Pivalialigiyit Havakviit

NTI-kut Quviahuutigiyait QIA-kut Apiqhuiyinit Pitqutjutinikkamik

(August 11, 2010 — Iqaluit, Nunavut) Nunavut Tunngavikkut Timingat Hivulliq Tuklia Angayuqqaaq James Eetoolook uplumi quviahuutigivagait taapkua Qikiqtani Inuit Katimaqatigiit akimaplutik apiqhuiyinit pitqutjutigharamik talvunga Nunaminngaaqtunit Pivighakkut Kanatami Kivalliqhianit Ukiuqtaqtup Hiqumingniqnik Qauyihaiyunik (Natural Resources Canada’s Eastern Canadian Arctic Seismic Experiment).

“NTI-kut quviahuutigiyait ihumaliuqhimayut apiqhuiyinit.  Akimatjutigiyait taapkua QIA-kut tamangnutlu Inungnut Nunavunmi.” uqaqtuq Eetoolook.

NTI-kut havaqatigihimmaaqpagait QIA-kut apiqhuiyinit pitqutjutinut taapkualu apiqhuutigiyauyut tajja, taapkuattauq apiqhuutauyut qaffinik ihumaaluutiqaramik maligaliqiniqmut aghuuqpagait Inuit.

“Taapkua aviktuqhimayumi kavamatkut kavamaqyuatkullu maligaliqinikkut havaariyaghaat taimaa katimaqatigilugit Inuit ikayurahuaqlugit ihumaaluutigiyainit Nunavunmi.” uqaqhimayuq Eetoolook.  “Inuit pilaarutait tuhaqtitauniqmut ikayuqtauniqmullu arligiyauyughat.”

Atauhiq apiqqutauvaktuq taapkua tughirautit taapkualu Kuin kivgaqtuiyiit maligaliqiniqmut havaaghait tuhaqtittiniqmik ikayuqtuiniqmiklu titiraqhimayunik qauhimannaqtuniklu nunataaqnikkut angirutinik.  Aajjikkutavyaittauq ihumaaluutauyut haavititauhimayut apiqhuutauyunit Apiqhuiyiqyuanit Kanatami.  NTI-kut nutqaqtittihimayut hapkua mighaagut kivgaqtuqhugit Inuit Nunavunmiut.

“Tajjattauq, atauttikkuurahuaqluta, kavamatkut Inuitlu ilitturipkailuta qanuq katimaqattaqpaktut ilittuqhitinahuaqhutik qanuqlu tuhaqtittitiariami.” uqaqtuq Eetoolook.