avikhimanini Uumayuligiyit Timingi tapkuatlu NWMB-kut ilittugihimaqpiaqnit tahapkuat inuliqutit, ilitquhit kiinauyaliugutitlu atuqpiaqnit tahapkuat qinalukkat qakuqtut, tuugalgit aiviitlu tahapkununga Inuit.
