ᓄᓇᕗᑦ ᑐᓐᖓᕕᒃ
ᐱᓕᕆᕝᕖᑦ
ᑕᑕᑎᒐᒃᓴᑦ ᐊᒻᒪᓗ ᑐᓴᕈᑏᑦ
ᓄᓇᕗᑦ ᑐᓐᖓᕕᒃ
ᐱᓕᕆᕝᕖᑦ
ᑕᑕᑎᒐᒃᓴᑦ ᐊᒻᒪᓗ ᑐᓴᕈᑏᑦ
ᐊᒥᓱᑦ ᒐᕙᒪᒃᑯᑎᒍᑦ ᐱᒋᐊᖅᑎᑕᐅᔪᑦ ᑲᓇᑕᐅᑉ ᒐᕙᒪᒃᑯᖏᓐᓄᑦ ᐱᔾᔪᑎᖃᖅᑐᓂᒃ ᐅᑭᐅᖅᑕᖅᑐᕐᒥᐅᓂᒃ ᐃᓚᑖᕆᔭᐅᓚᕆᓚᐅᖅᑐᓂᒃ ᓄᓇᕗᑦ ᑐᓐᖓᕕᒃ ᑎᒥᖓᑦ (ᑐᙵᕕᒃ) ᐱᓕᕆᐊᖏᓐᓄᑦ. ᑕᒪᓐᓇ ᐱᖏᐊᓐᖓᐅᑎᖃᓚᐅᖅᑐᖅ ᒐᕙᒪᒃᑯᑦ ᐅᖃᐅᓯᒃᓴᓕᐊᕆᓯᒪᔭᖏᓐᓂᒃ ᐃᓄᓕᒫᓄᑦ ᕕᕗᐊᕆ 2004-ᖑᑎᓪᓗᒍ ᐃᓕᑕᖅᓯᓯᒪᓪᓗᓂ ᐊᒥᓲᓗᐊᖅᑐᑦ ᑲᓇᑕᒥ ᓄᓇᖃᖅᑳᕐᓯᒪᔪᑦ ᖃᙳᓇᖅᑐᒥᒃ ᐃᓅᓯᖃᖅᑎᑕᐅᓂᖏᓐᓂᒃ. ᒫᔾᔨᒥ, ᓄᑖᑦ ᐅᑭᐅᖅᑕᖅᑐᒥ ᑮᓇᐅᔾᔭᒃᓴᐅᑎᒃᓴᓄᑦ ᐱᕙᓪᓕᐊᑎᑦᑎᔾᔪᑎᒃᓴᐃᑦ ᑮᓇᐅᔭᐃᑦ ᐅᖃᐅᓯᐅᓚᐅᖅᑐᑦ, ᑐᓂᔭᐅᓂᐊᖅᓱᑎᒃ $30 ᒥᓕᔭᓐᓂᒃ ᓄᓇᕗᑦ ᑕᓪᓕᒪᐅᓂᐊᖅᑐᓂ ᐊᕐᕌᒍᓂ, ᐊᒻᒪᓗ ᑲᓇᑕᐅᑉ ᓯᕗᓕᖅᑎᖓ ᐅᖃᓚᐅᖅᑐᖅ ᐸᕐᓇᐃᖅᓯᒪᓂᕐᒥᓂᒃ ᐃᓄᖕᓄᑦ ᑎᑎᕋᕐᕕᒃᓴᒥᒃ ᐃᓗᐊᓂ ᐃᓄᓕᕆᔨᑐᖃᒃᑯᑦ ᐃᓱᒪᒋᔭᐅᑦᑎᐊᕐᓂᖅᓴᐅᓂᐊᕐᒪᑕ ᐃᓄᖕᓄᑦ ᑐᕌᖓᔪᑦ ᐃᓱᒪᓘᑕᐅᔪᑦ. ᑲᑎᒪᑎᑦᑎᓚᐅᕐᒥᔪᖅ ᓄᓇᖃᖅᑳᓯᒪᔪᓂᒃ ᓯᕗᓕᖅᑎᓂᒃ, ᐃᓚᒋᔭᐅᓪᓗᓂ ᐹᓪ ᖃᓗᔾᔭᖅ, ᑐᙵᕕᒃᑯᑦ ᐊᖓᔪᖄᖓᑦ, ᑕᐃᑲᙵᓪᓗ ᓴᖅᑭᑕᐅᓕᓚᐅᖅᑐᑦ ᑲᑎᒪᖃᑎᒋᒃᑎᐅᔪᑦ ᓄᓇᖃᖄᖅᓯᒪᔪᓂᒃ ᐱᔾᔪᑎᖃᖅᑐᓂᒃ. ᓄᑖᑦ ᑲᑎᒪᔨᕋᓛᑦ ᓄᓇᖃᖅᑳᓯᒪᔪᓕᕆᓂᕐᒧᑦ ᓴᖅᑭᑕᐅᓚᐅᖅᑐᑦ, ᐃᒃᓯᕙᐅᑕᕆᔭᐅᓪᓗᓂᓗ ᑲᓇᑕᐅᑉ ᓯᕗᓕᖅᑎᖓ. ᓄᕕᐱᕆᒥ, ᑲᓇᑕᐅᑉ ᓯᕗᓕᐅᖅᑎᖓ ᐊᒻᒪᓗ ᐱᖓᓱᑦ ᐅᑭᐅᖅᑕᖅᑐᕐᒥ ᓯᕗᓕᖅᑏᑦ ᓴᖅᑭᑦᑎᓚᐅᖅᑐᑦ ᐱᒋᐊᕐᓂᐊᓕᖅᑐᓂᒃ ᐅᑭᐅᖅᑕᖅᑐᒥ ᑐᑭᒧᐊᒍᑎᒃᓴᐃᑦ ᑲᓇᑕᒥ.
ᑐᙵᕕᒃᑯᑦ ᖁᕕᐊᒋᓪᓚᕆᓚᐅᖅᑕᖓᑦ ᑕᒪᓐᓇ ᐱᒋᐊᖅᑎᑕᐅᓂᖓ ᐃᓚᐅᓚᐅᖅᓱᑎᒡᓗ ᓄᓇᕗᒻᒥ ᐃᓄᐃᑦ ᐃᓚᐅᑎᑕᐅᔭᕆᐊᖃᕐᓂᖏᑦ ᐃᓕᑕᕆᔭᐅᖁᓪᓗᒋᑦ. ᑕᒡᕙᓂᑦᓴᐃᓐᓇᖅ, ᖃᐅᔨᓇᓱᓚᐅᕐᒥᔪᒍᑦ ᓇᓗᓇᐃᒃᑯᑕᕐᓂᒃ ᐅᖃᐅᓯᕐᓂᒃ ᐅᖃᖅᑕᖏᓐᓂᒃ ᑲᓇᑕᐅᑉ ᓯᕗᓕᖅᑎᖓᑕ ᒥᓂᔅᑕᖏᑕᓗ, ᑐᑭᓕᐅᕐᓂᐊᕐᒪᖔᑕ ᖃᓄᖅᑑᕈᑎᓪᓚᕆᐅᔪᓄᑦ ᐱᐅᓯᕚᓪᓕᕈᑎᒃᓴᓄᑦ ᐃᓅᓯᖏᓐᓄᑦ ᐃᓄᐃᑦ. ᖃᐅᔨᒪᓇᒻᒪᕆᖏᑦᑐᖅ ᓱᓕ ᑕᒪᓐᓇ ᓴᖅᑭᓐᓂᐊᕐᒪᖔᑕ.
ᐱᓗᐊᖅᑐᒥᒃ, ᐊᔾᔨᒌᖏᓪᓚᕆᓚᐅᕐᒪᑎᒃ ᒐᕙᒪᑐᖃᒃᑯᑦ ᐱᓕᕆᐊᕆᓯᒪᔭᖏᑦ ᐊᒻᒪᓗ ᕿᐱᓗᐊᖏᓐᓇᑐᐃᓐᓇᕐᓂᖏᑦ ᐊᑐᓕᖅᑎᑕᐅᕙᓪᓕᐊᔭᕆᐊᓕᓐᓂᒃ ᐱᓂᐊᕐᓂᕋᖅᓯᒪᔭᒥᓂᒃ ᐊᖏᕈᑎᑎᒍᑦ. ᓯᑕᒪᐃᑦ ᐅᑭᐅᑦ ᓈᓕᖅᑐᑦ, ᑐᙵᕕᒃᑯᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᐱᓕᕆᖃᑎᖃᓕᓚᐅᖅᑐᑦ ᑲᓇᑕᒥᒃ ᓄᑖᕈᕆᐊᖅᑕᐅᔭᕆᐊᖃᕐᓂᖏᓐᓂᑦ ᐊᑐᓕᖅᑎᑦᑎᕙᓪᓕᐊᓂᕐᒧᑦ ᑳᓐᑐᓛᒃᓴᐃᑦ ᑮᓇᐅᔭᖃᕆᐊᖃᕐᓂᖏᓐᓄᑦ ᐊᑐᓕᖅᑎᑕᐅᕙᓪᓕᐊᓂᖏᓐᓄᑦ ᐊᖏᕈᑏᑦ ᖁᓕᓄᑦ (10-ᓂ) ᐅᑭᐅᓄᑦ.
ᐋᔩᖃᑎᒌᖕᓂᐅᓯᒪᔪᑦ ᓇᒧᖓᐅᓯᒪᖏᑦᑎᐊᖅᑐᑦ, ᐊᒻᒪᓗ ᐊᐅᔭᒃᑯᑦ 2004-ᒥ, ᒐᕙᒪᒃᑯᑦ ᑲᓇᑕᒥ ᕿᒪᐃᓚᐅᖅᑐᑦ ᑲᑎᒪᔪᓂᒃ.
ᑕᐃᒪᐃᓐᓂᖓᓄᑦ, ᑐᙵᕕᒃᑯᑦ ᒐᕙᒪᒃᑯᓐᓂᒃ ᐊᔭᐅᕆᐊᒃᑲᓐᓂᓕᓚᐅᖅᑐᑦ ᑲᓇᑕᒥ ᐋᔨᖃᑎᒌᓪᓗᑎᒃ ᐱᐊᓂᑦᑎᐊᕋᓱᐊᕐᓂᕐᒧᑦ, ᐊᒻᒪᓗ ᐸᕐᓇᒃᓯᒪᓕᓚᐅᖅᑐᒍᑦ ᐃᖅᑲᖅᑐᐃᕕᑰᖅᑎᑦᑎᓂᐊᕐᓂᕐᒥᒃ ᐊᓯᖏᑦ ᐆᒃᑐᖅᑕᕗᑦ ᑲᔪᓯᔪᓐᓇᐃᓪᓕᒃᐸᑕ. ᒫᔾᔨ 2005-ᒥ, ᑲᓇᑕ ᐱᒋᐊᖅᑎᑦᑎᔪᒪᓕᓚᐅᖅᑐᑦ ᐋᖅᑮᖃᑎᒋᒍᑎᒋᓂᐊᖅᑕᒥᓂᒃ. ᑐᙵᕕᒃᑯᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᐊᖏᓚᐅᖅᑐᑦ ᑕᐃᒃᑯᓄᖓ.
ᑐᙵᕕᒃᑯᑦ ᑲᔪᓯᑎᑦᑎᓚᐅᕐᒥᔪᑦ ᐊᖏᒡᓕᒋᐊᖅᑎᑦᑎᓂᕐᒥᓂᒃ ᒐᕙᒪᓕᕆᓂᕐᒥᒃ ᐱᓕᕆᖃᑕᕐᓂᕐᒥᓂᒃ ᐋᑐᕚᒥ. ᑎᒃᑯᐊᖅᓯᖅᑳᓚᐅᖅᑐᒍᑦ ᓄᑕᒦᒃ ᑐᑭᒧᐊᑦᑎᑦᑎᔨᒥᒃ ᒐᕙᒪᒃᑯᓐᓄᑦ ᐊᒻᒪᓗ ᐃᓄᖕᓂᒃ ᐱᓕᕆᖃᑎᒌᒃᑎᒃᓴᒥᒃ ᑎᓕᔭᐅᓯᒪᓪᓗᑎᒃ ᖃᐅᔨᒪᔭᐅᓕᖅᑎᑦᑎᓂᖅᓴᐅᔭᕆᐊᖃᕐᓂᕐᒥᒃ ᓄᓇᕗᒻᒥ ᐃᓄᖕᓄᑦ ᐃᓱᒪᓘᑕᐅᕙᒃᑐᓂᒃ ᑲᓇᑕᒥ ᒪᓕᒐᓕᐅᖅᑎᐅᔪᓄᑦ ᑭᒡᒐᖅᑐᐃᔨᓄᑦ ᐊᒻᒪᓗ ᑲᓇᑕᒥ ᐱᕙᓪᓕᐊᔪᓕᕆᔨᓄᑦ. ᐱᓕᕆᖃᑎᒌᓐᓇᕐᒥᔭᕗᑦ ᓄᓇᕗᒻᒥ ᑲᓇᑕᓕᒫᒧᑦ ᑲᑎᒪᔨᕐᔪᐊᑦ, ᑮᓇᐅᔭᓂᒃ ᖃᐅᔨᓴᖅᑎᕐᔪᐊᑉ ᑎᑎᕋᕐᕕᖓᓂ ᐊᒻᒪᓗ ᐊᓯᖏᓐᓂᒃ ᑲᓇᑕᒥ ᑎᑎᕋᕐᕕᖁᑎᒋᔭᐅᔪᓂ ᐃᑲᔪᕈᒪᓪᓗᒋᑦ ᑐᑭᓯᐅᕙᓪᓕᐊᓂᕐᒥᒃ ᐃᓱᒫᓘᑎᒋᔭᑦᑎᓐᓂᒃ. ᓄᑖᒥᒃ ᐱᕙᓪᓕᐊᔪᓕᕆᓂᕐᒧᑦ ᐊᐅᓚᑦᑎᕕᒃᓴᒥᒃ ᓴᖅᑮᓚᐅᖅᑐᒍᑦ ᐋᑐᕚᒥ ᐊᓪᓚᕝᕕᑦᑎᒍᑦ ᐊᑐᐃᓐᓇᖃᕐᓂᖅᓴᐅᒍᒪᓪᓗᑕ ᒐᕙᒪᑐᖃᒃᑯᑦ ᐱᓕᕆᐊᒃᓴᕆᖃᑦᑕᖅᑕᖏᓐᓂᒃ ᐊᒻᒪᓗ ᖃᓪᓗᓈᓂ ᑮᓇᐅᔭᖃᖅᑎᑦᓯᔾᔪᑎᒃᓴᖃᕐᕕᐅᖃᑦᑕᖅᑐᓂᒃ ᑕᒪᐅᓇ ᐱᓕᕆᔾᔪᑎᒃᓴᓂᒃ ᓇᓂᓯᖃᑦᑕᓂᖅᓴᐅᓇᔭᕐᓂᕗᑦ ᐱᔾᔪᑎᒋᓪᓗᒍ ᐃᖅᑲᓇᐃᔭᐅᑕᐅᔪᓐᓇᖅᑐᓂᒃ ᓄᓇᕗᒻᒥ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.
ᑐᓐᖓᕕᒃᑯᑦ ᓴᓐᖏᑦᑎᑦᑎᐹᓪᓕᒋᐊᓚᐅᕐᒥᔪᑦ ᐃᖅᑲᓇᐃᔭᖃᑎᖃᕐᓂᕐᒥᓂᒃ ᓄᓇᕗᑦ ᒐᕙᒪᒃᑯᖏᓐᓂᒃ (ᓄᓇᕗᑦ ᒐᕙᒪᖓ). ᒪᐃ 2004-ᒥ, ᑐᓐᖓᕕᒃᑯᑦ ᐊᖏᔪᖅᑳᖓ ᐊᒻᒪᓗ ᓄᓇᕗᒻᒥ ᓯᕗᓕᖅᑎ ᐊᑎᓕᐅᖃᑎᒌᓚᐅᖅᑑᒃ ᐃᖅᑲᓇᐃᔭᖃᑎᒌᓐᓂᕐᒧᑦ ᐊᖏᕈᑎᓂᒃ, ᑕᐅᖅᓯᕈᑎᖏᓐᓂᒃ ᑲᖏᖅᑐᒑᐱᒡᒥ ᐊᖏᖃᑎᒌᒍᑎᓕᐊᕆᓯᒪᔭᖏᓄᑦ, ᐃᖅᑲᓇᐃᔭᖃᑎᒌᑦ ᓇᓗᓇᐃᖅᑕᐅᓯᒪᔾᔪᑕᐅᓪᓗᓂ ᓯᕗᓪᓕᐅᔾᔭᖁᔭᒥᓂᒃ ᑲᑐᔾᔨᖃᑎᒌᓐᓂᕐᒧᑦ ᐊᒻᒪᓗ ᑐᑭᒧᐊᒍᑎᒃᓴᐃᑦ ᐋᖅᑭᓱᖅᑕᐅᓪᓗᑎᒃ ᐊᐅᓚᑦᓯᔾᔪᑕᐅᓂᐊᖅᑐᑦ ᐊᒻᒪᓗ ᐋᖅᑭᒃᓲᑎᒃᓴᑦ. ᑲᑎᒪᑭᑕᐅᔭᖃᑦᑕᓚᐅᖅᑐᑦ ᑐᓐᖓᕕᒃᑯᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑕ ᓯᕗᓕᖅᑎᖏᑦ ᐊᖏᔪᖅᑲᐅᑎᖏᓪᓗ ᐊᒻᒪᓗ ᓴᓐᖏᑦᑎᒃᐹᓪᓕᕈᑕᐅᓪᓗᓂ ᐃᖅᑲᓇᐃᔭᖃᑎᒌᓐᓂᕐᒧᑦ ᐊᒻᒪᓗ ᑲᑐᔾᔨᖃᑎᒌᓐᓂᕐᒧᑦ ᑐᕌᒐᕆᔭᐅᒐᔪᒃᑐᓂᒃ.
ᑐᓐᖓᕕᒃᑯᑦ ᐃᖅᑲᓇᐃᔮᖃᐃᓐᓇᖅᓯᒪᒻᒥᔪᑦ ᐊᕙᑎᓕᕆᓂᕐᒨᖓᔪᓂᒃ, ᐃᓚᒋᔭᐅᓪᓗᓂ ᐃᖅᑲᓇᐃᔮᖃᕐᓂᖅ ᐃᓄᐃᑦ ᐊᕙᑎᓕᕆᓂᕐᒧᑦ ᐊᑐᐊᒐᒃᓴᖓᓂᒃ ᑐᓐᖓᕕᒃᑯᑦ ᑲᑎᒪᔨᖏᓐᓄᑦ ᓴᖅᑭᖅᑕᐅᖁᔭᐅᓯᒪᔪᒥᒃ. ᐊᐃᕙᔾᔪᑕᐅᒻᒪᕆᖃᑦᑕᖅᓯᒪᔪᖅ ᐋᖅᑭᑦᓯᒪᑦᓯᐊᖁᔭᐅᓪᓗᓂ ᓇᓕᒧᒌᒋᐊᖃᕐᓂᖏᓐᓄᑦ ᑐᕌᒐᕆᔭᐅᔪᑦ ᐊᖏᖃᑎᒌᒍᓐᓇᐃᓕᖅᑲᐅᑕᐅᑎᓪᓗᒋᑦ ᐱᕙᓪᓕᐊᔪᓕᕆᓂᕐᒨᖓᔪᑦ ᐊᒻᒪᓗ ᐊᕙᑎᓕᕆᓂᕐᒧᑦ ᐋᖅᑭᑦᓯᒪᐅᑎᒃᓴᑦ. ᑐᓐᖓᕕᒃᑯᑦ ᐃᑲᔪᓚᐅᕆᕗᑦ ᑲᑎᓐᖓᓂᐅᔪᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᑕ ᐊᒃᑐᐃᓂᖓᓄᑦ ᐊᒻᒪᓗ ᓱᕈᓐᓇᖅᑐᓕᕆᓂᕐᒧᑦ ᐅᑭᐅᖅᑕᖅᑐᒥ, ᐊᒻᒪᓗ ᐃᓄᐃᑦ ᐃᓅᖃᑎᒌᑦ. ᑐᓐᖓᕕᒃᑯᑦ ᐃᖅᑲᓇᐃᔮᖃᓚᐅᕆᕗᑦ ᓴᓗᒻᒪᖅᓴᐃᓂᕐᒧᑦ ᐊᑐᐊᒐᕐᓂᖅ ᐃᓄᐃᑦ ᓄᓇᖁᑕᐃᓐᓂ, ᐊᒻᒪᓗ ᕿᒥᕐᕈᖃᑕᐅᓯᒪᓪᓗᑎᒃ ᑎᑎᕋᕆᐊᓐᖓᐅᑎᓕᐊᖑᓚᐅᖅᑐᓂᒃ ᕿᑎᕐᒥᐅᑦ ᐱᖓᓐᓈᓂ ᓄᓇᐃᑦ ᐊᑐᖅᑕᐅᓂᖏᓐᓄᑦ ᐸᕐᓇᐅᑎᓂᒃ.
ᑐᓐᖓᕕᒃᑯᑦ ᐊᒻᒪᓗ ᐊᕕᑦᑐᖅᓯᒪᓂᐅᔪᓂ ᐃᓄᐃᑦ ᑲᑐᔾᔨᖃᑎᒌᖏᑦ (ᐃᓄᐃᑦ ᑲᑐᔾᔨᖃᑎᒌᖏᑦ) ᓴᓐᖏᑎᑉᐹᓪᓕᖅᑎᑦᑎᓚᐅᕐᒥᔪᑦ ᑲᑐᔾᔨᖃᑎᒌᓐᓂᕐᒥᒃ ᐃᖅᑲᓇᐃᔭᖃᑎᒌᓐᓂᒃᑯᑦ. ᑲᑐᔾᔨᖃᑎᒌᖁᑎᕗᑦ ᕿᒥᕐᕈᓂᖃᓚᐅᕐᒪᑕ ᑲᑐᔾᔨᖃᑎᒌᓐᓂᕐᒥ ᐊᐅᓚᓂᕆᔭᑦᑎᒍᑦ ᖃᓄᑐᐃᓐᓇᑦᑎᐊᖅ ᑖᑦᓱᒥᖓᑦᓴᐃᓐᓇᖅ ᐱᓕᕆᐊᖑᔪᒥᒃ ᐱᓕᕆᐊᖃᒃᑲᓂᑦᑕᐃᓕᓂᕐᒧᑦ ᐊᒻᒪᓗ ᐊᑕᐅᓯᐅᖃᑎᒌᓕᖅᐹᓪᓕᕈᑎᒃᓴᖏᓐᓂᒃ. ᐊᖏᔪᖅᑲᐅᑎᖏᑦ ᐃᖅᑲᓇᐃᔭᖅᑏᑦ ᑲᑎᒪᖃᑦᑕᓂᖅᓴᐅᓕᖅᑐᑦ, ᐊᒻᒪᓗ ᑲᑐᔾᔨᖃᑎᒌᓐᓂᕐᒧᑦ ᐱᓗᐊᖅᑐᒥ ᐃᓅᓯᓕᕆᓂᕐᒧᑦ ᐊᒻᒪᓗ ᐃᓕᖅᑯᓯᓕᕆᓂᕐᒧᑦ ᐋᖅᑭᑦᑕᐅᕙᓪᓕᐊᒋᐊᖃᕐᓂᖓᓄᑦ ᑕᒪᓐᓇ ᐱᔭᕆᐊᑭᓪᓕᑎᕆᔨᓄᑦ ᑲᒪᒋᔭᐅᕚᓪᓕᕈᑕᐅᓯᒪᒻᒪᕆᑉᐳᖅ.
ᑐᓐᖓᕕᒃᑯᑦ ᐃᑲᔪᖅᓯᓯᒪᐃᓐᓇᖅᐳᑦ ᓄᓇᓕᓐᓂ ᑐᖅᑲᑕᕐᕕᖕᓂᒃ (ᑐᖅᑲᑕᕐᕖᑦ) ᓴᖅᑭᖅᑕᐅᓚᐅᖅᑐᑦ ᑲᑐᔾᔨᖃᑎᒌᒍᑕᐅᓪᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ 2002-ᒥ. ᑐᖅᑲᑕᕐᕕᖃᐅᖅᑐᐃᓐᓇᐅᓕᖅᑐᑦ 25-ᓂ ᓄᓇᓕᓐᓂ, ᐊᒻᒪᓗ ᕿᒥᕐᕈᔭᐅᓂᐊᕐᓂᖓ ᑐᖅᑲᑕᕐᕖᑦ ᐋᖅᑭᑦᓯᒪᓂᖓᓂ ᐸᕐᓇᑕᐅᓯᒪᔪᖅ ᐊᕐᕌᒍᒋᓂᐊᖅᑕᑎᓐᓂ.
ᑐᓐᖓᕕᒃᑯᑦ ᖃᓪᓕᕙᓪᓕᖅᓯᒪᒻᒥᔪᑦ ᐃᖅᑲᓇᐃᔭᖃᑎᖃᕐᓂᕐᒥᓂᒃ ᐃᓄᐃᑦ ᑕᐱᕇᑦ ᑲᓇᑕᒥ (ITK) ᐊᒻᒪᓗ ᐃᓄᐃᑦ ᓄᓇᕐᔪᐊᒥ ᑲᑎᒪᔨᖏᓐᓂᑦ (ICC). ᑐᓐᖓᕕᒃᑯᑦ ᐊᒻᒪᓗ ᐃᓄᐃᑦ ᑕᐱᕇᑦ ᑲᓇᑕᒥ ᐊᖏᖃᑎᒌᒍᓯᐅᕋᑖᓚᐅᕐᒥᔪᑦ ᑐᑭᓯᐅᒪᖃᑦᑕᐅᑎᓂᕐᒧᑦ ᐊᖏᖃᑎᒌᒍᑎᒃᑯᑦ (MOU) ᑲᑐᔾᔨᖃᑎᒌᓐᓂᕐᒧᑦ, ᐊᒻᒪᓗ ᐋᖅᑮᓪᓗᑎᒃ ᐊᐅᓚᑦᓯᔾᔪᑎᒃᓴᓂᒃ ᐃᑲᔫᑕᐅᓂᐊᖅᑐᓂᒃ ᓱᖅᑯᐃᑕᐅᓯᒪᔾᔪᑎᒃᓴᒥᒃ ᐊᒻᒪᓗ ᐊᑐᐊᖅᓯᔾᔪᑎᒃᓴᒥᒃ ᒪᓕᒐᒃᓴᐅᓂᐊᖅᑐᓂᒃ ᐱᓕᕆᐊᒃᓴᖏᑕ ᐊᒡᒍᖅᓯᒪᓂᖏᓐᓂᒃ.