ᓇᖕᒥᓂᖃᖅᑐᑦ ᐊᒻᒪᓗ ᑮᓇᐅᔾᔭᒃᓴᕕᒃᓴᓂᒃ ᐱᕙᓪᓕᐊᔪᓕᕆᓂᖅ

ᐃᖃᓇᐃᔭᕐᕕᖓᓐᓂ ᓇᖕᒥᓂᖃᖅᑐᓕᕆᓂᖅ ᐊᒻᒪᓗ ᑮᓇᐅᔭᒃᓴᕕᒃᓴᓂᒃ ᐱᕙᓪᓕᐊᔪᓕᕆᔩᑦ
ᐃᖃᓇᐃᔭᕐᕕᖓ ᓇᖕᒥᓂᖃᖅᑐᓄᑦ ᐊᒻᒪᓗ ᑮᓇᐅᔾᔭᒃᕐᓴᐅᑎᒃᓴᓂᒃ ᐱᕙᓪᓕᐊᔪᓕᕆᔨᒃᑯᑦ ᓯᕗᒻᒧᐊᒃᓯᒪᓚᐅᖅᑐᑦ ᐊᒥᓱᑎᒍᑦ ᑕᒡᕙᓂ ᑮᓇᐅᔭᓕᕆᓐᓇᐅᑉ ᐊᕐᕋᒍᖓᓂ. ᓄᑖᕈᕆᐊᖅᑕᐅᓚᐅᖅᑐᖅ ᖃᕆᑕᐅᔭᒃᑯᑦ ᐅᐸᒃᑕᕐᕕᖓᑦ ᑕᐃᒫᒃ ᑎᒥᐅᔪᑦ ᒐᕙᒪᐃᓪᓗ ᕿᓂᕐᕕᖃᕈᓐᓇᕐᓂᐊᕐᒪᑕ ᐃᓄᐃᑦ ᐊᑎᓕᐅᖅᑕᐅᓯᒪᕕᖓᓂᒃ ᑎᑎᕋᖅᑕᐅᓯᒪᕕᖕᓂ, ᐊᑐᓂ ᐱᖁᑎᓄᑦ ᐊᒻᒪᓗ ᐱᔨᑦᑎᕋᐃᕙᒃᑐᓄᑦ, ᐊᒻᒪᓗ ᖃᓗᓈᑎᑐᑦ ᐅᖃᐅᓯᖏᑦ ᒪᓕᒃᓗᒋᑦ ᕿᓂᕐᕕᐅᔪᓐᓇᖅᑐᓂ. ᑕᒪᓐᓇ ᐃᓚᖓᒍᑦ ᐊᔪᕐᓇᑲᐃᓇᓚᐅᖅᑐᖅ ᑭᓯᐊᓂ ᓂᕆᐅᒋᔭᐅᔪᖅ ᐱᔭᕇᖅᑕᐅᓂᐊᕐᓂᖓ ᑐᙵᕕᒃᑯᑦ ᓄᑖᖅ ᖃᕆᑕᐅᔭᒃᑯᑦ ᐅᐸᒃᑕᕐᕕᖓ ᓴᕿᑕᐅᓂᐊᕐᓂᖓᓂᒃ ᑕᒡᕙᓂ ᐊᕐᕌᒍᒥ.

ᑭᖑᕙᕆᖅᑕᐅᓯᒪᓚᐅᖅᑐᑦ ᐊᑐᓕᖅᑎᑦᑎᕙᓪᓕᐊᓂᕐᒧᑦ ᐊᑐᓕᖁᔭᓕᐊᖑᓯᒪᔪᑦ 2003-ᒥ ᓄᓇᕗᒻᒥ ᓇᖕᒥᓂᖃᖅᑐᑦ ᐃᑲᔫᑎᖏᓐᓂᒃ ᐊᑐᐊᒐᕐᓂ ᑕᒪᐃᓐᓂᒃ ᕿᒥᕐᕈᐊᖅᑕᐅᓂᖏᓐᓂ. ᑭᖑᕙᕆᐊᖅᑕᐅᓚᐅᕐᒥᔪᑦ ᑲᔪᓯᓂᖏᑦ 2004-ᒥ ᓄᓇᕗᒻᒥ ᓇᖕᒥᓂᖃᖅᑐᓄᑦ ᐊᑐᐊᒐᐃᑦ ᐊᕐᕌᒍᑕᒫᖅ ᕿᒥᕐᕈᐊᖅᑕᐅᖃᑕᕐᓂᖏᑦ. ᑕᒪᒃᑯᐊ ᑭᖑᕙᕆᐊᖅᑕᐅᓚᐅᖅᑐᑦ ᐱᔾᔪᑎᖃᖅᑐᑦ ᓅᑕᐅᓚᐅᕐᓂᖏᓐᓂᒃ ᓴᕿᑕᐅᕋᑖᖅᑐᑦ ᓄᑖᑦ ᓄᓇᕗᒻᒥ ᓇᖕᒥᓂᖃᖅᑐᓄᑦ ᐃᑲᔫᑏᑦ ᑎᑎᕋᕐᕕᒃᑖᓵᖓ ᓄᓇᕗᑦ ᒐᕙᒪᒃᑯᖏᓐᓂ ᐱᕙᓪᓕᐊᔪᓕᕆᔨᒃᑯᖏᓐᓂ ᐃᖏᕐᕋᔫᓕᕆᔨᒃᑯᖏᓐᓂᓗ 2004 ᐃᓱᐊᓂ.

ᒪᓕᒃᑕᐅᓪᓗᑎᒃ 2003-ᒥ ᓄᓇᕗᒻᒥ ᓇᖕᒥᓂᖃᖅᑐᓂᒃ ᐃᑲᔫᑏ ᑕᒪᕐᒥᒃ ᕿᒥᕐᕈᐊᖅᑕᐅᓯᒪᔪᑦ, ᓄᓇᕗᑦ ᒐᕙᒪᒃᑯᑦ ᓴᖅᑭᑦᑎᓕᓚᐅᖅᑐᑦ ᑳᑐᓐᓚᒃᑖᖅᑎᑕᐅᓯᒪᔪᓂᒃ ᐅᓐᓂᓗᕝᕖᑦ ᑲᑎᒪᔨᖏᓪᓂᒃ 2004-ᒥ. ᑐᙵᕕᒃᑯᑦ ᓂᕈᐊᒐᒃᓴᙳᖅᑎᑦᑎᓚᐅᖅᑐᑦ ᐹᑦ ᓚᐃᔪᓪᒥᒃ ᑲᒥᓯᓇᐅᖁᔭᐅᓪᓗᓂ ᑲᑎᒪᔨᓂ, ᐹᑐᓕᒃ ᑕᒎᕐᓇᕐᓗ, ᑭᖑᕝᕕᖅᑎᐅᓂᐊᖅᓱᓂ. ᐃᖃᓇᐃᔭᕐᕕᖓᓂ ᐃᓚᐅᓚᐅᖅᑐᑦ ᐊᒥᓱᓂᒃ ᐅᖃᖃᑎᖃᕐᓂᖅ ᓄᓇᕗᒻᒥᓗ ᑲᓇᑕᒥᓗ ᒐᕙᒪᓂᒃ ᑲᑎᒪᔩᓪᓗ ᓄᓇᕗᒻᒥ ᑮᓇᐅᔭᒃᓴᐃᓂᕐᒧᑦ ᑲᑎᒪᖏᓐᓂᒃ 2004-ᒥ ᑲᓇᑕᒥ ᑮᓇᐅᔭᓂᒃ ᐊᑐᖅᑕᒃᓴᓕᐊᖑᓚᐅᖅᑐᓂᒃ $90 ᒥᓕᔭᓐᓂᒃ ᐅᑭᐅᖅᑕᖅᑐᕐᒥᐅᓄᑦ ᐱᕙᓪᓕᐊᔾᔪᑎᒃᓵᓃᑦᑐᓂ ᐱᖓᓱᓄᑦ ᖁᑦᑎᒃᑐᒥ ᒐᕙᒪᐅᔪᓄᑦ ᑕᓪᓕᒪᐅᓂᐊᖅᑐᓂ ᐅᑭᐅᕐᓂ. ᐃᑲᔪᖅᑕᐅᓚᐅᖅᑐᑦ ᓄᓇᕗᒻᒥ ᑮᓇᐅᔾᔭᒃᓴᐅᑎᒃᓴᓄᑦ ᑲᑎᒪᔩᑦ ᑕᒪᐃᓐᓂᒃ ᑭᐅᔾᔪᑎᒃᓴᓕᐅᖅᐸᓪᓕᐊᓂᖏᓐᓂ ᐊᒥᓱᓄᑦ ᐊᐱᖁᑎᒃᓴᓄᑦ ᐅᑭᐅᖅᑕᖅᑐᒥ ᐱᕙᓪᓕᐊᔾᔪᑎᒃᓴᓄᑦ. ᑭᐅᔾᔪᑎᒃᓴᐃᑦ ᓴᖅᑭᖅᑕᐅᓚᐅᖅᑐᑦ ᓄᓇᕗᒻᒥ ᑮᓇᐅᔾᔭᒃᓴᐅᑎᒃᓴᓄᑦ ᑲᑎᒪᔨᓄᑦ ᐅᓂᒃᑳᓕᐊᒃᑯᑦ: ᖃᓂᔨᔪᖅ (ᖃᓂᒋᔭᖏᑦ). $3 ᒥᓕᔭᓐ ᑐᓂᔭᐅᓚᐅᖅᑐᑦ ᓄᓇᕗᒻᒥ ᑕᒡᕙᓂ ᐊᕐᕌᒍᒥ ᑭᓯᐊᓂ ᓱᓕ ᐃᓱᒪᓕᐅᕈᑕᐅᓯᒪᖏᑦᑐᑦ ᑮᓇᐅᔭᐃᑦ ᓯᑕᒪᐅᓂᐊᖅᑐᓄᑦ ᐅᑭᐅᕐᓄᑦ.

ᐱᓕᕆᕝᕕᐅᔪᖅ ᐃᑲᔪᕆᐅᓚᐅᖅᑐᑦ ᓯᕗᓪᓕᐹᑦᓯᐊᒥ ᐊᕐᕌᒍᑕᒫᖅᓯᐅᒻᒥᒃ ᑲᑎᒪᕐᔪᐊᖅᑎᑦᑎᓂᖓᓄᑦ (ᑲᑎᒪᕐᔪᐊᑎᑦᑎᓂᖅ), ᐊᒻᒪᓗ ᓄᓇᕗᒻᒥ ᑮᓇᐅᔾᔭᒃᓴᐅᑎᒃᓴᓄᑦ ᑲᑎᒪᔨᓂᒃ ᑐᓂᓯᓪᓗᑎᒃ $40,000-ᓂᒃ ᑮᓇᐅᔭᓂᒃ ᑲᑐᔾᔨᖃᑎᒌᖏᓐᓄᑦ. ᐃᖃᓇᐃᔭᕐᕕᒃᐳᑦ ᐃᓚᒋᔭᐅᔪᖅ ᑮᓇᐅᔾᔭᒃᓴᐅᑎᒃᓴᓄᑦ ᑲᑎᒪᔨᖏᓐᓂ, ᐊᒻᒪᓗ ᒫᓂᑲ ᐃᐅᓪ ᓂᕈᐊᖅᑕᐅᓪᓚᐅᖅᑐᖅ ᐊᖓᔪᖄᕐᒧᑦ ᐊᐅᓚᑦᑎᔨᐅᓂᕐᒧᓪᓗ. ᐊᕐᕌᒍᑕᒫᖅ ᑐᓂᔭᐅᖃᑕᐅᔪᓂ, ᑐᙵᕕᒃᑯᑦ ᑐᓂᓯᓚᐅᖅᑐᑦ ᐊᑕᐅᓰᖅᓱᒋᑦ ᐱᓂᐊᖅᑕᖏᓐᓂᒃ ᑎᑎᕋᕐᕕᒃᓴᒧᑦ. ᓄᓇᕗᑦ ᑮᓇᐅᔾᔭᒃᓴᐅᑎᒃᓴᓄᑦ ᑲᑎᒪᔨᑦ ᐱᒻᒪᕆᐊᓘᖕᒪᑕ ᑐᑭᓕᐅᖅᑎᐅᓪᓗᑎᒃ ᐊᑐᓕᖅᑎᑦᑎᓂᕐᒥᒃ ᓄᓇᕗᒻᒥ ᑮᓇᐅᔾᔭᒃᓴᐅᑎᒃᓴᓄᑦ ᑐᑭᒧᐊᒍᑎᒃᓴᑦ. ᐃᖅᑲᓇᐃᔭᕐᕕᖓ ᐃᑲᔪᖅᓱᐃᒃᑲᓐᓂᓚᐅᖅᑐᖅ ᓄᓇᕗᒻᒥ ᓴᓇᙳᐊᖅᑏᑦ ᑲᑎᒪᓂᖓᓐᓂᒃ-$40,000 ᑐᓂᔭᐅᓚᐅᖅᑐᑦ ᓄᓇᕗᒻᒥ ᓴᓇᙳᐊᖅᑏᑦ ᑲᑎᒪᓂᖓᓐᓂᒃ/ᑲᑎᓐᓂᖏᓐᓂᓗ ᑲᖏᖅᖠᓂᕐᒥ.

ᓄᓇᕗᒻᒥ ᑮᓇᐅᔭᓕᐅᕈᑎᒃᓴᓂᒃ ᕿᒥᕐᕈᐊᖅᑏᑦ ᑲᑎᒪᔨᕋᓛᖏᑦ (NIRC) ᑲᑎᒪᓚᐅᖅᑐᑦ ᔪᓚᐃᒥ. ᑐᓂᓂᓯᖃᑦᑕᕐᒪᑕ $1.8 ᒥᓕᔭᓐᓂᒃ ᐃᓄᐃᑦ ᑲᑐᔾᔨᖃᑎᒌᒋᓐᓄᑦ ᐊᒻᒪᓗ $300,000-ᓂᒃ ᑮᓇᐅᔭᓄᑦ ᓄᓇᕗᑦ ᓯᕗᒧᑦ ᑲᒪᒋᔭᖏᓐᓂ ᒥᑭᓐᓂᖅᓴᓂ ᑐᓂᔭᐅᔪᓐᓇᖅᑐᓂᒃ ᓇᖕᒥᓂᓖᑦ. ᓄᓇᕗᑦ ᓯᕗᒧᒃᑯᑦ ᐃᑲᔪᖅᑎᐅᖃᑕᖅᑐᑦ ᓴᓇᙳᐊᖅᑎᓄᑦ, ᐃᖃᓗᒃᓯᐅᖅᑎᓄᑦ, ᑎᑎᕋᐅᔭᖅᑎᓄᑦ ᒥᑭᓐᓂᖅᓴᓂᒡᓗ ᓇᖕᒥᓂᖃᖅᑐᓄᑦ.

ᐃᖃᓇᐃᔭᕐᕕᖓ ᐃᓚᐅᓚᐅᖅᑐᑦ ᑲᑎᒪᔪᓂ ᐊᒥᐊᓕᑲᒥᐅᑦ ᑭᒡᒐᖅᑐᐃᔨᖓᓂᒃ ᐹᓪ ᓯᓘᔾᔨᒥᒃ ᐊᒃᑑᐸᒥ. ᓴᕿᑕᐅᑎᓚᐅᖅᑕᕗᑦ ᐊᑲᐅᖏᓕᐅᕈᑏᑦ ᐊᒥᐊᓕᑲᒥᐅᓂ ᐃᒪᕐᒥᐅᑕᐃᑦ ᐆᒪᔪᐃᑦ ᓴᐳᓐᓂᐊᖅᑕᐅᓂᖏᓐᓄᑦ ᒪᓕᒐᐃᑦ. ᑭᒡᒐᖅᑐᐃᔨ ᓯᓗᑦᓯ ᐅᖃᓚᐅᖅᑐᖅ ᖃᐅᔨᒪᑎᑕᐅᖏᓐᓂᕐᒥᓂᒃ ᑲᓇᑕᒧᑦ ᑐᑭᓯᓂᕋᖅᓱᓂᓗ ᐅᑎᖅᑎᓐᓂᐊᕐᓂᕋᖅᓱᓂᐅᒃ ᐅᐋᓯᖕᑕᓐᒧᑦ.

ᐃᖃᓇᐃᔭᕐᕕᖓ ᐱᓕᕆᖃᑎᖃᓚᐅᖅᑐᖅ ᑐᙵᕕᒃᑯᑦ ᑮᓇᐅᔭᓕᕆᕕᖏᓐᓂᒃ, ᐊᑐᖅᑐᐊᕐᕕᒃ ᑯᐊᐳᕇᓴᑦ, ᑯᐊᐸᒃᑯᑦ, ᐃᖃᓗᖕᓂ ᑮᓇᐅᔭᒃᕕᒃᑖᕈᒪᔪᓂᒃ ᓴᖅᑭᑦᑎᔪᖃᕈᓐᓇᖏᒻᒪᖔᑦ ᓄᓇᕗᒻᒧᑦ.

ᐃᖃᓇᐃᔭᕐᕕᖓᑦ ᐃᓄᐃᑦ ᑲᑎᒪᑎᑕᐅᓂᖏᓐᓂ ᐃᓚᐅᓚᐅᖅᑐᑦ ᐆᒻᒪᖅᑯᑎᓕᕆᔨᕐᔪᐊᒃᑯᑦ ᕿᒥᕐᕈᐊᖅᑕᐅᓂᖏᓐᓂ ᓄᕕᐱᕆᒥ 2004 ᐃᖃᓗᖕᓂ. ᐃᖅᑲᓇᐃᔭᕐᕕᖓᓐ ᑐᓂᓯᓚᐅᕐᒥᔪᑦ ᑭᖑᓂᐊᓂ ᑎᑎᖃᕐᓂᒃ. ᑕᐃᒃᑯᐊ ᒪᓕᒐᓕᕆᖃᑕᕐᒪᑕ, ᐊᒃᑐᖅᑕᐅᓯᒪᓂᖏᓐᓂ ᐆᒻᒪᖁᑏᑦ ᐊᑭᖏᓐᓄᑦ ᓇᖕᒥᓂᖃᖅᑐᑦ, ᖃᓄᐃᓕᕚᓪᓕᕈᑕᐅᓲᖑᖕᒪᖔᑦ ᓄᓇᕗᒻᒥ ᑮᓇᐅᔭᓕᐅᖃᑕᐅᔪᓐᓇᕐᓂᖅ ᐊᒻᒪᓗ ᓄᓇᕗᒻᒥ ᓄᓇᑖᕈᑎᓂᒃ ᐃᓚᖃᖅᑐᓂᒃ. ᑲᑎᒪᔨᕐᔪᐊᑦ ᑭᖑᓪᓕᖅᐹᕐᒥᓂ ᐅᖃᐅᓯᖃᓚᐅᖅᑐᑦ ᑐᙵᕕᒃᑯᑦ ᖃᓄᐃᓕᖓᖁᔭᖏᓐᓂᒃ ᐊᒻᒪᓗ ᐃᓚᖏᑦ ᐊᑐᓕᖁᔭᓕᐊᕆᓚᐅᖅᑕᕗᑦ ᐊᖏᖅᑕᐅᓚᐅᖅᑐᑦ.

ᐃᖅᑲᓇᐃᔭᕐᕕᒃ ᐱᓕᕆᖃᑎᖃᓚᐅᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓂ, ᓄᓇᕗᑦ ᒐᕙᒪᒃᑯᖏᓐᓂᒃ ᐊᒻᒪᓗ ᐲᕚᑎ ᐄᓯᒃᔅ ᑕᑯᔭᒐᖃᕐᕕᖓᓂᒃ Peabody Essex Museum ᓴᐃᓚᒻ, ᒫᓯᑦᓲᓴᑦᔅᒥ Salem, Massachusetts, ᐹᔅᑕᓐᒥᐅᑕᐃᑦ ᐃᓕᖅᑯᓯᓕᕆᔨᖏᓐᓂᒃ. ᐃᓚᖃᓚᐅᖅᑐᖅ ᑕᒪᓐᓇ ᐊᔾᔨᓕᐅᖅᑕᐅᓯᒪᔪᑦ ᑕᑯᒃᓴᐅᑎᑕᐅᓂᖏᓐᓂᒃ ᐱᑐᖃᕕᓃᑦ ᐊᒻᒪᓗ ᒫᓐᓇ ᓄᓇᕗᒻᒥ ᐆᒪᔪᐃᑦ ᓄᓇᐃᓪᓗ. ᐃᖅᑲᓇᐃᔭᕐᕕᖓᓐᓂᒃ. ᑲᑕᔾᔭᖅᑎᓂᒃ ᕿᓚᐅᔾᔭᖅᑎᒥᒡᓗ ᐊᑕᐅᓯᕐᒥᒃ ᑕᑯᔭᒐᖃᕐᕕᖓᓐᓂ ᐹᔅᑕᓐᒥᓗ ᑕᑯᑦᓴᐅᑎᑦᓯᓚᐅᕐᒥᔪᖅ. ᐃᓄᐃᑦ ᒪᕐᕉᖕᓂᒃ ᒪᒃᐱᒑᕐᓂᒃ ᐅᖃᓕᒫᒐᓕᐅᖅᑕᐅᓚᐅᖅᑐᑦ ᐹᔅᑕᓐ ᐱᕙᓪᓕᐊᔪᖏᓐᓂᒃ ᑎᑎᕋᖃᑦᑕᖅᑐᓂᒃ Boston Globe (ᐱᕙᓪᓕᐊᔪᓕᕆᔩᑦ 800,000-ᓄᑦ ᐅᖃᓕᒫᕐᕕᐅᓲᖑᔪᓂ ᐱᓕᕆᓚᐅᕐᓂᖏᓐᓄᑦ. ᔫᓇ ᕿᓚᕙᖅ ᑎᒃᑯᐊᖅᑕᐅᓚᐅᖅᑐᖅ ᓄᓇᕗᑦ ᐳᓚᕋᑦᑐᓕᕆᔨᒃᑯᑦ ᑲᑎᒪᔨᖏᓐᓄᑦ ᑐᙵᕕᒃᑯᓐᓂ. ᐃᓚᐅᖏᓐᓇᓚᐅᕐᒥᔪᑦ ᐃᖅᑲᓇᐃᔭᕐᕕᒃ ᓄᓇᕗᒻᒥ ᐳᓚᕋᑦᑐᓕᕆᓂᕐᒥᒃ ᑐᑭᓯᓂᐊᖅᑎᓂᒃ, ᑎᒥᐅᔪᑦ ᐊᔾᔨᒌᖏᑦᑐᓂᖔᖅᑐᑦ ᐱᕙᓪᓕᐊᑎᑦᑎᒋᐊᒃᑲᓐᓂᕐᓂᐊᖅᑐᑦ ᐳᓚᕋᑦᑐᓕᕆᓂᕐᒥᒃ ᓄᓇᕗᒻᒥ.

ᐱᒋᐊᖅᓱᑎᒃ ᔭᓄᐊᕆ 2005-ᒥ, ᐃᖅᑲᓇᐃᔭᕐᕕᖓᓐᓂᒃ ᐱᓕᕆᖃᑎᖃᕐᔪᐊᓚᐅᖅᑐᑦ ᒪᓕᒐᓕᕆᔨᒃᑯᓐᓂᒃ ᐊᐅᓚᑦᑎᔨᓂᒡᓗ ᐊᖏᕈᑎᓃᑦᑐᖅ ᐃᓛᒃᑯᑦ 24-ᒥ ᐊᖏᕈᑎᑖᕋᓱᐊᕐᓂᕐᒧᑦ ᐃᓄᓕᕆᔨᑐᖃᒃᑯᑦ ᑳᓐᑐᓛᒃᑎᑦᑎᓚᐅᕐᓂᖏᓐᓄᑦ ᓴᓗᒻᒪᖅᓴᖅᑕᐅᓂᖏᓐᓂ ᓈᓚᒡᕕᕕᓃᑦ Dew Line ᐃᓂᕕᓂᖏᓐᓂᒃ. ᑕᐃᒪᐃᓕᐅᕈᑎᖃᓚᐅᖅᑐᑦ ᐊᖏᕈᑎᑖᕋᓱᐊᖅᓱᑎᒃ ᐊᔾᔨᖏᓐᓂᒃ ᐅᓇᑕᖅᑐᒃᓴᓂᒃ ᐱᔭᐅᓯᒪᔪᓂᒃ. ᑎᑎᖅᑲᑯᑦ ᐅᖃᓚᐅᖅᑐᖅ ᐃᐊᑐᓪ ᐸᓛᓐᑕᓐ-ᐋᓐᕉ, ᒥᓂᔅᑕᖓᑦ ᐅᑭᐅᖅᑕᖅᑐᕐᒥᐅᑕᓕᕆᓂᕐᒧᑦ ᐊᖏᖅᓱᓂ ᐊᐃᕆᓕ 2005-ᒥ.

ᐃᖅᑲᓇᐃᔭᕐᕕᖓᑦ ᓇᖕᒥᓂᖃᖅᑐᓄᑦ ᐊᒻᒪᓗ ᑮᓇᐅᔾᔭᒃᓴᐅᑎᒃᓴᓄᑦ ᐱᓕᕆᖃᑎᖃᓚᐅᖅᑐᖅ ᐊᑐᖅᑐᐊᕐᕕᒃ ᑯᐊᐳᕇᓴᒃᑯᓐᓂᒃ ᖃᐅᔨᓴᖅᑕᐅᓂᐅᖏᓐᓂ ᐃᓄᖕᓄᑦ ᓇᖕᒥᓂᖃᖃᑕᐅᔪᑦ ᐊᑎᓕᐅᖅᑕᐅᓯᒪᕕᖕᓂ. ᑭᖑᓂᐊᓂ ᐊᑎᓕᐅᖅᑕᐅᖅᑳᓚᐅᖅᓱᑎᒃ ᐃᓄᖕᓄᑦ ᓇᖕᒥᓂᕆᔭᐅᔪᑦ 1996-ᒥ, 20-ᖏᓐᓂᒃ 30-ᖏᓐᓄᑦ ᐊᑎᓕᐅᖅᑕᐅᖃᑕᐅᕙᓕᖅᑐᑦ ᐊᕐᕌᒍᑕᒫᖅ. ᑕᒡᕙᓂ ᐊᕐᕌᒍᒥ, ᐊᒥᓲᓂᖅᓴᐅᓚᐅᖅᑐᑦ ᑳᓐᑐᓛᒃᑖᖃᑕᐅᕙᒃᑐᑦ ᐅᑎᖅᑎᑦᑎᓚᐅᖏᑦᑐᑦ ᐊᕐᕌᒍᑕᒫᖅ ᓄᑖᕈᕆᐊᖅᑕᐅᖃᑕᕆᐊᖃᖅᑐᓂᒃ. ᑕᐃᒪᐃᓐᓂᖓᓄᑦ 20 ᐅᖓᑖᓃᑦᑐᑦ ᐲᖅᑕᐅᔪᒪᓚᐅᖅᑐᑦ ᐃᓄᐃᑦ ᓇᖕᒥᓂᖃᖅᑐᑦ ᐊᑎᓕᐅᖅᑕᐅᓯᒪᕕᖏᓐᓂ. ᑐᙵᕕᒃᑯᑦ ᐃᓚᐅᓚᐅᖅᑐᑦ ᓄᓇᕗᒻᒥ ᑕᐅᖅᓰᒐᒃᓴᖃᖅᑐᓂᒃ ᑕᑯᔭᒐᖃᕐᕕᖕᒥ ᐃᖃᓗᖕᓂ, ᐃᓕᑕᕆᔭᐅᓯᒪᓪᓚᕆᒃᓱᑎᒃ.