ᓄᓇᕗᑦ ᑐᓐᖓᕕᒃ
ᐱᓕᕆᕝᕖᑦ
ᑕᑕᑎᒐᒃᓴᑦ ᐊᒻᒪᓗ ᑐᓴᕈᑏᑦ
ᓄᓇᕗᑦ ᑐᓐᖓᕕᒃ
ᐱᓕᕆᕝᕖᑦ
ᑕᑕᑎᒐᒃᓴᑦ ᐊᒻᒪᓗ ᑐᓴᕈᑏᑦ
ᐊᐅᓚᑦᑎᔨᒥᒃ ᐃᖅᑲᓇᐃᔭᖅᑎᑖᖅᓱᑎᒃ ᐊᖓᔪᖅᑲᐅᑎᓂ, ᐃᑲᔪᖅᑎᖏᓐᓂᓗ, ᖃᐅᔨᓴᖅᑕᐅᓚᐅᖅᑐᑦ ᑮᓇᐅᔭᓕᐊᖑᕙᒃᑐᓂᒃ ᕿᒥᕐᕈᐊᖃᑦᑕᕐᓂᖅ ᐊᕐᕌᒍᑕᒫᖅ ᑕᐃᒫᒃ ᑐᙵᕕᒃᑯᑦ ᐃᖅᑲᓇᐃᔭᕐᕕᐅᔪᒥᓇᐃᓐᓇᕐᓂᐊᕐᒪᑕ. ᕿᒥᕐᕈᐊᖅᑕᐅᔪᓂ ᓴᖅᑭᑦᑎᓕᓚᐅᖅᑐᑦ ᓇᓂᓕᒫᖅ ᐊᑐᖅᑕᐅᕙᒃᑐᓂ ᐱᖅᑯᓯᕐᓂ ᒪᓕᒐᖃᖅᑎᑦᑎᓂᖅ ᐊᒻᒪᓗ ᓴᖅᑭᐸᓪᓕᐊᓚᐅᖅᑐᑦ ᑕᒫᙵᑦ ᐃᖅᑲᓇᐃᔭᖅᑏᑦ ᐊᑑᑎᖃᕐᓂᖏᓐᓂᒃ ᑎᒥᐅᔪᓂ ᐊᒻᒪᓗ ᐃᖅᑲᓇᐃᔮᒃᓴᐃᑦ ᖃᓄᐃᓕᖓᓂᖏᓐᓂ ᓄᓇᕗᒻᒥ.
2004/2005-ᒥ, ᐱᒻᒪᕆᐅᔪᑦ ᐊᓯᔾᔨᖅᑕᐅᓚᐅᖅᑐᑦ ᖃᓄᐃᓕᐅᕈᑕᐅᕙᒃᑐᓂ ᓴᖅᑭᑦᑎᓂᕐᒧᑦ ᓇᓗᓇᐃᖅᑕᐅᓯᒪᔪᓂ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ:
ᑐᑭᒧᐊᒍᑎᒃᓴᓕᐅᖅᐸᓪᓕᐊᓂᕐᒧᑦ, ᐃᖅᑲᓇᐃᔭᖅᑐᓕᕆᔨᒃᑯᑦ ᐃᖅᑲᓇᐃᔭᖅᑎᖏᑦ ᐱᓕᒻᒪᒃᓴᖅᑎᑕᐅᓚᐅᖅᐳᑦ ᐃᓕᓐᓂᐊᖃᑕᐅᓪᓗᑎᒃ ᒪᓂᒪᓐᖏᑦᑐᒥᒃ ᐸᒡᕕᓴᒃᑕᐅᔭᕆᐊᖃᖏᓐᓂᕐᒥᒃ ᐱᔾᔪᑎᖃᖅᑐᓂ ᐊᒻᒪᓗ ᑲᑎᒪᔩᑦ ᐊᑐᐊᒐᖏᓐᓂᒃ. ᑕᒪᕐᒥᒃ ᐃᖃᓇᐃᔭᖅᑏᑦ ᐃᓕᓐᓂᐊᓚᐅᕐᒥᔪᑦ ᐱᓂᕐᓗᒃᑎᑦᑎᑕᐃᓕᒪᓂᕐᒥᒃ ᐃᖅᑲᓇᐃᔭᕐᕕᖕᒥ ᐱᔮᕆᔭᐅᖃᑦᑕᕆᖃᖏᓐᓂᖏᓐᓂ ᐊᒻᒪᓗ ᐋᓂᖅᑕᐅᓯᒪᖃᑕᕐᓂᕐᒥᒃ ᐱᔾᔪᑎᖃᖅᑐᓂᒃ, ᓄᕕᐱᕆ 2004-ᒥ. ᐃᓕᓐᓂᐊᒃᑲᓐᓂᕐᓂᐊᖅᑐᑦ ᑐᙵᕕᒃᑯᑦ ᐊᓯᖏᑦ ᐃᖃᓇᐃᔭᖅᑎᖏᑦ ᓄᑖᒥ ᐊᕐᕌᒎᓂᐊᖅᑐᒥ. ᑐᑭᓯᒋᐊᕈᑎᒃᓴᐃᑦ ᐅᖃᓕᒫᒐᕋᓛᑦ ᓴᓇᔭᐅᓂᐊᖅᑐᑦ ᐃᖅᑲᓇᐃᔭᖅᑏᑦ ᖃᐅᔨᒪᔾᔪᑎᒃᓴᖏᓐᓂᒃ ᖃᓄᐃᓕᐅᕈᓐᓇᕐᒪᖔᑕ ᐱᔮᕆᔭᐅᖃᑦᑕᕈᑎᒃ/ᐸᒡᕕᓴᒃᑕᐅᖃᑦᑕᕈᑎᒃ ᐅᕙᓘᓐᓃᑦ ᐅᖃᐅᓯᖃᕈᒪᒍᑎᒃ. ᑎᑎᖃᐃᑦ ᐃᓄᒃᑎᑑᖓᓕᖅᑕᐅᓂᐊᖅᑐᑦ.
ᐃᖅᑲᓇᐃᔭᖅᑏᑦ ᓴᓇᓚᐅᖅᑐᑦ ᐃᖅᑲᓇᐃᔭᖅᑎᓕᕆᓂᕐᒧᑦ ᐊᐅᓚᑦᑎᓂᕐᒥᒃ ᖃᕆᑕᐅᔭᒃᑯᑦ ᑐᑭᓯᓂᐊᕐᕕᖕᓂᒃ. ᐱᖓᓱᑦ ᐃᖅᑲᓇᐃᔭᖅᑏᑦ ᐃᓕᓐᓂᐊᓚᐅᖅᑐᑦ Abra Suites ᓄᕕᐱᕆ 2004-ᒥ. Abra Suites ᐊᑐᖅᑕᐅᕙᓕᖅᑐᑦ ᑮᓇᐅᔭᓕᕆᔨᒃᑯᓐᓄᑦ ᐃᖃᓇᐃᔭᖅᑎᓕᕆᔨᒃᑯᓐᓄᓪᓗ.
ᐃᓱᒪᒋᓪᓗᒋᑦ ᐱᐅᓯᒋᐊᖅᑕᐅᓂᖏᑦ ᐱᔨᑦᑎᕋᐅᑏᑦ ᑐᙵᕕᒃᑯᑦ ᐃᖃᓇᐃᔭᕐᕕᖏᓐᓂ, ᒪᕐᕉᒃ ᐃᖅᑲᓇᐃᔭᖅᑎᓕᕆᔩᒃ ᐃᓚᐅᓚᐅᖅᑐᑦ ᐱᔪᓐᓇᖅᓯᑐᐊᕈᑎᒃ ᐸᕐᓇᐅᑎᓂᒃ ᐃᖅᑲᓇᐃᔮᓄᑦ ᖃᐅᔨᓴᕐᓂᕐᒥᒃ Hay Plan Job ᐊᖓᔪᖃᐅᑎᓄᑦ ᐊᑐᖅᑕᐅᕙᒃᑐᑦ ᐃᑲᔫᑏᑦ, ᐃᖅᑲᓇᐃᔭᖃᖅᑐᑦ ᖃᐅᔨᓴᖅᑕᐅᔾᔪᑎᖏᓐᓂᒃ ᐃᓕᓐᓂᐊᖅᑎᑕᐅᔪᓂ ᔪᓚᐃ 2004. ᑐᒡᓕᐊᓂ ᖃᓄᐃᓕᐅᖅᑕᐅᓯᒪᔭᕆᖃᖅᑐᓂ ᓴᖅᑭᑕᐅᔪᓂ, ᑕᑯᓇᖅᑕᐅᓯᒪᖕᒪᑕ ᐃᖅᑲᓇᐃᔭᖅᑏᑦ ᐃᓕᓐᓂᐊᖅᑎᑕᐅᓂᖏᓐᓂ, 9 ᐃᖅᑲᓇᐃᔭᖅᑏᑦ ᐱᔭᕇᓚᐅᖅᑐᑦ ᐃᓕᓐᓂᐊᖅᑎᑦᑎᕙᓪᓕᐊᔾᔪᑎᒃᓴᓂᒃ ᐸᕐᓇᐅᑎᓂᒃ ᐊᑐᓂ. 9-ᖑᔪᓂᒃ, 8-ᖑᔪᑦ ᐃᓕᓐᓂᐊᕈᑎᒃᓴᖅᑖᓚᐅᖅᑐᑦ ᑮᓇᐅᔭᓂᒃ ᐊᓯᐊᓂᖔᖅᑐᓂᒃ. ᐊᓯᖓ ᐃᖅᑲᓇᐃᔭᕐᕕᐅᔪᖅ ᐃᖃᓇᐃᔭᖅᑎᑦᑎᓚᐅᖅᑐᑦ ᓯᓚᑖᓂᒃ ᑐᑭᓯᓂᐊᖅᑎᓂᒃ ᓴᖅᑭᑦᑎᖁᓪᓗᒋᑦ ᐃᖅᑲᓇᐃᔭᕐᕕᖕᓂ ᐃᓕᓐᓂᐊᕈᑎᒃᓴᓂᒃ ᐸᕐᓇᐅᑎᓂᒃ.
ᐱᖓᔪᐊᓐᓂ ᑐᑭᒧᐊᒍᑎᒃᓴᓕᐊᖑᔪᓂ ᓴᖅᑭᑦᑕᕆᐊᖃᖅᑐᓂ, ᐃᓄᐃᑦ ᐃᖅᑲᓇᐃᔭᖅᑏᑦ ᐊᒥᓱᕈᕆᐊᖅᑕᐅᔭᕆᐊᖃᕐᓂᖏᓐᓂ ᐃᓄᐃᑦ ᐊᒥᓲᓂᖏᑦ ᒪᓕᒃᑕᐅᓗᑎᒃ, ᓈᓴᖅᑕᐅᔪᑦ ᑐᑭᓯᓇᖅᓯᓚᐅᖅᑐᑦ ᐊᐃᕆᓕᒥ 2005 75-ᖏᓃᑦᑐᑦ ᑐᙵᕕᒃᑯᑦ ᐃᖅᑲᓇᐃᔭᖅᑎᖏᑦ ᐃᓅᔪᑦ. 61% ᐊᐅᓚᑦᑎᔨᐅᖃᑕᐅᔪᓂᒃ ᐃᖅᑲᓇᐃᔮᖃᖅᑐᑦ, ᐊᕐᓇᐃᓪᓗ 49-ᒥᒃ ᐃᖅᑲᓇᐃᔮᖃᖅᓱᑎᒃ ᑐᙵᕕᒃᑯᓐᓂ. ᑕᒪᕐᒥᒃ ᐃᖅᑲᓇᐃᔮᕐᕖᑦ ᑐᙵᕕᒃᑯᓐᓂ ᓴᓇᔭᕆᐊᖃᖅᑐᑦ ᐃᓄᖕᓂᒃ ᐃᖅᑲᓇᐃᔮᖅᑖᖅᑎᑦᑎᔭᕆᐊᖃᕐᓂᕐᒧᑦ ᐸᕐᓇᐅᑎᓂᒃ, ᓄᑖᒥ ᐊᕐᕌᒍᒥ. ᐃᖅᑲᓇᐃᔭᖅᑎᓕᕆᔨᒃᑯᑦ ᐃᑲᔪᕐᓂᐊᖅᑐᑦ ᓴᓇᔭᐅᓂᖏᓐᓂ ᐸᕐᓇᐅᑏᑦ.
ᑮᓇᐅᔭᓄᑦ ᐊᕐᕌᒍᒥ 2004/2005, ᐃᖅᑲᓇᐃᔮᖅᑖᒐᒃᓴᐃᑦ ᑲᒪᒋᔭᐅᓚᐅᖅᑐᑦ ᐃᖅᑲᓇᐃᔭᖅᑎᓕᕆᔨᒃᑯᓐᓄᑦ 22-ᖑᓪᓗᑎᒃ ᐆᒃᑐᖃᑕᐅᔪᑦ ᐃᓄᖕᓄᑦ ᐱᔭᐅᓪᓗᑎᒃ.
ᐃᖅᑲᓇᐃᔭᕐᕕᖕᒥ ᑲᒪᔨᐅᖕᒥᔪᑦ ᐊᑐᐃᓐᓇᐅᓂᖏᓐᓂᒃ ᐊᒥᓱᒐᓴᐃᑦ ᓄᓇᕗᒥᐅᑦ ᐃᓄᐃᑦ ᐱᖃᑦᑕᕆᐊᖃᖅᑕᖏᓐᓂᒃ. ᐊᑐᖅᑕᐅᕙᒃᑐᑦ ᐃᓄᖕᓄᑦ ᐃᑲᔪᕐᓂᖏᓪᓗ ᑐᙵᕕᒃᑯᑦ ᐃᓄᖕᓄᑦ ᒪᑯᓂᖓ ᐃᓚᖃᖅᑐᑦ:
ᐃᓛᒃᑯᑦ 35 ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂᒃ ᐊᐅᓚᑦᑎᔾᔪᑕᐅᖕᒪᑕ ᐊᑎᓕᐅᖅᑕᐅᔪᓕᕆᓂᕐᒧᑦ ᐃᖅᑲᓇᐃᔮᓂᒃ. ᑐᙵᕕᒃᑯᑦ ᑲᒪᔨᐅᔪᑦ ᐸᐸᑦᑎᓂᕐᒥᒃ ᐃᓄᐃᑦ ᐊᑎᓕᐅᖅᑕᐅᓯᒪᓂᖏᓐᓂᒃ ᓄᓇᑖᖃᑕᐅᓯᒪᔪᓂᒃ. ᐅᓪᓗᒥᒧᑦ, ᐊᑎᓕᐅᖅᑕᐅᓯᒪᓕᖅᑐᑦ 24,700 ᐃᓄᐃᑦ ᓄᓇᑖᖃᑕᐅᓯᒪᔪᑦ ᖃᕆᑕᐅᔭᒃᑯᑦ ᐃᓕᐅᖃᖅᑕᐅᓯᒪᔪᓂ.
ᓄᑖᑦ ᓄᓇᑖᖃᑕᐅᓯᒪᔪᓄᑦ ᐊᐅᒃᑕᔫᒃ ᓴᓇᔭᐅᓚᐅᖅᑐᑦ ᑐᓴᒐᒃᓴᐅᓪᓗᑎᒡᓗ ᐊᑐᐃᓐᓇᐅᓂᖏᓐᓂᒃ. ᐆᒃᑐᖄᖃᑦᑕᕆᐊᖃᕐᒪᑕ ᐃᓄᐃᑦ ᓄᓇᑖᖃᑕᐅᓯᒪᔪᑦ ᑐᙵᕕᑯᓐᓄᑦ ᑕᒻᒪᖅᓯᒪᖁᓇᒋᑦ ᐊᑎᖏᑦᑕ ᑎᑎᕋᕐᓯᒪᓂᖏᑦ, ᐃᓄᕕᕕᓂᖏᑦ ᐊᒻᒪᓗ ᑐᕌᕈᑎᖏᑦ. ᑕᐃᒪᐃᑦᑐᓐᓇᖅᑐᑦ ᑐᙵᕕᒃᑯᑦ ᐊᑎᓕᐅᖅᑕᐅᕕᓕᕆᔨᒃᑯᖏᑦ ᐅᖄᓚᕕᐅᓗᑎᒃ ᓇᖕᒥᓂᖅ, ᐅᕙᓘᓐᓃᑦ ᐅᖃᖃᑎᒋᓗᒋᑦ ᓄᓇᓕᖕᓂ ᓄᓇᑖᖅᓯᒪᔪᓕᕆᔩᑦ. ᓄᑕᑦ ᐸᐸᑕᒐᐃᑦ ᓴᓇᔾᔪᑎᖏᑦ ᓂᐅᕕᖅᑕᐅᓚᐅᖅᑐᑦ ᑐᙵᕕᒃᑯᓪᓗ ᓂᕆᐅᒃᑐᑦ ᑎᑎᕋᖅᑕᐅᔪᓐᓇᕐᓂᐊᕐᓂᖏᓐᓂᒃ ᑐᓂᐅᖃᖅᑕᐅᒋᐊᕐᓗᑎᒡ ᓗ ᓄᑖᑦ ᐊᑎᓕᐅᖅᑕᐅᓯᒪᔪᑏᑦ ᐊᐅᔭᖅ. ᑕᒪᕐᒥᒃ ᓄᓇᕗᒻᒥ ᓄᓇᓖᑦ ᓄᓇᓕᖏᓐᓂ ᐊᑎᓕᐅᖅᑕᐅᕕ ᑲᑎᒪᔨᕋᓛᖃᖅᑐᑦ ᑲᑎᒪᐃᓐᓇᓲᖑᓪᓗᑎᒃ ᕿᒥᕐᕈᐊᕐᓂᐊᕐᓗᒋᑦ ᓄᑖᓂᒃ ᐆᒃᑐᕈᑏᑦ.
ᓄᓇᕗᒻᒥ ᐊᑎᓕᐅᖅᑕᐅᓯᒪᓂᕐᒧᑦ ᐅᓐᓂᓗᕝᕖᑦ ᑲᑎᒪᔨᕋᓛᖏᑦ ᑲᑎᒪᓚᐅᖏᑦᑐᑦ ᑕᒡᕙᓂ ᐊᕐᕌᒍᒥ, ᓴᖑᓐᓂᐊᖅᑐᖃᖅᓯᒪᖏᒪᑦ ᐊᓯᔾᔨᖅᑕᐅᖁᔨᔪᒥᒃ. ᑐᑭᓯᓂᐊᕈᑎᒃᓴᐃᑦ ᐊᑎᓕᐅᖅᑕᐅᖃᑦᑕᕐᓂᕐᒧᑦ ᐊᑐᐃᓐᓇᐅᔪᑦ ᓱᓕ ᑐᙵᕕᒃᑯᑦ ᖃᕆᑕᐅᔭᒃᑯᑦ ᐅᐸᒃᑕᕐᕕᖓᓂᒃ. ᑐᑭᓯᓂᐊᕈᑎᒃᓴᐃᑦ ᐃᓚᖃᖅᑐᑦ ᐅᓐᓂᓗᒡᕕᐅᔪᓐᓇᖅᑐᓂᒃ ᑲᑎᒪᔨᓂᒃ, ᐊᒥᓱᓂᒃ ᑕᑕᑎᕆᐊᓕᖕᓂᒃ ᐊᑎᓕᐅᖅᑕᐅᔪᒪᓂᖅ ᐊᓯᖏᓂᓗ ᐊᑐᕆᐊᖃᖅᑐᓂᒃ ᐊᑎᓕᐅᖅᑕᐅᔪᒪᓂᕐᒧᑦ.
ᑖᒃᑯᐊ ᐋᖅᑭᐅᒪᕙᒌᖅᑐᑦ ᐊᑐᖅᐸᒃᑐᑦ ᑕᕿᑕᒫᖅ ᑮᓇᐅᔭᖅᑖᕈᑎᒃᓴᖏᓐᓂᒃ ᐃᓄᐃᑦ ᐃᓐᓇᑐᖃᐃᑦ ᐃᓅᓂᑯᐃᑦ ᓯᕗᓂᐊᒍᑦ ᐅᓪᓗᖓᓂᓘᓐᓃᑦ ᑎᓯᐱᕆ 31, 1948. ᑕᕿᑕᒫᖅ ᐱᔭᐅᕙᒃᑐᑦ ᐊᔾᔨᒌᖃᑦᑕᖏᒻᒪᑕ $90-ᒥᒃ $150-ᒧᑦ ᑕᕿᑕᒪᖅ. ᒪᓕᒃᑕᐅᓪᓗᑎᒃ 2004-ᒥ ᐅᓪᓗᖅᓯᐅᑏᑦ, $2,984,475 ᑐᓂᐅᖃᖅᑕᐅᓚᐅᖅᑐᑦ ᖃᓂᒋᔭᖏᓐᓃᑦᑐᓄᑦ ᐃᓐᓇᑐᖃᕐᓄᑦ 1,755-ᓂᒃ.
ᑖᑯᓇᓂ ᐊᑐᖅᑕᐅᕙᒃᑐᓂ, ᐱᖁᑎᑖᕈᓐᓇᖅᑐᑦ ᐃᓄᐃᑦ ᐊᖑᓇᓱᒃᑎᓪᓚᕆᑐᐃᓐᓇᐃᑦ ᓄᓇᕗᒻᒥ ᐆᒪᔪᕐᓂᒃ, ᒪᓕᒐᐃᑦ ᒪᓕᒃᑕᐅᓪᓗᑎᒃ ᓴᓇᔭᐅᓯᒪᔪᑦ ᑐᙵᕕᒃᑯᑦ ᑲᑎᒪᔨᓕᒫᖏᓐᓄᑦ. ᐊᕐᕌᒍᒥ 2003, ᑲᑎᓪᓗᒋᑦ 5,843-ᖑᓚᐅᖅᑐᑦ ᐱᖁᑏᑦ ᒥᑭᓐᓂᖅᓴᐃᑦ ᐊᒻᒪᓗ 265 ᐊᖏᔫᑏᑦ ᐱᖁᑏᑦ ᐱᔭᐅᓪᓗᑎᒃ ᓄᓇᕗᒻᒥ, ᐊᑭᖃᖅᓱᑎᒃ $3,314,303.
ᑖᑯᓇᓂ ᐊᑐᖅᑕᐅᓚᐅᖅᑐᑦ ᐊᐅᓛᕈᑎᒃᓴᓄᑦ ᒪᕐᕉᖕᓂᒃ ᓄᓇᕗᒥᐅᓂ ᐃᓚᐃᖅᑐᓂ ᐃᓗᕕᖅᑕᐅᔭᖅᑐᖅᑐᓂ ᓇᒡᓕᒋᔭᖏᓐᓂ ᓄᓇᕗᒻᒥ.
ᑖᑯᓇᓂ ᐊᑐᖅᑕᐅᓚᐅᖅᑐᑦ ᐃᑲᔫᑏᑦ ᒪᕐᕉᖕᓄᑦ ᖃᑕᖑᑎᒌᖕᓄᑦ ᓇᒡᓕᒋᔭᖏᑦ ᑕᑯᔭᖅᑐᕈᑎᒃᓴᖏᓐᓂ ᐃᓅᔪᓐᓃᕐᓂᐊᓕᖅᑐᓂ. ᑖᒃᑯᓇᓂ ᐊᑐᖅᑕᐅᓲᓂ, ᐱᔪᓐᓇᐅᖅᑐᑦ 10-ᖏᓐᓂᒃ ᑮᓇᐅᔭᐃᑦ ᐊᑐᖅᑐᒃᓴᐃ ᐃᓄᖕᓄᑦ ᐃᓗᕕᕐᓄᖓᐅᔾᔪᑎᓄᑦ ᖃᓗᓈᓃᑦᑐᓄᑦ.
ᑲᑎᓪᓗᒋᑦ ᐊᑐᖅᑐᒃᓴᐃᑦ ᐊᒃᓱᕈᕐᓇᖅᑐᒃᑰᖅᑐᓄᑦ ᐊᒻᒪᓗ ᐃᓅᔪᓃᖅᑐᖃᕐᓂᐊᖅᑎᓪᓗᒍ ᐊᐅᓛᕈᑎᒃᓴᐃᑦ ᐋᖅᑭᒃᓯᒪᔪᑦ $452,000. ᕕᕗᐊᕆ 2005-ᖑᓕᖅᑎᓪᓗᒍ, ᖃᓂᒋᔭᖏᓐᓃᑦᑐᑦ 350 ᐃᓄᐃᑦ ᐅᕙᓘᓐᓃᑦ 168 ᖃᑕᖑᑎᒌᒃᑐᑦ ᐃᑲᔪᖅᑕᐅᓚᐅᖅᑐᑦ ᑲᑎᓪᓗᒋᑦ ᐊᑭᖃᖅᑐᓂᒃ $452,000.
ᑖᑯᓇᓂ ᐊᑐᖅᑕᐅᕙᒃᑐᓂ ᓇᓪᓕᐅᒃᑯᒫᒃᓴᖃᖅᑎᑕᐅᔪᑦ ᓄᓇᑖᖃᑕᐅᓯᒪᔪᑦ ᐊᓯᖏᓐᓂᒃ ᓇᓪᓕᐅᒃᑯᒫᒃᓴᖃᖏᑦᑐᓂ, ᐱᔮᖁᑕᐅᖏᑦᑐᒥᒃ ᐃᓅᔪᓃᖅᑐᖃᖅᑎᓪᓗᒍ ᐊᒻᒪᓗ ᑎᒥᖓᓂᒃ ᐃᓚᖓᖅᑐᖃᖅᑎᓪᓗᒍ. 2004-ᒥ, 14-ᖑᔪᑦ ᐆᒃᑐᓚᐅᖅᑐᑦ ᐃᑲᔫᓯᐊᖅᑖᕈᒪᔪᑦ ᐊᒻᒪᓗ ᐊᑕᐅᓯᖅ ᑎᒥᒥᒍᑦ ᐃᓚᓐᖓᖅᑐᖅ ᐊᑭᓕᖅᑕᐅᓚᐅᖅᑐᑦ. ᐱᖓᓱᑦ ᓱᓕ ᐆᒃᑐᕈᑏᑦ ᑲᒪᒋᔭᐅᖕᒪᑕ ᐊᒻᒪᓗ ᓯᑕᒪᐃᑦ ᐊᖏᖅᑕᐅᖏᓪᖢᑎᒃ. ᐊᕐᕌᒍᒥ 2005, ᐱᖓᓱᑦ ᓱᓕ ᐊᑭᓕᖅᑕᐅᓯᒫᓂᖏᑦᑐᑦ ᐆᒃᑐᕈᑏᑦ.
ᑐᙵᕕᒃᑯᑦ ᑐᓂᓯᓚᐅᖅᑐᑦ $25,000-ᓂᒃ ᐊᕐᕌᒍᑕᒫᖅ ᓄᓇᕗᒻᒥ ᐃᓕᓐᓂᐊᕆᐊᕈᑎᒃᓴᓂᒃ ᐊᐅᓚᑕᐅᔪᓂᒃ ᓄᓇᕗᒻᒥ ᐃᓕᓐᓂᐊᕈᑎᒃᓴᓕᕆᔨᒃᑯᑦ ᑲᑎᒪᔨᖏᑎᒍᑦ.
ᑖᒃᑯᐊ ᐊᑐᖅᑕᐅᕙᒃᑐᑦ ᑐᓂᓯᓲᑦ ᓄᓇᑖᖃᑕᐅᓯᒪᔪᓂᒃ ᐊᑎᓕᐅᖅᑕᐅᓯᒪᓕᖅᑐᓂᒃ ᐃᓕᓐᓂᐊᕌᓂᒃᓯᒪᔪᑦ ᐃᓕᓐᓂᐊᒃᑲᓐᓂᕐᕕᒃᓴᖏᓐᓂ ᑎᑭᐅᒪᔪᓂᒃ $2,400 ᐊᕐᕌᒍᑕᒫᖅ, ᒪᓕᒐᐃᑦ ᒪᓕᒃᑕᐅᓪᓗᑎᒃ ᐋᖅᑭᒃᑕᐅᓯᒪᔪᑦ ᓄᓇᕗᒻᒥ ᐃᓕᓐᓂᐊᕈᑎᒃᓴᓕᕆᔩᑦ ᑲᑎᒪᔨᖏᓐᓄᑦ. 2004/2005-ᒥ, 141 ᐃᓄᐃᑦ ᐆᒃᑐᖃᑕᐅᓚᐅᖅᑐᑦ ᐃᓕᓐᓂᐊᒃᑲᓐᓂᕈᑎᒃᓴᓄᑦ ᐊᒻᒪᓗ 118 ᐊᖏᖅᑕᐅᓪᓗᑎᒃ.
Lester B. Pearson College ᓕᐊᔅᑐ ᐱ. ᐱᐅᓴᓐ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕈᑎᒃᓴᐃᑦ
ᑐᙵᕕᒃᑯᑦ ᐊᑭᓖᓲᖑᖕᒪᑕ ᓄᓇᑖᖃᑕᐅᓯᒪᔪᓂᒃ ᐃᓕᓐᓂᐊᕌᓂᒃᓯᒪᔪᑦ ᐃᓕᓐᓂᐊᒃᑲᓐᓂᕈᑎᒃᓴᖏᓐᓂᒃ ᓕᐊᔅᑐ ᐱ. ᐱᐅᓴᓐ ᓯᓚᑦᑐᖅᓴᕐᕕᖓᓂ ᕕᒃᑐᐊᕆᔭ, ᐳᕆᑎᔅ ᑲᓚᒻᐱᔭᒥ. ᑐᙵᕕᒃᑯᓐᓄᑦ ᐊᑭᖃᓚᐅᖅᑐᖅ $35,000 ᐊᕐᕌᒍᑕᒫᖅ. ᐃᓕᓐᓂᐊᕈᑎᒃᓴᓂᒃ ᓂᐅᕕᐅᑎᒃᓴᓄᑦ ᑎᑭᓯᒪᔪᓂᒃ $25,000 ᐊᒻᒪᓗ ᐊᐅᓛᕈᑎᒃᓴᓂᒃ ᐊᑭᖃᖅᑐᓂᒃ ᑎᑭᐅᒪᔪᓂᒃ 10,000-ᓂᒃ ᐊᕐᕌᒍᑕᒫᖅ.
ᐱᑖᓚᐅᖅᑐᖅ ᐃᓕᓐᓂᐊᒃᑲᓐᓂᕈᑎᒃᓴᓂᒃ 2004/2005-ᒥ ᐃᓕᓐᓂᐊᕐᓇᒥ, ᓇᑖᓴ ᑕᑦᑐᐃᓂ ᐊᕐᕕᐊᓂ. ᒥᔅᑕ ᑕᑦᑐᐃᓂ ᐃᓕᓐᓂᐊᕌᓂᓚᐅᕐᒪᑦ ᒍᕇᑦ 10-ᒥᒃ ᐃᓚᐅᓚᐅᕆᓪᓗᓂ ᑲᑎᖃᑎᒌᒃᑐᓂ 500, ᑐᓴᕋᓈᖅᑏᑦ ᓂᐅᕙᓐᓛᓐᒥ; 2004-ᒥ ᐅᑭᐅᑯᑦ ᐱᖑᐊᕐᕕᒡᔪᐊᕐᓂᕐᒥ; ᑲᑎᖃᑎᒌᒃᑐᓂ ᑲᓇᑕᒥ; ᐃᓚᐅᓪᓗᓂᓗ ᐅᓇᑕᖅᑐᕕᓃᑦ ᐃᓕᑕᕆᔭᐅᓂᖏᓐᓂᒃ ᓄᐊᒪᓐᑎ, ᕗᕌᓐᔅᒥ. ᒥᔅ ᑕᑦᑐᐃᓐᓂ ᑲᔪᓰᓐᓇᓚᐅᖅᑐᖅ 80-ᓕᖕᓂᒃ ᐃᓕᓐᓂᐊᖅᑕᒥᓂ ᐊᒻᒪᓗ ᓴᖏᓂᖃᕐᓂᖓ ᐃᓕᖅᑯᓯᑐᖃᕐᒥᓂ ᑕᑯᓐᓇᖅᓱᑎᒃ ᐃᓄᐃᑦ ᐃᓕᖅᑯᓯᖏᓐᓂ. ᐃᓕᓐᓂᐊᕈᑎᒃᓴᐃ ᐊᑐᐃᓐᓇᐅᓛᓕᕐᒥᔪᑦ ᐅᐱᖔᒃᑯᑦ 2006/2007-ᒥ ᐅᑭᐊᒃᓵᖅ ᐃᓕᓐᓂᐊᕐᕕᐅᔪᒫᖅᑐᒥ.
ᑖᒃᑯᐊ ᐊᑐᖅᑕᐅᕙᒃᑐᑦ ᐊᑕᐅᓰᖅᑕᐅᓪᓗᑎᒃ ᐃᑲᔪᖅᑕᐅᔪᓐᓇᕐᓂᖅ $500-ᓂᒃ ᐃᓄᖕᒧᑦ ᐅᕙᓘᓐᓃᑦ $5,000-ᓂᒃ ᑎᒥᐅᔪᓄᑦ ᐊᑕᐅᑎᒃᑰᖅᑐᓄᑦ ᑕᑯᔭᖅᑐᐃᓂᖏᓐᓄᑦ ᓄᓇᑐᖃᕐᒥᓂᒃ ᓄᓇᕗᒻᒥ. ᐊᐃᕆᓕ 1, 2004-ᒥᒃ ᐅᓪᓗᒥᒧᑦ, ᑐᙵᕕᒃᑯᑦ ᐃᑲᔪᓚᐅᖅᑐᑦ 350-ᓂᒃ ᐃᓄᖕᓂᒃ, ᐊᑭᖃᓚᐅᖅᑐᓂᒃ $150,000-ᓂᒃ.
ᑐᙵᕕᒃᑯᑦ ᑐᓂᓯᓚᐅᖅᑐᑦ ᑎᑭᐅᒪᔪᓂᒃ $1,000-ᓂᒃ ᐊᑐᓂ ᐱᖑᐊᖅᑎᑦᑎᓂᕐᒧᑦ ᓄᓇᓕᖕᓂ ᓄᓇᕗᒻᒥ. ᑐᓂᔭᐅᓚᐅᖅᑐᑦ ᐊᑐᓂ $500 ᓄᓇᓕᖕᒧᑦ ᕼᐊᒻᓚᑦᑯᑦ ᐅᓪᓗᖓᓄᑦ; $1,000 ᐊᑐᓂ ᓄᓇᓕᖕᒧᑦ ᓄᓇᕗᑦ ᐅᓪᓗᖓᓄᑦ; $500 ᐊᑐᓂ ᓄᓇᓕᖕᒧᑦ ᖁᕕᐊᓱᖕᓇᒧᑦ ᓄᑖᒧᓪᓗ ᐊᕐᕌᒍᒧᑦ. ᑖᑯᐊ ᑮᓇᐅᔭᒃᓴᖃᖅᑎᑕᐅᔪᑦ ᐊᕐᕌᒍᑕᒫᖅ $50,000-ᓂᒃ.
ᓄᓇᕗᑦ ᑐᙵᕕᒃᑯᑦ ᐃᑲᔫᑎᖏᑦ ᑖᑯᐊ ᑮᓇᐅᔭᐃᑦ ᐊᑐᖅᑕᐅᕙᒃᑐᑦ $1,000-ᓂᒃ ᐱᖑᐊᖅᑎᑦᑎᓂᐊᖅᑐᓂ ᐃᓄᐃᑦ ᑎᒥᐅᔪᓪᓘᓐᓃᑦ ᐃᓚᒋᔭᐅᔪᑦ ᐃᓕᖅᑯᓯᑐᖃᕐᓂᒃ ᐊᑐᕈᒪᓂᕐᒧᑦ ᖁᕕᐊᓱᒃᑎᑦᑎᓂᐊᖅᑐᓂ. ᐊᐃᕆᓕ 1, 2004-ᒥ ᐱᒋᐊᕐᓗᑎᒃ ᑐᙵᕕᒃᑯᑦ ᐃᑲᔪᓚᐅᖅᑐᑦ ᐃᑲᔫᑎᓂᒃ 85-ᓄᑦ ᐃᓄᖕᓄᑦ/ᑎᒥᐅᔪᓄᑦ ᑐᓂᐅᖃᐃᓪᓗᑎᒃ $66,252.
ᑐᓐᖓᕕᒃᑯᑦ ᑐᓂᓯᓚᐅᖅᑐᑦ $85,000-ᓂᒃ ᐋᑐᕚᒦᑦᑐᓐᓄᑦ. ᑖᒃᑯᓇᓂ ᐃᓕᓐᓂᐊᕈᑎᒃᓴᐃᑦ ᖁᑦᑎᖕᓂᖅᓴᓂᒃ ᐃᓕᓐᓂᐊᕐᓂᐊᖅᑐᓂᒃ ᓄᓇᑖᖃᑕᐅᓯᒪᔪᓄᑦ ᐊᔪᖏᑕᐅᔭᕆᐊᓖᑦ ᐊᔪᕈᓃᕈᑎᒃᓴᖏᓐᓄᑦ ᓯᓚᑦᑐᖅᓴᕐᕕᖕᓄᐊᕈᓐᓇᕐᓂᐊᕐᒪᑕ, ᐊᒻᒪᓗ ᐃᓕᓐᓂᐊᖅᑎᑕᐅᖃᑕᖅᓱᑎᒃ ᖃᓄᖅ ᐱᒋᐊᖓᓚᐅᖅᓯᒪᖕᒪ!ᖓᑦ ᐊᑐᖅᑕᐅᓂᖏᓐᓂᓗ ᓄᓇᕗᒻᒥ ᓄᓇᑖᕈᑏᑦ ᐊᖏᕈᑎᖏᑦ. 20 ᐃᓄᐃᑦ ᐊᖏᖅᑕᐅᖃᑦᑕᖅᑐᑦ ᐊᕐᕌᒍᑕᒫᖅ ᐃᓕᓐᓂᐊᕈᑎᒃᓴᖏᓐᓄᑦ.
ᖃᐅᑕᒫᖅ ᑭᓇᑐᐃᓐᓇᖅ ᓄᓇᕗᒻᒥ ᓯᓚᑖᓂᓗᓐᓃᑦ ᑐᒃᓯᕋᖃᑕᖅᑐᖅ ᐃᑲᔪᖅᑕᐅᔪᒪᓪᓗᑎᒃ ᑐᙵᕕᒃᑯᑦ ᐃᑲᔫᑎᖏᓐᓂᒃ. ᑕᒪᕐᒥᒃ ᑐᒃᓯᕋᐅᑎᒋᔭᐅᔪᑦ ᒪᓕᒃᑕᐅᔭᕆᐊᖃᖅᑎᑕᐅᔪᓂᒃ ᒪᓕᒃᓯᒪᔭᕆᐊᖃᐃᓐᓇᖅᑐᑦ ᐱᔪᓐᓇᓚᐅᖏᓐᓂᖏᓐᓂ ᐃᑲᔫᑎᓂᒃ, ᐆᒃᑐᖃᑕᐅᔪᓪᓗ ᐊᑎᓕᐅᖅᑕᐅᓯᒪᔭᕆᐊᖃᖅᑐᑦ ᓄᓇᕗᒻᒥ ᓄᓇᑖᖃᑕᐅᓯᒪᔪᓂ.