ᖃᓄᐃᓕᖓᓂᕆᔭᐅᔪᑦ
ᐋᓪ ᖃᓗᔾᔭᖅ
ᐊᖓᔪᖄᖅ ᓄᓇᕗᑦ ᑐᓐᖓᕕᒃᑯᓐᓄᑦ
.ᐹᓪ ᐊᓄᓕᒃ ᖃᓗᔾᔭᖅ ᐊᑯᓂ ᐅᔾᔨᕐᓇᓪᓚᕆᒃᑐᒥᒃ ᐃᓄᖕᓂᒃ ᐱᓕᕆᔾᔪᔾᔨᖃᖅᑕᖅᓯᒪᔪᖅ,
ᑕᒪᓐᓇ ᐱᕈᖅᐸᓪᓕᐊᑎᑕᖓ ᐅᑉᓗᑕᒫᑦ. ᒫᑦᓯ 2004-ᒥ ᓄᓇᕗᑦ ᑐᓐᖓᕕᒃᑯᑦ ᑎᒥᖓᑕ
ᐊᖓᔪᖅᑳᖓᓄᑦ ᓂᕈᐊᖅᑕᐅᖅᑳᕋᓂ, ᖃᓗᔾᔭᖅ ᑮᓇᐅᔭᓕᕆᓂᕐᒧᑦ ᑐᖏᓕᕆᔭᐅᓚᐅᖅᑐᖅ
ᓄᓇᕗᑦ ᑐᓐᖓᕕᒃᑯᓐᓂᒃ, ᐊᖓᔪᖅᑳᕆᔭᐅᓚᐅᖅᓯᒪᓪᓗᓂᓗ ᑭᕙᓪᓕᖅ ᐃᓄᐃᑦ
ᑲᑐᔾᔨᖃᑎᒌᒃᑯᖏᓐᓄᑦ, ᐊᖓᔪᖅᑳᑉᓗ ᑐᖏᓕᕆᓚᐅᖅᓯᒪᓪᓗᓂᐅᒃ ᑭᕙᓪᓕᖅ ᐃᓄᐃᑦ
ᑲᑐᔾᔨᖃᑎᒌᒃᑯᖏᓐᓄᑦ ᐊᒻᒪᓗ ᒪᐃᔭᒋᔭᐅᓚᐅᖅᖢᓂ ᑲᖏᖅᖠᓂᕐᒥ. ᖃᓗᔾᔭᖅ
ᐃᓚᐅᖃᑕᐅᓯᒪᔪᖅᑕᐅᖅ ᓄᓇᓕᕆᓂᕐᒧᑦ ᐊᐃᕙᔪᓂᒃ ᐊᑐᓕᖅᑎᕆᓂᕐᒥᒡᓗ 14 ᐅᑭᐅᑦ
ᐅᖓᑖᓃᓕᖅᑐᖅ ᐊᒻᒪᓗ ᑲᓇᑕᒥ ᐅᓇᑕᖅᑐᒃᓴᖑᐊᓂ ᐱᖃᑕᐅᓚᐅᖅᖢᓂ ᒪᕐᕉᖕᓂᒃ
ᐅᑭᐅᓂᒃ.
ᐹᓪ ᖃᓗᔾᔭᖅ ᐃᓅᓚᐅᖅᑐᖅ ᓴᓪᓕᓂ. ᐃᓕᓐᓂᐊᕆᐊᓚᐅᖅᓯᒪᔪᖅ ᐃᒡᓗᓕᒑᕐᔪᖕᒧᑦ ᐃᓕᓐᓂᐊᕈᑎᒥᓂᒃ ᐱᐊᓂᒃᓯᖅᑳᕋᓂ ᑰᒡᔪᐊᕐᒥ ᓱᓇᖑᖅᓴᓂᕐᒧᑦ ᐃᓕᓐᓂᐊᕐᕕᐅᓚᐅᖅᑐᒥ. ᐃᓕᓐᓂᐊᕆᐊᒃᑲᓐᓂᓚᐅᖅᖢᓂ ᕗᐊᑦ ᓯᒥᑦᒧᑦ, ᓄᓇᑦᑎᐊᕐᒥ ᐊᒻᒪᓗ ᐃᓕᑕᕆᔭᐅᔾᔪᑎᑖᓚᐅᖅᖢᓂ ᑐᐊᕕᕐᓇᖅᑐᓕᕆᓂᕐᒧᑦ.
ᐹᓪ ᖃᓗᔾᔭᐅᑉ ᓯᕗᓕᖅᑎᐅᓂᖓ ᐃᓕᑕᕆᔭᐅᓚᐅᖅᑐᖅ ᑲᖏᖅᖠᓂᐅᑉ ᕼᐊᒻᓚᖓᓄᑦ, ᑐᓂᓪᓗᒍ ᐃᓕᑕᕆᔭᐅᔾᔪᑎᒥᒃ ᐃᑲᔪᒃᑲᐅᓂᖓᓄᑦ ᐃᓄᖕᓂᒃ. ᐃᖅᑲᓇᐃᔮᕆᖃᑦᑕᖅᓯᒪᔭᖏᑦ ᒪᓕᒃᖢᒋᑦ, ᑎᑎᕋᖅᑎᐅᓚᐅᖅᓯᒪᔪᖅ ᑎᑭᕋᕐᔪᐊᑉ ᕼᐊᒻᓚᖓᓂ, ᐃᒡᓗᓕᕆᔨᒃᑯᓐᓂᒃ ᐊᖓᔪᖅᑳᖑᓚᐅᖅᖢᓂ ᑲᖏᖅᖠᓂᕐᒥ ᐃᒡᓗᓕᕆᔨᒃᑯᓐᓂᒃ ᐊᒻᒪᓗ ᒥᑦᑕᕐᕕᖕᒥ ᐃᓱᒪᑕᕆᔭᐅᓚᐅᖅᖢᓂ ᑲᖏᖅᖠᓂᕐᒥ.
ᐹᓪ ᖃᓗᔾᔭᐅᑉ ᖁᕕᐊᒋᔭᖏᑦ ᐊᖑᓇᓱᖕᓂᖅ, ᐃᖃᓗᒐᓱᖕᓂᖅ, ᓄᓇᒦᓐᓂᖅ ᐊᒻᒪᓗ ᓄᓇᒦᖃᑎᖃᖅᖢᓂ ᖃᑕᓐᖑᑎᒥᓂᒃ. ᓄᓕᐊᓕᒃ ᑐᕋᑎ ᓯᕗᕋᖅ ᖃᓗᔾᔭᕐᒥᒃ, ᓯᑕᒪᓂᒃ ᓄᑕᕋᓖᒃ, ᒪᕐᕉᖕᓂᒃ ᐅᑯᐊᖃᖅᖢᑎᒃ, ᐱᖓᓱᓂᒃ ᓂᕕᐊᖅᓵᑯᓗᖕᓂᒃ ᐃᕐᖑᑕᓖᒃ, ᐊᒻᒪᓗ ᐱᖓᓱᓂᒃ ᓄᑲᑉᐱᐊᑯᓗᖕᓂᒃ ᐃᕐᖑᑕᖃᖅᖢᑎᒃ ᓇᒡᓕᒋᓪᓚᕆᒃᑕᖏᓐᓂᒃ.