ᖃᓄᐃᓕᖓᓂᕆᔭᐅᔪᑦ

ᔭᐃᒥᓯ ᐃᑦᑐᓗᒃ
ᓯᕗᓪᓕᐅᓂᖅᓴᖅ ᐊᖓᔪᖄᕐᒧᑦ ᑐᒡᓕᕆᔭᐅᔪᖅ ᐊᒻᒪᓗ ᐊᖓᔪᖄᕐᒧᑦ ᑐᒡᓕᕆᔭᐅᔪᖅ ᑮᓇᐅᔭᓕᕆᓂᕐᒧᑦ

ᔭᐃᒥᓯ ᐃᒃᑐᓗᒃ ᓯᕗᓕᐅᖅᑎᐅᓯᒪᔪᖅ ᐃᓐᓇᐅᓂᓕᒫᖓᓂᒃ, ᑕᒪᐃᓐᓂᒃ ᓄᓇᓕᖕᓂ ᐊᒻᒪᓗ ᐊᕕᒃᑐᖅᓯᒪᓂᐅᔪᓂ. ᓄᓇᓕᐊᕈᒪᖃᑦᑕᕐᓂᖏᑦ ᐊᑐᐃᓐᓇᕐᒥᔭᖓ.

ᒥᔅᑕ ᐃᑦᑐᓗᒃ ᐃᓅᓚᐅᖅᓯᒪᔪᖅ ᕗᐊᑦ ᕌᔅᒥ ᐃᓚᒥᑕ ᐊᖑᓇᓱᒡᕕᒋᕙᒃᑕᑐᖃᖓ ᐊᒻᒪᓗ ᒥᑭᒋᐊᕐᓂᐊᕐᕕᐅᕙᒃᓱᓂ. ᐃᓕᓐᓂᐊᕆᐊᓚᐅᖅᓯᒪᔪᖅ ᑕᓗᕐᔪᐊᓂ, ᐊᒻᒪᓗ ᑭᖑᓂᐊᓂ ᐃᓅᕕᒃᒥ. ᐃᖃᓇᐃᔭᕆᐅᓕᓚᐅᖅᓯᒪᔪᖅ ᕼᐊᑦᓴᓐᐲᒃᑯᑦ ᑲᒻᐸᓂᖓᓂ ᑎᑎᕋᖅᑎᐅᓪᓗᓂ, ᑕᐃᒃᑲᖓᓪᓗ ᐊᖓᔪᖄᖑᖅᓱᓂ ᑯᐊᐸᒃᑯᓐᓂ.

1975-ᒥᒃ 1989-ᒧᑦ, ᒥᔅᑕ ᐃᑦᑐᓗᒃ ᐃᖃᓇᐃᔭᓚᐅᖅᑐᖅ ᑕᓗᕐᔪᐊᓂ, ᓯᕗᓪᓕᖅᐹᖑᓪᓗᓂ ᓄᓇᖓᓐᓂ ᑎᑎᕋᖅᑎᐅᓪᓗᓂ, ᐊᒻᒪᓗ ᑎᑎᕋᖅᑎᐅᓕᖅᓱᓂ ᓴᕿᑕᐅᕋᑖᖅᑐᓂ ᕼᐊᒻᒪᓚᑦᑯᓐᓂ. ᐃᑲᔪᐃᓐᓇᕐᓂᖓ ᐃᓕᑕᕆᔭᐅᓚᐅᖅᑐᖅ ᓄᓇᕗᒻᒥ ᑲᑐᔾᔨᖃᑎᒌᖏᓐᓄᑦ ᕼᐊᒻᒪᓚᑦᑯᑦ, ᐃᓕᑕᕆᔭᐅᔾᔪᐊᖅᑖᖅᓱᓂ, ᒫᓐᓇᐅᓕᖅᑐᖅ ᑕᐃᔭᐃᓕᖅᑐᒥᒃ ᐃᑦᑐᓘᑉ ᐃᓕᑕᕆᔭᐅᔾᔪᑎᖓ, ᑐᓂᔭᐅᓲᖑᓪᓗᓂ ᐊᕐᕌᒎᑕᒫᖅ ᑎᑎᕋᖅᑦᑎᑦᑎᐊᕙᐅᓂᖅᐹᕐᒧᑦ.

ᒥᔅᑕ ᐃᒃᑐᓗᒃ ᓂᕈᐊᖅᑕᐅᓚᐅᖅᑐᖅ ᐊᖓᔪᖄᕐᒧᑦ ᕿᑎᖅᒥᐅᑦ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ 1989-ᖑᑎᓪᓗᒍ. ᓴᕿᑕᐅᖕᒪᑕ ᓄᓇᕗᑦ ᑐᓐᖓᕕᒃᑯᑦ 1993-ᒥ, ᓂᕈᐊᓚᐅᖅᑐᖅ ᓯᕗᓪᓕᐅᓂᖅᓴᒧᑦ ᐊᖓᔪᖄᕐᒧᑦ ᑐᒡᓕᐅᓂᕐᒧᑦ, ᐅᓪᓗᒥᒧᑦ ᓱᓕ ᐃᓂᒋᓗᓂᐅᒃ. 2004-ᒥ, ᐃᓂᖓ ᐊᓯᔾᔨᖅᑕᐅᓚᐅᖅᑐᖅ ᓯᕗᓪᓕᐅᓂᖅᓴᒧᑦ ᐊᖓᔪᖄᕐᒧᑦ ᑐᒡᓕᕆᔭᐅᓂᕐᒧᑦ ᐊᒻᒪᓗ ᐊᖓᔪᖄᕐᒧᑦ ᑐᒡᓕᕆᔭᐅᓂᕐᒧᑦ ᑮᓇᐅᔭᓕᕆᓂᕐᒧᑦ.

ᒥᔅᑕ ᐃᑦᑐᓗᒃ ᑲᑎᑎᑕᐅᓯᒪᔪᖅ, ᓯᑕᒪᓂᒃ ᕿᑐᖓᖃᖅᓱᓂ ᐊᒻᒪᓗ 8-ᓂᒃ ᐃᖑᑕᖃᖅᓱᓂ. ᓇᖕᒥᓂᖅ ᖁᕕᐊᒋᔭᖃᖅᑐᖅ ᐊᖑᓇᓱᖕᓂᕐᒥᒃ, ᐃᖃᓪᓕᐊᓂᕐᒥᒃ ᐊᐅᓛᖅᓯᒪᓂᕐᒥᒡᓗ.