Pivalialigiyit Havakviit

Nunavut Tunngavikkut Tunngahuktittiyut Ahiniqmiutat Maligaghanut Iniqniaqhimayainik

Nunavut Tunngavikkut Timingat Hivulliq Tuklia Angayuqqaaq James Eetoolook uplumi uqaqhimayuq taimaa NTI-kut quviahuqturiyut Ahiniqmiunut Ikayuqtit Ministaa Lawrence Cannon-ngup Titirainut Ukiuqtaqtumi Ahiniqmiunut Maligaghat mighaagut.

“NTI-kut quviahuktuttauq tautugiami Ukiuqtaqtuq irininautaugami Kavamatuqanut Kanatami,” uqaqtuq Eetoolook. “NTI-kut ilihimavut taimaa hapkua maligaghat angiqtauhimayut Angayuqqaaqyuamit Stephen Harper kavamatuqanilu maligaliuqtinit. Hapkua aghuuqluaqnaqtut.”

Tuhaqtittiyuq taimaa takupkaqtittiyaami maligaghanik, Minista Cannon uqaqtuqtauq taimaa titirattiaqhimaittuq havauhighaungmat kavamanut. “Kihimi ihuatqiyauniaqtut taapkua havauhiit apluraqtaqlutik aulapkaiyaami maligaghanik,” uqaqtuq Eetoolook.

Eetoolook uqaqtuq taimaa NTI-kut ihumavaktut kavamatkut maliguattiaqniarumik havaqatigilugit Inuit atuqtittivalliayumaplugu maligaghaq ihuaqutauniaq, talvanilluaq kavamaliqittiaqniqmut hakugighaqhugitlu Ukiuqtaqtumiut.

“NTI-kut naahurivut havaaghanik aittuqhiyaami aullaqtittivighaalu taapkua Nunavunmi Nunataaqnikkut Angirutit,” uqaqtuq Eetoolook. “Tikkuaqtuiyughat huli kavamatuqanit Nunavunmi aittuqhiniqmut angirutighaqhiuqtumik talvani aittuqhinahuaqhutik havauhinik.”

Eetoolook uqaqhimayuq taimaa iniqhiyumayut hapummiyauyunik imaqmiutanik talvani Lancaster Sound-mi ikayuqtaunginnaqtuq NTI-kunnit. “Angiqhimainnaqtugut, hivumuuqpalliatjutigiyumaplugu”, huli uqaqtuq.