ᐃᓄᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᓪᓗ ᐱᕙᓪᓕᐊᑎᑕᐅᔪᑦ

ᐱᓕᕆᕕᒃ ᐃᓄᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᓪᓗ ᖁᕕᐊᓱᒃᐳᖅ ᐅᓂᒃᑳᕈᑎᖃᕆᐊᒃᓴᖅ ᐱᔾᔪᑎᒋᓪᓗᒋᑦ 8-ᖑᔪᑦ ᐱᓕᕆᐊᕆᔭᐅᓚᐅᕐᑐᑦ ᑕᒡᕙᓂ ᐅᑭᐅᖑᔪᒥ.

ᐃᓕᓐᓂᐊᖅᑐᓕᕆᓂᖅ

• ᓄᓇᕗᑦ ᒐᕙᒪᒃᑯᖏᑦ ᓴᖅᑭᑎᑦᓯᕙᓪᓕᐊᕗᑦ ᓄᑖᒥᒃ ᐃᓕᓐᓂᐊᕐᑐᓕᕆᓂᕐᒧᑦ ᒪᓕᒐᒃᓴᒥᒃ. ᐃᓄᓕᕆᔨᒃᑯᑦ ᐃᓕᖅᑯᓯᓕᕆᔨᒃᑯᓪᓗ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓚᒋᔭᐅᕗᑦ ᑲᑎᒪᔨᕋᓛᓄᑦ ᐅᖃᐅᔾᔨᒋᐊᖅᑎᐅᓂᐊᕐᓱᑎᒃ ᓄᓇᕗᑦ ᒐᕙᒪᒃᑯᖏᓐᓂᑦ ᐃᓕᓐᓂᐊᕐᓂᓕᕆᓂᕐᒧᑦ ᒪᓕᒐᒃᓴᒧᑦ ᖃᐅᔨᓴᑦᓯᐊᖁᓪᓗᒋᑦ ᐃᓄᐃᑦ ᐅᖃᐅᓯᖏᑦ, ᐃᓕᖅᑯᓯᖏᑦ ᐱᖅᑯᓯᖏᑦ ᐅᒃᐱᕆᔭᖏᓪᓗ ᐃᓕᓐᓂᐊᕈᑕᐅᑦᓯᐊᕋᓗᐊᕐᒪᖔᑕ ᐃᓕᓐᓂᐊᕈᑎᓂ.
• ᐱᓕᕆᕕᒃ ᐊᒃᑐᐊᓂᖃᑦᓯᐊᕈᓐᓇᖅᓯᓯᒪᕗᖅ ᐃᓕᓐᓂᐊᕐᑐᓕᕆᔨᒃᑯᑦ ᒥᓂᔅᑕᖓᓐᓄᑦ ᐃᐊᑦ ᐲᑯᒧᑦ ᐃᒃᓯᕙᐅᑕᖃᖅᑎᑕᐅᓪᓗᑎᒃ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᓐᓄᑦ. ᑲᑎᒪᔨᕋᓛᑦ ᐊᑐᓕᖁᔨᔾᔪᑎᓕᐅᓲᖑᕗᑦ ᐃᓕᓐᓂᐊᖅᑐᓕᕆᔾᔪᑕᐅᔪᓄᑦ ᓱᓇᑐᐃᓐᓇᕐᓄᑦ ᐃᓕᓐᓂᐊᓕᓵᖅᑐᓂᑦ ᖁᒡᕙᓯᓐᓂᖅᓴᓄᑦ ᐃᓕᓐᓂᐊᖅᑎᓄᑦ.
• ᐃᓚᒋᔭᐅᓪᓗᑎᒃ ᖃᐅᔨᓴᕈᑎᖃᖅᑎᓪᓗᒋᑦ ᓄᓇᕗᒥ ᐃᓕᓴᐃᔩᑦ ᐃᓕᓐᓂᐊᖅᑎᑦᓯᔾᔪᑕᐅᕙᓐᓂᖏᓐᓄᑦ ᐱᓕᕆᐊᖑᖁᓪᓗᒋᑦ ᐱᑕᖃᙱᓗᐊᕐᓂᖏᑦ ᐃᓄᒃᑎᑐᑦ/ᐃᓄᐃᓐᓇᖅᑐᑦ ᐅᖃᐅᓯᖃᕐᑐᑦ ᐃᓕᓴᐃᔩᑦ ᐃᓕᓐᓂᐊᓕᓵᖅᑐᓂᑦ ᖁᒡᕙᓯᓐᓂᖅᓴᓄᑦ ᐃᓕᓐᓂᐊᕈᑎᓄᑦ.
• ᓄᓇᕗᒥ ᑐᙵᕕᒃᑯᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᖃᐅᔨᓴᕈᑎᖃᐃᓐᓇᕐᐳᑦ ᐃᓄᐃᑦ ᐱᖅᑯᓯᖏᑎᒍᑦ ᐃᓕᓐᓂᐊᕐᕕᒃᓴᖓᓐᓂᒃ.
• ᐃᓚᒋᔭᐅᕗᑦ ᐱᕙᓪᓕᐊᑎᑕᐅᓂᖓᓄᑦ ᐋᖅᑭᒋᐊᕆᓂᖅ, ᓄᓇᕗᑦ ᓯᓚᑦᑐᓴᕐᕕᐊᑕ ᓯᓚᑖᒍᑦ ᕿᒥᕐᕈᔭᐅᓯᒪᓂᖏᓐᓄᑦ ᐅᓂᒃᑳᓕᐊᒧᑦ ᓴᖅᑭᑎᑦᓯᔾᔪᑕᐅᓚᐅᕐᑐᖅ ᕿᒥᕐᕈᔭᐅᓂᖓᓄᑦ ᓯᓚᑦᑐᓴᕐᕕᐅᑉ ᑕᒪᐃᑎᒍᑦ.

ᐅᖃᐅᓯᓕᕆᓂᖅ

• ᐃᓚᒋᔭᐅᓚᐅᕐᐳᑦ ᐱᓕᕆᐊᖃᕐᑎᐅᓪᓗᑎᒃ ᑎᒥᐅᔪᒧᑦ ᐱᖃᑎᒋᓪᓗᒋᑦ ᓄᓇᕗᑦ ᒐᕙᒪᒃᑯᖏᑦ ᐋᖅᑭᒋᐊᖅᑕᐅᖁᓪᓗᒍ ᐃᓕᑕᕆᔭᐅᓯᒪᔪᑦ ᐅᖃᐅᓰᑦ ᒪᓕᒐᖓᑦ, ᐊᒻᒪᓗ ᐊᖏᖅᑎᑦᓯᓇᓱᐊᖃᑕᐅᖏᓐᓇᕐᓱᑎᒃ ᓴᖅᑭᑎᑦᓯᓂᕐᒧᑦ ᐃᓄᐃᑦ ᐅᖃᐅᓯᖏᑦᑕ ᓴᐳᑎᔭᐅᓯᒪᔾᔪᑎᒃᓴᖓᓄᑦ ᒪᓕᒐᕐᒥᒃ ᓄᓇᕗᒥ.
• ᐃᑲᔪᖅᓱᐃᓚᐅᕐᐳᑦ ᓄᓇᕗᑦ ᒐᕙᒪᒃᑯᖏᓐᓂᑦ ᒐᕙᒪᑐᖃᒃᑯᓂᓪᓗ ᐃᓕᑕᕆᔭᐅᓕᖅᑎᑦᓯᓇᓱᐊᖅᑎᓪᓗᒋᑦ ᐅᖃᐅᓯᓕᕆᓂᐅᑉ ᒥᒃᓵᓄᑦ ᓄᓇᕗᒥ ᑐᒃᓯᕋᐅᑎᓕᐅᖅᓯᒪᓪᓗᑎᒃ ᐅᓄᖅᓯᒋᐊᖅᑕᐅᖁᓪᓗᒋᑦ ᑮᓇᐅᔭᐃᑦ ᐃᓕᖓᒐᔭᕐᑐᑦ ᐃᓄᐃᑦ ᐅᖃᐅᓯᖏᓐᓄᑦ ᐱᓕᕆᐊᖑᔪᓂᒃ ᑐᒃᓯᕋᓱᑎᒃ ᑲᓇᑕᒥ/ᓄᓇᕗᒥᓗ ᐱᓕᕆᖃᑎᒌᓐᓂᐊᕐᓂᕐᒧᑦ ᐊᖏᕈᑕᐅᓯᒪᔪᒥᒃ.
• ᐱᓕᕆᐊᖃᓚᐅᕐᐳᑦ ᐊᑐᖅᑕᐅᓂᖅᓴᐅᓕᖁᓪᓗᒍ ᐃᓄᒃᑎᑐᑦ ᐅᖃᐅᓯᖅ ᓄᓇᕗᑦ ᑐᙵᕕᒃᑯᑦ ᐃᓗᐊᓂ ᒫᓐᓇᒧᑦ ᐊᑯᓂᐅᔪᒧᓪᓗ ᐊᑐᖅᑕᐅᒐᔭᕐᑐᓂᒃ.

ᐋᓐᓂᐊᕐᓇᖏᑦᑐᓕᕆᔨᒃᑯᑦ

• ᐃᑲᔪᓚᐅᕐᐳᑦ ᑮᓇᐅᔭᖅᑖᕋᓱᐊᕐᑎᓪᓗᒋᑦ $471,000-ᓂᒃ ᑲᓇᑕᒥ ᐋᓐᓂᐊᕐᓇᖏᑦᑐᓕᕆᔨᒃᑯᓐᓂᑦ ᐊᑐᖅᑕᐅᓂᐊᕐᑐᓂᒃ ᐃᒥᐊᓗᓐᓄᑦ ᐋᖓᔮᕐᓇᖅᑐᓄᓪᓗ ᐃᑲᔪᖅᑕᐅᕕᒃᓴᒧᑦ ᓄᓇᕗᒥ.
• •ᑐᖓᕕᒃᑯᑦ ᐱᕕᒃᓴᖃᖅᑎᑦᑎᓚᐅᖅᑐᑦ ᖃᐅᔨᑎᑕᐅᒋᐊᖁᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᑦ ᐋᓐᓂᐊᕐᓇᖏᑦᑐᓕᕆᔾᔪᑕᐅ% ᔭᕆᐊᖃᕐᑐᓄᑦ ᓄᓇᕗᒥ ᐱᓕᕆᐊᖃᕐᓱᑎᒃ ᑭᒃᑯᑐᐃᓐᓇᕐᓄᑦ ᐋᓐᓂᐊᕐᓇᖏᑦᑐᓕᕆᔾᔪᑕᐅᔪᑦ ᒪᓕᒐᖓᓐᓂᒃ ᐊᒻᒪᓗ ᐱᓕᕆᖃᑎᖃᕐᓱᑎᒃ ᑲᓇᑕᒥ ᐃᓄᐃᑦ ᑲᑎᒪᔨᕋᓛᖏᓐᓄᑦ ᐋᓐᓂᐊᕐᓇᖏᑦᑐᓕᕆᓂᕐᒧᑦ.
• ᐃᓚᒋᔭᐅᓚᐅᕐᑐᑦ ᐋᓐᓂᐊᕐᓇᖏᑦᑐᓕᕆᓂᕐᒧᑦ ᖃᐅᔨᓴᕈᑎᒃᓴᓂᒃ ᕿᒥᕐᕈᔩᑦ ᑲᑎᒪᔨᕋᓛᖏᓐᓄᑦ ᓄᓇᕗᑦ ᑐᙵᕕᒃᑯᑦ ᐊᐅᓚᑦᓯᓂᖃᖅᑎᑕᐅᓂᖅᓴᐅᖁᓪᓗᒋᑦ ᐃᒃᐱᓐᓂᕈᑕᐅᕙᒃᑐᓂᒃ ᐃᓄᓐᓄᑦ.
• ᐃᓚᒋᔭᐅᓚᐅᕐᑐᑦ ᐃᓚᒌᖑᔪᑦ ᐋᓐᓂᐊᕐᑐᓕᕆᓂᕐᒧᑦ ᑲᒪᒋᔭᐅᓂᖏᓐᓄᑦ ᐱᓕᕆᔨᖏᓐᓄᑦ ᓴᖅᑭᑎᑦᓯᓚᐅᕐᑐᓄᑦ ᐃᓚᒌᖑᔪᑦ ᖃᐅᔨᓴᖅᑕᐅᕕᒃᓴᖓᓐᓂᑦ ᐃᖃᓗᓐᓂ, ᐱᓕᕆᐊᖃᓚᐅᕐᐳᓪᓗ ᖃᐅᔨᓴᑦᓯᐊᖁᓪᓗᒋᑦ ᐃᓄᐃᑦ ᐃᓕᖅᑯᓯᖅᑎᒍᑦ ᐊᓐᓂᕆᒪᔭᖏᑦ ᐃᓕᖅᑯᓯᖏᓪᓗ ᐃᖅᑲᒋᔭᐅᑦᓯᐊᕋᓗᐊᕐᒪᖔᑕ ᐱᓕᕆᐊᖑᔪᑎᒍᑦ.
• ᓯᕗᓕᖅᑎᒋᔭᐅᓚᐅᕐᐳᑦ ᓄᓇᓕᓐᓂ ᐱᓕᕆᐊᖃᕐᐸᓪᓕᐊᑎᓪᓗᒋᑦ ᐊᒻᒪᓗ ᒪᒃᑯᒃᑐᑦ ᐃᓚᒋᔭᐅᓂᖅᓴᐅᖁᓪᓗᒋᑦ ᐃᒻᒥᓃᖅᑕᐃᓕᒪᓂᕐᒧᑦ ᐃᓕᓐᓂᐊᖅᑎᑦᓯᔾᔪᑕᐅᓚᐅᕐᑐᓂ ᑰᒑᕐᔪᖕᒥ. ᐃᓕᓐᓂᐊᕐᑎᓪᓗᒋᑦ ᓴᖅᑭᑎᑦᓯᓚᐅᕐᐳᑦ ᓄᓇᕗᓕᒫᒧᑦ ᐅᐸᓗᖓᐃᔭᐃᑎᒃᓴᒥᒃ ᐃᖕᒥᓃᖅᑕᐃᓕᒪᓂᕐᒥᒃ ᐱᓕᕆᐊᖃᕐᑎᓪᓗᒋᑦ.

ᖃᐅᒪᒃᑯᑦ ᒪᒥᓴᐃᔨᓕᕆᔨᒃᑯᖏᑦᑕ ᐱᓕᕆᐊᖓᑦ

• ᖃᐅᒪᒃᑯᑦ ᒪᒥᓴᐃᔨᓕᕆᔨᒃᑯᖏᑦᑕ ᐱᓕᕆᐊᖓᑦ ᐊᑐᖅᑕᐅᓪᓗᓂ ᓴᖅᑭᑎᑦᓯᓯᒪᓚᐅᕐᐳᑦ ᒪᒥᓴᐅᑎᒃᓴᓂᒃ ᐃᓕᓐᓂᐊᕐᑎᕕᓂᕐᓄᑦ ᓯᑕᒪᓂ ᐊᔾᔨᒌᖏᑦᑐᓂ ᓄᓇᓕᓐᓂ. ᐃᑲᔪᖅᓱᐃᔨᐅᓪᓗᑎᒃ ᑎᒥᐅᔪᑦ ᓴᖅᑭᑎᑕᐅᓚᐅᕐᐳᑦ ᑕᒪᐃᓐᓂ ᓄᓇᓕᐅᔪᓂ, ᐸᕐᓇᐅᑎᓕᐅᖅᓯᒪᓪᓗᑎᒃ ᑲᔪᓯᐅᒪᔪᓂᒃ ᒪᒥᓴᕐᕕᒃᓴᓂᒃ, ᐊᒻᒪᓗ ᐃᓄᐃᑦ ᑭᒃᑯᑐᐃᓐᓇᐃᑦ ᑐᓴᐅᒪᑎᑕᐅᓂᖅᓴᐅᒐᓱᐊᓕᕐᓱᑎᒃ ᐱᑦᓯᐊᖏᓐᓂᕆᔭᐅᕙᓚᐅᕐᑐᓂᒃ ᐃᓕᓐᓂᐊᕐᕕᓐᓂ. ᐃᓐᓇᑐᖃᐃᑦ ᐃᑲᔪᖅᑎᒋᔭᐅᒻᒪᕆᓚᐅᕐᐳᑦ ᒪᒥᓴᕐᓂᐅᑉ ᒥᒃᓵᓄᑦ ᐃᓄᐃᑦ ᐃᓕᖅᑯᓯᖏᑦ ᐊᑐᖅᓱᒋᑦ. ᑭᖑᕚᕇᒃᑐᓄᑦ ᐃᒃᐱᓐᓂᕈᑕᐅᓯᒪᔪᑦ ᐃᓕᓐᓂᐊᕐᓂᒃᑯᑦ ᐅᖃᐅᓯᐅᒻᒪᕆᓚᐅᕐᐳᑦ ᖃᐅᔨᒪᔭᐅᓕᖅᑎᑕᐅᓐᓇᓱᐊᕐᓱᑎᓪᓗ.

ᐃᖅᑲᖅᑐᐃᕕᓕᕆᔨᒃᑯᑦ ᐊᒻᒪᓗ ᓄᓇᓕᓐᓂ ᐋᖅᑭᐅᒪᑦᓯᐊᕋᓱᐊᕐᓂᖅ

• ᐱᓕᕆᐊᖃᓚᐅᕐᐳᑦ ᓴᖅᑭᑎᑦᓯᒐᓱᐊᕐᓱᑎᒃ ᑕᐃᔭᐅᔪᒥᒃ ᑲᔪᓯᓂᖅᒥᒃ ᐸᕐᓇᐅᑎᓕᐅᖅᓯᒪᓪᓗᑎᒃ ᐱᓕᕆᐊᕆᔭ% ᐅᖁᓪᓗᒋᑦ ᐃᑲᔫᑕᐅᕙᒃᑐᑦ ᐱᔨᒃᓯᕋᐅᑎᒋᔭᐅᕙᒃᑐᓪᓗ ᐃᓄᓐᓄᑦ ᖃᓪᓗᓈᓂ ᐊᓄᓪᓚᒃᓰᕕᐅᔪᓂ, ᐊᒻᒪᓗ ᓇᓗᓇᐃᖅᓯᒐᓱᐊᕐᓱᑎᒃ ᐃᓄᐃᑦ ᐱᓕᕆᐊᖃᖅᑎᑕᐅᓂᖅᓴᐅᖁᓪᓗᒋᑦ ᐊᓄᓪᓚᒃᓰᕕᒡᔪᐊᖑᓂᖅᓴᐅᔪᓂ ᖃᓪᓗᓈᑦ ᓄᓇᖏᓐᓂ.
• ᐆᒃᑐᕋᐅᑎᓕᐅᓚᐅᕐᐳᑦ ᐃᓄᐃᑦ ᐃᓕᖅᑯᓯᖏᓐᓄᑦ ᐸᕐᓇᐅᑎᒥᒃ ᑐᕌᖓᓂᐊᕐᑐᓂᒃ ᖃᓪᓗᓈᓄᑦ ᐃᓄᖕᓂᒃ ᑎᒍᐊᖅᐸᒃᑐᓄᑦ. ᑖᓐᓇ ᐸᕐᓇᐅᑦ ᐃᓕᔭᐅᖃᓯᐅᔾᔭᐅᓚᐅᕐᐳᖅ ᓄᓇᕗᑦ ᒐᕙᒪᒃᑯᖏᑦᑕ ᐃᓄᒃᑎᒍᑦ ᑎᒍᐊᖅᑎᑦᓯᓂᐅᕙᒃᑐᑦ ᐊᑐᐊᒐᖁᑎᖏᓐᓄᑦ.
• ᐃᓚᒋᔭᐅᓚᐅᕐᐳᑦ ᐃᓚᒌᖑᔪᑦ ᐋᓐᓂᖅᑎᕆᐅᑎᕙᒃᑐᑦ ᐃᑲᔪᖅᑕᐅᒐᓱᐊᕐᓂᖏᓐᓄᑦ ᑲᑎᒪᔨᕋᓛᓄᑦ ᖃᐅᔨᓴᑦᓯᐊᖁᓪᓗᒋᑦ ᐃᓄᐃᑦ ᐃᓱᒪᒋᔭᖏᑦ ᐃᓕᔭᐅᓯᒪᖁᓪᓗᒋᑦ ᓄᓇᓕᓐᓂ ᐱᕋᔭᒃᑕᐃᓕᒪᑎᑦᓯᓂᕐᒧᑦ ᐊᐃᑉᐸᕇᖑᔪᓄᓪᓗ ᐋᓐᓂᖅᑎᕆᐅᑎᕙᒃᑐᓄᑦ ᐃᑲᔪᖅᑕᐅᔾᔪᑕᐅᒐᓱᐊᕐᑐᓄᑦ ᐱᓕᕆᐊᓄᑦ.

ᑎᒥᒥᒍᑦ ᐊᔪᕈᑎᖃᕐᑐᑦ

• ᓄᓇᕗᒥ ᑎᒥᒥᒍᑦ ᐊᔪᕈᑎᖃᕐᑐᑦ ᒪᑭᓐᓇᓱᐊᖅᑏᑦ ᑲᑎᒪᔨᖏᑦ ᓴᖅᑭᑕᐅᓚᐅᕐᐳᑦ ᐱᓕᕆᕕᐅᑉ ᐱᓕᕆᐊᖃᕐᓂᖏᑦᑎᒍᑦ ᑲᑎᑎᑦᓯᔨᐅᖁᓪᓗᒋᑦ ᒐᕙᒪᒃᑯᑦ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐅᖃᐅᓯᕆᔭᐅᖁᓪᓗᒋᑦ ᑎᒥᒥᒍᑦ ᐊᔪᕈᑎᖃᕐᑐᑦ ᐱᔾᔪᑎᖏᓐᓂᒃ ᐃᓱᒫᓘᑎᒋᕙᒃᑕᖏᓐᓂᓪᓗ. ᓄᓇᕗᒥ ᑎᒥᒥᒍᑦ ᐊᔪᕈᑎᖃᕐᑐᑦ ᒪᑭᓐᓇᓱᐊᖅᑏᑦ ᑲᑎᒪᔨᖏᑦ ᐊᖏᖅᑎᑦᓯᒐᓱᓐᓂᐊᕐᑐᑦ ᒐᕙᒪᒃᑯᓐᓂᒃ ᑮᓇᐅᔭᖃᖅᑎᑕᐅᒃᑲᓐᓂᖁᓪᓗᒋᑦ ᐱᔨᒃᓯᕋᖅᑕᐅᑦᓯᐊᕐᓂᖅᓴᐅᖁᓪᓗᒋᓪᓗ ᐃᓄᐃᑦ ᑎᒥᒥᒍᑦ ᐊᔪᕈᑎᖃᖅᑐᑦ.
• ᐱᓕᕆᐊᖃᓚᐅᕐᐳᑦ ᐱᓕᕆᖃᑎᖃᕐᓱᑎᒃ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᓐᓂᒃ ᐃᒡᓗᖃᖅᑎᑕᐅᑦᓯᐊᕐᓂᖅᓴᐅᖁᓪᓗᒋᑦ ᐃᓄᐃᑦ ᑎᒥᒥᒍᑦ ᐊᔪᕈᑎᖃᕐᑐᑦ.

ᐃᒡᓗᓕᕆᓂᖅ

• ᐱᓕᕆᖃᑎᖃᑦᓯᐊᓚᐅᕐᐳᑦ ᓄᓇᕗᒥ ᐃᒡᓗᓕᕆᔨᕐᔪᐊᒃᑯᓐᓂᑦ ᐊᒻᒪᓗ ᑲᓇᑕᒥ ᐃᒡᓗᓕᕆᔨᕐᔪᐊᒃᑯᑦ ᐱᓕᕆᐊᕆᔭᐅᖁᓪᓗᒋᑦ ᓄᓇᕗᒥ ᐃᒡᓗᑭᒃᓴᕈᑕᐅᔪᑦ.
• ᐃᓚᒋᔭᐅᓚᐅᕐᐳᑦ ᑲᓇᑕᒥ ᑲᑎᒪᔨᓄᑦ ᐃᒡᓗᓕᕆᓂᕐᒧᑦ ᐊᖏᖅᑎᑦᓯᓇᓱᐊᕈᓐᓇᕐᓯᓪᓗᑎᒃ ᑲᓇᑕᒥ ᐃᒡᓗᓕᕆᔨᕐᔪᐊᒃᑯᓐᓂᒃ ᐃᒡᓗᓕᐅᒃᑲᓐᓂᕈᓐᓇᖁᓪᓗᒋᑦ ᓄᓇᕗᒥ ᐱᔭᕆᐊᖃᕐᓂᖏᑦ ᒪᓕᓪᓗᒋᑦ.
• ᑲᑎᒪᖃᑎᖃᓚᐅᕐᐳᑦ ᑲᓇᑕᐅᑉ ᒐᕙᒪᒃᑯᖏᑦ ᒥᓂᔅᑕᖏᓐᓂᒃ ᐅᖃᐅᓯᐅᖁᓪᓗᒋᑦ ᓄᓇᕗᒥ ᐃᒡᓗᖃᕐᓂᕐᒧᑦ ᐱᔭᕆᐊᖃᒻᒪᕆᓐᓂᐅᔪᑦ.

ᐊᕌᖑᑕᒫᑦ ᐅᓂᒃᑳᓕᐊᖅ ᐱᔾᔪᑎᒋᓪᓗᒍ ᐃᓄᐃᑦ ᐃᓕᖅᑯᓯᖏᑦ ᖃᓄᐃᑦᑑᓂᖏᓪᓗ

• ᐃᖅᑲᓇᐃᔭᖅᑎᑖᓚᐅᕐᐳᑦ ᐅᓪᓗᓕᒫᖅ ᐱᓕᕆᐊᖃᕐᓂᐊᕐᑐᒥᒃ ᑎᑎᕋᖅᑎᐅᖁᓪᓗᒍ ᐊᕐᕌᖑᑕᒫᑦ ᐅᓂᒃᑳᓕᐊᖑᕙᒃᑐᒥᒃ ᐱᔾᔪᑎᒋᓪᓗᒍ ᐃᓄᐃᑦ ᐃᓕᖅᑯᓯᖏᑦ ᖃᓄᐃᑦᑑᓂᖏᓪᓗ. ᓯᕗᕐᖓᒍᑦ, ᐱᓕᕆᐊᖏᑦ ᐱᓕᕆᐊᖑᕙᓚᐅᕐᐳᑦ ᑳᓐᑐᕌᖅᑎᒍᑦ ᐅᖃᐅᔾᔪᐃᔨᖃᕐᓱᑎᒃ ᐊᑐᕚᒥᑦ. ᐱᓕᕆᕕᕗᑦ ᐱᓕᕆᑦᓯᐊᕈᓐᓇᕐᓂᖅᓴᐅᓂᐊᓕᕐᐳᖅ ᑲᒪᒋᔭᕆᐊᖃᕐᑕᖏᓐᓂᑦ ᒪᓕᓪᓗᒍ ᐊᖏᕈᑎᓂ ᐃᓛᒃᑯᑦ 32-ᒥᒃ.