ᒪᓕᒐᑎᒍᑦ ᐱᔨᒃᓯᕋᕈᑕᐅᔪᑦ

ᓄᓇᕗᑦ ᑐᙵᕕᒃᑯᓐᓂ ᒪᓕᒐᓕᕆᔨᒃᑯᑦ ᓯᑕᒪᓂᒃ ᐱᓕᕆᐊᖃᓪᓗᐊᑕᖅᐳᑦ ᑲᒪᒋᔭᒃᓴᒥᓐᓂᒃ: ᓴᖅᑭᑎᑦᓯᓗᑎᒃ ᒪᓕᒐᒃᓴᓂᒃ; ᐃᑲᔪᖅᓯᔨᐅᓪᓗᑎᒃ ᐋᔩᖃᑎᒌᔾᔪᑕᐅᔪᓄᑦ ᐱᕙᓪᓕᐊᑎᑕᐅᖁᓪᓗᒍ ᓄᓇᕗᒥ ᓄᓇᑖᕈᑕᐅᓯᒪᔪᑦ ᐊᖏᕈᑎᖓᑦ, ᑲᒪᔨᐅᓪᓗᑎᒃ ᐊᐃᕙᔾᔪᑕᐅᔪᓂᒃ ᒪᓕᒐᑎᒍᑦ (ᐃᖅᑲᖅᑐᐃᕕᒃᑰᕈᑕᐅᔪᓂᒃ); ᐊᒻᒪᓗ ᐅᓂᒃᑳᖅᑎᐅᓪᓗᑎᒃ ᑐᑭᓯᐅᒪᑎᑦᓯᔨᐅᓪᓗᑎᒃ ᒪᓕᒐᓕᕆᓂᕐᒥᒃ ᑯᐊᐱᕇᓴᐅᔪᒥᓪᓗ ᐱᔾᔪᔾᔨᓂᕐᒥᒃ.

ᐊᕐᕌᓂᐅᓚᐅᖅᑐᖅ, ᒪᓕᒐᓕᕆᔨᒃᑯᑦ ᐱᓕᕆᕕᖓᑦ ᐱᓕᕆᐊᖃᒻᒪᕆᓚᐅᖅᐳᖅ ᐊᔾᔨᒌᖏᒃᑐᓂᒃ ᐱᖃᓯᐅᑎᓪᓗᒋᑦ ᐃᑲᔪᖅᓯᓂᖏᑦ ᓴᖅᑭᑎᑦᓯᑎᓪᓗᒋᑦ ᓄᑖᓂᒃ ᒪᓕᒐᒃᓴᓂᒃ ᐊᑐᐊᒐᒃᓴᓂᓪᓗ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ, ᓄᓇᕗᒻᒥ ᐸᕐᓇᐃᔨᒃᑯᓐᓄᑦ, ᐊᒻᒪᓗ ᓄᓇᕗᒻᒥ ᐆᒪᔪᓕᕆᓂᕐᒧᑦ ᒪᓕᒐᕐᒥ ᐱᖁᔭᒃᓴᓂᒃ. ᐃᓚᒋᔭᐅᓂᖃᓚᐅᕐᒥᔪᒍᑦ ᐊᓯᖏᓐᓄᑦ ᐱᓕᕆᐊᓄᑦ, ᐋᔩᖃᑎᒌᔾᔪᑕᐅᔪᓄᑦ ᐱᕙᓪᓕᐊᑎᑦᓯᔾᔪᑕᐅᔪᓄᓪᓗ ᐃᓕᖓᔪᓄᑦ ᓄᓇᕗᑦ ᑐᙵᕕᒃᑯᓐᓄᑦ, ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᑲᓇᑕᐅᑉ ᒐᕙᒪᒃᑯᖏᓐᓄᑦ, ᐱᖃᓯᐅᑎᓪᓗᒋᑦ ᓄᑖᙳᕆᐊᖅᑕᐅᓂᖏᑦ ᓄᓇᕗᑦ ᓄᓇᑖᕈᑎᒋᓯᒪᔭᖏᑦᑕ ᐊᖏᕈᑎᖓᓐᓂ ᐱᒋᐊᖅᑎᑕᐅᓂᐊᕐᓂᖓᓐᓄᑦ ᑳᓐᑐᕌᖑᓂᐊᕐᑐᑦ, ᓄᓇᕗᑦ ᑐᙵᕕᒃᑯᑦ ᐃᖅᑲᖅᑐᐃᕕᒃᑯᑎᒍᑦ ᐊᐃᕙᔾᔪᑎᖏᓐᓄᑦ, ᐊᔩᖃᑎᒌᔾᔪᑕᐅᓪᓗᑎᒃ ᐃᒃᐱᓐᓂᖅᑎᑕᐅᓂᕐᒧᑦ ᐃᑲᔫᑎᒃᓴᐃᑦ ᐊᖏᕈᑎᖓᑦ, ᒪᓕᒐᑎᒍᓪᓗ ᑐᑭᓯᐅᒪᑎᑦᓯᔨᐅᓪᓗᑎᒃ ᐃᑲᔪᖅᓱᐃᔨᐅᓪᓗᑎᓪᓗ ᐊᔾᔨᒌᖏᑦᑐᓄᑦ ᐱᓕᕆᐊᓄᑦ ᐃᑲᔪᕆᐊᖅᑎᐅᓪᓗᑎᒃ ᐃᑲᔪᖅᑕᐅᔭᕆᐊᖃᕐᐸᑕ ᑲᑎᒪᔩᑦ, ᐊᐅᓚᑦᓯᔨᒃᑯᑦ ᑲᑎᒪᔨᕋᓛᖏᑦ, ᐊᓯᖏᓪᓗ ᐱᓕᕆᕕᑦ ᓄᓇᕗᑦ ᑐᙵᕕᒃᑯᓐᓂ. ᐱᓕᕆᕕᒃ ᐱᓕᕆᖃᑎᖃᖅᐸᒻᒥᔪᖅ ᓄᓇᓕᓐᓂ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ, ᒐᕙᒪᒃᑯᑦ ᐱᓕᕆᕕᕐᔪᐊᖁᑎᖏᓐᓂᑦ, ᐊᒻᒪᓗ ᑲᓇᑕᒥ ᐃᓄᐃᑦ ᑲᑐᔾᔨᖃᑎᒌᖏᓐᓂᑦ.

ᒪᓕᒐᐃᑦ ᓴᖅᑭᑕᐅᓂᖏᑦ

ᐱᓕᕆᕕᒃ ᖃᐅᔨᓴᕈᑎᖃᒻᒪᕆᓚᐅᕐᐳᖅ ᐃᓄᐃᑦ ᐱᔪᓐᓇᐅᑎᖏᑦ ᐃᖅᑲᒋᔭᐅᑦᓯᐊᕋᓗᐊᕐᒪᖔᑕ ᐱᕙᓪᓕᐊᑎᑦᓯᑎᓪᓗᒋᑦ ᓴᖅᑭᑕᐅᓂᐊᕐᓂᖏᓐᓄᑦ ᓄᑖᑦ ᒪᓕᒐᒃᓴᐃᑦ.

ᐱᓕᕆᕕᒃ ᐃᓚᒋᔭᐅᓚᐅᕐᐳᖅ ᐱᓕᕆᐊᖃᕐᓂᕐᒧᑦ ᑎᒥᐅᔪᒧᑦ ᑲᑎᒪᔨᖃᕐᑎᓪᓗᒋᑦ ᑭᒡᒐᕐᑐᐃᔪᓂᒃ ᓄᓇᕗᑦ ᑐᙵᕕᒃᑯᓐᓂᑦ, ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᓐᓂᑦ, ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓂᑦ ᐊᒻᒪᓗ ᓄᓇᕗᑦ ᐸᕐᓇᐃᔨᖏᑦᑕ ᑲᑎᒪᔨᖏᓐᓂᑦ ᖃᐅᔨᓴᖅᑎᐅᑎᑕᐅᓪᓗᑎᒃ ᐸᕐᓇᒃᑕᐅᑎᓪᓗᒋᑦ ᒪᓕᒐᒃᓴᐃᑦ ᐊᐅᓚᑦᓯᔾᔪᑕᐅᓂᐊᕐᑐᑦ ᐱᓕᕆᐊᕆᔭᖏᓐᓂᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐊᒻᒪᓗ ᓄᓇᕗᑦ ᐸᕐᓇᐃᔨᖏᑦᑕ ᑲᑎᒪᔨᖏᓐᓄᑦ. ᒪᓕᒐᕐᓂᒃ ᖃᐅᔨᓴᖅᑎᐅᓂᐊᕐᑐᑦ ᐊᒻᒪᓗ ᐱᔾᔪᑎᖃᕐᑐᑦ ᐊᒥᓱᓂᒃ ᐱᓕᕆᐊᕆᔭᐅᕙᒃᑐᓂᒃ ᑖᒃᑯᓄᖓ ᑎᒥᐅᔪᓄᑦ.

ᒐᕙᒪᑐᖃᒃᑯᑦ ᐊᖏᖅᑕᐅᔾᔪᑎᒃᓴᓂᒃ ᐱᒐᓱᒃᑐᑦ ᐱᒋᐊᖅᑕᐅᕙᓪᓕᐊᖁᓪᓗᒋᑦ ᒪᓕᒐᒃᓴᐃᑦ. ᐱᓕᕆᕕᒃ ᕿᒥᕐᕈᓂᐊᕐᑐᖅ ᐅᖃᐅᓯᒃᓴᖃᕐᕕᖃᕐᓗᑎᓪᓗ ᒪᓕᒐᒃᓴᒧᑦ ᐱᐊᓂᒃᑕᐅᒃᐸᑦ 2005 ᕿᑎᕋᖓᓂ.

ᐱᓕᕆᕕᒃ ᐱᓕᕆᐊᖃᖃᑕᐅᒻᒪᕆᓚᐅᕐᐳᖅ ᓴᖅᑭᑎᑦᓯᒐᓱᐊᖅᑎᓪᓗᒋᑦ ᐊᐅᓚᑦᑎᔾᔪᑎᒃᓴᓂᒃ ᐃᓚᒋᔭᐅᓂᐊᕐᑐᓂᒃ ᓄᑖᒥ ᓄᓇᕗᒥ ᐆᒪᔪᓕᕆᓂᕐᒧᑦ ᒪᓕᒐᖏᓐᓄᖅ. ᐊᐅᓚᑦᑎᔾᔪᑎᒃᓴᐃᑦ ᑲᒪᒋᔭᖃᕐᓂᐊᕐᑐᑦ ᐃᓕᖅᑯᓯᐅᔪᒃᓴᓂᒃ ᐊᖑᓇᓱᓐᓂᕐᒧᑦ ᑐᓂᐅᖅᑲᐃᓂᕐᒧᓪᓗ ᐆᒪᔪᕋᓱᒍᓐᓇᐅᑎᓂᒃ ᐱᔪᓐᓇᐅᑎᓂᒃ. ᐊᖏᕈᑎᖃᖅᓯᒪᙱᓚᐅᖅᓱᑎᒃ ᓄᓇᕗᑦ ᒐᕙᒪᒃᑯᖏᓐᓂᑦ ᑐᓂᐅᖅᑲᐃᓂᐅᑉ ᒥᒃᓵᓄᑦ, ᓄᓇᕗᑦ ᑐᙵᕕᒃᑯᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᐊᖏᖃᑎᒌᑦᓱᓐᓇᖅᓯᓚᐅᖅᐴᒃ ᐱᓕᕆᐊᖑᓗᑎᒃ ᐃᓄᐃᑦ ᐃᓱᒫᓘᑎᒋᔭᖏᑦ. ᓄᓇᕗᒻᒥ ᑐᙵᕕᒃᑯᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᓱᓕ ᒫᓐᓇ ᐋᔩᖃᑎᒌᒃᐴᒃ ᖃᓄᑎᒋ ᐃᓄᐃᑦ ᐆᒪᔪᕋᓱᓐᓂᕐᒧᑦ ᐃᓕᖅᑯᓯᕆᕙᓐᓂᐊᖅᑕᖏᑦ ᑭᒡᓕᖃᖅᑎᑕᐅᓂᐊᕐᒪᖔᑕ ᐱᖁᔭᐃᑦ ᒪᓕᓪᓗᒋᑦ. ᐅᖃᖃᑎᒌᔾᔪᑎᖃᒻᒪᕆᓐᓂᐊᕐᒥᔪᑦ ᐱᔾᔪᑎᒋᓪᓗᒍ ᑲᑎᓪᓗᒋᑦ ᐆᒪᔪᖅᑕᐅᔪᓐᓇᕐᑐᑦ ᖃᑦᓯᕙᓐᓂᐊᕐᒪᖔᑕ ᐊᒻᒪᓗ ᓇᓗᓇᐃᒃᑯᑕᖃᖅᑎᑕᐅᙱᓪᓗᑎᒃ ᑭᒡᓕᒋᔭᐅᕙᓐᓂᐊᕐᑐᓂᒃ ᐊᔾᔨᒌᖏᑦᑐᓄᑦ ᐆᒪᔪᓄᑦ.

ᒐᕙᒪᑐᖃᒃᑯᑦ ᐃᖃᓗᓕᕆᓂᕐᒧᑦ ᐱᖁᔭᐃᑦ ᑐᓗᖅᑕᕈᑎᖃᓚᐅᕐᐳᑦ ᓄᓇᕗᒥ ᓄᓇᑖᕈᑕᐅᓯᒪᔪᑦ ᐊᖏᕈᑎᖓᑦᑕ ᐱᖁᔭᖏᓐᓄᑦ. ᑕᒪᑐᒪ ᑭᒡᓕᑖᖅᓯᒪᙱᓐᓂᖓ ᓇᓗᓕᕈᑕᐅᓯᒪᓚᐅᕐᐳᖅ ᐊᒻᒪᓗ ᐊᖏᖃᑎᒌᖏᔾᔪᑕᐅᓯᒪᓪᓗᓂ. ᐊᖏᔪᖅᑲᐅᑎᓂᒃ ᑎᒥᖁᑎᑖᓚᐅᕐᐳᑦ ᐃᒪᕐᒥᐅᑕᓕᕆᔨᒃᑯᓐᓂᑦ, ᓄᓇᕗᑦ ᒐᕙᒪᒃᑯᖏᓐᓂᑦ, ᓄᓇᕗᑦ ᑐᙵᕕᒃᑯᑦ ᒪᓕᒐᓕᕆᔨᖏᓐᓂᑦ ᐊᒻᒪᓗ ᓄᓇᕗᑦ ᑐᙵᕕᒃᑯᑦ ᐆᒪᔪᓕᕆᔨᒃᑯᖏᓐᓂᑦ ᓴᖅᑭᑎᑦᓯᖁᓪᓗᒋᑦ ᓄᑖᓂᒃ ᐊᖏᖃᑎᒌᔾᔪᑕᐅᓯᒪᔪᓂᒃ ᐱᖁᔭᒃᓴᓂᒃ. ᐱᖁᔭᒃᓴᐃᑦ ᐱᐊᓂᒃᑕᐅᓚᐅᕐᐳᑦ ᐊᒻᒪᓗ ᑖᒃᑯᐊ ᑎᒥᖓᑦ ᐅᑕᖅᑭᑐᐃᓐᓇᓕᕐᐳᖅ ᒐᕙᒪᑐᖃᒃᑯᑦ ᐅᖃᖃᑎᖃᕋᔭᕐᓂᕐᒧᑦ ᑭᒃᑯᑐᐃᓐᓇᕐᓂᒃ ᐃᓄᓐᓂᒃ.

ᐋᔩᖃᑎᒌᔾᔪᑕᐅᔪᑦ

ᐱᓕᕆᕕᒃ ᐱᓕᕆᐊᖃᒻᒪᕆᓚᐅᕐᐳᖅ ᓄᓇᕗᑦ ᑐᙵᕕᒃᑯᑦ ᐊᒃᓱᕈᕈᑎᒋᔭᖏᓐᓂᑦ ᐊᓂᒍᖅᑎᑕᐅᖁᓪᓗᒍ ᓈᒻᒪᖏᓐᓂᕆᔭᐅᓚᐅᕐᑐᖅ ᐱᑎᑕᐅᕙᒃᑐᓄᑦ ᐃᖃᓗᒐᓱᓐᓂᕐᒧᑦ ᕿᑭᖅᑖᓘᑉ ᑲᓇᓐᓇᖓᓂ. ᐊᒥᓱᑲᓪᓚᓐᓂᒃ ᐱᓕᕆᐊᖃᓚᐅᕐᐳᑦ ᐱᖃᓯᐅᑎᓪᓗᒋᑦ ᐃᖅᑲᖅᑐᐃᕕᒃᑰᖅᑎᑦᓯᔾᔪᑕᐅᓯᒪᔪᑦ ᑭᖑᖅᐸᓐᓂᐊᕈᑕᐅᔪᓄᑦ ᑲᓇᑕᒥ ᐃᖅᑲᖅᑐᐃᕕᒃᑯᑎᒍᑦ ᐊᒻᒪᓗ ᐱᓕᕆᐊᖃᓚᐅᕆᓪᓗᑎᒃ ᐊᑐᐊᒐᐃᑦ ᐊᓯᔾᔨᖅᑕᐅᖁᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᓐᓂ.

ᐱᓕᕆᕕᒃ ᒪᓕᒐᑎᒍᑦ ᐅᖃᐅᔾᔨᒋᐊᖅᑎᐅᓚᐅᕐᐳᑦ ᐃᑲᔪᕆᐊᖅᑎᐅᓪᓗᑎᓪᓗ ᑐᙵᕕᒃᑯᑦ ᐱᒋᐊᖅᑎᑦᓯᕙᓪᓕᐊᔾᔪᑎᖏᓐᓄᑦ ᐋᔩᖃᑎᖃᕐᑎᓪᓗᒋᑦ ᑲᓇᑕᒥ ᐆᒪᔪᓕᕆᔨᕐᔪᐊᒃᑯᓐᓂᒃ ᑲᑐᔾᔨᖃᑎᒌᖁᓪᓗᒋᒃ ᐊᖏᖃᑎᒌᒍᒻᒥᒃ ᐊᑕᐅᓯᐅᖃᑎᒌᓐᓂᒃᑯᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑕᕈᑎᒃᓴᓄᓪᓗ ᐊᖏᖃᑎᒌᒍᒻᒥ ᒥᐊᓂᖅᓯᑎᓪᓗᒋᑦ ᑲᓇᑕᒥ ᐆᒪᔪᓕᕆᕝᕕᐅᔪᓂᒃ ᐊᒻᒪᓗ ᐅᑎᖅᑕᖅᐸᒃᑐᓄᑦ ᑎᒥᐊᖃᐅᑎᓂᒃ ᓄᓇᕗᑦ ᐃᓗᐊᓂ. ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑕᕈᑎᒃᓴᓄᓪᓗ ᐊᖏᕈᑎ ᐱᐊᓂᒃᑕᐅᕙᓪᓕᐊᕗᖅ ᐊᒻᒪᓗ ᒐᕙᒪᑐᖃᒃᑯᑦ ᐊᖏᕈᑎᖃᖅᓯᒪᓪᓗᑎᒃ $17.9-ᒥᓕᔭᓂᒃ ᐊᑐᖅᑕᐅᔪᒃᓴᓂᒃ 15-ᓄᑦ ᐅᑭᐅᓄᑦ. ᐱᓕᕆᕕᒃ ᐃᑲᔪᓚᐅᕐᒥᔪᖅ ᐱᒋᐊᖅᑎᑦᓯᕙᓪᓕᐊᔨᒃᑯᓐᓂᑦ ᐋᖅᑭᑦᓱᐃᕙᓪᓕᐊᑎᓪᓗᒋᑦ ᐊᑕᐅᓯᐅᖃᑎᒌᓐᓂᒃᑯᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑕᕈᑎᒃᓴᖏᓐᓄᓪᓗ ᐊᖏᕈᑎᓂᒃ ᑲᑐᔾᔨᖃᑎᒌᔾᔪᑎᒃᓴᒥᒃ ᑲᒪᒋᔭᐅᓂᖏᓐᓄᑦ ᑲᓇᑕᒥ ᐃᓕᑕᕆᔭᐅᓯᒪᔪᑦ ᑰᖑᔪᑦ ᓄᓇᕗᒥ.

ᐱᓕᕆᕕᒃ ᐃᓚᒋᔭᐅᓚᐅᕐᑐᖅ ᐱᒋᐊᖅᑎᑦᓯᕙᓪᓕᐊᓂᕐᒧᑦ ᑳᓐᑐᕌᒃᓴᐃᒃ ᐋᔩᖃᑎᒌᔾᔪᑕᐅᓂᖏᓐᓄᑦ, ᐃᓚᒋᔭᐅᓪᓗᑎᒃ ᐋᔩᖃᑎᒌᔾᔪᑕᐅᑎᓪᓗᒋᑦ ᐊᒻᒪᓗ ᓴᖅᑭᑎᑦᓯᑎᓪᓗᒋᑦ ᐅᐸᓗᖓᐃᔭᐅᑎᒃᓴᓂᒃ, ᐋᖅᑭᐅᒪᓂᕆᔭᐅᓂᐊᕐᑐᓂᒃ, ᑎᑎᕋᖅᑎᓪᓗᒋᓪᓗ ᑐᕌᖓᔪᓂᒃ ᑲᓇᑕᐅᑉ ᐊᒻᒪᓗ ᓄᓇᕗᑦ ᐱᓕᕆᕕᖁᑎᖏᑦᑕ ᒥᓂᔅᑕᖏᓐᓄᑦ ᐊᖏᔪᖅᑲᐅᑎᖏᓐᓄᓪᓗ ᑲᑎᒪᖃᑕᐅᖃᑦᑕᕐᓂᐊᕐᓂᖏᓐᓄᓪᓗ ᑲᑎᒪᔪᓂ. ᒪᓕᒐᓕᕆᔨᒃᑯᑦ ᐃᓚᒋᔭᐅᓚᐅᕐᒥᔪᑦ ᖃᐅᔨᓴᖅᑎᓪᓗᒋᑦ ᓄᒃᑎᖅᑕᐅᕙᓪᓕᐊᓂᖏᓐᓄᑦ ᓄᓇᓂᒃ ᐊᐅᓚᑦᓯᓂᐅᓂᐊᕐᑐᑦ ᑲᓇᑕᐅᑉ ᒐᕙᒪᒃᑯᖏᑦᑕ ᓄᓇᖁᑎᖏᓐᓂᑦ ᓅᑕᐅᓪᓗᑎᒃ ᑲᓇᑕᐅᑉ ᒐᕙᒪᒃᑯᖏᓐᓂᑦ ᓄᓇᕗᑦ ᒐᕙᒪᒃᑯᖏᓐᓄᑦ.

ᐱᓕᕆᖃᑎᒋᓪᓗᒋᑦ ᓄᓇᕗᑦ ᑐᙵᕕᒃᑯᑦ ᐊᕙᑎᒥᐅᑕᓕᕆᔨᒃᑯᖏᑦ, ᒪᓕᒐᓕᕆᔨᒃᑯᑦ ᐃᑲᔪᖅᑎᐅᓚᐅᕐᐳᑦ ᐱᓕᕆᐊᖃᕐᑎᐅᓪᓗᑎᒃ ᑎᒥᐅᔪᒥᒃ ᐱᓕᕆᐊᖃᖃᑕᐅᔪᒥᒃ ᕼᐊᑦᓴᓐᐸᐃᒥ ᓴᖅᑭᑕᐅᒐᓱᐊᕐᑐᒥᒃ Westmain A1, Rupert Division project. ᒪᓕᒐᓕᕆᔨᒃᑯᑦᑕᐅᖅ ᑲᔪᓯᑎᑦᓯᓚᐅᕐᒥᔪᑦ ᐱᓕᕆᐊᖑᖁᓪᓗᒋᑦ ᐃᓱᒫᓘᑕᐅᔪᑦ ᓴᓂᑭᓗᐊᕐᒥᐅᓄᑦ ᐊᕙᑎᒥᐅᑕᓕᕆᓂᕐᒧᑦ ᐃᓕᖓᑎᓪᓗᒋᑦ.

ᐃᖅᑲᖅᑐᐃᕕᒃᑯᑦ ᐊᐃᕙᔾᔪᑕᐅᔪᑦ

ᐱᔾᔪᑎᒋᓪᓗᒋᑦ ᐃᖅᑲᖅᑐᐃᕕᒃᑰᕈᑕᐅᓯᒪᔪᑦ ᓴᖅᑭᑕᐅᓚᐅᕐᑐᑦ ᓄᓇᕗᑦ ᑐᙵᕕᒃᑯᓐᓄᑦ ᓴᐳᑎᔭᐅᓯᒪᖁᓪᓗᒋᑦ ᐃᓄᐃᑦ ᐱᔪᓐᓇᐅᑎᖏᑦ ᒪᓕᓪᓗᒍ ᓄᓇᑖᕈᑕᐅᓯᒪᔪᑦ ᐊᖏᕈᑎᖓᑦ, ᐊᕐᕌᓂ ᐱᓕᕆᐊᖑᓗᐊᕐᓯᒪᔪᑦ ᓴᖅᑭᑎᑦᓯᔾᔪᑕᐅᓚᐅᕐᐳᑦ ᑐᓴᕈᒥᓇᖅᑐᓂᒃ. ᐊᑐᖅᑎᑕᐅᙱᑲᐃᓐᓇᕐᓂᖏᑦ ᐃᓄᐃᑦ ᐱᔭᕆᐊᖃᕐᓂᖏᓐᓄᑦ ᐊᖑᓇᓱᓐᓂᕐᒧᑦ ᓚᐃᓴᓐᓯᓂᒃ ᑎᑎᕋᖅᑕᐅᓯᒪᔭᕆᐊᖃᕐᓂᕐᒧᓪᓗ ᖁᑭᐅᑏᑦ ᒪᓕᒐᖓᑦ ᒪᓕᓪᓗᒍ ᑲᔪᓯᑎᑕᐅᓯᒪᓚᐅᕐᐳᖅ 2004-ᒥ. ᑲᓇᑕᐅᑉ ᒐᕙᒪᒃᑯᖏᑦ ᐃᓱᒪᒋᔭᖃᓗᐊᕐᑎᓪᓗᒋᑦ ᐊᒥᓲᓗᐊᙱᑦᓱᑎᒃ ᒐᕙᒪᐅᓂᕐᒥᓐᓂᒃ, ᒐᕙᒪᒃᑯᑦ ᓅᑦᓯᒋᐊᖅᓯᒪᓚᐅᙱᓚᑦ ᐊᓯᔾᔨᖅᑕᐅᖁᓪᓗᒍ ᒫᓐᓇᐅᓂᖓᓂ ᐃᓕᖅᑯᓯᕆᔭᐅᔪᖅ ᐋᔩᖃᑎᒌᓐᓂᒃᑯᑦ ᐃᖅᑲᖅᑐᐃᕕᒃᑯᑎᒍᓪᓘᓐᓃᑦ. ᐱᓕᕆᕕᒃ ᖃᐅᔨᓴᕈᑎᖃᐃᓐᓇᕐᓂᐊᕐᐳᖅ ᖃᓄᐃᓐᓂᕆᔭᐅᔪᒥᒃ ᐊᒻᒪᓗ ᐱᓕᕆᐊᖃᕆᐊᖅᑎᐅᓂᐊᕐᓱᑎᒃ ᐃᓄᐃᑦ ᐱᔪᓐᓇᐅᑎᖏᑦ ᓱᕋᖅᑕᐅᒐᓱᐊᓐᓂᖅᐸᑕ ᖃᓄᑐᐃᓐᓇᖅ.

ᐃᖅᑲᖅᑐᐃᕕᒃᑰᕈᑕᐅᓚᐅᕐᑐᑦ 1992-ᒥᓂᑦ ᒫᓂᑑᕙᒥᐅᓄᑦ ᓴᔅᑳᑦᓱᕚᒥᐅᓄᓪᓗ ᐃᖅᑭᓕᓄᑦ ᐃᖅᑲᖅᑐᐃᕕᒃᑰᕈᔾᔨᑎᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᒻᒪᓗ ᓄᓇᕗᑦ ᑐᙵᕕᒃᑯᓐᓂᑦ ᓱᓕ ᐃᖅᑲᖅᑐᐃᕕᐅᑉ ᓵᖓᓃᒃᐳᑦ. ᐃᖅᑲᖅᑐᖅᑕᐅᔾᔪᑎᒋᔭᐅᒻᒪᕆᙱᒃᑲᓗᐊᖅᑎᓪᓗᒋᑦ. ᓄᓇᕗᑦ ᑐᙵᕕᒃᑯᑦ ᐱᓕᕆᖃᑎᖃᖅᓯᒪᕗᑦ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖓᓐᓂᒃ ᑕᒪᑐᒪ ᒥᒃᓵᓄᑦ. ᑕᒪᕐᒥᒃ ᑎᒥᐅᔫᒃ ᑲᑎᒪᖃᑎᖃᓚᐅᕐᐴᒃ ᑲᓇᑕᐅᑉ ᒐᕙᒪᒃᑯᖏᑦᑕ ᐊᖏᔪᖅᑲᐅᑎᖏᓐᓂᒃ ᐊᒻᒪᓗ ᒫᓂᑑᕙᐅᑉ ᐃᖅᑭᓕᖏᓐᓂᒃ ᐅᖃᐅᓯᖁᓪᓗᒍ ᑲᓇᑕᐅᑉ ᒐᕙᒪᒃᑯᖏᑦᑕ ᓴᖅᑭᑎᓐᓇᓱᐊᖅᑕᖏᑦ ᒫᓂᑑᕙᐅᑉ ᐃᖅᑭᓕᖏᓐᓄᑦ ᑲᔪᓯᑎᑕᐅᖁᓪᓗᒍ ᐃᖅᑲᖅᑐᐃᕕᒃᑯᑎᒍᑦ. ᑲᓇᑕᐅᑉ ᒐᕙᒪᒃᑯᖏᑦᑕ ᓴᖅᑭᑎᓐᓇᓱᐊᖅᑕᖏᑦ ᐱᖃᓯᐅᔾᔨᓯᒪᕗᑦ ᓄᑖᒥᒃ ᐊᖏᕈᑎᒃᓴᒥᒃ ᑲᔪᓯᑎᑦᓯᔾᔪᑕᐅᓂᐊᕐᑐᓂᒃ ᐃᖅᑭᓖᑦ ᐊᖑᓇᓱᒍᓐᓇᕐᓂᖏᓐᓄᑦ, ᐃᖃᓗᒐᓱᒍᓐᓇᕐᓂᖏᓐᓄᑦ, ᒥᑭᒋᐊᕐᓂᐊᕈᓐᓇᕐᓂᖏᓐᓄᓪᓗ ᑭᕙᓪᓕᐅᑉ ᓂᒋᖅᐸᓯᐊᓂ ᓄᓇᓂ ᓄᓇᕗᑦ ᐃᓗᐊᓂ, ᐱᖃᓯᐅᔾᔭᐅᓪᓗᑎᒃ ᐊᑭᓕᖅᑑᑎᒃᓴᐃᑦ ᓄᓇᒥᒃ ᐊᑐᕐᓂᕐᒧᑦ ᐊᒻᒪᓗ ᐊᐅᓚᑦᓯᖃᑕᐅᔾᔪᑎᒃᓴᖏᓐᓂᒃ, ᐊᓯᖏᓐᓂᓪᓗ ᐱᐊᓂᒃᑕᐅᓯᒪᔭᕆᐊᖃᕐᑐᓂᒃ ᐱᓕᕆᐊᒃᓴᓂᒃ ᐱᓕᕆᐊᖃᕐᓗᑎᒃ.

ᐱᒋᐊᓕᓵᖅᑎᓪᓗᒍ 2004, ᓄᓇᕗᑦ ᑐᙵᕕᒃᑯᑦ ᐊᒻᒪᓗ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖓᑦᑕ ᐊᖏᔪᖅᑳᖏᑦ ᐅᖃᐅᔾᔨᓚᐅᕐᐳᑦ ᐃᓄᓕᕆᔨᑐᖃᒃᑯᑦ ᒥᓂᔅᑕᖓᓐᓂᒃ ᐲᖅᑕᐅᑎᑦᓯᓇᓱᑐᐊᖅᐸᑕ ᒐᕙᒪᒃᑯᑦ ᓄᓇᖁᑎᖏᓐᓂᒃ ᐊᑐᖅᑕᐅᕙᒃᑐᓂᒃ ᑭᕙᓪᓕᐅᑉ ᓂᒋᐊᓂ ᐃᖅᑭᓕᓄᑦ ᐊᑐᖅᑕᐅᓕᕋᔭᖅᑎᓪᓗᒋᑦ ᒫᓐᓇᑲᐅᑎᒋᒃᑯᑦ ᐃᖅᑲᖅᑐᐃᕕᒃᑰᕈᔾᔭᐅᑎᑦᓯᓂᐊᕐᓂᕐᒥᓂᒃ ᓄᖅᑲᖅᑎᑕᐅᖁᓪᓗᒍ ᐱᓕᕆᒐᓱᓐᓂᖓᑦ. ᐅᒡᒍᕐᓇᖅᑑᒐᓗᐊᖅ ᐃᓄᓕᕆᔨᑐᖃᒃᑯᑦ ᒥᓂᔅᑕᖓᑦ ᓇᓗᓇᐃᖅᓯᓚᐅᙱᒻᒪᑦ ᑕᒪᑐᒥᖓ, ᑭᓯᐊᓂ ᓄᓇᕗᑦ ᑐᙵᕕᒃᑯᑦ ᓱᓕ ᑕᒪᑐᒥᖓ ᓈᒪᒍᓱᙱᓚᑦ ᐱᒻᒪᕆᐅᔪᑦ ᑐᓴᐅᒪᔭᐅᔭᕆᐊᓕᑦ ᓱᓕ ᑐᓂᔭᐅᓯᒪᙱᓐᓂᖏᓐᓂᒃ ᓄᓇᕗᑦ ᑐᙵᕕᒃᑯᓐᓄᑦ ᐊᒻᒪᓗ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖓᓐᓄᑦ. ᐅᒃᑑᐱᕆᐅᑎᓪᓗᒍ, ᓄᓇᕗᑦ ᑐᙵᕕᒃᑯᑦ ᒪᓕᒐᓕᕆᔨᒃᑯᖏᑦ ᖃᐅᔨᒃᑲᐃᓚᐅᕐᐳᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐊᒻᒪᓗ ᐃᖅᑭᓕᓂᒃ ᓄᓇᕗᑦ ᑐᙵᕕᒃᑯᑦ ᐸᕐᓇᒃᓯᒪᓂᖏᓐᓂᒃ ᑐᒃᓯᕋᐅᑎᖃᕋᔭᕐᓂᕐᒧᑦ ᑲᓇᑕᒥ ᐃᖅᑲᖅᑐᐃᔨᕐᔪᐊᒃᑯᖏᓐᓄᑦ ᑐᓂᓯᖁᓪᓗᒋᑦ ᑐᓴᖅᑕᐅᔭᕆᐊᖃᒻᒪᕆᒃᑐᓂᒃ ᑐᑭᓯᐅᒪᔾᔪᑎᒃᓴᓂᒃ ᐱᔭᕆᐊᖃᒻᒪᕆᒃᑯᑎᒃ. ᑕᒪᓐᓇ ᐱᔾᔪᑎᒋᓪᓗᒍ, ᓄᓇᕗᒥ ᑐᙵᕕᒃᑯᑦ ᐱᑎᑕᐅᓕᓚᐅᕐᐳᑦ ᑐᑭᓯᒋᐊᕈᑎᒃᓴᓂᒃ. ᒪᒥᐊᓇᐅᒐᓗᐊᖅ, ᕿᒥᕐᕈᔭᐅᑎᓪᓗᒍ ᐸᐃᑉᐹᑦ ᑐᑭᓯᑎᑦᓯᓯᒪᒻᒪᑕ ᑲᓇᑕᐅᑉ ᒐᕙᒪᒃᑯᖏᑦ ᑐᓵᙱᓵᕐᓂᐊᕐᑑᔮᕐᒪᑕ ᐊᑐᖅᑕᐅᖁᔭᐅᓚᐅᕐᑐᓂᒃ ᑐᙵᕕᒃᑯᓐᓄᑦ ᓱᕋᐃᒐᔭᕐᓱᑎᒃ ᐱᖁᔭᕐᒥᒃ ᐃᓛᒃᑯᑦ 40 ᐊᖏᕈᑎᓂ, ᐊᒻᒪᓗ ᑐᙵᕕᒃᑯᑦ ᐊᒻᒪᓗ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖓᑦ ᒪᓕᒐᑎᒍᑦ ᐱᓇᓱᒃᑲᓐᓂᕆᐊᖃᕐᓂᐊᕐᑑᔮᕐᐳᑦ ᐃᖅᑲᖅᑐᐃᕕᒃᑰᕈᔾᔨᓂᕐᒥᒃ ᓴᐳᑎᔭᐅᓯᒪᖁᓪᓗᒋᑦ ᐃᓄᐃᑦ ᐱᔪᓐᓇᐅᑎᖏᑦ.

ᒪᓕᒐᓕᕆᓂᑐᐃᓐᓇᐃᑦ ᐊᒻᒪᓗ ᑯᐊᐱᕇᓴᓄᑦ ᐃᑲᔪᖅᓯᓂᐅᔪᑦ

ᐱᓕᕆᕕᒃ ᐊᒃᓱᕈᕈᑎᖃᒻᒪᕆᓚᐅᕐᐳᖅ ᒪᓕᒐᑎᒍᑦ ᐅᖃᐅᔾᔨᒋᐊᖅᑎᐅᓪᓗᑎᒃ ᑐᙵᕕᒃᑯᑦ ᐊᑐᐊᒐᓕᕆᔨᒃᑯᖏᓐᓄᑦ, ᐆᒪᔪᓕᕆᔨᒃᑯᓐᓄᑦ, ᐊᒻᒪᓗ ᓄᓇᓕᓕᕆᔨᒃᑯᓐᓄᑦ ᓄᓇᒥᐅᑕᓕᕆᔨᒃᑯᓐᓄᓪᓗ ᐃᓕᖓᔪᓄᑦ ᐆᒪᔪᓕᕆᓂᕐᒧᑦ, ᐅᔭᕋᕐᓂᐊᕐᑐᓕᕆᓂᕐᒧᑦ, ᓄᓇᓕᕆᓂᕐᒧᑦ, ᐃᒪᐃᑦ ᓄᓇᐃᓪᓗ ᐊᑐᖅᑕᐅᓂᖏᓐᓄᑦ, ᐊᒻᒪᓗ ᓄᓇᐃᑦ ᓴᐳᔾᔭᐅᒪᓂᖏᓐᓄᑦ ᐊᕙᑎᒥᐅᑕᓕᕆᓂᕐᒧᓪᓗ. ᐱᓕᕆᕕᒃ ᐅᖃᐅᔾᔨᒋᐊᖅᑎᐅᓚᐅᕐᐳᖅ ᐱᕙᓪᓕᐊᑎᑕᐅᓂᖏᓐᓄᑦ ᑐᙵᕕᒃᑯᑦ ᐊᕙᑎᒥᐅᑕᓕᕆᔾᔪᑎᖏᑦᑕ ᐊᑐᐊᒐᖓᓐᓄᑦ, ᑐᙵᕕᒃᑯᑦ ᑐᓂᓯᒪᔭᖏᓐᓄᑦ ᓄᓇᕗᒻᒥ ᐊᕙᑎᓕᕆᔨᒃᑯᑦ ᑲᑎᒪᔨᖏᓐᓄᑦ ᐱᔾᔪᑎᒋᓪᓗᒋᑦ ᐱᕙᓪᓕᐊᑎᑦᓯᓂᕐᒧᑦ ᐱᓕᕆᐊᖑᔪᑦ ᐊᒻᒪᓗ ᓄᓇᕗᒻᒥ ᐊᑐᐊᒐᓕᕆᔨᒃᑯᓐᓄᑦ ᐱᔾᔪᑎᒋᓪᓗᒍ ᕿᑎᕐᒥᐅᑦ ᐅᐊᓕᓂᕐᐸᓯᐊᓂ ᓄᓇᐅᑉ ᐊᑐᖅᑕᐅᓂᖏᓐᓄᑦ ᐸᕐᓇᐅᑦ.

ᐱᓕᕆᕕᐅᑉ ᐃᖅᑲᓇᐃᔭᖅᑎᖏᑦ ᐃᓚᒋᔭᐅᓚᐅᕐᐳᑦ ᑲᑎᒪᔨᕐᔪᐊᖑᔪᓄᑦ ᐊᑭᑦᓯᕋᖅ ᒪᓕᒐᓕᕆᓂᕐᒧᑦ ᐃᓕᓐᓂᐊᕈᑕᐅᔪᓂᒃ ᐊᒻᒪᓗ ᓄᓇᕗᒥᐅᓄᑦ ᒪᓕᒐᓕᕆᔩᑦ ᑲᑎᒪᔨᕐᔪᐊᖏᑦᑕ ᑲᑐᔾᔨᖃᑎᒌᖓᓐᓄᑦ. ᐱᓕᕆᐊᖃᓚᐅᕐᒥᔪᑦ ᑲᔪᓯᐅᒪᑎᑕᐅᓪᓗᑎᒃ ᒪᓕᒐᑎᒍᑦ ᐅᖃᐅᔾᔨᒋᐊᖅᑎᐅᓂᖏᑦ ᐱᔾᔪᑎᖃᕐᑐᓂᒃ ᖃᐅᑕᒫᑦ ᐱᓕᕆᐊᖑᔭᕆᐊᓕᓐᓄᑦ ᐊᐅᓚᑦᓯᔾᔪᑎᒃᓴᓄᓪᓗ ᓄᓇᕗᑦ ᑐᙵᕕᒃᑯᓐᓄᑦ; ᒪᓕᒐᑎᒍᑦ ᐅᖃᐅᔾᔨᒋᐊᖅᑎᐅᓪᓗᑎᒃ ᐱᔾᔪᑎᒋᓪᓗᒋᑦ ᐃᓄᐃᑦ ᐊᑎᓕᐅᖅᑕᐅᓯᒪᕕᖏᓐᓄᑦ ᐱᓕᕆᐊᖑᔪᑦ ᐊᒻᒪᓗ ᓇᖕᒥᓂᖅ ᐱᓕᕆᐊᖃᕐᓂᕐᒧᑦ ᐱᕙᓪᓕᐊᑎᑦᓯᔾᔪᑕᐅᔪᑦ, ᐱᖃᓯᐅᑎᓪᓗᒋᑦ ᐅᖃᐅᔾᔨᒋᐊᕈᑕᐅᕙᒃᑐᓄᑦ ᑐᕌᖓᔪᑦ ᐃᓄᐃᑦ ᓇᖕᒥᓂᖅ ᐱᓕᕆᕕᖏᑦᑕ ᑎᑎᕋᖅᑕᐅᓯᒪᕕᖏᓐᓄᑦ; ᑐᙵᕕᒃᑯᓐᓂ ᑎᒃᑯᐊᖅᑕᐅᓯᒪᔪᓄᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐱᓕᕆᐊᖑᔪᓄᑦ ᒪᓕᓪᓗᒍ ᐃᓛᒃᑯᑦ 39 ᐊᖏᕈᑎᓂ; ᒪᓕᒐᑎᒍᑦ ᐱᓕᕆᐊᕆᔭᐅᕙᒃᑐᓂᒃ ᑐᙵᕕᒃᑯᑦ ᐱᓕᕆᐊᖃᖃᑕᐅᓂᖏᓐᓄᑦ ᓄᓇᕗᑦ ᓯᓚᑖᓂ, ᐱᖃᓯᐅᑎᓪᓗᒍ ᐋᓐᓂᐊᕐᓇᖏᑦᑐᓕᕆᓂᕐᒧᑦ ᐊᖏᕈᑎᑦ ᑎᑎᖅᑲᐃᑦ; ᓱᓇᑐᐃᓐᓇᐃᑦ ᐃᓕᖓᔪᑦ ᑲᑐᔾᔨᖃᑎᒌᖑᔪᓄᑦ ᐊᐅᓚᑦᓯᓂᖃᖅᑎᑕᐅᔪᓄᑦ ᒪᓕᒐᒃᓴᖃᖅᑎᑕᐅᔪᓄᓪᓗ ᒪᓕᓪᓗᒍ ᓄᓇᕗᒥ ᓄᓇᑖᖅᓯᒪᓂᕐᒧᑦ ᐊᖏᕈᑦ; ᐱᓕᕆᐊᖃᕐᑎᐅᓪᓗᑎᓪᓗ ᑯᐊᐱᕇᓴᐃᑦ ᑳᓐᑐᕌᖅᑎᒍᓪᓗ ᐋᖅᑭᐅᒪᓂᕆᔭᐅᔪᑦ; ᐊᒻᒪᓗ ᐃᖅᑲᓇᐃᔭᖅᑎᓕᕆᓂᕐᒥᑦ.