Nunavut Tunngavik Angayukaat Tuklia James Eetoolook ukakhimayuk ublumi katimatjutainik havaktiit Munagiyit Ikaluligiyit ovalo Tagiuligiyit nakuuyumik. Katimayut aipaanguyuk katimayunut paknaiyakhimayait ilanganut aalamik ihuakhagutikhait akigaktuitjutainut NTIkut tunihimayaa DFOkut ukiumi nani DFOkut mikhitihimayait nunakyuamut niuviktigutikhait tuugaaliit tuugangit ukakatigihimaitumik Inuit. NTIkut nutkaktihimayaa akigaktuitjutikhait Junemi, 2011, DFOkut angikmata ilaukatauniakhutik ukakatigitjutikhait Inuit angigutainik mikhaanut tuugaaliit umayukhiugutikhait ovalo niuviktiguitkhait.

Havaktiig NTIkunit nutaamik hanahimayut Inuit Umayuligiyit ovalo Hilakyualigiyit Ikayuktiit Katimayigalaat ilaukatauyaanganik katimaynut aalanik tuugaaliit munagikatigiit ilaukatauyukhat, ilauyut Nunavumi Umayuligiyit Katimayit, Kavamatkut Nunavumi ovalo DFOkut. Ilaukatauyut ukakatiginiaktait tuugaaliit munagitjutikhainik.

Eetoolook ukaktuk katimayut autlaaktitihimayut nutaamik havakatigiigutikhait kitkanit Inuit ovalo DFOkut munagikatigiigutikhainik tuugaaliit Nunavumi ovalo ihumagilugit aalanik atulaaktait munagitjutikhait tuugaaliit. “Nakuuhiliktuk DFOkut ilaukataulimata hamani katimayut Inuinut. Munagiyit takupkailiktut pinialiktut ikpinagilugit Inut inminiigutikhait iluani Nunavumi Nunataagutait Angigutaanut.” ukaktuk Eetoolook.

DFOkut tunihimayut kauyimayatukangit ovalo munagitjutikhait tuhagutikhainik mikhaanut tuugaaliit ayoikhaititlugit. Amigaitut havakatigiit hanahimaliktut ovalo munagikatigiigutikhait ilaukatauyukhat angikhimayut kinikhialutik pilaaktainik munagiyaanganik tuugaaliit atuklugit atuktainik ilaukatauyut. Ilaukatauyut ukakatigiyait ukakatigiyakhainik ikpinagiyait nunaini Januarymi ovalo Februarymi 2012.

Inuit Umayuligiyit ovalo Hilakyualigiyit Ikayuktiit Katimayigalaat NTIkut katimayigalaat ilaukatauyut pingahut ikhivautat ovalo pingahut ikhivautat tukliit Aviktukhimayut Umayuligiyit, ilaukatauyut Aviktukhimayut Inuit Katutjikatingit ovalo NTIkut Angayukaat Tuklia.