ᓄᓇᕗᑦ ᑐᙵᕕᒃᑯᑦ ᐱᓕᕆᐊᕆᔭᕆᐊᖃᕐᑕᖏᑦ

ᑲᒪᒋᔭᒃᓴᖏᓪᓗ ᓴᖅᑭᓯᒪᒻᒪᑕ ᓄᓇᕗᒻᒥ ᓄᓇᑖᖅᓯᒪᓂᕐᒧᑦ ᐊᖏᕈᑎᓂ (ᐊᖏᕈᑏᑦ) ᐱᒋᐊᖅᑎᑦᓯᓂᕐᒧᑦ ᑳᓐᑐᕌᖑᔪᒥᒃ, ᐊᒻᒪᓗ ᐱᓕᕆᐊᒃᓴᕆᔭᐅᑎᑕᐅᔪᓂᑦ ᑲᒪᔨᐅᑎᓪᓗᒋᑦ ᑐᙵᕕᒃᑯᑦ ᐊᒻᒪᓗ ᐊᔾᔨᒌᖏᑦᑐᑦ ᓇᓗᓇᐃᖅᑕᐅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᑦ.

ᓄᓇᕗᒻᒥ ᓄᓇᑖᕈᑕᐅᓯᒪᔪᑦ ᐊᖏᕈᑎᖓᓐᓂᑦ ᐱᓯᒪᔪᑦ ᐱᓕᕆᐊᕆᔭᒃᓴᑦ

ᓄᓇᕗᒻᒥ ᓄᓇᑖᕈᑕᐅᓯᒪᔪᑦ ᐊᖏᕈᑎᖓᑦ ᐃᓕᑕᖅᓯᓯᒪᕗᖅ ᑲᔪᓯᑎᑦᓯᔨᐅᓪᓗᓂᓗ ᐋᖅᑭᒃᑕᐅᓯᒪᔪᓂᒃ ᐃᓄᐃᑦ ᐆᒪᔪᕈᓐᓇᐅᑎᖏᓐᓄᑦ ᐱᔪᓐᓇᐅᑎᓂᒃ ᐊᒻᒪᓗ ᐃᓄᐃᑦ ᐃᓚᒋᔭᐅᔭᕆᐊᖃᕐᓂᖏᓐᓄᑦ ᐆᒪᔪᐃᑦ ᐊᐅᓚᑕᐅᕙᓐᓂᖏᓐᓄᑦ. ᓄᓇᕗᒻᒥ ᓄᓇᑖᕈᑕᐅᓯᒪᔪᑦ ᐊᖏᕈᑎᖓᑦ ᓴᖅᑭᑎᑦᓯᔾᔪᑕᐅᓚᐅᕐᓯᒪᕗᖅ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓂᒃ ᐊᖅᑯᑎᒃᓴᐅᖁᔭᐅᓪᓗᓂ ᒐᕙᒪᓕᕆᓂᕐᒧᑦ ᓄᓇᕗᒥ ᓇᓕᒧᒃᑐᒥᒃ ᑭᒡᒐᖅᑐᐃᔨᐅᖃᐅᔪᓐᓇᕐᓗᓂ ᒐᕙᒪᒃᑯᓐᓂᑦ ᐃᓄᖕᓂᓪᓗ. ᐆᒪᔪᐃᑦ ᓇᓗᓇᐃᖅᑕᐅᓯᒪᔪᑦ ᐊᖏᕈᑎᓂ ᐱᖃᓯᐅᔾᔨᕗᑦ ᓄᓇᒥᐅᑕᓂᒃ ᑕᕆᐅᕐᒥᐅᑕᓂᓪᓗ ᐆᒪᔪᓂᒃ, ᐃᖃᓗᓐᓂᒃ, ᐊᒻᒪᓗ ᑎᖕᒥᐊᓂᒃ.

ᐃᓄᐃᑦ ᐆᒪᔪᕈᓐᓇᐅᑎᖏᑦ ᒥᐊᓂᖅᓯᔪᓐᓇᐅᑎᖏᓪᓗ ᐱᓕᕆᐊᕆᔭᐅᓪᓗᐊᑕᒻᒪᕆᒃᐳᑦ ᐊᖏᕈᑎᓂ. ᐃᓛᒃᑯᑦ 5 ᐃᓗᓕᖃᕐᐳᖅ 15-ᐳᓴᓐᑎᖏᓐᓂᒃ ᑎᑎᕋᖅᑕᐅᓯᒪᔪᓂᒃ ᐸᐃᑉᐹᖏᓐᓂ ᐊᖏᕈᑎᓂ ᐊᒥᓱᓄᑦ ᐃᓕᖓᔪᖅ ᐱᔭᕆᐊᑐᔪᒻᒪᕆᐅᓪᓗᓂᓗ. ᐃᓛᒃᑯᑦ 6 (ᐆᒪᔪᐃᑦ ᓇᓪᓕᐅᒃᑯᒫᖃᕈᑕᐅᓂᖏᑦ) ᐃᓱᒫᓘᑎᖃᓪᓗᐊᑕᖅᐳᖅ ᐃᓄᐃᑦ ᐊᖑᓇᓱᒍᓐᓇᕐᓂᕐᒧᑦ ᐱᔪᓐᓇᐅᑎᖏᓐᓂᒃ. ᐊᒥᓱᑦ ᐊᓯᖏᑦ ᑎᑎᕋᖅᓯᒪᔪᑦ ᐅᖃᐅᓯᖃᖅᓯᒪᒋᕗᑦ ᐆᒪᔪᓕᕆᓂᕐᒥᒃ ᐊᖑᓇᓱᒍᓐᓇᕐᓂᒥᓪᓗ, ᐱᖃᓯᐅᑎᓪᓗᒋᑦ:

• ᑎᑎᕋᖅᓯᒪᓂᖓ 15 - ᑕᕆᐅᖅᐸᓯᒻᒥᐅᑕᐃᑦ
• ᑎᑎᕋᖅᓯᒪᓂᖓ 26 - ᐃᓄᐃᑦ ᐃᒃᐱᓐᓂᖅᑎᑕᐅᓂᖏᓐᓄᑦ ᐃᑲᔫᓯᐊᖏᓐᓄᓪᓗ ᐊᖏᕈᑎᑦ
• ᑎᑎᕋᖅᓯᒪᓂᖓ 40 - ᐊᓯᖏᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ
• ᑎᑎᕋᖅᓯᒪᓂᖓ 42 - ᒫᓂᑑᕙ ᐊᒻᒪᓗ ᑕᕆᐅᖅ
• ᒪᓂᑑᕙᐅᑉ ᑲᓇᓐᓇᖓᓂ.

ᐆᒪᔪᓕᕆᓂᕐᒧᑦ ᐊᐅᓚᑦᓯᔩᑦ ᐃᒪᓐᓇᐃᒋᐊᖃᕐᐳᑦ, ᐊᓯᖏᓐᓂᒃ ᐱᓕᕆᐊᖃᓯᓐᓈᕐᓗᑎᒃ:

• ᐃᑲᔪᖅᓱᐃᖏᓐᓇᕆᐊᖃᕐᐳᑦ ᐃᓄᐃᑦ ᐊᖑᓇᓱᒍᓐᓇᕐᓂᕐᒧᑦ ᐱᔪᓐᓇᐅᑎᖏᓐᓂᒃ ᓯᕗᓪᓕᖅᐸᐅᖁᓯᒪᔭᖏᓐᓂᓪᓗ.
• ᐃᓕᑕᖅᓯᓯᒪᓗᑎᒃ ᐃᓄᐃᑦ ᐃᓕᖅᑯᓯᖏᓐᓂᑦ ᐆᒪᔪᓕᕆᓂᕐᒧᑦ ᐱᓕᕆᐊᕆᔭᐅᔪᓂᒃ ᐃᑲᔪᖅᓯᓂᐊᕐᑐᓂᒃ ᒥᐊᓂᕆᔭᐅᓂᖏᓐᓄᑦ ᑲᒪᒋᔭᐅᑦᓯᐊᕐᓂᖏᓄᓪᓗ ᐆᒪᔪᐃᑦ ᐆᒪᕕᖏᓪᓗ.
• ᓴᐳᔾᔨᓯᒪᔨᐅᓗᑎᒃ ᐊᑐᖅᑕᐅᒃᑲᓐᓂᕈᓐᓇᕐᑐᓂᒃ ᓄᓇᒥᐅᑕᐃᑦ ᑮᓇᐅᔭᓕᐅᕈᑕᐅᒐᓱᐊᕐᓂᖏᓐᓄᑦ.
• ᐊᑑᑎᖃᑦᓯᐊᖅᑐᒃᑯᑦ ᐃᓚᒋᔭᐅᑎᑦᓯᔨᐅᓗᑎᒃ ᐃᓄᓐᓂᒃ ᑐᕌᖓᔪᓂᒃ ᑕᒪᐃᓐᓄᑦ ᐆᒪᔪᓕᕆᔾᔪᑕᐅᔪᓄᑦ, ᐱᖃᓯᐅᑎᓗᒋᑦ ᖃᐅᔨᓴᕈᑕᐅᕙᒃᑐᑦ.
• ᖃᐅᔨᓴᑦᓯᐊᕐᓗᑎᒃ ᐊᑐᖅᑕᐅᓂᖏᑦ ᐃᓄᐃᑦ ᐊᖑᓇᓱᒍᓐᓇᕐᓂᕐᒧᑦ ᐱᔪᓐᓇᐅᑎᖏᑦ ᐊᐅᓚᑕᐅᒐᓗᐊᕐᒪᖔᑕ ᒪᓕᑦᓯᐊᕋᓗᐊᕐᒪᖔᑕᓗ ᐊᑐᖅᑕᐅᖁᔭᐅᔪᓂᒃ ᐆᒪᔪᓂᒃ ᓴᐳᔾᔨᓯᒪᓂᕐᒧᑦ ᒪᓕᒐᒃᓴᓂᒃ.

ᑐᕌᖅᑕᐅᒐᓱᓗᐊᖅᑐᖅ ᐃᓛᒃᑯᑦ 5 ᐃᒪᐃᑦᑑᖁᓪᓗᒋᑦ ᐆᒪᔪᐃᑦ ᐊᐅᓚᑕᐅᓂᖏᑦ:

• ᖃᐅᔨᒪᔭᐅᑦᓯᐊᕐᓗᑎᒃ ᑕᑯᒃᓴᐅᑎᑦᓯᓗᑎᓪᓗ ᐃᓄᐃᑦ ᐱᓕᕆᐊᕆᔭᖏᓐᓂᑦ ᐆᒪᔪᕋᓱᒍᓐᓇᕐᓂᕐᒧᑦ.
• ᐱᔨᒃᓯᕋᕐᓗᑎᒃ ᓴᖅᑭᐅᒪᑎᑦᓯᔨᐅᓗᑎᓪᓗ ᐊᑯᓂᐅᔪᒧᑦ ᑮᓇᐅᔭᓕᐅᕈᑎᒃᓴᓂᒃ, ᐃᓄᓕᕆᔾᔪᑎᒃᓴᓂᒃ ᐃᓕᖅᑯᓯᖅᑎᒍᓪᓗ ᐱᔪᒪᔭᕆᔭᐅᔪᓂᒃ ᐃᓄᓐᓄᑦ ᐊᖑᓇᓱᒃᑎᓄᑦ.

ᓇᓗᓇᐃᖅᑕᐅᓯᒪᔪᑦ ᐱᓕᕆᐊᕆᔭᐅᔭᕆᐊᓖᑦ ᐃᓄᓐᓄᑦ ᑲᑐᔾᔨᖃᑎᒌᖑᔪᓄᓪᓗ ᐊᖏᕈᑎᑎᒍᑦ:

• ᑎᒃᑯᐊᖅᑕᐅᓗᑎᒃ ᐃᓕᑕᕆᔭᐅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᓐᓄᑦ (5.2.1) ᐊᒻᒪᓗ ᐃᑲᔪᖅᑎᐅᓗᑎᒃ ᖃᐅᔨᒪᔨᑕᕆᔭᐅᓂᕐᒧᑦ (5.2.3), ᐃᓚᒋᔭᐅᓗᑎᒃ ᖃᐅᔨᒪᔨᑕᕆᔭᐅᓂᖅ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑕ ᖃᐅᔨᒪᔨᑕᐅᔭᕆᐊᖃᕐᓂᖏᓐᓄᑦ ᑎᒍᒥᐊᕈᓐᓇᖅᑕᖏᓐᓂᒃ ᑕᕆᐅᕐᒥᑕᓕᕆᓂᕐᒧᑦ ᐃᓛᒃᑯᑦ 15 ᐊᖏᕈᑏ ᒪᓕᓪᓗᒋᑦ.

ᐃᑲᔪᖅᑎᐅᓗᑎᒃ:

• ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑐᓂᐅᖅᑲᐅᑕᐅᓂᖏᑦ ᐆᒪᔪᖅᑕᐅᔪᓐᓇᖅᑐᑦ (BNL) ᐊᒻᒪᓗ ᐋᖅᑭᒋᐊᖅᑕᐅᓯᒪᔪᑦ ᐆᒪᔪᖅᑕᐅᔪᓐᓇᖅᑐᑦ (5.6.24, 5.6.27).
• ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᑐᓂᐅᖅᑲᐃᖃᑦᑕᕐᓂᖏᑦ ᐆᒪᔪᖅᑕᐅᔪᓐᓇᖅᑐᓂᒃ ᐊᒥᐊᒃᑯᓂᒃ ᓂᐅᕐᕈᑎᒃᓴᓄᑦ ᐊᒻᒪᓗ ᐊᓯᖏᓐᓄᑦ ᐊᑐᖅᑕᐅᔪᒃᓴᐅᓗᑎᒃ (5.6.39, 5.6.40).
• ᒐᕙᒪᓄᑦ ᐱᔾᔪᑎᒋᓪᓗᒋᑦ ᓯᕗᓕᕐᐸᐅᓗᑎᒃ ᐊᖏᕈᑎᖃᕈᓐᓇᕐᓂᕐᒧᑦ ᕿᐱᓗᓐᓂᕐᒥᒃ ᐊᔾᔨᒌᖏᑦᑐᓄᑦ ᑮᓇᐅᔭᓕᐅᕈᑎᒃᓴᒃᑲᓐᓂᕐᓄᑦ ᐃᓕᖓᑎᓪᓗᒋᑦ ᐆᒪᔪᓄᑦ (5.8)
• ᐱᕙᓪᓕᐊᑎᑦᓯᔨᓄᑦ ᐊᒻᒪᓗ ᓄᓇᐅᑉ ᖄᖓᓃᑦᑐᓄᑦ ᐱᔪᓐᓇᐅᑎᓄᑦ ᑲᑎᒪᔨᐅᔪᓄᑦ ᐱᔾᔪᑎᒋᓪᓗᒋᑦ ᐆᒪᔪᐃᑦ ᐊᑭᓕᐅᓯᐊᖅᑖᕈᑕᐅᕙᓐᓂᖏᑦ (6).
• ᐱᕙᓪᓕᐊᑎᑦᓯᔨᓄᑦ ᐋᔩᖃᑎᒌᔾᔪᑕᐅᑎᓪᓗᒋᑦ ᐆᒪᔪᐃᑦ ᐊᑭᓕᐅᓯᐊᖅᑖᕈᑕᐅᕙᓐᓂᖏᓐᓄᑦ ᐱᖁᔭᐃᑦ ᐃᓄᐃᑦ ᐊᒃᑐᖅᑕᐅᓯᒪᓂᖏᓐᓄᑦ ᐃᑲᔫᓯᐊᖅᑖᕈᑎᓄᓪᓗ ᐊᖏᕈᑏᑦ (26).
• ᒐᕙᒪᒃᑯᑦ ᐊᒻᒪᓗ ᓄᓇᑖᕈᑎᑎᒍᑦ ᑎᒥᓐᖑᖅᑎᑕᐅᓯᒪᔪᑦ ᐱᔾᔪᑎᒋᓪᓗᒋᑦ ᐆᒪᔪᕋᓱᐊᕐᓂᐅᕙᒃᑐᑦ ᓄᓇᓕᖏᓐᓂ (ᓇᓗᓇᐃᖅᑕᐅᓯᒪᙱᑦᑐᑦ ᐊᖏᕈᑎᓂ ᑭᓯᐊᓂ ᐱᓕᕆᐊᕆᔭᐅᓪᓗᐊᑕᖅᑐᖅ ᓄᓇᓕᓐᓂ ᐊᖑᓇᓱᒃᑐᓕᕆᔨᒃᑯᑦ ᑲᑐᔾᔨᖃᑎᒌᖏᓐᓄᑦ (ᑎᒃᑯᐊᖅᑕᐅᓯᒪᔪᓄᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ)).
• • ᐃᓄᐃᑦ ᑭᒡᒐᕐᑐᖅᑎᖃᕐᓗᑎᒃ ᐅᖃᖃᑎᒌᔾᔪᑕᐅᑎᓪᓗᒋᑦ ᒐᕙᒪᒃᑯᓐᓂ ᐱᓕᕆᐊᒃᓴᓄᑦ ᐋᔩᖃᑎᒌᔾᔪᑕᐅᑎᓪᓗᒋᑦ ᑲᓇᑕᐅᑉ ᓯᓚᑖᓂ ᐊᖏᕈᑎᒃᓴᐃᑦ ᐃᓕᖓᑎᓪᓗᒋᑦ ᐃᓄᐃᑦ ᐆᒪᔪᕋᓱᒍᓐᓇᐅᑎᖏᓐᓄᑦ ᐱᔪᓐᓇᐅᑏᑦ (5.9.2).
• ᓴᖅᑭᐅᒪᑎᑕᐅᒋᐊᕐᓗᑎᒃ ᐱᔪᒪᓂᕆᔭᐅᔪᑦ ᐃᓄᓐᓄᑦ ᓄᓇᕗᒥᐅᓄᑦ ᐱᔾᔪᑎᒋᓪᓗᒋᑦ ᐋᖅᑭᖃᑎᒌᔾᔪᑕᐅᓯᒪᔪᑦ ᐊᓯᖏᓐᓄᑦ ᓄᓇᖃᖅᑳᖅᓯᒪᔪᑦ ᑎᒥᖁᑎᖏᓐᓄᑦ ᐱᔾᔪᑎᒋᓪᓗᒋᑦ ᐆᒪᔪᕋᓱᐊᕐᓂᐅᕙᒃᑐᑦ (40), ᐊᒻᒪᓗ ᐃᓄᐃᑦ ᐊᑐᕈᓐᓇᕐᓂᖏᓐᓄᑦ ᐆᒪᔪᕋᓱᐊᕐᓂᕐᒧᑦ ᐱᔪᓐᓇᐅᑎᖏᓐᓂᑦ ᒫᓂᑑᐸᐅᑉ ᐃᒪᖁᑎᖏᓐᓂ (42.2).
• ᓴᖅᑭᑎᑦᓯᓗᑎᒃ ᓄᓇᓕᖕᓂ ᐊᖑᓇᓱᒃᑐᓕᕆᔨᒃᑯᑦ ᑲᑐᔾᔨᖃᑎᒌᖏᑕ ᑲᑎᒪᔨᒃᓴᖏᓐᓂᒃ ᐊᒻᒪᓗ ᐊᕕᒃᑐᖅᓯᒪᔪᓂ ᐆᒪᔪᓕᕆᔩᑦ ᑲᑎᒪᔨᒃᓴᖏᓐᓂᑦ (5.7.2, 5.7.4).
• ᖃᐅᔨᒪᑦᓯᐊᕋᓱᐊᕐᓗᑎᒃ ᐊᑐᓕᖅᑎᑕᐅᕙᓪᓕᐊᓂᖏᓐᓂᑦ ᐃᓄᐃᑦ ᐆᒪᔪᕋᓱᓐᓂᕐᒧᑦ ᐱᔪᓐᓇᐅᑎᖏᑦ, ᐱᓗᐊᖅᑐᒥᒃ ᓇᓗᓇᐃᖅᑕᐅᓯᒪᔪᑦ 5.6-ᒥ (ᐆᒪᔪᕋᓱᓐᓂᖅ) ᐊᒻᒪᓗ 5.7-ᒥ (ᓇᓗᓇᐃᖅᑕᐅᓯᒪᔪᑦ ᐃᓄᐃᑦ ᐆᒪᔪᕋᓱᐊᕈᓐᓇᕐᓂᖏᑦ ᐊᔾᔨᐅᖏᑦᑐᑎᒍᑦ)

ᒪᓕᓪᓗᒋᑦ ᐊᖏᕈᑏ, ᒐᕙᒪᑐᖃᒃᑯᑦ ᑎᒍᒥᐊᕐᓂᐊᕐᐳᑦ ᑲᒪᔨᐅᓪᓗᐊᑕᕐᓂᕐᒧᑦ ᐆᒪᔪᐃᑦ ᐊᐅᓚᑕᐅᓂᖏᓐᓄᑦ. ᑕᒪᓐᓇ ᑐᑭᖃᕐᐳᖅ ᐊᕙᑎᒥᐅᑕᐅᓕᕆᔨᒃᑯᑦ ᐱᓕᕆᕕᖓᑦ, ᐃᒪᕐᒥᐅᑕᓕᕆᔨᒃᑯᑦ ᐱᓕᕆᕕᖓᑦ ᐊᒻᒪᓗ ᑲᓇᑕᒥ ᐆᒪᔪᓕᕆᔨᒃᑯᑦ ᑲᑎᒪᔨᕐᔪᐊᖏᑦ ᒪᓕᒐᓕᐅᖏᓐᓇᕐᓂᐊᕐᒪᑕ, ᑐᓂᓯᔨᐅᓗᑎᒃ ᐱᔪᓐᓇᐅᑎᓂᒃ ᓚᐃᓴᓐᓯᓂᓪᓗ, ᒪᓕᒐᕐᓂᒃ ᒪᓕᒃᑕᐅᑎᑦᓯᔨᐅᓗᑎᒃ, ᖃᐅᔨᓴᖅᑎᐅᕙᓪᓗᑎᒃ ᐆᒪᔪᓂᒃ, ᐊᐅᓚᑦᓯᔨᐅᓗᑎᒃ ᐱᓕᕆᐊᒃᓴᓂᒃ ᓴᖅᑭᑕᐅᕙᓪᓕᐊᔪᓂᒃ, ᐊᑑᑎᖃᑦᓯᐊᖅᑐᒥᓪᓗ ᐊᐅᓚᑦᓯᔨᐅᓗᑎᒃ ᒥᐊᓂᖅᓯᔨᐅᓗᑎᓪᓗ ᐃᒪᕐᒥᐅᑕᓂᒃ, ᑎᖕᒥᐊᓂᒃ, ᐃᖃᓗᓐᓂᓪᓗ ᓄᓇᕗᑦ ᐃᓗᐊᓂ. ᑭᓯᐊᓂ, ᑕᐃᒪᐃᓕᐅᕈᓐᓇᕐᑎᑕᐅᕗᑦ ᐊᖏᖅᑕᐅᓯᓗᑎᒃ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑕ ᐊᕙᑎᒥᐅᑕᓕᕆᔨᒃᑯᑦ ᐱᓕᕆᕕᖓᑦ ᑲᒪᔨᐅᓂᐊᕐᑐᖅ ᐱᕙᓪᓕᐊᓂ ᐆᔪᓕᕆᔾᔪᑕᐅᔪᓂᒃ ᐆᒪᔪᕐᓂᐊᕐᑐᓕᕆᔾᔪᑕᐅᔪᑎᒍᑦ, ᑭᓯᐊᓂ ᐃᑲᔪᖅᓯᒋᐊᖅᑎᑐᐃᓐᓇᐅᓂᐊᕐᑐᖅ ᒪᓕᓪᓗᒋᑦ ᐊᖏᕈᑏ ᓇᓗᓇᐃᖅᑎᕆᔨᐅᑎᑕᐅᙱᓪᓗᑎᒃ ᐱᔭᕆᐊᖃᕐᑐᓄᑦ.

ᑮᓇᐅᔭᓕᕆᓐᓇᐅᖅᑲᐅᔪᒥ ᐊᕐᕌᒍᒥ, ᓇᓗᓇᕈᓐᓃᓚᐅᕐᒪᑦ ᐊᕙᑎᒥᐅᑕᓕᕆᔨᒃᑯᑦ ᐱᓕᕆᕕᖓᑦ ᐊᑲᐅᙱᓕᐅᕈᑎᖃᕐᑐᒻᒪᕆᐅᓚᐅᕐᓂᖏᓐᓂᑦ ᐊᑐᖅᑕᐅᑎᑦᓯᓇᓱᒃᑎᓪᓗᒋᑦ ᐆᒪᔪᓕᕆᓂᕐᒧᑦ ᑲᒪᒋᔭᐅᔭᕆᐊᖃᕐᑐᓂᒃ. ᐱᔾᔪᑕᐅᓗᐊᙱᒃᑲᓗᐊᖅᑎᓪᓗᒍ ᐅᓂᒃᑳᓕᐅᕐᓂᕐᒧᑦ, ᖁᔭᓈᖅᑕᐅᓯᒪᒋᐊᖃᙱᒻᒪᑦ ᐱᔾᔪᑕᐅᑎᓪᓗᒍ. ᐊᕙᑎᒥᐅᑕᓕᕆᔨᒃᑯᑦ ᐊᒻᒪᓗ ᑕᕆᐅᕐᒥᐅᑕᓕᕆᔨᒃᑯᑦ ᐱᓕᕆᕕᖏᑦ ᓄᓇᕗᒥ ᑐᙵᕕᒃᑯᑦ ᒐᕙᒪᒃᑯᓐᓂ ᐱᓕᕆᖃᑎᒋᓪᓗᐊᑕᕐᒪᒋᑦ ᐱᕙᓪᓕᐊᑎᑦᓯᑎᓪᓗᒋᑦ ᐆᒪᔪᓕᕆᓂᕐᒧᑦ ᒥᐊᓂᖅᓯᔾᔪᑎᒃᓴᓂᒃ ᓄᓇᕗᒥ. ᐱᕙᓪᓕᐊᑎᑦᓯᓂᖃᓗᐊᕈᓐᓃᕐᓂᖏᑦ ᐊᕙᑎᒥᐅᑕᓕᕆᔨᒃᑯᑦ ᐊᒃᓱᕈᕐᑎᑦᓯᒃᑲᓐᓂᕐᓂᐅᓴᕗᑦ ᓄᓇᕗᑦ ᑐᙵᕕᒃᑯᓐᓂᑦ ᐊᒻᒪᓗ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑦ ᖃᐅᔨᓴᕐᓂᕐᒧᑦ, ᓄᓇᓕᓐᓂ ᒥᐊᓂᖅᓯᓂᕐᒧᑦ, ᒪᓕᒃᑕᐅᑎᑦᓯᒐᓱᐊᕐᓂᕐᒧᑦ ᐱᖁᔭᓂᒃ, ᐊᒻᒪᓗ ᓄᓇᓕᖕᓂ ᐊᖑᓇᓱᒃᑐᓕᕆᔨᒃᑯᑦ ᑲᑐᔾᔨᖃᑎᒌᑦ ᐃᑲᔪᖅᑕᐅᔾᔪᑎᒃᓴᖏᓐᓄᑦ.

ᐱᔭᕇᖅᑕᐅᓯᒪᔪᑦ ᐊᕐᕌᖑᒥ ᑮᓇᐅᔭᓕᕆᓐᓇᐅᓚᐅᖅᑐᒥ ᐃᒪᐃᑦᑑᕗᑦ:

• ᐱᐊᓂᒃᑕᐅᓪᓗᓂ ᐆᒪᔪᓕᕆᓂᕐᒧᑦ ᒪᓕᒐᖅ:
• ᓴᖅᑭᑎᑦᓯᓪᓗᑎᒃ 23-ᖑᔪᓂᒃ ᐆᒪᔪᓕᕆᓂᕐᒧᑦ ᒪᓕᒐᕐᒥ ᐊᐅᓚᑦᑎᔾᔪᑎᖏᓐᓂᒃ
• ᓴᖅᑭᑎᑦᓯᓪᓗᑎᒃ ᐊᑐᐊᒐᒃᓴᒥᒃ ᓴᖅᑭᑎᑕᐅᔭᕆᐊᖃᕐᓂᖏᓐᓄᑦ ᐊᑕᖏᕐᓗᑎᒃ ᐆᒪᔪᖅᑕᐅᔪᓐᓇᕐᑐᓂᒃ.
• ᓴᖅᑭᑎᑦᓯᓪᓗᑎᒃ ᓄᓇᕗᒥ ᐃᖃᓗᓕᕆᔾᔪᑎᒃᓴᓂᒃ.
• ᑎᑎᕋᖅᐸᓪᓕᐊᓕᓵᕈᑎᓂᒃ ᐱᓕᕆᐊᖃᕐᓱᑎᒃ ᓄᓇᕗᒥ ᐃᖃᓗᓕᕆᔾᔪᑎᒃᓴᐃᑦ ᐱᖁᔭᒃᓴᖏᓐᓂᑦ ᐊᑐᖅᑕᐅᓪᓗᑎᒃ ᐃᖃᓗᓕᕆᓂᕐᒧᑦ ᒪᓕᒐᖅ ᐊᒻᒪᓗ ᐊᖏᕈᑏᑦ.
• ᐃᓚᒋᔭᐅᓚᐅᕐᑐᑦ ᑳᓐᑐᕌᖃᕈᑎᒃᓴᓄᑦ ᐋᔩᖃᑎᒌᔾᔪᑎᖃᕐᑎᓪᓗᒋᑦ ᓄᓇᓕᓐᓂ ᐊᖑᓇᓱᒃᑐᓕᕆᔩᑦ ᑲᑐᔾᔨᖃᑎᒌᖏᓐᓂ ᐊᒻᒪᓗ ᐊᕕᒃᑐᖅᓯᒪᔪᓂ ᐆᒪᔪᓕᕆᔩᑦ ᑲᑎᒪᔨᖏᑦᑕ ᑮᓇᐅᔭᖃᕈᑎᒃᓴᖏᓐᓄᑦ.
• ᐃᓚᒋᔭᐅᓚᐅᕐᑐᑦ ᓇᓄᐃᑦ ᐊᐅᓚᑕᐅᓂᖏᓐᓄᑦ ᐊᒻᒪᓗ ᐱᐊᓂᒃᑕᐅᓪᓗᑎᒃ ᑐᑭᓯᐅᒪᖃᑎᒌᓐᓂᕐᒧᑦ ᐊᖏᕈᑎᑦ.
• ᓴᖅᑭᑎᑦᓯᓚᐅᕐᐳᑦ ᑐᓴᐅᒪᖃᑎᒌᔾᔪᑎᒃᓴᓄᑦ ᐅᐸᓗᖓᐃᔭᐅᑎᒃᓴᓂᒃ ᐆᒪᔪᐃᑦ ᒥᒃᓵᓄᑦ.
• ᓯᕗᓕᖅᑎᐅᓪᓗᑎᒃ ᐊᖑᓇᓱᒍᓯᐅᕙᒃᑐᓕᕆᓂᕐᒥᒃ.
• ᐃᓕᓐᓂᐊᓯᓐᓈᑦ ᑲᑎᒪᑎᑦᓯᓚᐅᕐᐳᑦ ᐊᖑᓇᓱᓐᓂᕐᒧᑦ ᐊᑐᖅᑕᐅᕙᒃᑐᓂᒃ ᐃᓕᖅᑯᓯᐅᔭᕆᐊᖃᕐᑐᓂᓪᓗ.
• ᓂᐅᕕᓚᐅᖅᑐᑦ ᓄᑖᓂᒃ ᐱᖁᑎᓂᒃ ᐊᕐᕙᓐᓂᐊᕈᑎᒃᓴᓄᑦ.
• ᐆᒃᑐᕋᖃᑦᑕᖅᓯᒪᔪᑦ ᖁᑭᐅᑎᓂᒃ ᖃᕐᔪᓂᓪᓗ ᐊᖑᓇᓲᑎᓂᒃ ᕿᓚᓗᒐᕐᓄᑦ, ᑑᒑᓕᓐᓄᑦ ᐊᐃᕕᕐᓄᓪᓗ.
• ᐃᑲᔪᖅᓱᐃᓚᐅᕐᑐᑦ ᑐᙵᕕᒃᑯᑦ ᐱᓕᕆᐊᖃᕐᓂᖏᓐᓂᑦ ᖁᑭᐅᑏᑦ ᒪᓕᒐᖏᓐᓄᑦ.
• ᓴᖅᑭᑎᑦᓯᓚᐅᕐᐳᑦ ᓄᓇᓕᓐᓂ ᒥᐊᓂᖅᓯᔾᔪᑎᒃᓴᓂᒃ.
• ᖃᐅᔨᓴᑦᓯᐊᕋᓱᓚᐅᕐᐳᑦ ᓄᓇᕗᑦ ᐃᓚᒋᔭᐅᑦᓯᐊᕋᓗᐊᕐᒪᖔᑦ ᐱᔾᔪᑎᒋᓪᓗᒍ ᑲᓇᑕᐅᑉ ᒐᕙᒪᒃᑯᖏᑦᑕ ᓄᖑᒃᐸᓪᓕᐊᓂᕋᖅᑕᐅᓯᒪᔪᑦ ᐆᒪᔪᐃᑦ ᒪᓕᒐᖓᑦ.
• ᓯᕗᒃᑲᑕᐃᔨᐅᓚᐅᕐᐳᑦ ᐋᖅᑭᒋᐊᕆᓪᓗᑎᓪᓗ ᐊᑑᑎᖃᕐᓂᖏᓐᓂᑦ ᓄᓇᕗᒥ ᐆᒪᔪᓕᕆᔩᑦ ᑲᑎᒪᔨᕐᔪᐊᖏ.
• ᓯᕗᒃᑲᑕᐃᔨᐅᓚᐅᕐᐳᑦ ᓄᓇᓕᓐᓂ ᐊᕕᒃᑐᖅᓯᒪᔪᓂ ᐊᖅᑯᑎᒋᔭᐅᓪᓗᑎᒃ ᐆᒪᔪᓕᕆᓂᕐᒧᑦ ᐊᑐᐊᒐᒃᓴᓕᕆᔩᑦ ᑲᑎᒪᔨᖏᓐᓂᑦ.
• ᓴᖅᑭᑎᑦᓯᓚᐅᕐᐳᑦ ᐊᑐᓕᖅᑎᑦᓯᓪᓗᑎᓪᓗ ᐊᑐᐊᒐᒃᓴᒥᒃ ᑎᓕᓯᔾᔪᑕᐅᓯᒪᔪᓄᑦ ᐱᓕᕆᐊᒃᓴᓄᑦ.
• ᓯᕗᓕᖅᑎᐅᓚᐅᕐᐳᑦ ᓄᓇᓕᐅᔪᑦ ᑭᒡᓕᖃᕐᓂᖏᓐᓄᑦ ᐆᒪᔪᓕᕆᔾᔪᑕᐅᕙᒃᑐᑦ ᒥᒃᓵᓄᑦ.
• ᓯᕗᓕᖅᑎᐅᓚᐅᕐᐳᑦ ᐆᒪᔪᐃᑦ ᐱᔾᔪᑎᒋᓪᓗᒋᑦ ᐅᔭᕋᕐᓂᐊᕐᑐᓕᕆᔾᔪᑕᐅᔪᑦ ᐱᔾᔪᑎᒋᓪᓗᒋᑦ ᓄᓇᕗᒥ.
• •ᐃᓚᒋᔭᐅᓚᐅᕐᐳᑦ ᑲᓇᑕᒥ ᐊᒻᒪᓗ ᑲᓇᑕᐅᑉ ᓯᓚᑖᓂ ᐆᒪᔪᓕᕆᔾᔪᑕᐅᔪᓄᑦ
• ᐃᓕᓐᓂᐊᓯᓐᓈᑦ ᑲᑎᒪᑎᑦᓯᔪᑦ ᓇᑦᓰᑦ ᐊᒻᒪᓗ ᐊᐃᕖᑦ ᐊᖑᓇᓱᒃᑕᐅᔾᔪᑎᒋᕙᒃᑕᖏᓐᓄᑦ.
• ᐃᓕᓐᓂᐊᓯᓐᓈᑦ ᑲᑎᒪᑎᑦᓯᔪᑦ ᐆᒪᔪᐃᑦ ᓴᐳᑎᔭᐅᓯᒪᔾᔪᑎᒃᓴᖏᓐᓄᑦ ᐃᐊᑦᒪᓐᑕᓐᒥ.
• ᑲᑐᑎᔭᐅᓗᑎᒃ ᖃᕐᔪᐃᑦ ᖃᐅᔨᓴᖅᑕᐅᔪᑦ ᐊᑐᖅᑕᐅᕙᒃᑐᑦ ᕿᓚᓗᒐᕐᓂᐊᕈᑕᐅᓪᓗᑎᒃ ᐱᓕᕆᖃᑕᐅᓪᓗᑎᒃ ᓄᐊᑦ ᐊᑦᓛᓐᑎᒃᒥ ᐃᒪᕐᒥᐅᑕᐃᑦ ᐆᒪᔪᖅᑕᐅᒐᓱᒃᐸᓐᓂᖏᓐᓄᑦ ᑲᒥᓴᒃᑯᑦ.
• ᑲᑎᒪᔭᖅᑐᖃᑕᐅᓯᒪᓚᐅᕐᑐᑦ ᓄᐊᑦ ᐊᑦᓛᓐᑎᒃᒥ ᐃᒪᕐᒥᐅᑕᐃᑦ ᐆᒪᔪᐃᑦ ᑲᑎᒪᕐᔪᐊᕈᑕᐅᑎᓪᓗᒋᑦ.