ᐊᑐᓕᖅᑎᑦᑎᕙᓪᓕᐊᓂᖅ

ᐃᖅᑲᓇᐃᔭᕐᕕᖓᑦ ᐊᑐᓕᖅᑎᑦᑎᕙᓪᓕᐊᓂᕐᒧᑦ ᑲᒪᔨᐅᔪᑦ ᑕᒪᐃᓐᓂᒃ ᐱᓕᕆᐊᖏᓐᓂᒃ ᐊᑐᓕᖅᑎᑦᑎᕙᓪᓕᐊᓂᕐᒥᒃ ᓄᓇᕗᒻᒥ ᓄᓇᑖᕈᑎᑦ ᐃᓗᓕᖏᓐᓂᒃ. ᑕᒪᒃᑯᐊ ᐱᓕᕆᐊᖏᑦ ᐃᓚᖃᖅᑐᑦ ᐱᓕᕆᖃᑎᖃᕐᓂᖏᓐᓂᒃ ᒐᕙᒪᒃᑯᑦ ᑲᓇᑕᒥ, ᓄᓇᕗᑦ ᒐᕙᒪᒃᑯᖏᓐᓂᒃ, ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᑐᙵᕕᒃᑯᓐᓂᓗ.

ᐊᑐᓕᖅᑎᑦᑎᔾᔪᑎᒃᓴᐃᑦ ᑳᓐᑐᓛᒃᓴᐃᑦ ᐋᔩᖃᑎᒌᒍᑕᐅᓂᖏᑦ

ᓯᑕᒪᓂᒃ ᐅᑭᐅᓂᒃ ᐊᐃᕙᖃᑎᖃᖅᓯᒪᐃᓐᓇᓚᐅᕐᒪᑕ ᐃᓄᓕᕆᔨᑐᖃᒃᑯᓐᓂ, ᓄᑖᕈᕆᐊᖅᑕᐅᔭᕆᐊᖃᕐᓂᖏᓐᓄᑦ ᐊᑐᓕᖅᑎᑦᑎᓂᕐᒧᑦ ᑮᓇᐅᔭᖅᑖᒃᓴᐃᑦ ᑳᓐᑐᓛᒃᑯᑎᒍᑦ, ᐊᖏᖃᑎᒌᖕᓂᖅᑕᖃᖏᑦᑐᖅ ᐱᒻᒪᕆᐊᔪᓂ ᐋᕿᒋᐊᖃᖅᑐᓂ. ᑲᓇᑕᐅᑉ ᐊᔩᖃᑎᒌᒃᑎᖓ ᓄᖅᑲᓚᐅᖅᑐᖅ ᐃᖃᓇᐃᔮᒥᓂᒃ ᕿᒪᐃᓪᓗᓂ. ᐃᓄᓕᕆᔨᑐᖃᒃᑯᑦ ᐅᖃᓚᐅᖅᑐᑦ ᑎᓕᔭᐅᓯᒪᓂᖏᑦ ᓄᖑᓯᒪᓕᕐᒪᑕ ᐊᒻᒪᓗ ᑎᒃᑯᐊᖅᓯᒃᑲᓐᓂᔾᔮᖏᖢᑎᒃ ᓄᑖᒥᒃ ᐊᓯᐊᓂᒃ ᑲᓇᑕᐅᑉ ᐊᔩᖃᑎᒌᒃᑎᖓᓂᒃ.

ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ ᐊᑎᓕᖅᑕᐅᓪᓗᑎᒃ 1993-ᒥ, ᑲᓇᑕᒥ ᐱᔪᒪᔭᓗᒃᑖᒥᓂᒃ ᐱᓚᐅᖅᓯᒪᔪᖅ. ᐃᓕᑕᕆᔭᐅᓂᖅᑖᓚᐅᖅᑐᑦ ᐱᖁᑎᖃᕐᓂᕐᒥᓂᒃ ᓄᓇᓂᒃ 1/5 ᐊᖏᓂᖃᖅᑐᒥᒃ ᑲᓇᑕᓕᒫᒥ ᓄᓇᖁᑎᒋᔭᐅᔪᓂ, ᐅᐱᒋᔭᐅᕐᔪᐊᖅᓯᒪᔪᑦ ᓯᓚᕐᔪᐊᒥᐅᑦ ᑲᑐᔾᔨᖃᑎᒌᖏᓐᓂᒃ ᐃᓱᒪᒋᔭᐅᔪᓂ ᑲᔪᓰᓐᓇᕐᓂᐊᖅᑐᒥᒃ ᐱᓕᕆᖃᑎᖃᑦᑎᐊᕐᓂᖏᓐᓂᒃ ᐃᓄᐃᑦ, ᑲᓇᑕᓗ ᐃᓕᔭᐅᓚᐅᖅᑐᖅ ᓄᓇᓄᑦ ᓄᓇᒥᐅᑕᓄᓪᓗ ᓴᓇᕕᐅᔪᒪᒍᓂ ᐊᖏᖅᑕᓯᒪᖃᑦᑕᕆᖃᖅᓱᑎᒃ ᐃᓄᖕᓄᑦ. ᐱᕚᓪᓕᕈᑎᕐᔪᐊᕆᓯᒪᔭᖓ ᑕᒪᓐᓇ ᑲᓇᑕᐅᑉ. ᑕᐅᖅᓰᓂᐊᕐᓗᑎᒃ, ᐃᓄᐃᑦ ᐱᓂᐊᕐᓂᕋᖅᑕᐅᓯᒪᔪᑦ ᐊᒥᓱᓂᒃ ᐃᑲᔫᑎᒃᓴᓂᒃ, ᐃᓚᖏᑦ ᐱᒋᐊᑲᐅᑎᒋᓚᐅᖅᓯᒪᔪᑦ. ᐃᓄᐃᑦ ᐊᑖᓃᖃᑕᐅᖏᑦᑐᑦ ᐊᑐᕐᓂᖏᓐᓂᒃ 23 ᐃᓗᖏᑦ (ᐃᓄᐃᑦ ᐃᖃᓇᐃᔮᖃᕐᓂᖏᑦ ᒐᕙᒪᒃᑯᓐᓂ), ᐃᓛᒃᑯᑦ 24 (ᑳᓐᑐᓛᒃᑖᕐᓂᖅᓴᐅᔭᕆᐊᖃᕐᓂᖏᑦ ᐃᓄᐃᑦ ᒐᕙᒪᒃᑯᓐᓂᒃ), ᐃᓗᖏᑦ 15 (ᐃᖃᓗᒃᓯᐅᖃᑕᐅᕕᒃᓴᖏᑦ ᑕᕆᐅᕐᒥ ᐊᔾᔨᒋᔭᐅᔭᕆᐊᖃᖅᑐᑦ ᑲᓇᑕᒥ ᑕᕆᐅᕐᒥᐅᑕᖃᖃᑕᐅᔪᓂ ᓯᖏᓐᓂᒃ, 80 ᐊᒪ 90% ᐊᑯᓐᓂᖏᓃᑦᑐᑦ), ᐊᒻᒪᓗ ᐃᓗᓕᖏᑦ 12.7.6 (ᒪᓕᒐᐃᑦ ᓄᓇᕗᒻᒥ ᖃᐅᔨᓴᐃᔾᔪᑎᖃᕆᐊᖃᕐᓂᖏᑦ). ᑕᒪᒃᑯᐊ ᒪᑐᐃᖓᔪᑦ ᓴᖅᑭᑕᐅᔭᕆᐊᓖᑦ ᐊᑕᔪᑦ ᐃᖅᑲᓇᐃᔮᒃᓴᓄᑦ ᐊᑐᒃᑲᓐᓂᕈᓐᓇᖅᑐᓂᒡᓗ ᑮᓇᐅᔾᔭᒃᓴᕕᒃᓴᓂᒃ ᐱᕙᓪᓕᐊᑎᑦᑎᓂᕐᒧᑦ ᐃᓄᖕᓄᑦ.

ᐊᖏᕈᑎᑖᕈᓐᓇᖏᒻᒪᑕ ᐱᒻᒪᕆᐅᓂᖏᓐᓂᒃ ᕿᑎᐊᓃᒃᑐᓂ ᐃᓱᒪᓘᑕᐅᔪᓂ ᑭᓯᐊᓂ ᑲᓇᑕ ᐊᖏᖅᐸᑦ ᖃᐅᔨᓴᖅᑕᐅᒃᑲᓐᓂᖁᓗᒋᑦ ᑮᓇᐅᔭᖅᑖᕆᔭᐅᓂᐊᕐᓂᕋᓚᐅᖅᓯᒪᔪᑦ 1993-ᒥ, ᖃᐅᔨᓴᖅᑕᐅᑦᑎᐊᕐᓗᑎᒡᓗ ᑕᒪᕐᒥᒃ ᓄᓇᕗᒻᒥ ᐊᖏᕈᑏᑦ ᒪᓕᒃᑕᐅᔭᕆᐊᖃᖅᑐᑦ ᑐᕌᒐᖏᓪᓗ, ᓴᓇᔭᐅᔪᓐᓇᕐᓂᐊᕐᒪᑕ ᓈᒻᒪᔪᑦ ᑮᓇᐅᔭᒃᓴᐃᑦ ᓴᕿᑦᑎᑦᑎᕙᓪᓕᐊᓚᕆᒍᑕᐅᓂᐊᖅᑐᑦ ᒪᓕᒃᑕᐅᓗᑎᒡᓗ ᓯᕗᓪᓕᖅᐹᑦ ᖁᓖᑦ ᐊᕐᕌᒎᓚᐅᖅᑐᑦ ᐊᑐᓚᐅᖅᑐᑦ.

ᒐᕙᒪᒃᑯᑦ ᑲᓇᑕᒥ ᐱᓕᕆᖃᑎᖃᕆᐊᖃᖅᑐᑦ ᑐᙵᕕᒃᑯᓐᓂᒃ ᓄᓇᕗᓪᓗ ᒐᕙᒪᒃᑯᖏᓐᓂᒃ ᐊᑯᓂᐅᔪᖅ ᐊᑐᕐᓂᐊᖅᑐᓂᒃ ᐸᕐᓇᐅᑎᖃᕐᓗᑎᒃ ᐊᑐᓕᖅᑎᑕᐅᓂᖏᓐᓄᑦ ᐃᓗᓕᖏᑦ 23 ᐱᕙᓪᓕᐊᖏᓐᓇᖁᓪᓗᒋᑦ ᐊᒥᓲᓂᖏᑦ ᐃᓄᐃᑦ ᐃᖅᑲᓇᐃᔮᖅᑐᑦ, ᒪᓕᒃᑕᐅᓗᑎᒃ ᐃᓄᐃᑦ ᐊᒥᓲᓂᖏᑦ ᒐᕙᒪᒃᑯᓐᓂ 2013-ᒥ. ᑕᒪᓐᓇ ᑐᑭᖃᖅᑐᖅ ᓵᒧᐊᖃᑕᐅᔭᕆᐊᖃᕐᓂᖅ ᑕᒪᕐᒥᒃ ᒐᕙᒪᑐᖃᒃᑯᑦ ᐃᖅᑲᓇᐃᔭᕐᕕᖏᑦ, ᖃᐅᔨᒪᕐᔪᐊᖅᑐᑦ ᐃᓕᓐᓂᐊᖅᑐᓕᕆᓂᕐᒥᒃ.

ᐊᑐᓕᖅᑎᑕᐅᕙᓪᓕᐊᓂᖏᑦ ᓄᓇᕗᒻᒥ ᖃᐅᔨᓴᕈᑎᒃᓴᐃᑦ ᐅᖃᐅᓯᐅᔪᑦ ᐃᓗᓕᖏᓐᓂᒃ 12.7.6 ᐱᔭᕆᐊᑐᔫᖏᒻᒪᑦ. ᒐᕙᒪᒃᑯᑦ ᐋᕿᓗᑎᒃ ᖃᐅᔨᓴᕈᑎᒃᓴᓂᒃ ᓄᓇᕗᑦ ᐊᕙᑎᖓᓂᒃ ᐱᒋᐊᖅᓯᒪᓕᐊᓂᒃᑐᖅ, ᐊᒻᒪᓗ ᑐᓴᐅᒪᔭᐅᖃᑦᑕᕐᓗᑎᒃ ᖃᓄᐃᓂᖏᓐᓂᒃ ᓄᓇᕗᑦ ᐊᕙᑎᖏᑦ. ᑭᓯᐊᓂᓕ, 12-ᖑᓕᖅᑐᓂ ᐊᑎᓕᐅᖅᑕᐅᓚᐅᖅᓯᒪᓪᓗᑎᒃ ᓄᓇᕗᒻᒥ ᓄᓇᑖᕈᑏᑦ, ᐃᓄᓕᕆᔨᑐᖃᒃᑯᑦ ᑕᐃᒪᐃᓯᒪᖏᑦᑐᑦ.

ᑐᙵᕕᒃᑯᑦ ᐃᖃᖅᑐᐃᔨᒃᑰᖁᔨᓯᒪᓕᖅᑐᑦ ᑲᓇᑕᒥ ᐃᖃᖅᑐᐃᕕᓕᕆᔨᕐᔪᐊᕐᒧᑦ ᑕᐅᑐᒡᓗᒋᑦ ᐃᓄᓕᕆᔨᑐᖃᒃᑯᑦ ᐊᑐᓕᖅᑎᓯᒪᖏᓐᓂᖏᓐᓂᒃ ᑕᒪᐃᓐᓂᒃ ᖃᐅᔨᓴᐃᔾᔪᑎᒃᓴᐃᑦ.

ᑭᖑᓪᓕᖅᐹᒥ, ᑐᙵᕕᒃᑯᑦ ᐱᔪᒪᔪᑦ ᓈᒪᔪᓂᒃ ᑮᓇᐅᔭᒃᓴᓂᒃ ᐊᐅᓚᑦᑎᔾᔪᑎᒃᓴᓄᑦ ᐃᖏᕐᕋᔾᔪᑎᒃᓴᖏᓄᓪᓗ ᓄᓇᕗᑦ ᓄᓇᑖᕈᑎᑎᒍᑦ ᓴᖅᑭᑕᐅᓯᒪᔪᓂᒃ ᑎᒥᐅᔪᓂᒃ. ᑖᒃᑯᐊ ᑮᓇᐅᔭᐃᑦ ᓈᒻᒪᒋᐊᖃᖅᑐᑦ ᐋᖅᑭᒋᐊᖅᑕᐅᓗᑎᒃ ᐅᓪᓗᒥᐅᓕᖅᑐᖅ ᐊᑭᖏᑦ ᐱᖁᑏᑦ ᓄᓇᕗᒻᒥ. ᑖᒃᑯᐊ ᑮᓇᐅᔭᐃᑦ ᐃᓚᒋᔭᐅᔪᑦ ᓈᒪᔪᓂᒃ ᑮᓇᐅᔭᒃᓴᓂᒃ ᓄᓇᓕᖕᓂ ᐊᖑᓇᓱᒃᑐᓕᕆᔨᒃᑯᑦ ᑲᑐᔾᔨᖃᑎᒌᖏᓐᓄᑦ. ᑐᙵᕕᒃᑯᑦ ᑕᑯᔪᒪᔪᑦ ᑲᔪᓯᑎᑕᐅᔾᔪᑎᒃᓴᓂᒃ ᓄᓇᕗᒻᒥ ᐆᒪᔪᐃᑦ ᐱᔭᐅᖃᑕᕐᓂᖏᓐᓂᒃ ᖃᐅᔨᓴᖅᑕᐅᔪᑦ.

ᓄᓇᕗᒻᒥ ᐊᑐᓕᖅᑎᑦᑎᓂᕐᒧᑦ ᑲᑎᒪᔩᑦ

ᐊᑐᓕᖅᑎᑦᓂᕐᒧᑦ ᑲᑎᒪᔩᑦ ᓴᖅᑭᑕᐅᓚᐅᖅᑐᑦ ᒪᓕᒃᑕᐅᓗᑎᒃ ᐃᓗᓕᖏᑦ 37-ᒦᑦᑐᑦᖅ ᐊᑐᓕᖅᑎᑦᑕᐅᕙᓪᓕᐊᔪᓂᒃ ᑲᒪᔨᐅᓂᐊᖅᑐᓂᒃ. ᓄᓇᕗᑦ ᑐᙵᕕᒃᑯᑦ, ᓄᓇᕗᑦ ᒐᕙᒪᒃᑯᖏᑦ ᒐᕙᒪᒃᑯᓪᓗ ᑲᓇᑕᒥ ᐃᓚᒋᔭᐅᔪᑦ ᑲᑎᒪᔨᓂ. ᓄᕕᐱᕆ 2003-ᒥ ᖃᐃᔨᓴᖅᑎᕐᔪᐊᑉ ᐅᓂᒃᑳᓕᐊᖏᑦ ᓈᒻᒪᒃᓴᓚᐅᖏᑦᑐᑦ ᑲᑎᒪᔨᓂᒃ ᐊᑐᕈᓐᓇᖏᓗᐊᕐᓂᖏᓐᓂ ᐃᓱᒪᓕᐅᖅᑎᐅᓂᕐᒥᒃ ᓈᒻᒪᒌᒍᓐᓃᖅᑐᓂᓗ ᐋᖀᖃᑦᑕᕐᓂᕐᒥᒃ. ᐅᓂᒃᑳᕐᓂ ᐅᖃᖅᓯᒪᔪᑦ ᐅᓂᒃᑳᖅᑕᐅᖃᑦᑕᖏᓐᓂᖏᓐᓂᒃ ᐊᑐᓕᖅᑎᑦᑎᕙᓪᓕᐊᔭᐅᔪᑦ. ᑐᙵᕕᒃᑯᑦ ᑐᕌᒐᕆᒻᒪᕆᒃᑕᖓᑦ ᐱᐅᓯᕚᓕᖅᑎᑦᑎᓂᕐᒥᒃ ᐊᑐᕐᓂᖏᓐᓂᒃ ᐊᐅᓚᑦᑎᓂᖃᕐᓂᖏᓐᓂᓗ ᑲᑎᒪᔩᑦ, ᒪᓕᒃᑕᐅᑦᑎᐊᕐᓗᑎᒃ ᓄᓇᕗᒻᒥ ᓄᓇᑖᕈᑏᑦ. ᒪᕐᕉᖕᓂᒃ ᐅᑭᐅᕐᓂᒃ ᓄᖅᖃᖓᓚᐅᖅᓱᑎᒃ, ᑲᑎᒪᔩᑦ ᑲᑎᓚᐅᖅᑐᑦ ᐃᖃᓗᖕᓂ ᐊᒃᑑᐸ 2004. ᑲᑎᒪᔩᑦ ᐱᓕᕆᓲᖑᓂᖏᓐᓄᑦ ᐊᖏᖃᑎᒌᖕᓂᒃᑯᑦ ᑕᒪᕐᒥᒃ ᐱᖓᓱᑦ ᐃᓚᒌᑦ, ᑕᒪᕐᒥᑲᓴᐃᑦ ᑲᑎᒪᓂᖏᑦ ᑎᑎᕿᕆᑐᐃᓇᓚᐅᖅᑐᑦ ᓯᕗᒻᒧᐊᒃᐸᓪᓕᐊᖏᓪᖢᑎᒃ ᐱᒻᒪᕆᐅᔪᓂᒃ ᕿᑎᐊᓃᒃᑐᓂᒃ ᐃᓱᒪᓘᑕᐅᔪᓂᒃ. ᑐᙵᕕᒃᑯᑦ ᐃᓚᐅᖃᑦᑕᕈᒪᔪᓐᓃᖅᑐᑦ ᑭᓯᐊᓂ ᐱᕙᓪᓕᐊᓚᐅᕐᓗᑎᒃ ᐊᔩᖃᑎᒌᒍᓐᓇᕐᓂᖏᑦ ᓄᑖᕈᕆᐊᖅᑕᐅᓂᖏᓐᓄᑦ ᐊᑐᓕᖅᑎᑦᑎᓂᕐᒧᑦ ᑳᓐᑐᓛᖑᔪᑦ.

ᐃᖅᑲᓇᐃᔭᕐᕕᖓᓐᓂ ᐱᓕᕆᓚᐅᕐᒥᔪᑦ ᐱᒋᐊᕈᑎᒃᓴᖏᓐᓄᑦ 1998-2004-ᒧᑦ ᓇᖕᒥᓂᖅᓱᖅᑐᓄᑦ ᕿᒥᕐᕈᐊᖅᑕᐅᓂᖏᓐᓂ ᐊᖏᕈᑏ ᐊᒻᒪᓗ ᓴᓇᔭᐅᕙᓪᓕᐊᓗᑎᒃ ᐅᓂᒃᑳᓕᐊᖏᑦ ᐊᑐᓕᖅᑎᑦᑎᓯᒪᕐᓂᕐᒧᑦ ᐱᓕᕆᐊᖑᔪᓂᒃ 2001-ᒥᒃ 2004-ᒧᑦ. 2004-2005-ᒥ, ᑐᙵᕕᒃᑯᑦ ᓴᖅᑮᑲᓐᓂᖃᑕᐅᓚᐅᖅᑐᑦ ᐱᔭᕆᐊᑭᓪᓕᑎᕆᔨᓂᒃ ᐃᓛᒃᑯᑦ 23-ᒥᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᑲᑎᒪᓂᖃᑦᑎᐊᓚᐅᖅᓱᑎᒃ ᑲᔪᓯᑦᓯᐊᖅᑐᓂᒃ. ᐱᓕᕆᕝᕕᐅᔪᖅ ᓱᓕ ᐱᕙᓪᓕᐊᑎᑦᑏᓐᓇᕋᓱᐊᖃᑎᖃᕐᓂᐊᖅᐳᖅ ᒐᕙᒪᑐᖃᒃᑯᓐᓂᒃ ᐊᒻᒪᓗ ᓄᓇᓖᑦ ᒐᕙᒪᖏᓐᓂᒃ ᓯᕗᓂᓪᓛᐱᑦᑎᓐᓂ.

90% ᑲᑎᖅᓱᖅᑕᐅᓚᐅᖅᑐᑦ ᓄᐊᑕᐅᓪᓗᑎᒃ ᐊᒻᒪᓗ ᖃᕆᓴᐅᔭᒨᖅᑲᖅᑕᐅᓪᓗᑎᒃ ᖃᐅᔨᓴᕈᑎᕕᓃᑦ ᐊᑐᓕᖅᑎᑦᑎᕙᓪᓕᐊᓂᕐᒧᑦ ᖃᐅᔨᓴᕈᑎᓄᑦ ᐋᖅᑭᑦᑕᐅᓯᒪᔪᖅ (IMS). ᐊᑲᐅᓐᖏᓪᓕᐅᕈᑎᖃᒐᓛᖃᑦᑕᓚᐅᖅᑐᑦ, ᑭᓯᐊᓂ ᐋᖅᑭᑕᐅᑦᓴᐅᑎᒋᖃᑦᑕᓚᐅᖅᑐᑦ. ᐊᑐᓕᖅᑎᑦᑎᕙᓪᓕᐊᓂᕐᒧᑦ ᖃᐅᔨᓴᕈᑎᓄᑦ ᐋᖅᑭᑦᑕᐅᓯᒪᔪᖅ ᐊᑑᑎᖃᒻᒪᕆᓐᓂᐊᖅᐳᖅ ᑐᓐᖓᕕᒃᑯᑦ ᖃᐅᔨᓴᑦᓯᐊᓂᖅᓴᐅᖃᑦᑕᕈᓐᓇᕐᓂᐊᓕᕐᒪᑕ ᐱᓇᓱᐊᖅᑕᖏᓐᓂᒃ ᐊᕕᑦᑐᖅᓯᒪᓂᐅᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ.

ᖃᐅᔨᓴᕈᑏᑦ ᖃᕆᑕᐅᔭᒃᑰᕈᑎᖏᑦ ᐊᔪᕐᓇᖏᓐᓂᖅᓴᐅᓂᐊᖅᑐᑦ ᑐᙵᕕᒃᑯᓐᓄᑦ ᐊᔪᕐᓇᖏᓐᓂᖅᓴᐅᓂᐊᖅᑐᑦ ᖃᐅᔨᓴᐃᔪᓐᓇᕐᓂᕐᒥᒃ ᒪᓕᒋᐊᖃᖅᑕᖏᓐᓂᒃ ᑕᒪᕐᒥᒃ ᐃᓕᑕᕆᔭᐅᓯᒪᔪᑦ ᐃᓄᐃᑦ ᑲᑐᔾᔨᖃᑎᒌᖏᑦ.

ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᑎᓄᓪᓗ ᐊᖏᕈᑏᑦ IIBA

ᐱᓕᕆᕝᕕᐅᔪᖅ ᐊᒻᒪᓗ ᐊᕕᑦᑐᖅᓯᒪᓂᐅᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᐃᓄᐃᑦ ᑲᑐᔾᔨᖃᑎᒌᖏᑦ) ᐊᐃᕙᔾᔪᑎᖃᐃᓐᓇᖅᓯᒪᓚᐅᖅᑐᑦ ᐱᖓᓱᓂᒃ ᑕᒪᐃᓐᓄᑦ ᐃᓄᐃᑦ ᐃᑲᔫᓯᐊᖅᑖᕈᑎᒃᓴᓂᒃ ᐊᖏᕈᑎᓂᒃ IIBA ᑕᒡᕙᓂ ᐊᕐᕌᒍᒥ. ᐊᐃᕙᔾᔪᑎᒋᔭᖏᑦ ᐸᐸᑕᐅᑦᑎᐊᕆᐊᖃᖅᑐᓂ ᓄᓇᓂ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᑎᓄᓪᓗ ᐊᖏᕈᑏᑦ ᑎᑭᓕᖅᑐᑦ ᐊᖏᖃᑎᒌᒍᑎᒃᓴᓄᑦ-ᐅᒃᐱᕆᔭᐅᔪᓄᑦ. ᐸᕐᓇᓕᖅᑐᒍᑦ ᑭᖑᓪᓕᖅᐹᖅᓯᐅᑎᓂᒃ ᐊᖏᕈᑎᒃᓴᓂᒃ ᑕᒡᕙᓂ ᐊᕐᕌᒍᒥ. ᖃᐅᔨᒪᔭᐅᓗᐊᕆᐊᖃᖅᑐᑦ ᐃᓚᖃᖅᑐᑦ $8.3 ᒥᓕᔭᓐᓂᒃ ᓯᕗᓪᓕᕐᓄᑦ 7-ᓄᑦ ᐅᑭᐅᕐᓄᑦ ᐊᑐᓚᐅᕐᓂᖏᓐᓂ; $5 ᒥᓕᔭᓐ ᑐᓂᔭᐅᓂᐊᖅᑐᑦ ᐃᓄᖕᓄᑦ ᐳᓚᕋᑦᑐᓕᕆᓂᕐᒧᑦ ᐃᓕᖅᑯᓯᑐᖃᕐᓄᓪᓗ ᐸᐸᑕᐅᔪᒪᔪᓄᑦ; 4 ᒥᓕᔭᓐ ᐳᓚᕋᑦᑐᓕᕆᓂᕐᒧᑦ ᑮᓇᐅᔭᐃᑦ ᐊᑐᕐᓂᐊᖅᑐᑦ ᐃᓄᐃᑦ ᐱᕝᕕᒋᔪᓐᓇᕐᓂᐊᖅᑕᖏᑦ ᓴᓇᓂᕐᒧᑦ ᓇᖕᒥᓂᖃᕈᑎᒥᓄᑦ ᐸᕐᓇᐅᑎᓂᒃ, ᑮᓇᐅᔭᓂᒃ ᑐᒃᓯᕋᐅᑎᓂᒃ, ᐳᓚᕋᑦᑐᓕᕆᓂᕐᒧᑦ ᑕᑯᔭᒃᓴᓂᒃ; $1 ᒥᓕᔭᓐ ᐃᓕᖅᑯᓯᓕᕆᓂᕐᒧᑦ ᐱᑐᖃᕆᔭᐅᓄᓪᓗ ᑮᓇᐅᔭᖁᑎᒃᓴᐃᑦ ᐊᑐᕐᓂᐊᖅᑐᑦ ᐃᓄᖕᓄᑦ ᓈᓴᐅᓯᒪᔪᓐᓇᕐᓂᖏᓐᓂᒃ ᓄᓇᓂᒃ ᐱᒻᒪᕆᐅᔪᓂᒃ ᐃᓄᖕᓄᑦ, ᐃᓚᒋᔭᐅᓗᑎᒃ ᐅᖃᐅᓯᒃᑯᑦ ᐅᓂᒃᑳᕐᓂᖅ, ᐱᖁᑎᕕᓂᓕᕆᓂᖅ, ᐃᓄᒃᑎᑑᖅᑕᐅᓂᖏᑦ ᓄᓇᐃᑦ ᐊᑎᖏᑦ, ᐊᒻᒪᓗ ᑐᑭᓯᕚᓪᓕᕈᑎᒃᓴᐃᑦ; ᐊᒻᒪᓗ ᐊᐅᓚᑎᔨᐅᖃᑕᐅᓗᑎᒃ ᐸᐸᑕᐅᔭᕆᐊᖃᖅᑐᓂ ᓄᓇᓂ ᓄᓇᓕᖕᓂ ᓄᓇᓕᕆᔨᕋᓛᑦ ᑲᑎᒪᔨᕋᓛᖏᓐᓂᒃ CLARC.

ᓯᑕᒪᐅᔪᑦ ᑲᓇᑕᒧᑦ ᐃᓕᑕᕆᔭᐅᔪᑦ ᑰᑦ ᓄᓇᕗᒻᒥ. ᑐᙵᕕᒃᑯᑦ ᐃᓄᐃᓪᓗ ᑲᑐᔾᔨᖃᑎᒌᖏᑦ ᐊᔩᖃᑎᖃᕆᐊᖅᓯᒪᓕᖅᑐᑦ ᐃᓄᓕᕆᔨᑐᖃᒃᑯᓂᒃ ᒥᖑᐃᖅᓯᕐᕕᒃᑯᓐᓂᓗ ᑲᓇᑕᒥ, ᑭᓯᐊᓂ ᓱᓕ ᒫᓐᓇ ᖃᐅᔨᒪᓇᖏᑦᑐᖅ ᖃᓄᐃᓐᓂᐊᕐᒪᖔᑕ ᐃᑲᔫᓯᐊᒃᓴᐃᑦ. ᓂᕆᐅᖕᓇᖅᑐᖅ ᐊᔩᖃᑎᒌᒍᑕᐅᔪᑦ ᐱᔭᕇᕐᓂᐊᖅᑐᑦ ᑕᒡᕙᓂ ᐊᕐᕌᒍᒥ.

ᐊᒥᓱᓂᒃ ᐅᑭᐅᕐᓂᒃ ᐊᔪᐃᓐᓈᖃᖃᑦᑕᓚᐅᖅᑐᑎᒃ, ᒥᖑᐃᖅᓯᕐᕕᓕᕆᔨᕐᔪᐊᒃᑯᑦ ᑲᓇᑕᒥ ᐊᖏᕋᑕᐅᓚᐅᖅᑐᑦ ᐊᐃᕙᔾᔪᑎᖃᕈᓐᓇᓕᕐᓂᕋᖅᑐᑎᒃ ᐃᓄᖕᓂᒃ ᓄᓇᑐᕐᓕᕕᓂᕐᓄᑦ ᐃᓄᐃᑦ ᐊᒃᑐᖅᑕᐅᓂᐊᕐᓂᖏᓐᓄᑦ ᐃᑲᔫᓯᐊᖅᑖᕈᑎᓄᓪᓗ ᐊᖏᕈᑎᓂᒃ. 11-ᖑᒻᒪᑕ ᓄᓇᑐᕐᓕᕕᓃᑦ ᓄᓇᕗᒻᒥ. ᑐᓐᖓᕕᒃᑯᑦ ᐊᒻᒪᓗ ᐊᕕᒃᑐᖅᓯᒪᓂᐅᔪᓂ ᐃᓄᐃᑦ ᑲᑐᔾᔨᖃᑎᒋᑦ ᐱᐊᓂᓛᕆᐊᒃᓴᖅ ᓯᕗᓂᖃᑦᓯᐊᓕᖅᑐᖅ ᐱᐊᓂᒃᓯᒪᔭᕆᐊᖃᖅᓯᒪᔪᑐᖄᓗᒻᒥᒃ ᐊᖏᕈᑎᑎᒍᑦ ᓴᖅᑭᖅᓯᒪᔭᕆᐊᖃᖅᑐᑐᖄᓗᓐᓂᒃ.