Avatqugaluaqtitlugu ukiuq katimaniit uqaqatigiknitlu inungnut, Inuit ataniuyutlu tapkunani Imaqmiutaligiyikkut huli angiqatigigahuat tapkununga uuktutit ilaliutyuqhimayunut iqaluliginiqmut aulattiniq upalungaiyautit tuugalgit aulatauninut Nunavutmi.
Tapkuat uuktutit aulatauninut upalungaiyautit pivaliatitai tapkuat DFO-kut uqaqatigiplugit tapkuat Nunavut Tunngavik Nanminilgit Nunaliit Avikhimaninut Angutikhat Timigiyait Angutikhaligiyitlu Timigiyait pinguqtitnahuaqhugit katitlugit pilaqnit angunahuaqnit tugalgit piplugit Inuit angunahuaqninut pilaqnit himiqtautiginilu tugalgit. Tapkuat uuktutauyut aulatauninut upalungaiyautit uuktutauniat katitlugit pilaqnit angunahuaqnit piplugit auyami amigaitnit, nutat havikhainut havagutit ilainut nunaliuyut, nutatlu tuhaqhitautainut piyaqaqnit angunahuaqtit.
NTI-kut Tukligiya-Angayuqaq James Eetoolook uqallaktuq tapkuat aulatyutainut pityutit angqatigigutaungitnit pihimayut DFO-kut pinahuaqnit tapkuat auyautitlugu, tugalgit avikpaknit naunaittunut avikpakninut ilagiknit allatqinut nunanut, hulilu huniumaitnahuaqni ilaunginaqni tahapkununga ilagiknit nunanutlu. DFO-kut nanmini qauhaiyit angiqpiaqhimaitai tapkuat ihumagiyaunit, tapkuat pityutauhimakmata tamaitnut aulatyutauyunut upalungaiyautit hatqiqhimani inungnut naalaktitiyunut atuqtitai tapkuat Nunavut Uumayuligiyiqyuaqtkut Katimayit Iqaluitni uumani havaguhiqmi.
“Inuit tautuktai aulanit tugalgit nutanut allatqinutlu nunanut tamaat, tapkuat allauyut tapkunanga qauyihaiyit DFO-kut atuqtai pivaliatitni ukuat upalungaiyautit. Naunaipkutagiplugu, una aipagiya ukiuq tugalgit takukhauvaktut imaqutaini haniani Ikaluktutiak. Naunaqtuq naliatni auyami amigaitni tahapkuat tugalgit tikihimavigiyait. Tapkuat Ikaluktutiak Angutikhaligiyit Timingat tatya apigiyut ikayuqtauniq pilaquplugit angunahuaqtit ilihaqnit pityuhiqnik angunahuaqni tapkuat qinalukkat nakuuniqhamik,” uqaqtuq Eetoolook.
Angiqatigikhimaitkaluaqtitlugit tapkuat DFO-kut upalungaiyautit, NTI-kut atugahuaquiyut tapkununga NWMB-kut tahamna Nunavut atuliqtitni tapkuat uuktutit uuktulautit pivikhat pingahunik ukiunik talvangalu naunaiyaqlugit atuttiagiakhait. Una piqpiagutauniaq nutanik tugalgit aulatauninut upalungaiyautit atuliqnit hivuagut katimani tapkununga Maligait tahapkuat Hilaqyuaqmi Himiqtautai Nungunahuqugiyauyut Angutikhat (CITES) katimanikhaq Matyi, 2013, pilaqtittilutiklu nutanguqtauni piyaqaqata kinguagut taphuma uuktulakvikha pivikhat.
Tapkuat NWMB-kut tatya naunaiyaqniaqtai tapkuat uuktutit upalungaiyautit atugahuaquilutiklu taphumunga DFO-kut minihitauyuq naliaknik piyakha angiqnia qipiluknialuniit. Tapkuat NWMB-kut nigiugiyauyut hatqiqtitnikha ihumaliugutiktik ukiakhaq.
