IQALUIT, Nunavut (Apitilirvia 21, 2011) – Kangiqhidjutit taapkunuuna Inuit Aanniaqtailinirmut Ihivriurutit takupkaiyut Inuit nakuuyunik aanniatailinirmut kangiqhidjutiqarumayut ihumaliuriamingni inmugut ihumamigut nakuuyaamingnik.

Inuit Aanniaqtailinirmut Ihivriurutit 2007-2008 Nunavut Nunallaani Inmigullu Aanniaqtailinirmut Kangiqhidjutit havaktauhimayuq iligiinit Nunavut Kavamangat (GN), Nunavut Tun’gnavitkut (NTI) ukualu Ivaqhiayit tamangnit McGill Iliharvigyuanganit uvanngalu Iliharvigyuaq Torontomit. Ivaqhiayit ukiungni malruungni ihivriuqhiyut Nunavunmiunik. Nunallaani Inmigullu Aanniaqtailinirmut ilauyut apiqhuutimik saivanut aanniarutiqautinikkut: nunallaani aanniqtailiniq, ilitquhiugaluangit, inuuhikkut qaritauyakkuurut, inmigut ihumaqattiarniq, ilagiinit aanniqtaunikkut, inminiitirniq, imirnikkut higaarlungnikkut puukarnikkullu.

“Una ivaqhiadjut ikpingnaqtuq kangiqhiyaami iluliinut aanniaqtailiniup Nunavunmi. Tunivaktaatigut angitqiyamik piksssamik ikayuutauniaqhunilu aanniaqtailidjutauyunut tamainik nunaqaqtunik,” Uqaqtuq Dr. Laurence Kirmayer, Tiliuqtiuyuq Pitquhinut Aanniarnikkut Ihumaqattiarniq uvani Havagvik Ihumaqattiarnirmut, McGill Iliharvigyuangani. “Inuit haahimavaktut ayuqhaunirmut hivun’ngani ukiuni., Aanniaqtilinirmut kangiqhidjutit imaittut tautuktitaatigut mikiyumik hadja idjuhiriyainik maligakhaliuriangini qanurlu ihumaqattianiq atuqtauniaraluaqqa inminiiqtailiyaamingnik.”

“Atuquilutik nunallaani Inmigullu Aanniaqtailinirmut hivulliutauliqtuq Munaqhiliqiyitkut Inuuhiqattialiriyillu. Kangiqhidjutit uvani pipkaqtaatigut upaktakhaptingnik talvuuna piyumayauluaqtanik aallatqiinut hulidjutikhanut.” Uqaqtuq Dr. Geraldine Osborne, Angiyuqaangat Aanniaqtailiyi aanniaqtailinrmut Munaqhiliqiyitkut Inuuhiqattialiriyitkuni.

“Kangiqhidjutit ihlitturipkaiyut qilanaarutikhanik tapkunuuna Inminiitailinirmut Ihumaqattiarnirmut. NTI-tkut huli piyumayut havaqatigilugit Nunavut Kavamangat aallallu atuqtiniarlugit ihuaqtut pitquyauyut ihumaqattiarnirmut piyumayait Inuit.” Uqaqtuq Cathy Towtongie, Atan’gnuyaq NTI-tkuni.

Kangiqhidjutit hailiyauniaqtaat qaritauyakkut NTI-tkut qaritauyakuurutaanni Nunavut Kavamangallu Munaqhiliqiyitkut Inuuhiqattialiriyillu qaritauyakuurutaanni. Makpiraanik pittaaqtullu Munaqhiqarviini nunallaani.

Manikhautait uvunga havakhauhirmut piyaat Kavamanganit Kanatap talvuna Hilaryuami Ukiuqtaqtumi Ukiungat. Kanatamiut Huliviryuangit Aanniaqtailinirmut Ivaqhiadjutit, Aanniaqtailiniq Kanatami, Iliharvigyuaq Torontomi, Nunavut Kavamangat, Nunaqaqqaaqtuliriyitkut Kanatami ukualu ArcticNet qaritauyakuurutit.

Tuhaayakhaliqiyit iliturivikhat: