(February 16-mi 2012-mi – Ikalokni, Nunavumi) Nunavut Tungavik Timeoyomi Tukleoyok Ikhivaotalikmin uplomi koyayok anigukniganik Bill C-19, Atugoekniga Hikotinik Titigakpaleaniginik Maligakyoak, Kavamatokaen Maligaleokvikyoagani.

“NTI-kon ikayoktoeteaktun aniknaetomik atugeagani hikotin Kanatami, kiheani Hikotinun Maligakyoak atoktaolihaktilogo 1995-mi, ihoeliyutaokman Inoenaen agonahoaktin nikikhamiknik pinahoageagani. Hikotinun Maligakyoak ihoakhaktaokman ihomagiyakaginmata inuyutaoyun Nunavumi. Hikotin ihoakotaokmata atoktaovlotiklo Inoenaknin agonahoageamikni nikikhamiknik nikikhaeniklo ilagiyatik,” okaktok Eetoolook.

Maligaleoktin vutiktun uvuna Bill C-19-mik ipakhak unuktilogo Kavamatokaen Maligaleokvikyoagani. Maligak aniguktok 159-goyun namaguhoktun 130-lo akigaktoeyun atogoegeagani hikotinik titigakpaleaniganik maligakyoak. Una maligak anigugeakaliktok Senate-konin maligagugeaktinagu. Agiktaokpan, hikotikaktun titigaktitiyageakagoekneaktun atoenageakaktonik hikotinik. Kiheani, hikutilgin piyageakakneaktun pihimayagani neovigeaganilo hikotinik laesinik.

“Ipakhak unuktomi vuteotan napaena akhugutigiyaata NTI-kon Hikotinun Maligakyoami. Nunavumi Nunataknikun Agikatigegutaoyok penageakagutaokman Inoenaen ihomakhogeagani agonahoaklotik laesetomik piyonaonmiklunen. July-min 2003-mi, atogeakaginigagun tonihihimayok Nunavumi Apikhoeyikyoan nutkaktitogo maligeakakniga titigakpaleanigin laesokageakaknigaglo pivikhakaknen Hikotinun Maligakyoak ukunani Nunavumi Inoenaknin atokpaktonin hikotinik agonahoageamikni. NTI-kon havakatigihimakneaktaen Kavaman Kanatami ilitagiyaoyagani Inoen Ihomakhutaen uvani Nunataknikun Agikatigegutaoyomi aniknaetomiklo atokoehimaklotik tutkumateaktaolotiklo hikotin,” okaktok Eetoolook. “Ihoaknikhak hikotilikiyotin Nunavumi una piyotikaktok kanoginigagun Nunavumi. Hikotin okaotaotilogin, ataohik maligakyoak ihoaginman tamaenun Kantami.”