ᓄᓇᕗᑦ ᑐᓐᖓᕕᒃ
ᐱᓕᕆᕝᕖᑦ
ᑕᑕᑎᒐᒃᓴᑦ ᐊᒻᒪᓗ ᑐᓴᕈᑏᑦ
ᓄᓇᕗᑦ ᑐᓐᖓᕕᒃ
ᐱᓕᕆᕝᕖᑦ
ᑕᑕᑎᒐᒃᓴᑦ ᐊᒻᒪᓗ ᑐᓴᕈᑏᑦ
ᐃᖅᑲᓇᐃᔭᕐᕕᒃ ᓴᖅᑭᑦᑎᓚᐅᖅᑐᑦ ᑭᖑᓪᓕᖅᐹᕐᒥᒃ ᐅᓂᒃᑳᓕᐊᓂᒃ ᐃᓐᓇᑐᖃᐃᑦ ᑲᑎᒪᓂᖏᓐᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂᒃ ᓄᓇᕗᒻᒥ. 18-ᖑᓚᐅᖅᑐᑦ ᐃᓐᓇᑐᖃᐃᑦ ᖃᐅᔨᓯᒪᔭᖏᑦ ᐅᖃᐅᓯᐅᓯᒪᔪᑦ ᐅᓂᒃᑳᓕᐊᓂᒃ ᓇᑭᑐᐃᓐᓈᖅᑐᓂ ᓄᓇᕗᒻᒥ ᑲᑎᒪᓚᐅᖅᓯᒪᖕᒪᑕ ᐃᖃᓗᒃᑑᑦᑎᐊᕐᓂ, ᓄᓇᕗᑦ 2001-ᒥ ᓯᓚᓕᕆᓗᑎᒃ ᐅᖂᓇᖅᓯᕙᓪᓕᐊᓂᖓᓂᒡᓗ ᖃᓄᕐᓗ ᐊᒃᑐᖅᓯᕙᓪᓕᐊᖕᒪᖔᑕ ᑕᒪᓐᓇ ᓄᓇᕗᒻᒥ ᐊᕙᑎᒥ.
ᐃᓚᒋᓪᓗᒋᑦ ᐃᖃᓇᐃᔭᕐᕕᖓᑦ ᐃᓅᓯᓕᕆᓂᕐᒧᑦ ᐃᓕᖅᑯᓯᓕᕆᓂᕐᒧᓪᓗ ᐱᕙᓪᓕᐊᓂᖅ, ᑐᓴᐅᒪᖃᑦᑕᐅᑎᓕᕆᔨᒃᑯᑦ ᓴᕿᑦᑎᓚᐅᖅᑐᑦ ᐅᓂᒃᑳᓕᐊᓂᒃ ᐊᕐᕌᒍᑕᒫᖅ ᖃᓄᐃᓂᖏᓐᓂᒃ ᐃᓄᐃᑦ ᐃᓕᖅᑯᓯᖏᑦ ᐃᓅᖃᑎᒌᖕᓂᖏᓂᓗ ᓴᕿᑕᐅᓚᐅᖅᓱᓂᓗ ᑕᒪᐃᓐᓂᒃ ᓄᓇᕗᒻᒥ ᒪᓕᒐᓕᐅᕐᕕᖕᒥ ᑲᓇᑕᒥᓗ.
ᑐᑭᓯᓇᕐᓂᖅᓴᐃᑦ ᐅᖃᐅᓯᖅᑕᐃᑦ ᐊᑐᖅᑕᐅᓪᓗᑎᒃ ᓇᓗᓇᐃᒃᑯᑕᐃᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂᒃ ᐱᔭᕇᖅᑕᐅᓚᐅᖅᑐᑦ ᑐᓂᐅᖃᖅᑕᐅᓪᓗᑎᒡᓗ ᓇᒧᑐᐃᓐᓇᑦᑎᐊᖅ ᓄᓇᕗᒻᒥ. ᓯᕗᓕᐅᖅᑎ ᐹᓪ ᐅᑲᓕᒃ ᐊᒻᒪᓗ ᑐᙵᕕᒃᑯᑦ ᐊᖓᔪᖄᖓ ᐹᓪ ᖃᓗᔾᔭᖅ ᑲᑎᓚᐅᖅᑑᒃ ᓴᕿᑎᑦᑎᓪᓗᑎᒃ. ᑐᙵᕕᒃᑯᑦ ᐃᓕᑕᖅᓯᓚᐅᖅᑐᑦ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ (ᐊᖏᕈᑏᑦ) ᐊᓯᔾᔨᕆᐊᕈᑕᐅᓚᐅᖅᓯᒪᓂᖏᓐᓂᒃ ᑐᓐᖓᕕᐅᓕᖅᓱᑎᒃ ᓄᓇᕗᒻᒥ ᐱᒻᒪᕆᐅᓪᓗᓂᓗ ᐃᓄᐃᑦ ᖃᐅᔨᒪᔭᕆᐊᖃᕐᓂᖏᓐᓂᒃ ᐃᓗᓕᖏᓐᓂᒃ. ᐊᒥᓱᑦ ᖃᐅᔨᒪᓕᖅᑎᑦᑎᓂᕐᒧᑦ ᐃᓕᓐᓂᐊᕈᑏᑦ ᑲᔪᓯᓚᐅᖅᑐᑦ ᐃᓄᖕᓄᑦ. ᐊᒥᓱᒃᑲᓃᑦ ᓱᓕ ᐱᓂᐊᕐᒥᔪᑦ ᓄᑖᒥ ᐊᕐᕌᒍᒥ, ᐃᓚᖃᕐᓗᑎᒃ ᐃᓕᓐᓂᐊᕈᑎᒃᓴᓕᐅᕈᑏᑦ ᓄᓇᕗᒻᒥ ᐃᓕᓐᓂᐊᕐᕕᖕᓂ ᐊᒻᒪᓗ ᓄᓇᑖᕈᑎᓂᒃ ᖃᐅᔨᕚᓪᓕᕈᑎᒃᓴᐃᑦ ᐃᓐᓇᕐᓄᑦ ᑲᔪᓯᓂᐊᕐᒥᔪᑦ.
ᐱᕙᓪᓕᐊᓚᕆᓚᐅᖅᑐᖅ ᓄᓇᕗᒻᒥ ᓄᓇᑖᕈᑎᓂ ᐊᖏᕈᑏᑦ ᐅᖃᐅᓯᒃᑯᑦ ᐅᓂᒃᑳᖅᑕᐅᕙᓪᓕᐊᔪᑦ ᓂᐱᓕᐅᖅᑕᐅᓂᖏᑦ. ᐃᖅᑲᐅᒪᓂᐊᖅᑐᓯ 2003-ᒥ ᑲᑎᒪᔩᑦ ᑲᑎᒪᑎᓪᓗᒋᑦ, ᑐᙵᕕᒃᑯᑦ ᑲᑎᒪᔨᖏᑦ ᐊᖏᕈᑎᖃᓚᐅᕐᒪᑕ ᐱᖁᔨᕗᖔᕈᑎᒃᑯᑦ ᑐᑭᑖᕈᑎᓕᐅᕐᖢᑎᒃ ᑖᒃᑯᓄᖓ ᐊᖏᕈᑏᑦ ᐅᓂᑳᓕᐅᖅᑕᐅᓂᖏᓐᓄᑦ ᐱᕙᓪᓕᐊᓂᒥᓂᖏᓐᓂᒃ ᐱᓕᕆᔾᔪᑎᒃᓴᒧᑦ. ᑲᑎᒪᔩᑦ ᐃᓱᒪᖃᓚᐅᕐᒪᑕ ᑐᓴᐅᒪᔭᐅᓂᖏᑦ ᖃᓄᖅ ᐱᒋᐊᖓᓚᐅᖅᓯᒪᖕᒪᖔᑕ ᓄᓇᕗᒻᒥ ᓄᓇᑖᕈᑎᑦ ᐱᒻᒪᕆᐅᓘᓪᓗᓂᓗ ᐅᓪᓗᒥᐅᓕᖅᑐᖅ ᐱᖁᑎᑖᕆᓯᒪᔭᑦᑎᓐᓂᒃ ᐱᖁᑎᑐᖃᕐᓂᒃ ᐱᖅᑯᓯᑐᖃᑦᑎᓐᓂᒡᓗ, ᐊᒻᒪᓗ ᐱᒻᒪᕆᐊᓘᓪᓗᓂ ᐃᓚᒋᔭᐅᖕᒪᑦ ᑲᓇᑕ ᖃᓄᖅ ᓴᕿᑉᐸᓪᓕᐊᓯᒪᖕᒪᖔᑦ; ᑕᐃᒃᑯᐊ ᑭᓯᐊᓂ ᓂᐱᓕᐅᖅᑕᐅᑲᐅᑎᒋᖏᒃᑯᑎᒃ ᖃᐅᔨᒪᔭᐅᔪᑦ, ᐊᓯᐅᑐᐃᓐᓇᕆᐊᖃᕐᒪᑕ. ᑐᙵᕕᒃᑯᑦ ᑐᓂᓯᓂᐊᓕᓚᐅᖅᑐᑦ $50,000-ᓂᒃ ᓴᓇᔭᐅᓂᐊᖅᑐᑦ ᑲᔪᓯᖁᔭᐅᓪᓗᑎᒡᓗ ᐃᖃᓇᐃᔭᖅᑏᑦ ᐅᓂᒃᑳᖅᑕᐅᔪᓂᒃ ᖃᐅᔨᒪᔭᐅᔪᓂᒃ ᓂᐱᓕᐅᖅᐸᓪᓕᐊᖁᔭᐅᓪᓗᑎᒃ. ᑐᓴᐅᒪᖃᑦᑕᐅᑎᓕᕆᔨᒃᑯᑦ ᑎᒍᒥᐊᓕᓚᐅᖅᑐᑦ ᐱᓕᕆᐊᒃᓴᓂᒃ, ᑮᓇᐅᔭᓂᒃ ᐱᒃᑲᓐᓂᖅᓱᑎᒃ $50,000-ᓂᒃ ᓄᓇᕗᑦ ᐃᓕᖅᑯᓯᓕᕆᔨᒃᑯᖏᓐᓂᒃ, ᐊᒻᒪᓗ ᐆᒃᑐᖁᔨᓕᖅᓱᑎᒃ ᐆᒃᑐᕈᒪᔪᓂᒃ ᑲᑎᖅᓱᐃᔨᐅᔪᒪᔪᓂᒃ ᖃᐅᔨᒪᔭᐅᔪᓂᒃ ᓄᓇᕗᒻᒥ ᓄᓇᑖᕈᑎᓂᒃ. ᑕᒪᕐᒥᒃ ᐃᓄᐃᑦ ᑎᒦᓪᓗ ᑲᑎᖅᓱᐃᒋᐊᓕᓚᐅᖅᑐᑦ ᖃᐅᔨᒪᔭᐅᔪᑐᖃᕐᓂᒃ. ᓂᐱᓕᐅᖅᑕᐅᕙᓪᓕᐊᔪᑦ ᑐᓂᔭᐅᓯᒪᔭᕆᐊᖃᓚᐅᖅᑐᑦ ᑐᙵᕕᒃᑯᓐᓄᑦ ᐃᓱᐊᓂ ᔫᓐ 2005. ᑐᙵᕕᒃᑯᑦ ᑮᓇᐅᔭᖅᑖᒃᑲᓐᓂᕈᑎᒃᓴᓂᒃ ᐊᐱᕆᓚᐅᕐᒥᔪᑦ ᑲᓇᑕ ᐊᒻᒪᓗ ᓄᓇᕗᑦ ᒐᕙᒪᖏᓐᓄᑦ ᒐᕙᒪᐅᖏᑦᑑᒐᓗᐊᓄᓪᓗ ᖃᕆᑕᐅᔭᒃᑯᑦ ᑮᓇᐅᔭᐃᑦ ᐊᑐᖅᑕᐅᓚᐅᖅᑐᑦ 2005-ᒥ ᐊᒥᓱᒐᓴᐃᓪᓗ ᐅᐸᒃᑕᕐᕕᓕᐅᕈᒪᓪᓗᑎᒃ ᐅᖃᓕᒫᒐᓕᐅᕐᕈᑎᒃᓴᓂᒡᓗ ᓄᓇᕗᒻᒥ ᓄᓇᑖᕈᑎᓂᒃ ᐊᖏᕈᑎᓂᒃ ᐱᒋᐊᖓᓚᐅᖅᓯᒪᓂᖏᓐᓂᒃ ᐅᓂᒃᑳᓂᒃ.
ᐃᖃᓇᐃᔭᕐᕕᖓᑦ ᐋᕿᒃᓱᐃᑦᑎᐊᕆᐊᓕᓚᐅᖅᑐᖅ ᑐᙵᕕᒃᑯᑦ ᐃᓗᐊᓂ ᑎᑎᖃᕕᓂᕐᓂᒃ ᑎᑎᖃᖃᐅᑎᓂᒡᓗ ᐃᖃᓇᐃᔭᖅᑎᑖᖅᓱᑎᒃ. 12-ᖑᔪᑦ ᐅᑭᐅᑦ ᑐᙵᕕᒃᑯᑦ ᐊᔾᔨᖁᑎᖏᑦ ᖃᕆᑕᐅᔭᒃᑯᑦ ᐋᕿᒃᑕᐅᓂᐊᖅᑐᑦ ᐃᓚᒋᔭᐅᔪᓂ ᑖᒃᑯᐊ ᐱᓕᕆᐊᖏᓐᓂ. ᐋᕿᓚᐅᖅᑎᓪᓗᒋᑦ, ᑖᒃᑯᐊ ᖃᐅᔨᒪᔾᔪᑏᑦ ᐃᓚᒋᔭᐅᓕᕐᓂᐊᕐᒥᔪᑦ ᓄᓇᕗᒻᒥ ᓄᓇᑖᕈᑏᑦ ᐊᖏᕈᑎᖏᓐᓂ ᐅᖃᐅᓯᒃᑯᑦ ᐅᓂᒃᑳᓂᒃ ᖃᐅᔨᒪᔭᐅᔪᓂᒃ.
ᑐᙵᔾᔪᑦ, ᐃᓗᐊᓂ ᑐᓴᒐᒃᓴᓕᐊᖑᓲᖅ, ᓴᓇᔭᐅᓚᐅᖅᑐᖅ ᓴᖅᑭᑕᐅᓪᓗᓂᓗ ᑕᐃᒫᒃ ᐊᖅᑯᑎᒋᔪᒪᓪᓗᒍ ᑐᓴᐅᒪᖃᑦᑕᐅᑎᑦᑎᐊᒃᑲᓐᓂᕈᑕᐅᓂᐊᕐᒪᑦ, ᑐᙵᕕᒃᑯᓐᓄᓪᓗ ᐃᓄᐃᓪᓗ ᑲᑐᔾᔨᖃᑎᒌᖏᓐᓄᑦ. ᑐᓴᒐᒃᓴᐃᑦ ᐃᓚᖃᒃᑲᓐᓂᓚᐅᖅᑐᑦ ᐊᔾᔨᓂᒃ, ᐱᔪᒪᔭᐅᔪᓂᒃ, ᐊᒻᒪᓗ ᐅᓪᓗᖅᓯᐅᑎᓂᒃ ᓱᔪᖃᕐᓂᐊᕐᒪᖔᑦ.
ᑐᓴᐅᒪᖃᑦᑕᐅᑎᓕᕆᔨᒃᑯᑦ ᐋᕿᒃᓱᐃᑦᑎᐊᒃᑲᓐᓂᓚᐅᖅᑐᑦ ᓴᕿᑦᑎᓗᑎᒡᓗ ᓇᓃᓕᖅᐱᑕᒥᒃ, ᑐᙵᕕᒃᑯᑦ ᓯᓚᑖᓂ ᑐᓴᒐᒃᓴᐃᑦ. ᑐᓴᒐᒃᓴᐃᑦ ᐃᓕᖅᑯᓯᑐᖃᕐᓂᒃ ᓴᖅᑭᔮᕐᓂᖅᓴᐅᑎᑦᑎᓇᓱᐊᓚᐅᖅᑐᑦ, ᐃᓄᖕᓄᓪᓗ ᖁᕕᐊᒋᔭᐅᓲᖑᓪᓗᓂ ᑎᑎᖅᑲᒃᑯᑦ ᑎᑭᓐᓂᐊᕐᓂᖓᓂᒃ. ᒪᕐᕉᒃ ᑐᓴᒐᒃᓵᒃ ᓴᖅᑭᑕᐅᓚᐅᖅᑑᒃ. ᐋᖅᑭᒋᐊᖅᑕᐅᒃᑲᓐᓂᑐᐃᓐᓇᕆᐊᖃᕐᒥᔪᖅ.
ᑐᓴᐅᒪᖃᑦᑕᐅᑎᓕᕆᔨᒃᑯᑦ ᑎᑎᕋᓚᐅᖅᑐᑦ ᐃᑲᔪᖅᓱᒋᑦ ᐃᓄᐃᑦ ᑕᑯᓈᒐᒃᓴᓕᕆᔨᒃᑯᑦᖅ ᐃᖃᓇᐃᔭᖅᑎᖏᑦ ᓴᓇᔭᐅᖁᓪᓗᒋᑦ ᐊᕐᕌᒍ ᕿᒥᕐᕈᐊᖅᑕᐅᓂᖓ ᐅᖄᓚᑎᑦᑎᕕᒃᓴᖅ ᑕᒪᐃᓐᓂᒃ ᑐᙵᕕᒃᑯᑦ ᐊᐅᓚᑦᑎᔨᖏᑕ ᑲᑎᒪᔨᖏᓐᓄᑦ. ᓇᓚᐅᒃᑎᒃᑰᓚᐅᖅᑐᑦ ᐊᕐᕌᓂ, ᑕᒪᓐᓇ ᐊᕐᕌᒎᔪᖅ ᑕᓚᕖᓴᒃᑰᕐᓂᐊᖅᑐᖅ ᐱᔪᓐᓇᕐᕕᐅᓂᐊᖅᑐᖅ ᐃᓄᖕᓄᑦ ᐅᖄᓚᔪᓐᓇᕐᓂᖅ ᐃᓱᒪᒋᔭᖏᓐᓂᒃ ᐅᖃᕈᓐᓇᕐᓂᐊᕐᒪᑕ ᐊᐅᓚᑦᑎᔨᓄᑦ. ᑲᔪᓯᑦᑎᐊᖅᑐᒻᒪᕆᐊᓘᓚᐅᖅᑐᖅ ᑕᐃᒪᐃᓕᐅᒃᑲᓐᓂᓛᖅᑐᑦ ᓄᑖᒥ ᐊᕐᕌᒍᒥ.
ᑐᙵᕕᒃᑯᑦ ᖃᕆᑕᐅᔭᒃᑯᑦ ᐅᐸᒃᑕᕐᕕᖓ ᓱᓕ ᐋᕿᒃᓱᖅᑕᐅᖕᒪᑦ. ᓴᖅᑭᖅᑕᐅᓂᐊᖅᑐᖅ ᐊᐅᔭᖅ 2005, ᐃᓄᒃᑎᑑᖓᔪᖅ ᐅᐸᒃᑕᐅᓲᖅ, ᐃᓄᐃᓐᓇᖅᑐᓐ ᖃᓗᓈᑎᑐᓪᓗ ᐃᓄᖕᓄᑦ ᑐᑭᓯᒋᐊᕐᕕᐅᔪᓐᓇᑦᑎᐊᕐᓂᐊᖅᑐᖅ, ᑐᑭᓯᔪᓐᓇᕐᓂᐊᕆᓪᓗᑎᒃ ᓄᓇᕗᒥ ᓄᓇᑖᕈᑎᑦ ᖃᓄᖅ ᐱᒋᐊᓚᐅᖅᓯᒪᖕᒪᖔᑕ ᐊᒻᒪᓗ ᑎᑎᖅᑲᖁᑎᖏᑦ ᑕᑯᔭᐅᔪᓐᓇᕐᓗᑎᒃ, ᐊᔾᔨᓕᐅᒐᕐᓂᒃ ᓵᓚᒃᓴᖅᑎᑦᑎᓇᓱᐊᓚᐅᖅᑐᑦ ᐊᒻᒪᓗ ᑎᑎᕋᖅᓯᒪᓪᓗᑎᒃ ᖃᓄᖅ ᐃᑲᔪᖅᑕᐅᔪᓐᓇᕐᒪᖔᑕ ᐃᓄᐃᑦ, ᐊᑎᓕᐅᖅᑕᐅᓯᒪᔪᑦ. ᐱᖁᑏᑦ ᓴᕕᒐᔭᐅᒃᑰᖅᑐᑦ ᐅᖓᓯᒃᑐᒧᑦ ᐊᑐᕈᓐᓇᖅᑐᑦ ᐃᓕᐅᖅᑲᖅᑕᐅᓚᐅᖅᑐᑦ ᑕᒪᐃᓐᓂ ᓯᑕᒪᓂ ᑐᙵᕕᒃᑯᑦ ᑎᑎᕋᕐᕕᖏᓐᓂ ᓂᐅᕕᖅᑕᐅᓚᐅᖅᑐᑦ. ᐃᓕᐅᖃᖅᑕᐅᓂᐊᓕᖅᑐᑦ ᐊᐅᔭᒃᑯᑦ 2005-ᒥ. ᐅᖃᖃᑎᒋᔭᐅᓕᖅᑐᑦ ᐊᔪᕐᓇᖏᓐᓇᔭᕐᒪᖔᑦ ᐃᓄᐃᑦ ᑲᑐᔾᔨᖃᑎᒌᖏᑦ ᐃᓚᐅᔪᓐᓇᕐᒪᖔᑕ ᐱᖂᑏᑖᖃᑕᐅᓂᖅ ᐊᒻᒪᓗ ᐊᑐᖃᑕᐅᔪᓐᓇᕐᓂᖅ ᖃᕆᑕᐅᔭᐃᑦ ᐊᖅᑯᑎᖏᓐᓂᒃ ᐊᑐᐃᓐᓇᐅᔪᓂ ᑐᙵᕕᒃᑯᑦ ᑎᑎᕋᕐᕕᖏᓐᓂ. ᑐᙵᕕᒃᑯᑦ ᑐᓵᔨᐅᕕᖏᑦ/ᐃᓄᒃᑎᑑᓕᕐᕕᖏᑦ ᐋᕿᑦᑎᐊᒃᑲᓐᓂᓚᐅᖅᑐᑦ, ᑕᐃᒫᒃ ᐃᓄᒃᑎᑑᓕᖅᑎᕆᐊᓖᑦ ᑲᔪᓯᑦᑎᐊᒃᑲᓐᓂᖃᑕᕐᓂᐊᕐᒪᑕ ᕿᓚᒥᐅᓂᖅᓴᖅ ᐊᒻᒪᓗ ᐊᑭᑭᓐᓂᖅᓴᐅᓗᑎᒃ. ᑐᙵᕕᒃᑯᓐᓂᓕᒫᖅ ᑐᓴᐅᒪᖃᑕᐅᑎᓂᕐᒧᑦ ᐊᑐᐊᒐᐃᑦ ᓴᓇᔭᐅᓚᐅᖅᑐᑦ ᑐᓂᔭᐅᓪᓗᑎᒡᓗ ᐊᑐᐊᒐᓕᕆᔨᒃᑯᑦ ᐊᒻᒪᓗ ᒪᓕᒐᓕᕆᔨᒃᑯᖏᓐᓄᑦ ᕿᒥᕐᕈᐊᖅᑕᐅᖁᓪᓗᒋᑦ. ᖃᓄᐃᓕᐅᕈᑎᒃᓴᐃᑦ ᑐᓂᔭᐅᓂᐊᖅᑐᑦ ᑲᑎᒪᔨᓄᑦ ᕿᒥᕐᕈᐊᖅᑕᐅᓂᐊᕐᒪᑕ ᐊᖏᖅᑕᐅᔪᒃᓴᒫᖑᓪᓗᑎᒃ 2005/2006-ᒥ. ᐃᖅᑲᓇᐃᔭᕐᕕᖓᓐᓂ ᐱᓕᕆᐊᖃᓚᐅᕐᒥᔪᑦ ᖃᕆᑕᐅᔭᓂᒃ ᐅᖓᓯᒃᑐᑰᕈᑎᖏᓐᓂᓗ ᐊᑐᖃᑕᕐᓂᕐᒧᑦ ᐊᑐᐊᒐᕐᓂᒃ.