Pivalialigiyit Havakviit

NTI-kut Katimayiit tuhaqtittiyut nutaanik Tunngavighainik

(August 27, 2010 – Iqaluit, Nunavut) Nunavut Tunngavikkut Timingat Angayuqqaanguaq James Eetoolook uplumi unipkaaqtaa taamna Qaniklivalliayut Inungnut.

Taamna Qaniklivalliayut Inungnut pitquhimayunik titiralik aallannguqtiquyunik NTI-kut katimayiit aulapkaiyiqyuatlu katimayiralaangitlu; nutqaqtitlugit aulapkaiyiqyuat katimayiralaangit; ihumaaluutit inuuhiliqiniqmut ilitquhiliqiniqmutlu ihuaqharahuaqlugit Nunavunmi Inuuhiliqiniqmut Katimayiitigut; aullaqtittilutiklu Inuit anngutighatigut katimayiralaanik.

“2006-mi ihivriuliqtaqqut tunngaviat katimavikput taapkualu aviktuqhimayumi Inuit katimaqatigiingit NTI-kutlu ihuaqhaiyumapluta havauhiqattiarumaplutalu iniriaqaqtavut munaqhinahuaqhuta, atuqpallianahuaqhuta, ihumagiyaitalu Inuit nuivallianahuaqhugit.  Talvanngat ihuaqhaivallianahuaqpaktugut, Qaniklivalliayut Inungnut hivumuuqpalliatjutauyuq havauhiqattiaqniqmut katimavikput ikayurahuaqhugit Inuit.” uqaqtuq Eetoolook.

“Taapkua nutaat NTI-kut aulapkaiyiqyuangit katimayiralaat katimayiqaqniat NTI-kut Angayuqqaanganik taapkualu RIA-kut Angayuqqaanginik.  Talvuuna NTI-kut RIA-kutlu havaqatigiittiaqniaqtut aviktuittiarahuaqlutiklu pivighaptingnik kikliliuqhimayut ayuqnaiyarahuaqlugit ihuaqnighakkut ihumaliurahuaqlutiklu.” uqaqtuq Eetoolook. “Angirutitaarahuaqhutik aulapkaiyiqyuat katimayiralaat ihariagiyauyuugaluit, kihimi ukiut atuqtillugit katimayiupluta hapkua atuqtauhuiqpalliayut imaalu maligaliuqhutik ataniqtuiplutik ihuatqiyauyuq katimaviptingnut tajja.”

Tajja, NTI-kut aulapkaiyiqyuangit katimayiralaangit malrungnik tukliqaqtut angayuqqaanik angayuqqaamiklu niruaqtauvaktut Nunataaqhimayunit maligaliuqhimayuq ataniqtuiniqmut imaalu havaaghaita katimayiit maliktaghaliuqniq, maligaghaliuqniq parnaiyainiqlu havauhighainik katimayiit; tikkuaqtuilutik havaaghainik ataniqtuiyughaniklu taapkununnga aullaqtittihimayunutt maliktaghanik, maligaghaliuqhimayunik parnaiyaihimayainiklu; imaalu CEO-nguyuq hapkuninnga aulattiaqnighaanik munaqhiyughaq.

“Inuuhiqattiaqniq ilitquhivutlu ihumaaluutaulluaqtut Inungnut.  Ilitquhivut tajja huli aulayuittuq inuuhiptingni imaalu Inuit anguniaqtiuyut/niqighaqhiuqtiuyut huli.  Katimaqatigiikput tunngavia ihuaqharumayaqqut munaqhittiariami atuqpalliayaamilu ilitquhivut, uqauhivut pitquhivullu.” uqaqtuq Eetoolook.

Tamangnik tukliit angayuqqat niruaqtauvangniaqtut huli Nunataaqhimayunit, atauhiq tukliq ighivautaliuniaqtuq Nunavunmi Inuuhiliqiniqmut Katimayiinut aippaattauq ighivautaliuniaqtuq talvani Nunavunmi Anguniaqnikkut Katimayiinut.

“Hamanngat aviktuqhimayunit anguniaqnikkut katimayinik katimaqatigiyumayaqqut aullaqtittiniqmut Nunavunmi Anguniaqnikkut Unniqtuiyughat Katimayinik.” taimaaqtiqtuq Eetoolook.