Nunavut Tunngavikkut Tuklia Angayuqqaaq James Eetoolook tuhaqtittiyumayuq Inungnik taimaa apiqhuqtikkuurahuaqtut huli Havakvianik Iqalliqiyit Imaliqiyillu. Eetoolook uqaqhimayuq taimaa NTI-kut tuhaqviginahuaqtaat apiqhuiyit qakugunnuaq.
NTI-kut apiqhuiyikkuuqtittiyut DFO-kut niuviqtittihuiramik nunaqyuami tugaanik talvanngat 17-nguyut nunallaanit. Tuhaqtittihimayut DFO-kut atannguyainit Ottawa-mi December , 2010-mi, tuhaqtittihimaittumik katimatjutigihimaittumiklu Inuillu Nunavunmi taapkuninngalu Nunavunmi Anngutighanik Munaqtiit Katimayiinik.
“NTI-kut apiqhuiyikkuurumaliqtut DFO-kut ihumaliuqhimayainut niuviqtittihuirumaplutik tugaanik ahikkuuqnainmat. Aghuuqhuta kiuyugut, kihimi naunaiqhitiyaghavut DFO-kut taimaa Inuit akihaqtuqniaqtut pilaarutainik nunataarutikput maliktaunngitpat,” uqaqtuq Eetoolook.
DFO-kut naunaiqhitiyumanngittut qanuq naunaitkutanik ihumaliurutiqaqtut. Tugaalgit taapkua humaanngitturiyauyut amigaittuuplutik Nunavunmi.
NTI-kut, Anguniaqtillu Katimayiit taapkualu Aviktuqhimayumi Anguniaqtit Katimayiit pulaaquiyut DFO-kunnik tamangnut nunallaanut 17-nut aktuqtauhimayut naunaiqhitilugit huuq niuviqtittihuiqtut tugaalingnik tuhaqtittilutiklu huuq ihumaaluutigiyait kititaaqhimayut. DFO-kut pulaarumanngittut tamangnut nunallaanut kihimi katimatjutiginahuaqtait 6-nit nunallaanit tatqiqhiut nungutinnagu.
