(March 5, 2010 – Kangiqhiniq, Nunavut) Nunavut Tunngavikkut Timingat Tuklia Angayuqqaap Kiinauyaliqiyinut Raymond Ningeocheak uqaqhimayuq tuhaqtitaungmat kavamaqyuakkut kiinauyaliqiyiinit. Ningeocheak uqaqhimayuq taimaa nutaanik niuviqtailinahuarmata ihuaqutighat inuuhirluknirmut Nunavunmi.

“NTI-kut ilittarhiyut quviagiplugitlu nutaanguqtiqtauyut qaffiuyut aanniaqtailinikkut atuqtaghait nutqaqvighait tikittutik, taapkualu atuqtaghait nutaqqiqinikkut timitigutlu aanniarutinut, kihimi uittaktinnaqtuq mamianaqhunilu kiinauyanik takunnaittuq ikluilliirnikkut Nunavunmi, aanniaqtailinirmullu ilihaqnirmullu,” Ningeocheak uqaqhimayuq. “NTI-kut mamiahuktullu kiinauyainmat Inuit uqauhiliqinirmut atuqtaghait, ihuaqhainirmutlu tullakvighait qayait nunallaanit Nunavunmi.”

Ningeocheak uqaqhimayuq taimaa NTI-kut quviahuktut kiinauyaqtaghainik ilihariaqhimayutuqait, kihimi apiqhuutautigiyauyughat hapkua mighaagut. “Nutqaqtitaungmat taamna Nunaqaqqaaqhimayut Mamihainirmut Tunngaviat ayurnaqtuq. Ilihariaqhimayut hapkuninnga mamihainirmut ihariagiyait,” uqaqhimayuq.

Ningeocheak quviahuktuq ihuaqhautighanik takuyaami $45 milian-taalaniklu ikayuutighat niqitarnikkut titiraqvikkut. “Una ukiuqtaqtumiunut aullaqtitauhimayuq ayuqnaiyarahuaqhugit akikittut niqittiat. Aallannguqtauhimayut tuhaqtitauhimaittut huli inungnut, NTI-kut aulatiaquplugit atuqtauttiaquplugitlu. Hapkua ikayuutit ayuqnaiyarahuarutighat niqitarniqmut niuviqtinut.”

Ningeocheak uqaqhimayuqtauq taimaa $8 milian-taalait tutquqtauhimayut atuqtauyughat malrungnik ukiunik Nunavunmi Munaqhinirmut Atuqtaghainut quviagiyauplunilu. “NTI-kut quviahukput hapkua aullaqtittigamikik, hapkua huittumik ihuinaarutauyuq nunataarutiptingnut ilitariyauplunilu apiqhuutauyughamut atuliqtittinirmut.”