ᓄᓇᐃᑦ ᓄᓇᒥᐅᑕᐃᓪᓗ

ᐊᕐᕌᒍᕆᖅᑲᐅᔭᑦᑎᓐᓂ ᐱᔭᒃᓴᓕᒻᒪᕆᐊᓘᓚᐅᖅᑐᒍᑦ, ᖁᕕᐊᓇᖅᓱᓂᓗ ᐱᓕᕆᕝᕕᖓᓂ ᓄᓇᐃᑦ ᓄᓇᒥᐅᑕᐃᓪᓗ. ᐱᕙᓪᓕᐊᓯᒪᔪᒍᑦ ᓴᓇᕕᐅᔪᓐᓇᕐᓂᕐᒥᒃ ᓄᓇᒥᐅᑕᓂᒃ ᓄᓇᕗᒻᒥ ᐊᒻᒪᓗ ᑐᓴᐅᒪᔭᐅᑎᑦᑎᓂᕐᒥᒃ ᑲᒪᑦᑎᐊᕆᐊᖃᕐᓂᕐᒥᒃ ᐱᑕᖃᐃᓇᖅᑎᑦᑎᓂᕐᒥᓗ ᓄᓇᓂᒃ ᐊᑐᕐᓂᕐᒥᒃ. ᐃᓚᑖᖅᐸᓪᓕᐊᓯᒪᔪᒍᑦ ᐃᑲᔪᖅᑕᐅᓂᖏᓐᓄᑦ ᐃᓄᐃᑦ ᐊᔪᕈᓃᖅᐸᓪᓕᐊᖏᓐᓇᖅᓱᑎᒡᓗ ᐊᔪᖏᓐᓂᖏᑦ ᐃᓄᐃᑦ ᐊᐅᓚᑦᑎᔪᓐᓇᕐᓂᕐᒥᒃ ᓄᓇᒥᒃ ᐊᑐᖅᑕᐅᑦᑎᐊᕐᓗᑎᒃ ᓄᓇᐃᑦ ᓄᓇᒥᐅᑕᐃᓪᓗ ᒪᓕᒐᐃᑦ ᓄᓇᕗᒻᒥ. ᑕᒪᑐᒪᓂ ᐅᓂᒃᑳᕈᒪᔭᕗᑦ ᑐᓴᒐᒃᓴᓗᐊᑕᕐᓂᒃ ᐊᕐᕌᒍᒥ ᐊᓂᒍᖅᑐᒥ.

ᒪᔾᔨ 31, 2005-ᒧᑦ ᑎᑭᓪᓗᒍ, ᑐᙵᕕᒃᑯᑦ 61-ᓂᒃ ᓴᕕᕋᔭᒃᓴᖅᓯᐅᕈᑎᓂᒃ ᐊᖏᕈᑎᖃᓕᓚᐅᖅᑐᑦ ᕿᓂᕈᒪᔪᓂᒃ ᐊᒻᒪᓗ 15-ᖑᓪᓗᑎᒃ ᕿᓂᖅᑏᑦ ᐅᔭᕋᖕᓂᐊᖅᑏᓪᓗ ᑲᒻᐸᓃᑦ ᐱᓕᕆᔪᑦ ᐊᖏᓂᓕᒻᒥ 647,973 ᕼᐊᒃᑐᔅ. ᑮᓇᐅᔭᐃᑦ ᐊᕐᕌᑕᒫᖅ ᐆᒃᑐᕈᑏᑦ, ᐊᐅᓚᑕᐅᓂᖏᓐᓄᑦ ᐊᑭᓕᕆᐊᓖᑦ ᐊᑭᓕᖔᕆᐊᖃᕈᑏᓪᓗ ᒪᓐᓇᒥ ᓯᕗᓂᒥᓗ ᕿᓂᕐᓂᐊᖅᑐᓂ ᐊᖏᕈᑏᑦ ᐊᕐᕌᒍᒥ ᑲᑎᓪᓗᒋᑦ $1,052,629. ᐊᒻᒪᓗ ᑐᙵᕕᒃᑯᑦ ᐱᓚᐅᖅᑐᑦ $350,275-ᓂᒃ ᐱᑐᖃᐅᓂᖅᓴᓂᒃ ᕿᓂᕈᓐᓇᐅᑎᓕᐊᕕᓂᕐᓂᒃ ᐃᓄᓕᕆᔨᑐᖃᒃᑯᓐᓂᒃ.

ᐅᔭᕋᑦᓯᐅᕐᓂᐅᖃᑦᑕᖅᑐᖅ ᑲᔪᓯᓚᐅᖅᑐᑦ ᐊᒥᓱᓂ ᒎᓗᓯᐅᖅᑐᓂ ᓴᕕᒃᓴᖅᓯᐅᖅᑐᓂᓗ ᐃᓄᐃᑦ ᓄᓇᖁᑎᖏᓐᓂ. ᒥᐊᑐᐹᖕᑯᑦ Meadowbank ᐊᒻᒪᓗ ᑐᐊᕆᔅ (ᕼᐆᑉ ᐲ) Doris (Hope Bay) ᓴᓇᔭᐅᔪᑦ ᐱᔪᓐᓇᐅᑎᑳᒃᑲᓐᓂᖅᐸᓪᓕᐊᓕᖅᑐᑦ ᒫᓐᓇᒥ. ᐱᓕᕆᐅᖑᐃᓐᓇᕐᒥᔪᑦ ᕼᐊᐃ ᓖᒃ (High Lake) ) ᐊᒻᒪᓗ ᐅᓗ ᓴᓇᔭᐅᔪᑦ, ᐊᒻᒪᓗ Goose and George Lake -ᒥ ᓂᒋᐊᓂ ᕿᖓᐅᑦ. ᑕᒪᕐᒥᒃ ᑖᒃᑯᐊ ᓄᓇᒥᐅᑕᓖᑦ ᓄᓇᐃᑦ ᐃᓗᐊᓃᑦᑐᓖᑦ ᐃᓄᖕᓄᑦ ᐱᒋᔭᐅᔪᑦ, ᐅᔭᕋᖕᓂᐊᖅᑎᓂᖔᖅᑐᑦ ᑮᓇᐅᔭᐃᑦ ᑖᒃᑯᐊ ᐱᖁᑎᓂᒃ ᑐᙵᕕᒃᑯᓐᓄᐊᕐᓂᐊᖅᑐᑦ ᐅᔭᕋᖕᓂᐊᕐᕕᓕᐅᕈᑎᒃ. ᐊᓯᖃᕐᒥᔪᑦ ᐱᒋᐊᖅᓯᒪᖏᓐᓂᖅᓴᓂᒃ ᕿᓂᖅᑐᓂᒃ ᒎᓗᒥᒃ, ᑕᐃᒪᓐᓂᒃ, ᓴᕕᕋᔭᖕᓂᒃ ᐊᒻᒪᓗ ᐊᓯᖏᓐᓂᒃ ᓴᕕᓕᖕᓂᒃ ᐃᓄᐃᑦ ᓄᓇᖁᑎᖏᓐᓂ ᓇᓂᕈᓘᔭᖅ ᓄᓇᕗᒻᒥ.

ᐅᔭᕋᑦᓯᐅᓂᕐᒧᑦ ᐊᖏᕈᑦ ᐊᑎᓕᐅᖅᑕᐅᓚᐅᕐᑐᖅ 2003-ᖑᑎᓪᓗᒍ Strongbow Resources Inc.-ᑯᓐᓂ ᐱᐊᓂᒃᓯᓚᐅᕐᐳᑦ ᑐᒡᓕᐊᓂ ᐅᑭᐅᕆᔭᖓᓂ ᒥᑭᓕᒋᐊᖅᑎᑦᓯᒃᑲᓐᓂᕐᓱᑎᒃ ᓄᓇᓂᒃ ᑎᒍᒥᐊᖅᑕᒥᓐᓂᒃ 147,700 hectares-ᓄᑦ. ᒥᑭᓕᒋᐊᕐᓂᐊᕐᓂᖓᑦ ᓂᕆᐅᒋᔭᐅᓚᐅᕐᑐᖅ. ᑲᑎᓪᓗᒋᑦ ᐅᔭᕋᑦᓯᐅᓂᕐᒧᑦ ᐊᖏᕈᑏᑦ ᐅᓄᖅᓯᒋᐊᕐᓂᐊᕐᐳᑦ 2005/06-ᒥ ᐱᔾᔪᑎᒋᓪᓗᒋᑦ ᐊᑕᐅᓯᐅᑎᓪᓗᒍ ᐊᖏᕈᑎᑦ ᐊᕕᒃᑐᖅᑕᐅᓂᐊᕐᒪᑕ ᐃᓛᒃᑰᖓᓕᖅᑎᑕᐅᓗᑎᒃ ᕿᓂᕐᓂᕐᒧᑦ ᐊᖏᕈᑎᑦ ᐅᕙᓘᓐᓃᑦ ᐱᓕᕆᐊᖑᔪᑎᒍᑦ ᐃᓛᒃᑰᖓᓕᕐᓗᑎᒃ. ᐊᒻᒪᓗᒃᑕᐅᖅ, ᐅᔭᕋᑦᓯᐅᓂᕐᒧᑦ ᐊᖏᕈᑎᑦ ᐱᐊᓂᒃᑕᐅᓚᐅᕐᒥᔪᑦ TecCominco-ᑯᓐᓄᑦ, ᐃᓚᒋᔭᐅᓂᐊᕐᓯᒪᑎᓪᓗᒋᑦ ᑐᙵᕕᒃᑯᑦ ᐱᓕᕆᐊᖑᓂᐊᕐᑐᑦ ᐱᕙᓪᓕᐊᑎᑕᐅᓕᖅᐸᑕ.

ᐱᓕᕆᕝᕕᐅᔪᖅ ᑮᓇᐅᔭᖅᑖᖅᑎᑕᐅᓚᐅᕐᐳᑦ ᐃᓄᓕᕆᔨᑐᖃᒃᑯᓐᓂᑦ ᖃᕆᑕᐅᔭᒃᑰᖓᓕᖅᑎᑕᐅᖁᓪᓗᒋᑦ ᖃᐅᔨᓴᕐᓂᕐᒧᑦ ᐅᓂᒃᑳᓕᐊᕆᔭᐅᖃᑦᑕᕐᓂᐊᕐᑐᑦ ᐃᓚᒋᔭᐅᑎᓪᓗᒍ ᓄᓇᕗᑦ ᑐᙵᕕᒃᑯᓐᓄᑦ ᐊᒻᒪᓗ ᐃᓄᓕᕆᔨᑐᖃᒃᑯᑦ ᐱᕙᓪᓕᐊᑎᓐᓇᓱᒃᑕᖏᓐᓄᑦ ᓄᓇᓕᕆᓂᐅᑉ ᒥᒃᓵᓄᑦ ᖃᐅᔨᓴᕈᑎᕕᓃᑦ ᐊᑐᐃᓐᓇᐅᓂᖅᓴᐅᖁᓪᓗᒋᑦ.

ᐱᓕᕆᕕᒃ ᕿᓂᕐᓂᖅᓴᐅᓚᐅᕐᒪᑦ ᕿᓂᕋᓱᐊᕐᓱᑎᒃ ᐃᓚᒋᔭᒃᓴᒥᓐᓂᒃ ᐃᓄᐃᑦ ᓄᓇᖁᑎᖏᓐᓂᒃ ᓄᓇᐅᑉ ᖄᖓᓃᒃᑐᓄᑦ ᐱᔪᓐᓇᐅᑎᖃᕐᓂᕐᒧᑦ. ᐅᖃᕐᕕᐅᖃᑦᑕᕐᑐᒃᓴᐃᑦ ᕿᓂᖃᑦᑕᓚᐅᕐᐳᑦ ᐊᒻᒪᓗ ᑲᑎᒪᓂᐅᔪᑦ ᐱᒋᐊᖅᑎᑕᐅᓯᒪᓪᓗᑎᒃ ᐊᒥᓱᓄᑦ ᑲᒻᐸᓂᐅᔪᓄᑦ ᐱᓕᕆᐊᖃᖃᑕᐅᔪᓄᑦ ᓄᓇᕗᒥ, ᐊᒻᒪᓗ ᕿᓂᕐᓂᕐᒧᑦ ᓯᕗᓕᖅᑎᒋᔭᐅᔪᓄᑦ. ᐅᖃᕐᕕᖃᖃᑦᑕᓚᐅᕐᐳᑦ ᑭᒃᑯᑐᐃᓐᓇᕐᓂᒃ ᐃᓄᐃᑦ ᓄᓇᖁᑎᖏᓐᓄᐊᖅᐸᓪᓕᐊᔪᓐᓇᖁᓪᓗᒋᑦ. ᐋᔩᖃᑎᖃᕐᓯᒪᓕᕐᐳᑦ ᐊᒥᓱᑲᓪᓚᓐᓂᒃ ᑲᒻᐸᓂᐅᔪᓂᒃ ᐱᖃᑎᖃᕐᓱᑎᒃ ᓄᓇᐃᑦ ᐊᑐᖅᑕᐅᓂᖏᓐᓄᑦ ᕿᑐᕐᖏᐊᕈᑎᒃᓴᓕᐅᕐᓱᑎᒃ ᓄᓇᕗᑦ ᐃᓗᐊᓂ. ᐅᖃᖃᑎᒌᔾᔪᑕᐅᓚᐅᕐᑐᑦ ᐱᕙᓪᓕᐊᑎᑦᓯᔾᔪᑕᐅᓂᐊᓕᕐᐳᑦ ᐊᖏᕈᑎᒃᓴᓄᑦ.

ᐱᓕᕆᕕᒻᒥᙶᖅᑐᑦ ᐅᐸᒍᑎᓯᒪᓚᐅᕐᐳᑦ ᑕᑯᒃᓴᐅᑎᑦᓯᓂᐅᔪᓂᒃ ᐱᓕᕆᐊᓂᒃ, ᑲᑎᒪᓂᕐᒥᒃ ᑲᑎᒪᕐᔪᐊᕐᓂᕐᒥᓪᓗ ᐅᓂᒃᑳᕆᐊᖅᑐᖅᓯᒪᓪᓗᑎᒃ ᖃᓄᐃᑦᑐᒻᒪᖔᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ, (ᐊᖏᕈᑏᑦ) ᑕᑯᒃᓴᐅᑎᑦᓯᒐᓱᐊᕐᓱᑎᒃ ᐃᑲᔫᓯᐊᖅᑖᕈᑕᐅᔪᓐᓇᕐᑐᓂᒃ ᓄᓇᕗᑦ ᐃᓗᐊᓂ, ᐊᒻᒪᓗ ᑎᓕᐅᕆᒃᑲᓐᓂᕋᓱᐊᕐᓱᑎᒃ ᕿᓂᖅᑎᐅᔪᓂᒃ ᓄᓇᕗᑦ ᓄᓇᖁᑎᖏᓐᓄᐊᖅᐸᓪᓕᐊᖁᓪᓗᒋᑦ ᐅᔭᕋᒃᓴᔭᓄᑦ. ᑕᒪᑐᒥᖓ ᐱᓕᕆᐊᖃᒻᒪᕆᓐᓂᖏᑦ ᑕᑯᒃᓴᕈᖅᑎᑦᓯᓯᒪᕗᑦ ᕿᓂᕐᕕᐅᕙᓪᓕᐊᒐᔭᕐᓂᖏᓐᓂᑦ. ᐱᓕᕆᕕᒃ ᐱᓕᕆᐊᖃᖅᓯᒪᒻᒥᔪᖅ ᐃᓚᒋᔭᐅᓂᖅᓴᐅᓯᒪᓪᓗᑎᒃ ᑲᑎᒪᔪᓄᑦ ᑲᑎᒪᖃᑎᖃᖃᑦᑕᖅᓱᑎᒃ ᐅᖅᓱᐊᓗᓕᕆᔨᓂᒃ ᖃᐅᔨᒪᑦᓯᐊᖁᓪᓗᒋᑦ ᐊᑐᐃᓐᓇᐅᑦᓯᐊᕋᓗᐊᕐᒪᖔᑕ ᓄᓇᕗᑦ ᑐᙵᕕᒃᑯᑦ ᐃᓚᒋᔭᐅᓂᐊᖅᑎᓪᓗᒋᑦ ᐅᖅᓱᐊᓗᓕᕆᓂᕐᒥᒃ ᕿᓂᕐᕕᐅᔪᓂ.

ᓂᕈᐊᕐᓂᒃᓴᖏᑦ ᐅᖅᓱᐊᓗᓕᕆᓂᕐᒧᑦ ᕿᓂᕐᕕᐅᔪᒃᓴᓂ ᐅᐱᕐᖔᖑᓂᐊᕐᑐᒥ 2005-ᒥ ᐱᓕᕆᐊᖑᓚᐅᕐᐳᑦ. ᐃᓄᓕᕆᔨᑐᖃᒃᑯᑦ ᐅᖃᖃᑎᖃᓚᐅᕐᐳᑦ ᓄᓇᕗᑦ ᑐᙵᕕᒃᑯᓐᓂᑦ ᐱᔾᔪᑎᒋᓪᓗᒋᑦ ᒪᓕᒃᑕᐅᔪᒃᓴᐃᑦ ᐊᑐᐊᖅᑕᐅᔪᒃᓴᐃᓪᓗ ᕿᓂᖅᑐᖃᕐᑎᓪᓗᒍ ᖁᑦᓯᒃᑐᒥ. ᖃᐃᖁᔨᓯᒪᓂᖏᑦ ᐅᖅᓱᐊᓗᓕᕆᔨᒃᑯᓐᓂᑦ ᓄᓇᕗᒧᑦ ᑲᔪᓯᑦᓯᐊᓚᐅᙱᓚᖅ, ᑭᓯᐊᓂ ᐃᓄᓕᕆᔨᑐᖃᒃᑯᑦ ᖃᐃᖁᔨᒐᓱᐃᓐᓇᕐᓂᐊᕐᐳᑦ ᐅᖅᓱᐊᓗᓐᓂᐊᖅᑎᒃᑯᓐᓂᑦ ᐊᕐᕌᖑᑕᒫᑦ. ᓄᓇ ᐅᖃᐅᓯᕆᔭᐅᔪᖅ ᐱᑕᖃᕐᒪᑦ ᐅᖅᓱᐊᓗᒃᓴᔭᓂᒃ, ᐱᕙᓪᓕᐊᑎᑕᐅᓕᕐᓂᖅᐸᑕ ᐃᑲᔪᖅᓯᒻᒪᕆᒐᔭᕐᑐᖅ ᑮᓇᐅᔭᑎᒍᑦ ᓄᓇᕗᑦ ᑮᓇᐅᔭᓕᐅᕈᑎᒋᓇᓱᐊᖅᑕᖏᓐᓄᑦ. ᐃᑲᔪᖅᓱᐃᓯᒪᓂᕐᒥᓄᑦ ᓇᓗᓇᐃᖅᓯᖁᓪᓗᒋᑦ ᐅᖅᓱᐊᓗᓕᕆᔨᐅᔪᓄᑦ, ᐱᓕᕆᕕᒃ ᐱᒋᐊᖅᑎᑦᓯᓚᐅᕐᐳᖅ ᐅᑭᐅᖅᑕᖅᑐᒥ ᐱᕙᓪᓕᐊᑎᑕᐅᒐᔭᕐᑐᒥᒃ, ᐊᒥᓱᐃᓕᖓᓗᓂ ᖃᐅᔨᓴᕐᕕᐅᖃᑦᑕᕐᓂᐊᕐᑐᑦ ᑕᒪᐃᓐᓂ ᑲᓇᑕᐅᑉ ᐅᑭᐅᖅᑕᖅᑐᐊᓂ ᐅᖅᓱᐊᓗᖃᕈᒥᓇᖅᑐᓂ.

ᐱᓕᕆᕕᒃ, ᐱᓕᕆᖃᑎᖃᖅᓱᑎᒃ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᐊᑯᓂᑲᓪᓚᒃ ᐱᓕᕆᐊᖃᓚᐅᕐᐳᑦ ᕿᒥᕐᕈᔭᐅᖁᓪᓗᒋᑦ ᐊᒥᓱᑲᓪᓚᐃᑦ ᐱᕙᓪᓕᐊᑎᑕᐅᓂᐊᕐᑐᑦ ᓄᓇᕗᑦ ᐃᓗᐊᓂ. ᕿᒥᕐᕈᓂᕆᔭᐅᔪᑦ ᐱᒋᐊᖅᑎᑕᐅᓚᐅᕐᐳᑦ ᐅᓂᒃᑳᓕᐅᕈᑕᐅᓪᓗᑎᓗ ᐅᑯᐊ ᐱᓕᕆᐊᖑᔪᑦ ᓄᓇᕗᒥ: Jericho Diamond Project, Doris North Gold Project, ᓇᓂᓯᕕᒻᒥ ᐅᔭᕋᕐᓂᐊᕐᕕᐅᑉ ᒪᑐᔭᐅᓚᐅᕐᓂᖓ ᓴᓗᒻᒪᖅᓴᖅᑕᐅᓂᖓᓗ ᐊᒻᒪᓗ ᐆᒃᑐᕋᐅᑕᐅᓪᓗᓂ ᐊᕙᑎᐅᑉ ᐊᒃᑐᖅᑕᐅᓂᐊᕐᓂᖓᓂᒃ ᐅᖃᐅᓯᕆᔭᐅᓯᒪᔪᑦ Meadowbank ᒎᓗᓐᓂᐊᖅᑎᒃᑯᖏᓐᓄᑦ. ᐱᓕᕆᐊᕆᔭᐅᑐᐃᓐᓇᕆᐊᓖᑦ ᑕᒡᕙᓂ ᐅᑭᐅᖑᓂᐊᕐᑐᒥ ᐅᑯᐊᖑᕗᑦ: Meadow Bank Gold Project; Bathurst Port ᐊᒻᒪᓗ ᐊᖅᑯᓯᐅᖅᑕᐅᒐᔭᕐᓂᖓ; Wolfden Highlake ᐊᒻᒪᓗ ᐅᓗ ᐱᓕᕆᐊᖏᑦ; ᐊᒻᒪᓗ ᐊᔾᔨᒌᖏᒃᑐᑦ ᑑᓚᐃᓐᓂ ᓴᓗᒻᒪᖅᓴᖅᑕᐅᓂᐊᕐᑐᑦ. ᑖᒃᑯᐊ ᐱᓕᕆᐊᕆᔭᐅᑎᓪᓗᒋᑦ ᑲᔪᓯᔪᓐᓇᕐᓂᐊᕐᐳᑦ ᐃᑲᔫᑕᐅᔪᑦ ᓄᓇᕗᒥᐅᓄᑦ ᐊᒻᒪᓗ ᐱᑕᖃᙱᓐᓂᖅᓴᐅᑎᑦᓯᓗᑎᒃ ᓈᒻᒪᖏᔾᔪᑕᐅᔪᓐᓇᕐᑐᓂᒃ. ᐱᓕᕆᕕᒃ ᕿᒥᕐᕈᐃᓐᓇᕐᓂᐊᕐᐳᖅ ᐅᖃᐅᓯᐅᓯᒪᔪᓂᒃ ᐱᓕᕆᐊᒃᓴᓄᑦ ᐊᖅᑯᑎᒋᔭᐅᓗᑎᒃ ᓄᓇᕗᒥ ᐊᕙᑎᓕᕆᓂᕐᒧᑦ ᑲᑎᒪᔨᖏᑦ ᐊᒻᒪᓗ ᓄᓇᕗᒥ ᐃᒪᓕᕆᔨᒃᑯᑦ ᑲᑎᒪᔨᖏᑦ.

ᐱᓕᕆᕕᒃ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᖏᑦ ᑲᑐᔾᔨᖃᑎᒌᒋᐊᓕᓚᐅᕐᐴᒃ ᐱᓕᕆᐊᖃᕐᑎᐅᓗᑎᒃ ᑯᕕᔪᓂᒃ ᑐᐊᕕᕐᓇᕐᑐᓕᕆᓂᕐᒧᑦ ᑭᐅᔨᐅᑎᑕᐅᓗᑎᒃ ᓄᓇᕗᑦ ᐃᓗᐊᓂ. ᑕᒪᓐᓇ ᐱᕕᖃᖅᑎᑦᓯᓂᖅᓴᐅᓂᐊᕐᐳᖅ ᐃᓄᐃᑦ ᑲᑐᔾᔨᖃᑎᒌᖏᑦ ᖃᐅᔨᓴᕈᓐᓇᕐᑎᑕᐅᓗᑎᒃ ᑯᕕᔪᖃᖅᑐᕕᓂᐅᒃᐸᑦ ᐅᖅᓱᐊᓗᓐᓂᒃ ᐃᓄᐃᑦ ᓄᓇᖁᑎᖏᓐᓂ. ᐱᓕᕆᕕᖕᒦᓐᖔᖅᑐᓂᒃ ᐊᕐᕌᖑᑕᒫᑦ ᑲᑎᒪᔭᖅᑐᖅᑐᖃᖃᑕᐅᖃᑦᑕᕐᐳᑦ ᑲᓇᑕᒥ ᐃᒪᕐᒥᐅᑕᓕᕆᔩᑦ ᐅᖃᐅᔾᔨᒋᐊᖅᑎᖏᑦᑕ ᑲᑎᒪᔨᖏᓐᓄᑦ, ᑎᒥᒋᔭᐅᓪᓗᑎᒃ ᑭᒡᒐᕐᑐᐃᑎᓪᓗᒋᑦ ᐊᒥᓱᓂᒃ ᐃᓚᒋᔭᐅᔪᓂᒃ ᐅᓯᔨᓄᑦ, ᐅᒥᐊᕐᔪᐊᓄᑦ ᐊᒻᒪᓗ ᑕᕆᐅᕐᒥ ᓴᓗᒪᐃᓪᓕᖅᑎᑦᓯᑦᑕᐃᓕᔨᓄᑦ. ᐱᓕᕆᖃᑎᖃᖅᓱᑎᒃ ᑲᓇᑕᒥ ᓯᑯᓕᕆᔨᒃᑯᓐᓂᒃ, ᐱᓕᕆᕝᕕᐅᔪᖅ ᐃᖅᑲᓇᐃᔭᖃᑎᖃᓚᐅᖅᐳᖅ ᑲᓇᑕᒥ ᓯᔾᔭᒥᐅᑕᓕᕆᔨᒃᑯᓐᓂᒃ ᑲᒪᕝᕕᒃᓴᐅᓇᔭᖅᑐᓂᒃ ᓴᖅᑭᖅᑎᕆᓪᓗᑎᒃ ᑯᕕᔪᖃᕐᓂᕐᐸᑦ ᐱᖁᑎᒋᔭᐅᔪᒃᓴᓂᒃ ᓴᓗᒻᒪᖅᓴᐅᑎᒃᓴᓂᓪᓗ ᓄᓇᕗᑦ ᐃᓗᐊᓂ.

ᐃᓚᒋᔭᐅᑎᓪᓗᒋᑦ ᓴᓂᑭᓗᐊᕐᒥ ᐊᕙᑎᒥᐅᑕᓕᕆᓂᕐᒧᑦ ᑲᑎᒪᔨᕋᓛᑦ, ᓄᓇᕗᑦ ᒐᕙᒪᒃᑯᖏᑦ ᐊᒻᒪᓗ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖓᑦ, ᐱᓕᕆᕕᒃ ᐃᓚᒋᔭᐅᓚᐅᕐᐳᖅ ᕼᐊᑦᓴᓐ ᐸᐃᒥ ᑭᒡᒐᕐᑐᐃᔨᒋᔭᐅᔪᑦ ᑎᒥᖁᑎᖓᑦ ᑲᑎᒪᑎᓪᓗᒋᑦ ᐱᔾᔪᑎᒋᓪᓗᒍ ᓴᖅᑭᑕᐅᒐᓱᐊᕐᑐᖅ Eastmain A-1, Rupert Diversion Project ᓴᖅᑭᑕᐅᒐᓱᐊᕐᑐᖅ ᐅᖅᓱᐊᓗᓕᕆᔨᕐᔪᐊᒃᑯᓐᓄᑦ ᑯᐸᐃᒃᒥ.

ᓯᕗᓪᓕᖅᐹᖅᓯᐅᑦ ᓴᓗᒻᒪᖅᓴᐃᕙᓪᓕᐊᓂᕐᒧᑦ ᐊᑐᐊᒐᕐᒥ ᐃᓄᐃᑦ ᓄᓇᖁᑕᐃᓐᓄᑦ ᐱᐊᓂᒃᑕᐅᓚᐅᕐᐳᖅ ᐊᓱᐃᓛᒃ ᐱᓕᕆᕕᒃ ᐊᒻᒪᓗ ᐊᕕᒃᑐᖅᓯᒪᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ ᓴᖅᑭᑎᑦᓯᓂᐊᕐᒪᑕ ᐊᑐᐊᒐᒃᓴᒥᒃ ᒪᓕᒃᑕᐅᓂᐊᕐᑐᒥᒃ. ᑕᒪᓐᓇ ᖃᐅᔨᒪᑦᓯᐊᕈᑕᐅᓂᐊᕐᐳᖅ ᑲᒪᑦᓯᐊᕋᓗᐊᕐᒪᖔᑕ ᐱᓕᕆᐊᕆᔭᕐᒥᓐᓂᒃ ᐃᓄᐃᑦ ᓄᓇᖁᑎᖏᓐᓂ ᐃᑲᔪᖅᓯᓯᓐᓈᕐᓗᑎᒃ ᐃᓄᖕᓂᒃ ᓯᕗᓂᒃᓴᐅᓂᐊᕐᑐᒥ.

ᐱᓕᕆᕕᒃ ᐱᓕᕆᖃᑎᖃᒻᒪᕆᓚᐅᕐᐳᖅ ᒐᕙᒪᒃᑯᓐᓂᑦ ᐊᒻᒪᓗ ᓄᓇᕗᑦ ᐸᕐᓇᐃᔨᒃᑯᖏᓐᓂᑦ ᐱᔾᔪᑎᒋᓪᓗᒋᑦ ᑲᓇᑕᐅᑉ ᒐᕙᒪᒃᑯᖏᑦᑕ ᒪᓕᒐᖁᑎᖏᑦ ᐊᐅᓚᑦᓯᔾᔪᑕᐅᓂᐊᕐᑐᓂᒃ ᓄᓇᕗᒻᒥ ᐸᕐᓇᐃᔨᒃᑯᓐᓂᑦ ᐊᒻᒪᓗ ᓄᓇᕗᒻᒥ ᐊᕙᑎᓕᕆᔩᑦ ᑲᑎᒪᔨᖏᓐᓂᑦ. ᓯᕗᓪᓕᖅᐹᖅᓯᐅᑏᑦ ᒪᓕᒃᒐᓴᓄᑦ ᓴᖅᑭᑕᐅᓂᐊᕐᐳᑦ ᑕᒡᕙᓂ ᐅᑭᐅᖑᔪᒥ. ᐱᓕᕆᕕᒃ ᑐᓂᓯᓚᐅᕐᒥᔪᖅ ᐅᓄᖅᑐᑲᓪᓚᓐᓂᒃ ᐅᖃᐅᓯᐅᓯᒪᔪᓂᒃ ᐱᔾᔪᑎᒋᓪᓗᒋᑦ ᕿᑎᕐᒥᐅᑦ ᐱᖓᓐᓇᖅᐸᓯᐊᓂ ᓄᓇᐃᑦ ᐊᑐᖅᑕᐅᓂᒃᓴᖏᓐᓄᑦ ᐸᕐᓇᐅᑎᒥᒃ, ᐊᒻᒪᓗ ᐃᓄᖕᓂᒃ ᑐᓴᕆᐊᕐᕕᖃᓚᐅᕆᓪᓗᑕ ᐃᖃᓗᒃᑑᑦᓯᐊᕐᒥ. ᐊᒻᒪᓗ ᐱᓕᕆᐊᖃᓂᐊᕐᒥᔪᑦ ᑭᕙᓪᓕᕐᒥ ᓄᓇᐃᑦ ᐊᑐᖅᑕᐅᓂᐊᕐᓂᖏᓐᓄᑦ ᐸᕐᓇᐅᑎᒃᓴᒥᒃ. ᐃᓚᒋᔭᐅᓂᑦᑎᒍᑦ, ᓴᐳᔾᔨᓯᒪᓂᐊᕐᐳᒍᑦ ᐃᓄᐃᑦ ᐱᔪᓐᓇᐅᑎᖏᓐᓂᑦ ᓇᖕᒥᓂᖃᕐᓂᕐᒧᑦ ᓄᓇᖁᑎᒥᓐᓂᒃ ᐃᓄᐃᑦ ᓄᓇᖁᑎᖏᓐᓄᑦ ᐊᒻᒪᓗ ᖃᐅᔨᓴᖅᑎᐅᓗᑎᒃ ᑲᒪᒋᔭᐅᑦᓯᐊᕋᓗᐊᕐᒪᖔᑕ ᓄᓇᐃᑦ ᓄᓇᕗᑦ ᐃᓗᐊᓂ ᐱᖁᔭᖃᖅᑎᑦᓯᓗᐊᖅᑕᐃᓕᒪᒐᓱᒃᓯᓐᓈᑦ ᐱᕙᓪᓕᐊᑎᑦᓯᔨᐅᔪᓂᒃ ᓄᓇᓂᒃ.

ᓄᓇᕗᑦ ᑐᙵᕕᒃᑯᑦ ᓄᓇᓂᒃ ᖃᐅᔨᓴᖅᑎᖏᑦ ᓄᐊᑦᓯᕙᓪᓕᐊᖏᓐᓇᕐᓂᐊᕐᐳᑦ ᓄᓇᙳᐊᑎᒍᑦ (GIS) ᑐᑭᓯᐅᒪᔾᔪᑎᒃᓴᓂᒃ ᐃᓄᐃᑦ ᓄᓇᖁᑎᖏᓐᓂ ᓄᓇᐃᑦ ᐊᐅᓚᑕᐅᓂᖏᓐᓄᑦ ᐸᕐᓇᐃᔨᒃᑯᓐᓄᑦ. ᐱᓕᕆᐊᖃᒻᒪᕆᓚᐅᕐᐳᑦ ᖃᕆᑕᐅᔭᒃᑰᖓᓕᖅᑎᑦᓯᓐᓇᓱᐊᕐᓱᑎᒃ ᐃᓄᓕᕆᔨᑐᖃᒃᑯᑎᒍᑦ ᓄᓇᐃᑦ ᐊᑐᖅᑕᐅᔪᑦ ᓄᓇᙳᐊᑎᒎᖓᓕᖅᑎᑕᐅᓗᑎᒃ ᐊᒻᒪᓗ ᑐᙵᕕ ᐃᓛᒌᒃᓴᖅ ᓄᓇᕗᒥ ᓄᓇᐃᑦ ᐊᑐᖅᑕᐅᔪᑦ ᓄᓇᙳᐊᑎᒎᖓᓕᖅᑎᑕᐅᓗᑎᒃ. ᑖᒃᑯᐊ ᓄᓇᙳᐊᑦ ᐃᓗᓕᖃᕐᓂᐊᕐᑐᑦ ᓇᓗᓇᐃᔭᖅᓯᒪᔪᓂᒃ ᑐᑭᓯᐅᒪᔾᔪᑎᒃᓴᓂᒃ ᐱᔾᔪᑎᒋᓪᓗᒋᑦ ᐃᖃᓗᖃᕐᕕᐅᔪᑦ ᐆᒪᔪᖃᕐᕕᐅᔪᓪᓗ, ᐃᓄᐃᑦ ᐊᑐᖅᐸᒃᑕᖏᓐᓂᒃ ᓄᓇᓂᒃ, ᖃᐅᔨᓴᖅᑎᕐᔪᐊᓄᓪᓗ ᖃᐅᔨᓴᖅᕕᐅᕙᒃᑐᓂᒃ ᓄᓇᓂᒃ ᐅᖃᖅᓯᒪᓗᑎᒃ ᖃᓄᐃᑦᑐᓂᒃ ᐱᕈᖅᓯᐊᖃᕐᒪᖔᑕ ᓄᓇᔭᖃᕐᒪᖔᑕᓗ. ᓄᓇᓂᒃ ᖃᐅᔨᓴᖅᑏᒃ ᐱᐊᓂᒃᓯᓚᐅᕐᒥᔪᑦ Landsat-ᒥᒃ ᐱᓕᕆᐊᕆᔭᐅᔪᒥᒃ ᑮᓇᐅᔭᑎᒍᑦ ᐃᑲᔪᖅᓯᔭᐅᓯᒪᓪᓗᑎᒃ $99,947-ᓂᒃ ᐃᓄᓕᕆᔨᑐᖃᒃᑯᓐᓄᑦ. ᖃᐅᔨᓴᖅᑕᐅᒻᒪᕆᓚᐅᕐᒥᔪᑦ ᓄᓇᓕᓕᕆᔨᒃᑯᑦ ᐱᓕᕆᐊᖓᑦ ᖃᐅᔨᒪᑦᓯᐊᕈᑕᐅᓪᓗᓂ ᓄᓇᕗᒥ ᑐᙵᕕᒃᑯᑦ ᓯᕗᓕᖅᑎᐅᖏᓐᓇᖁᓪᓗᒋᑦ ᖃᐅᔨᓴᖅᑎᐅᓂᕐᒧᑦ ᓄᓇᐃᑦ ᓄᓇᒥᐅᑕᐃᓪᓗ ᐊᐅᓚᑕᐅᓂᖏᓐᓄᑦ ᐅᑭᐅᓂ ᖃᐃᕙᓪᓕᐊᔪᓂ ᐊᑐᖅᑕᐅᓗᑎᒃ ᖃᕆᑕᐅᔭᑎᒍᑦ ᓄᐊᑕᐅᓯᒪᔪᑦ, ᐱᕙᓪᓕᐊᑎᑕᐅᓯᒪᔪᑦ, ᐋᖅᑭᒃᑕᐅᓯᒪᕙᒃᑐᑦ ᐊᖅᑯᑎᐅᓗᑎᒃ, ᐃᓕᓐᓂᐊᕐᑎᑦᓯᓂᒃᑯᓪᓗ.

ᐱᓕᕆᕕᒃ ᐱᓕᕆᐊᖃᓚᐅᕐᒥᔪᖅ ᓄᓇᕗᑦ ᑐᙵᕕᒃᑯᑦ ᖃᕆᑕᐅᔭᑎᒍᑦ ᐅᐸᒃᑕᕐᕕᖓᓂᒃ ᐃᑭᐊᖅᑭᔾᔪᒻᒥᒃ ᑕᑯᒋᐊᖅᑕᐅᔪᓐᓇᕐᑐᓂᒃ. ᖃᕆᑕᐅᔭᑎᒍᑦ ᓄᓇᙳᐊᑦ ᐱᔾᔪᑎᖃᕐᑐᑦ ᐃᓄᐃᑦ ᓇᖕᒥᓂᖁᑎᖏᓐᓂᑦ ᓄᓇᓂᒃ ᐱᑕᖃᕐᐳᑦ ᐅᕙᓂ www.ntilands.com .

ᐱᓕᕆᕕᒻᒥ ᓄᓇᙳᐊᓕᕆᔨᒃᑯᑦ ᖃᕆᑕᐅᔭᒃᑰᖓᓕᖅᑎᑦᓯᓚᐅᕐᐳᑦ, ᓇᓗᓇᐃᖅᓯᓪᓗᑎᒃ, ᐊᐅᓪᓚᕐᑎᑦᓯᓪᓗᑎᓪᓗ ᐊᒥᓱᓂᒃ ᖃᐅᔨᓴᕈᑎᕕᓂᕐᓂᒃ ᐃᓄᐃᑦ ᓄᓇᖁᑎᖏᓐᓄᑦ ᓇᖕᒥᓂᕆᔭᐅᔪᓄᑦ ᑐᓐᓂᐅᑎᒋᔭᐅᓪᓗᑎᒃ ᓄᓇᐃᑦ ᓇᖕᒥᓂᕆᔭᐅᔪᑦ ᓇᓗᓇᐃᒃᑯᑕᖃᕐᕕᖓᓐᓄᑦ ᑎᑎᕋᕐᕕᒻᒧᑦ. ᖃᐅᔨᓴᕈᑎᕕᓃᑦ ᓄᓇᙳᐊᑦ ᐃᓗᓕᖃᕐᐳᑦ ᒪᓕᒐᑎᒍᑦ ᓇᓗᓇᐃᔭᖅᑕᐅᓯᒪᔪᓂᒃ ᑕᒪᐃᓐᓄᑦ ᐃᓄᐃᑦ ᓄᓇᖁᑎᖏᓐᓄᑦ ᓄᓇᓄᑦ. ᓄᓇᕗᑦ ᑐᙵᕕᒃᑯᓐᓂ ᓄᓇᓕᓕᕆᔨᒃᑯᑦ ᐱᓯᒪᓕᕐᐳᑦ ᖃᕆᑕᐅᔭᒃᑰᖓᔪᓂᒃ ᖃᐅᔨᓴᖅᑕᐅᓯᒪᔪᓂᒃ ᓄᓇᓂᒃ ᓄᓇᕗᑦ ᐃᓗᐊᓂ ᑎᑭᐅᒪᓪᓗᑎᒃ 1993-ᒧᑦ.

ᐱᐊᓂᒃᓯᕙᓪᓕᐊᒻᒥᔪᑦ ᓄᑖᙳᕆᐊᖅᑕᐅᓯᒪᔪᒥᒃ ᓄᓇᕗᑦ ᑐᙵᕕᒃᑯᑦ ᓄᓇᖁᑎᖏᑦᑕ ᓄᓇᙳᐊᖁᑎᖓᓐᓂᒃ ᓇᓗᓇᐃᔭᖅᓯᒪᓂᖅᓴᒥᒃ. ᐅᑭᐅᓂᒃ ᐱᖓᓱᓂᒃ ᐊᐅᓪᓚᕐᑎᑦᓯᓯᒪᓕᕐᐳᑦ 4,000-ᓂᒃ ᑎᑎᕋᖅᑕᐅᓯᒪᔪᑦ ᐊᔾᔨᖏᓐᓂᑦ. ᑐᑭᓯᐅᒪᔾᔪᑎᒃᓴᓂᒃ ᐱᑕᖃᕐᓂᖅᓴᐅᓂᐊᕐᑐᑦ ᓯᕗᓪᓕᐅᓚᐅᕐᑐᓂᒃ.