ᐅᓂᒃᑳᑦ ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᓂᒃ
ᖃᓄᖅ ᐱᒋᐊᖓᓚᐅᖅᓯᒪᖕᒪᖔᑕ ᐊᒻᒪᓗ ᑕᒪᕐᒥ ᑕᑯᓪᓗᒋᑦ ᖃᓄᐃᓕᖓᓂᖏᑦ
ᖃᓄᖅ ᓄᓇᕗᑦ ᐱᓐᖑᖅᑎᑕᐅᓐᓂᕐᒪᑦ?
ᓄᓇᕗᑦ ᑐᑭᖃᖅᑐᖅ ᓄᓇᖃᕐᓂᕋᐃᓂᕐᒥᒃ ᐱᒋᔭᑦᑎᓐᓂᒃ ᐃᓄᒃᑎᑐᑦ, ᐅᖃᐅᓯᖓᒍᑦ ᐃᓄᐃᑦ. ᓄᓇᕗᑦ ᐊᖏᕐᕋᕆᔭᐅᔪᑐᖃᐅᒻᒪᑦ ᐃᓄᖕᓄᑦ ᑲᓇᖕᓇᕐᒦᑦᑐᓄᑦ. ᓄᑖᖑᓛᖑᓪᓗᓐᓂ ᑲᓇᑕᒥ ᐊᕕᒃᑐᖅᓯᒪᖃᑕᐅᔪᓂ, ᐱᒋᐊᖅᐸᓪᓕᐊᓕᓚᐅᖅᓯᒪᔪᖅ ᓯᕗᓂᐊᒍᑦ 1959, ᑕᐃᔅᓱᒪᓂ ᔪᐊᑦᔨ ᑯᓂᐊᖅ ᓯᕗᓪᓕᐅᓪᓗᓂ ᐃᓅᓚᐅᖅᓯᒪᔪᖅ ᐅᖃᓪᓚᒋᐊᖅᑐᖅᓯᒪᓪᓗᓂ ᑲᓇᑕᐅᑉ ᒪᓕᒐᓕᐅᕐᕕᖓᓂ. ᒐᕙᒪᓂᒃ ᐊᐅᓚᑦᑎᕙᓪᓕᐊᓕᓚᐅᖅᓯᒪᔪᑦ ᑎᑭᐅᓐᓂᐊᕈᒫᖅᑐᒧᑦ ᓴᕿᑕᐅᓂᖓᓄᑦ ᓄᓇᕗᑦ, ᓴᕿᓚᐅᖅᓯᒪᓂᖏᓐᓄᑦ ᑲᑎᒪᔨᕋᓛᑦ ᓄᓇᖃᖄᖅᓯᒪᔪᑦ ᐱᒋᔭᑐᖃᖏᓐᓂᒃ ᐱᖃᖅᑎᑕᐅᔭᕆᐊᖃᓂᖏᓐᓄᑦ (Committee for Original People's Entitlement). ᑕᐃᑲᖓᑦ ᓴᕿᑕᐅᓕᓚᐅᖅᓯᒪᔪᑦ ᐃᓄᐃᑦ ᑕᐱᕇᒃᓴᐃᑦ ᑲᓇᑕᒥ 1971-ᒥ. 20 ᐊᕐᕋᒍᐃᑦ ᐊᓂᒍᖅᑎᓪᓗᒋᑦ ᑭᖑᓂᐊᓂ, ᔫᓐ 1993-ᒥ ᓄᓇᕗᒻᒥ ᓄᓇᑖᕈᑎᓄᑦ ᐊᖏᕈᑎᑦ ᓂᕈᐊᕈᑕᐅᓪᓗᑎᒃ ᐊᖏᖅᑕᐅᓚᐅᖅᓯᒪᔪᑦ ᓄᓇᕗᓕᒫᒥ ᓂᕈᐊᖅᑎᑕᐅᓪᓗᑎᒃ (ᐃᓄᐃᑦ ᑭᒡᒐᖅᑐᖅᑕᐅᓚᐅᖅᓯᒪᔪᑦ ᑕᐃᔅᓱᒪᓂ ᑐᓐᖓᕕᒃ ᕕᑐᕇᓴᒃᑯᓐᓄᑦ ᓄᓇᕗᒻᒥ) ᐊᒻᒪᓗ ᑲᓇᑕᒥ ᒪᓕᒐᓕᐅᖅᕕᖕᒧᑦ.
ᑐᓐᖓᕕᒃ ᕕᑐᕇᓴᒃᑯᑦ ᓄᓇᕗᒻᒥ ᐊᔩᖃᑎᒌᓚᐅᖅᓯᒪᔪᑦ ᒐᕙᒪᖏᓐᓂᒃ ᑲᓇᑕᒥ ᐊᒻᒪᓗ ᓄᓇᑦᓯᐊᕐᒥ. ᑕᒪᕐᒥᒃ ᓄᓇᕗᑦ ᑐᓐᖓᕕᒃᑯᑦ ᐊᒻᒪᓗ ᒐᕙᒪᒃᑯᖏᑦ ᓄᓇᕗᒻᒥ ᓴᕿᑕᐅᓕᓚᐅᖅᓯᒪᔪᑦ ᐊᑐᖅᑕᐅᓂᖏᓐᓄᑦ ᓄᓇᕗᒻᒥ ᓄᓇᑖᕈᑎᓄᑦ ᐊᖏᕈᑏᑦ -ᑐᓐᖓᕕᒃᑯᑦ ᓯᕗᒃᑲᑕᐃᔨᐅᓗᑎᒃ ᐃᓚᒋᔭᐅᓂᖏᓐᓂᒃ ᐃᓄᐃᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᐱᔨᑦᑎᕋᖅᑎᐅᓂᕐᒧᑦ ᓄᓇᒻᒥ ᐃᓄᖁᑎᖏᓐᓂᓗ.
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ ᐱᖑᖅᑎᑕᐅᓚᐅᖅᓯᒪᔪᖅ 1993-ᒥ ᐃᓇᖏᖅᓯᓪᓗᓂ ᑐᖓᕕᒃ ᕕᑐᕇᓴᒃᑯᑦ ᓄᓇᕗᒻᒥ. ᑎᒥᐅᔪᖅ ᑖᓐᓇ ᐃᓕᑕᕆᔭᐅᓯᒪᔪᖅ ᑲᑐᔾᔨᖃᑎᒋᖕᓂᐅᓪᓗᓂ ᑭᒡᒐᖅᑐᐃᔨᐅᔪᖅ ᐃᓄᖕᓂᒃ ᐊᑖᒍᑦ ᓄᓇᕗᒻᒥ ᓄᓇᑖᕈᑎᓂᒃ ᐊᖏᕈᑎᓂ. ᑐᓐᖓᕕᒃᑯᑦ ᑎᓕᐅᔭᓯᒪᔪᑦ ᐱᕈᖅᓴᐃᔨᐅᓂᕐᒥᒃ ᐃᓄᐃᑦ ᑮᓇᐅᔾᔭᒃᓴᖃᑕᐅᓂᒃᑯᑦ, ᐃᓅᓯᒃᑯᑦ, ᐃᓕᖅᑯᓯᒃᑯᓪᓗ ᖃᓄᐃᖏᓐᓂᖃᕐᓂᕐᒧᑦ ᐊᑐᓕᖅᑎᑕᐅᕙᓪᓕᐊᓂᖓᒍᑦ ᓄᓇᕗᒻᒥ ᓄᓇᑖᕈᑎᑦ ᐊᖏᕈᑎᐊᒍᑦ.
ᑐᓐᖓᕕᒃᑯᑦ ᐃᖃᓇᐃᔭᖅᑎᖃᖅᑐᑦ 90-ᓂᒃ ᐃᓄᖕᓂᒃ ᓯᑕᒪᒥᒃ ᑎᑎᕋᕐᕕᖃᖅᓱᑎᒃ/ᐊᓪᓚᒡᕕᖃᖅᓱᑎᒃ, ᐃᓚᒋᔭᐅᓪᓗᓂ ᐊᑕᐅᓯᖅ ᑎᑎᕋᕐᕕᒃ ᐋᑐᕚᒥ . ᑐᓐᖓᕕᒃᑯᑦ ᐊᐅᓚᑕᐅᓲᑦ ᖁᓕᓂᒃ (10-ᓂᒃ) ᑲᑎᒪᔨᖃᖅᓱᑎᒃ ᓂᕈᐊᖅᑕᐅᓯᒪᔪᓂᒃ ᐃᓄᖕᓄᑦ ᓄᓇᕗᒻᒥᐅᓄᑦ ᐅᑭᐅᖃᖅᑐᓂᒃ 16-ᓂᒃ ᐅᖓᑖᓂᓗᓐᓃᑦ. ᐱᖓᓱᑦ ᑲᑎᒪᔨᐅᖃᑕᐅᔪᑦ ᑐᓐᖓᕕᒃᑯᑦ ᑲᑎᒪᔨᖏᓐᓂ ᓂᕈᐊᖅᑕᐅᓯᒪᕙᒃᑐᑦ ᐃᓄᖕᓄᑦ ᐱᓕᕆᔨᐅᑎᑕᐅᓪᓗᑎᒃ ᐊᐅᓚᑦᑎᔨᓂᒃ ᑲᑎᒪᔨᐅᓂᖅ ᑐᓐᖓᕕᒃᑯᓐᓂ. ᐊᒥᐊᒃᑯᖏᑦ 6-ᖑᔪᑦ ᑲᑎᒪᔨᐅᖃᑕᐅᔪᑦ ᓂᕈᐊᒐᒃᓴᓐᖑᖅᑎᑕᐅᕙᒃᑐᑦ ᐊᕕᒃᑐᖅᓯᒪᓂᐅᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ ᐃᓚᒋᔭᐅᕙᒃᓱᑎᒃ ᐊᖓᔪᖄᕆᔭᐅᔪᑦ. ᐃᒃᓯᕙᐅᑕᖓᑦ ᓄᓇᕗᑦ ᐸᐸᑦᑎᔨᒃᑯᓐᓄᑦ ᓂᕈᐊᖃᑕᐅᓲᖑᖏᑦᑐᖅ ᑲᑎᒪᔨᐅᖃᑕᐅᓗᓂ ᑐᓐᖓᕕᒃᑯᓐᓂ.
ᑐᓐᖓᕕᒃᑯᑦ ᑲᒪᔨᐅᑎᑕᐅᔪᑦ ᐊᐅᓚᑕᐅᓂᖏᓐᓂᒃ ᑕᒪᕐᓂᒃ ᐃᓄᖕᓄᑦ ᐱᖁᑎᒋᔭᐅᔪᑦ ᓄᓇᐃᑦ ᓄᓇᕗᒻᒦᑦᑐᑦ, ᐊᒻᒪᓗ ᐱᓕᕆᔨᐅᔭᕆᐊᖃᕆᓪᓗᑎᒃ ᑕᐱᕆᔭᐅᖃᑦᑕᕐᓂᖅ ᐃᓄᐃᑦ ᐃᓚᐅᔭᕆᐊᖃᕐᓂᖏᓐᓂ ᓄᓇᕗᒻᒥ. ᑲᑐᔾᔨᖃᑎᒌᖏᑦᑕᐅᖅ ᐊᒥᓱᒐᓴᖕᓂᒃ ᐊᑐᖅᑕᐅᔪᒃᓴᓂᒃ ᐱᑕᖃᖅᑎᑦᑎᔨᐅᔪᑦ ᐃᓄᖕᓄᑦ, ᐃᓚᖏᑦ ᐃᑲᔪᖅᑕᐅᖃᑦᑕᕐᓂᖏᓐᓄᑦ ᐃᓄᐃᑦ ᐱᕙᓪᓕᐊᓂᕐᒧᑦ ᑯᐊᐳᕇᓴᖏᓐᓂᒃ ᐊᒻᒪᓗ ᓄᓇᓕᖕᓂ ᑮᓇᐅᔾᔭᒃᓴᐅᑎᒃᓴᓂᒃ ᐱᕙᓪᓕᐊᑎᑦᑎᓂᕐᒧᑦ ᑎᒥᐅᔪᓂᒃ, ᐃᓐᓇᑐᖃᕐᓄᑦ ᐃᑲᔫᓯᐊᒃᓴᓂᒃ ᐸᕐᓇᐅᑕᐅᔪᓂᒃ, ᐊᖑᓇᓲᑎᒃᑯᑦ ᐃᑲᔫᑎᓂᒃ, ᐊᒻᒪᓗ ᐃᓅᔪᓃᖅᑐᖃᖅᑎᓪᓗᒍ ᐊᐅᓛᕈᑎᒃᓴᖏᓐᓂ ᐊᑐᕋᔭᖅᑐᓂᒃ.
ᓄᓇᕗᑦ ᑐᓐᖓᕕᒃᑯᑦ ᐱᓕᕆᖃᑎᖃᖅᐸᒃᑐᑦ ᐊᕕᒃᑐᖅᓯᒪᓂᐅᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ - ᕿᑎᖅᒥᐅᑦ, ᑭᕙᓪᓕᖅ, ᕿᑭᖅᑕᓂᓗ - ᐱᕙᓪᓕᐅᑎᑦᑎᓂᕐᒧᑦ ᐃᓅᓯᒃᑯᑦ, ᒐᕙᒪᓕᕆᓂᒃᑯᑦ, ᓄᓇᒥᐅᑕᓕᕆᓂᒃᑯᑦ ᐊᒻᒪᓗ ᑮᓇᐅᔾᔭᒃᓴᐅᑎᒃᓴᓄᑦ ᐱᕙᓪᓕᐊᑎᑦᑎᓂᕐᒧᑦ. ᐊᑕᐅᓯᕐᒦᑎᑕᐅᖏᓐᓂᖏᑦ ᓄᓇᓕᖕᒥ ᐃᑲᔪᕐᓂᖃᖅᑐᖅ ᑕᒪᐃᓐᓄᑦ ᐊᕕᒃᑐᖅᓯᒪᓂᐅᔪᓃᑦᑐᑦ ᐃᑲᔪᖅᑕᐅᖃᑕᐅᔪᓐᓇᕐᓂᖏᓐᓄᑦ.
ᑐᓐᖓᕕᒃᑯᑦ ᐊᒻᒪᓗ ᐃᓄᐃᑦ ᑲᑐᔾᔨᖃᑎᒌᖏᑦ ᓴᕿᑎᑦᑎᓵᓚᐅᕐᒥᔪᑦ ᓄᓇᓕᖕᓂ ᐃᑲᔪᖅᑎᓂᒃ ᑐᓐᖓᕕᒃᑯᓐᓄᑦ ᓄᓇᓕᓕᒫᓂ ᓄᓇᕗᒻᒥ, ᓴᖏᓂᖅᓴᐅᓕᖁᓪᓗᒋᑦ ᓄᓇᓕᖕᓂ ᐊᑐᓕᖅᑎᑦᑎᖃᑕᐅᕙᓪᓕᐊᓂᖏᓐᓄᑦ ᐱᓕᕆᐊᖑᔪᑦ, ᐊᑐᐃᓐᓇᐅᓂᖅᓴᐅᓕᖁᓪᓗᒋᓪᓗ ᐊᑐᖅᑕᐅᔪᓐᓇᓲᑦ ᐃᓄᖕᓄᑦ, ᐊᔾᔨᒋᒃᑐᐃᓐᓇᓂᒃ ᐱᓕᕆᑐᐃᓐᓇᖏᓐᓂᖅᓴᐅᓕᖁᓗᒋ5 ᐃᓄᐃᑦ ᑲᑐᔾᔨᖃᑎᒌᖏᑦ ᐊᒻᒪᓗ ᑕᒪᕐᒥᒃ ᐃᓄᐃᑦ ᐃᑲᔪᖅᑕᐅᕚᓪᓕᖁᓪᓗᒋᑦ ᓄᓇᕗᒻᒥ ᓄᓇᑖᕈᑎᒃᑯᑦ ᐊᖏᕈᑎᓂᒃ.
ᓄᓇᕗᒻᒥ ᓄᓇᑖᕈᑎᓂᒃ ᐊᖏᕈᑏᑦ
ᓄᓇᕗᒻᒥ ᓄᓇᑖᕈᑏᑦ ᐊᖏᕈᑎᐅᔪᑦ ᐊᖏᓂᖅᐸᖑᖕᒪᑕ ᓄᓇᑖᕈᑎᒋᔭᐅᓯᒪᔪᓂ ᑲᓇᑕᒥ ᒐᕙᒪᐅᔪᓂ ᐊᒻᒪᓗ ᓄᓇᖃᖄᖅᓯᒪᔪᓂ ᐃᓄᖁᑎᒋᔭᐅᔪᓂ ᓄᓇᕐᔪᐊᓕᒫᒥ, ᐊᒻᒪᓗ ᐱᕙᓪᓕᐊᓯᒪᓕᖅᓱᑎᒃ ᐃᓄᖕᓂᒃ ᓄᓇᕗᒻᒥ ᐃᓂᖃᖃᑕᐅᑦᑎᐊᕆᐊᖃᕐᓂᖏᓐᓂᒃ ᐃᓂᑖᖃᑕᐅᓯᒪᓂᕐᒥᒃ ᑲᓇᑕᒥ. 1973-ᒥ ᐃᖃᖅᑐᐃᔨᕐᔪᐊᒃᑯᑦ ᑲᓇᑕᒥ ᐃᓕᑕᖅᓯᒪᓚᐅᖅᓯᒪᔪᑦ ᐱᑕᖃᕐᓂᖏᓐᓂᒃ ᓄᓇᖃᖄᖅᓯᒪᔪᑦ ᓄᓇᖃᖅᑐᑐᖃᐅᓂᖏᓐᓂᒃ, ᑕᐃᒫᒃ ᓇᓗᓇᖅᓯᓪᓗᓂ ᑲᓇᑕᐅᑉ ᓇᖕᒥᓂᖁᑎᖃᕐᓂᕋᐅᑎᖏᓐᓂᒃ ᐅᑭᐅᖅᑕᖅᑐᒥ ᓄᓇᓂᒃ ᑲᓇᑕᒥ. ᓄᓇᑖᕈᑎᓄᑦ ᐊᖏᕈᑏᑦ ᐲᖅᓯᓚᐅᖅᓯᒪᔪᑦ ᑕᒪᑐᒥᖓ ᓇᓗᓇᕈᑕᐅᔪᒥᒃ ᑲᓇᑕᒧᑦ ᐱᖁᑎᒋᔭᐅᓂᖏᓐᓂᒃ ᐊᖏᓂᖃᖅᑐᓂᒃ 1/5-ᓂᒃ ᓄᓇᖁᑎᓪᓚᑖᖑᔪᓂᒃ ᑲᓇᑕᒧᑦ ᐃᓚᒋᔭᐅᔪᓂᒃ.
ᑲᓇᑕᒥ ᒪᕐᕉᐃᓕᖃᖓᔫᖕᓂᒃ ᐱᒻᒪᕆᐅᔪᓂᒃ ᓯᕗᒻᒧᐊᖕᓂᖃᓚᐅᖅᑐᖅ ᐊᑎᓕᐅᖅᑕᐅᓂᖓᓄᑦ ᓄᓇᕗᒻᒥ ᓄᓇᑕᕈᑏᑦ. ᓯᕗᓪᓕᕐᒥ, ᐊᖏᕈᑏᑦ ᐃᓕᓯᔾᔪᑕᐅᓕᓚᐅᖅᑐᑦ ᐃᓄᓕᒫᕐᓄᑦ ᑐᕌᖓᔪᓂᒃ ᑲᑎᒪᔨᖏᓐᓂᒃ ᐊᒻᒪᓗ ᓴᕿᑦᑎᔾᔪᑕᐅᓪᓗᑎᒃ ᐱᖅᑯᓯᕆᔭᐅᖃᑦᑕᕆᐊᖃᖅᑐᓂᒃ ᐱᕙᓪᓕᐊᔪᓕᕆᓂᕐᒧᑦ ᓴᓇᔪᒪᔪᖃᖅᑎᓪᓗᒋᑦ ᐊᖏᖅᑕᐅᓯᒪᖃᑦᑕᕆᐊᖃᕐᓂᖏᓐᓂᒃ ᓄᓇᓕᖕᓂ ᐃᓄᖁᑎᒋᔭᐅᔪᓂᒃ. ᑕᒪᒃᑯᐊ ᑲᑎᒪᔨᐅᓕᖅᑐᑦ ᐱᑕᖃᖃᑦᑕᓚᐅᖏᒻᒪᑕ ᓯᕗᓂᐊᒍᑦ ᐊᒻᒪᓗ ᓴᕿᑐᐃᓇᕆᐊᖃᕐᓂᖏᑦ ᐃᓱᖃᖏᑦᑐᒥᒃ ᒐᕙᒪᒃᑯᑎᒍᑦ ᒪᓕᒐᓕᕆᓂᒃᑯᓪᓗ ᐊᑭᕋᖅᑑᑕᐅᔪᓐᓇᖅᑐᑦ ᐱᕙᓪᓕᐊᑎᑦᑎᓂᕐᒧᑦ ᐱᔾᔪᑎᖃᖅᑐᑦ ᐲᔭᖅᑕᐅᓚᐅᕐᒥᔪᑦ. ᑐᒡᓕᖓᓂ, ᓄᓇᕗᒻᒥ ᓄᓇᑖᕈᑎᓄᑦ ᐊᖏᕈᑏᑦ ᐱᔪᓐᓇᐅᑕᐅᓕᓚᐅᖅᑐᑦ ᑲᓇᑕᐅᑉ ᒐᕙᒪᒃᑯᖏᓐᓂᒃ ᐊᑐᕈᓐᓇᕐᓂᖏᓐᓂᒃ ᖃᐅᔨᒪᓂᖏᓐᓂᒃ ᐃᑲᔪᕈᒪᓂᖏᓐᓂᓗ ᓄᓇᓕᖕᓂ ᐃᓄᐃᑦ ᐊᐅᓚᑦᑎᔨᐅᓂᖏᓐᓄᑦ ᓄᓇᓂᒃ ᐃᒪᕐᓂᒡᓗ ᓄᓇᕗᒻᒥ.
ᑕᒪᒃᑯᓂᖓ ᐱᔪᒪᔭᖏᓐᓂ ᐱᑎᑕᐅᒍᑎᒃ, ᑲᓇᑕ ᓱᓕᓂᐊᕐᓂᕋᖅᓯᒪᔪᖅ ᐃᓄᖕᓄᑦ ᒪᑯᓂᖓ:
- ᓄᑖᕐᒥᒃ ᐊᕕᒃᑐᖅᓯᒪᓂᕐᒥᒃ ᐱᓐᖑᖅᑎᑦᑎᓂᐊᕐᓂᖅ ᓇᖕᒥᓂᖅ ᒪᓕᒐᓕᐅᕐᕕᖃᕐᓗᓂ ᐊᒻᒪᓗ ᐃᓄᓕᒫᓄᑦ ᒐᕙᒪᖃᕐᓗᓂ. ᒐᕙᒪᒃᑯᑦ ᓄᓇᕗᒻᒥ ᐊᑐᓕᕆᐊᓚᐅᖅᓯᒪᔪᑦ ᐄᐳ 1, 1999-ᒥ;
- ᒪᓕᒐᖅᑎᒍᑦ ᐱᖁᑎᖃᖅᑎᑕᐅᓂᖅ ᖃᓂᒋᔭᖏᓐᓂ 351,000 ᑭᑉᐸᕆᒃᑐᑦ ᑭᓛᒥᑕᐃᑦ ᓄᓇᓂᒃ, ᑖᒃᑯᓇᖓᑦ 37,000 ᑭᑉᐸᕆᒃᑐᑦ ᑭᓛᒥᐅᑕᖏᑦ ᐃᓚᖃᕐᓗᑎᒃ ᓴᕕᕋᔭᒃᓴᖃᕐᓂᖏᓐᓄᑦ ᐱᔪᓐᓇᐅᑎᖃᕐᓂᖅ, ᑕᐃᒫᒃ ᐃᓄᐃᑦ ᐊᖏᓂᖅᐹᓂᒃ ᓄᓇᓂᒃ ᓇᖕᒥᓂᖃᖅᑎᑕᐅᓪᓗᑎᒃ ᓄᓇᕗᒻᒥ, ᓴᓂᐊᓂ ᑯᐃᓐᒧᑦ ᐱᖁᑎᒋᔭᐅᔪᓂᒃ;
- ᐃᓕᑕᕆᔭᐅᓂᖏᑦ ᐱᔪᓐᓇᐅᑏᑦ ᓄᓇᕗᒻᒥ ᐃᓄᐃᑦ, ᐊᖑᓇᓱᒍᓐᓇᕐᓂᖅ ᐆᒪᔪᓂᒃ, ᑕᒪᐃᓐᓂ ᓄᓇᓂᒃ ᐃᒪᕐᓂᒡᓗ ᓄᓇᕗᒻᒦᑦᑐᓂᒃ, ᑭᓇᒧᑦ ᐱᒋᔭᐅᒐᓗᐊᖅᐸᑕ;
- ᓇᓕᒧᒋᔭᐅᔪᓂᒃ ᑭᒡᒐᖅᑐᐃᔨᖃᕈᓐᓇᕐᓂᖏᑦ ᐃᓄᐃᑦ ᓄᓇᒥᐅᑕᓄᑦ ᐆᒪᔪᕐᓄᓪᓗ ᐊᐅᓚᑦᑎᔨᐅᓂᕐᒧᑦ ᑲᑎᒪᔨᓄᑦ ᐊᒻᒪᓗ ᑎᒥᖑᖅᑎᑕᐅᔪᓄᑦ;
- ᓴᕿᑕᐅᓂᖏᑦ ᐱᖓᓱᑦ ᑲᓇᑕᓕᒫᒧᑦ ᒥᖑᐃᖅᓯᕐᕕᒃᓴᐃᑦ;
- ᑭᒡᒐᖅᑐᐃᔪᓂᒃ ᒐᕙᒃᑯᓐᓂᒃ ᐃᖃᓇᐃᔭᖅᑎᓂᒃ ᐱᑕᖃᓕᕐᓗᑎᒃ 85%-ᓂᒃ ᐃᓄᖁᑎᒋᔭᐅᔪᓂᒃ ᓄᓇᕗᒻᒥ ᐃᖃᓇᐃᔭᖅᑎᖏᓐᓂ;
- ᓇᓪᓕᐅᒃᑯᒪᒃᓴᖅᑎᑕᐅᓂᖏᑦ $1.148 ᐱᓕᔭᓐᓂᒃ, ᐊᔾᔨᐅᖏᑦᑐᒧᑦ ᐸᐸᑦᑎᕕᐅᓂᐊᖅᑐᒧᑦ 14-ᓄᑦ ᐊᕐᕌᒍᓄᑦ;
- ᓇᖕᒥᓂᖅᑖᖃᑕᐅᖃᑦᑕᕐᓗᑎᒃ ᑮᓇᐅᔭᓕᐊᖑᕙᓪᓕᐊᔪᓂᒃ ᐲᔭᐃᕕᐅᓂᖏᓐᓂ ᓄᓇᐃᑦ ᓴᕕᕋᔭᒃᓴᒐᓚᖕᓂᒃ ᐊᒻᒪᓗ ᐅᖅᓱᐊᓗᖕᓂᒃ ᒑᓴᓖᒃᓴᓂᒡᓗ ᑯᐃᓐᒧᑦ ᓄᓇᖁᑎᒋᔭᐅᓂᕋᖅᑕᐅᔪᓂᖓᖅᑐᓂᒃ ᓴᓇᔭᐅᔪᓂᒃ;
- ᐱᔪᓐᓇᐅᑎᖃᕐᓗᑎᒃ ᐊᔩᖃᑎᒌᒍᓐᓇᕐᓂᖅ ᑮᓇᐅᔾᔭᒃᓴᐅᖃᑕᐅᓂᕐᒧᑦ, ᐃᓅᓯᕐᒥᓄᑦ, ᐊᒻᒪᓗ ᐃᓕᖅᑯᓯᖏᓐᓄᑦ ᐃᑲᔫᑕᐅᓂᐊᖅᑐᓂᒃ, ᐊᒻᒪᓗ ᐊᕙᑎᖏᑦ ᓴᐳᓂᐊᕈᑎᒃᓴᖏᓐᓄᑦ ᓴᕿᓚᕿᓯᒪᔪᓂᒃ ᐊᑐᖅᑕᐅᒃᑲᓐᓂᕈᓇᖏᑦᑐᓂᒃ ᓄᓇᒥᐅᑕᓂᒃ ᐲᔭᐃᕕᐅᓂᖏᓐᓄ/ᓴᓇᕕᐅᓂᖏᓐᓂ ᐃᓄᖕᓄᑦ ᐱᖁᑎᒋᔭᐅᔪᑦ ᓄᓇᐃᑦ;
- ᐱᔪᓐᓇᐅᑎᓂᒃ ᐃᓚᐅᖃᑕᕐᓂᖅ ᓴᓇᔭᐅᕙᓪᓕᐊᓂᖏᓐᓂ ᒐᕙᒪᒃᑯᓐᓄᑦ ᐃᓅᓯᕐᓄᑦ ᐃᓕᖅᑯᓯᓕᕆᓂᕐᒧᓪᓗ ᐊᑐᐊᒐᒃᓴᐃᑦ ᓄᓇᕗᒻᒥ.
ᐊᖏᕈᑏᑦ ᐊᑎᓕᐅᖅᑕᐅᓚᐅᕋᓗᐊᖅᑎᓪᓗᒋᑦ 1993-ᒥ, ᐊᒥᓲᓚᐅᕐᒪᑕ ᓱᓕ ᐱᓂᐊᕐᓂᕋᖅᑕᐅᓯᒪᔪᑦ ᓄᓇᕗᒻᒥ ᓄᓇᑖᕈᑎᒃᑯᑦ ᐊᖏᕈᑎᑎᒍᑦ ᒐᕙᒪᒃᑯᑦ ᑲᓇᑕᒥ ᓱᓕ ᐱᓐᖑᖅᑎᓯᒪᖏᑕᖏᓐᓂᒃ. ᑲᑐᔾᔨᖃᑎᒋᖕᓂᒃᑯᑦ ᓄᓇᒥᐅᑕᓂᒃ ᐊᐅᓚᑦᑎᓂᕐᒧᑦ ᐊᑐᖅᐸᖕᓂᐊᓕᖅᑐᓂᒃ ᐋᕿᒃᓱᐃᓯᒪᒐᓗᐊᖅᓱᑎᒃ, ᐱᓕᕆᐊᒃᓴᓕᒻᒪᕆᐅᕗᑦ ᓱᓕ ᐱᑕᖃᓕᖅᑎᑦᑎᓂᐊᕐᓂᕋᖅᓯᒪᔭᖏᓐᓂᒃ ᐃᖃᓇᐃᔮᖅᑖᖅᑎᑦᑎᓂᕐᒧᑦ, ᑮᓇᐅᔾᔭᒃᓴᐅᑎᒃᓴᑎᒍᑦ ᐱᕙᓪᓕᐊᑎᑦᑎᓂᕐᒥ, ᐃᓅᓯᖏᓐᓂ ᐃᓕᖅᑯᓯᖏᓄᓪᓗ ᐱᐅᓯᕚᓪᓕᕈᑎᒃᓴᓂᒃ, ᐊᒻᒪᓗ ᐊᕙᑎᖏᓐᓂᒃ ᓴᐳᔾᔨᓯᒪᐅᑎᒃᓴᓂᒃ ᓄᓇᑖᕈᑎᑎᒍᑦ ᓴᕿᑕᐅᓂᐊᕐᓂᕋᖅᑕᐅᓯᒪᓪᓗᑎᒃ.
ᖃᓄᖅ ᓄᓇᕗᑦ ᒐᕙᒪᖃᖅᐸᑦ?
ᓄᓇᕗᑦ ᓄᓇᕐᔪᐊᖓ ᐊᕕᒃᑐᖅᓯᒪᓂᐅᓂᖓ ᐃᓕᑕᕆᔭᐅᓪᓗᓂ ᐱᓐᖑᖅᑎᑕᐅᓚᐅᖅᓯᒪᔪᖅ ᐄᐳ 1, 1999-ᒥ. ᒐᕙᒪᒃᑯᑦ ᓄᓇᕗᒻᒥ ᐊᔾᔨᑐᐃᓐᓇᕆᔭᐅᔪᖅ ᐊᓯᖏᓐᓄᑦ ᐃᓄᓕᒫᓄᑦ ᒐᕙᒪᐅᖃᑕᐅᔪᓄᑦ ᑲᓇᑕᒥ, ᐊᑕᐅᓯᕐᒥᒃ ᐊᔾᔨᐅᖏᓐᓂᖃᖅᓱᓂ. ᓄᓇᕗᑦ ᒐᕙᒪᒃᑯᑦ ᑲᔪᓯᔭᕆᐊᖃᖅᑐᑦ ᐃᓗᐊᓂ ᐋᕿᐅᒪᔭᐅᔪᓂ ᑲᔪᓯᒡᒍᑕᐅᔪᓂ ᓄᓇᕗᒻᒥ ᓄᓇᑖᕈᑎᒃᑯᑦ ᐊᖏᕈᑎᒃᑯᑦ, ᒪᓕᒐᖅᑎᒍᑦ ᐃᓕᑕᕆᔭᐅᓯᒪᓪᓗᓂ ᓄᓇᕗᑦ ᒐᕙᒪᒃᑯᖏᓐᓄᑦ ᑎᒍᒥᐊᕈᑕᐅᔪᖅ ᑐᑭᓯᓂᐊᕐᕕᖃᖃᑦᑕᕆᐊᖃᖅᓱᑎᒃ 85%-ᓂᒃ ᐃᓄᓪᓚᕆᐅᔪᓂᒃ ᐃᓄᖁᑎᒥᓄᑦ ᐊᒥᓱᓂᒃ ᐃᓱᒪᓘᑕᐅᔪᓂᒃ ᐊᒃᑐᐃᔪᓐᓇᖅᑐᓂᒃ ᐃᓅᓯᖏᓐᓄᑦᒧ ᐃᓕᖅᑯᓯᖏᓐᓄᓪᓗ ᐃᓄᐃᑦ. ᑐᓐᖓᕕᒃᑯᑦ ᐊᒻᒪᓗ ᓄᓇᕗᑦ ᒐᕙᒪᒃᑯᖏᑦ ᐱᓕᕆᖃᑎᒌᑦᑎᐊᖏᓐᓇᖃᑦᑕᖅᑐᑦ ᐊᒥᓱᓂᒃ ᐊᔾᔨᒌᖏᑦᑐᓂᒃ ᐱᔾᔪᑎᖃᖅᑐᓂᒃ, ᒪᓕᒃᓱᒋᑦ ᐱᓕᕆᖃᑎᒌᖕᓂᐊᕐᓂᕐᒧᑦ ᐊᖏᕈᑎᓕᐊᖑᓯᒪᔪᑦ, ᑕᐃᔭᐅᔪᑦ ᐃᖃᓇᐃᔭᖃᑎᒌᑦ- ᓂᒃ.
ᓄᓇᕗᒻᒥ ᑮᓇᐅᔾᔭᒃᓴᕕᐅᕙᒃᑐᑦ
ᓂᒡᓚᓱᓕᑲᐅᓂᖓ, ᑎᑭᑕᐅᓴᕋᐃᖏᓐᓂᖓ ᓄᓇᖓ, ᐊᒥᓲᖏᓐᓂᖏᑦ ᐃᓄᐃᑦ, ᐱᑕᖃᖏᓐᓂᖏᑦ ᐊᖅᑯᑏᑦ ᓄᓇᓯᐅᑎᑯᑖᖕᓄᓪᓗ ᐊᖅᑯᑏᑦ, ᐊᑭᑐᖏᑦ ᓴᓇᔩᑦ ᐱᖁᑏᓪᓗ, ᐱᑕᖃᖏᓗᐊᕐᓂᖏᑦ ᓄᓇᓕᒡᔪᐊᕐᓂ ᐱᖁᑎᕐᔪᐊᖑᓲᓪᓗ, ᑕᒪᕐᒥᒃ ᑲᑎᓪᓗᒋᑦ ᐱᔾᔪᑕᐅᓯᒪᔪᑦ ᓴᐱᕐᓇᑲᓴᖃᑦᑕᖅᑐᓂᒃ ᑮᓇᐅᔾᔭᒃᓴᖃᑕᐅᔪᓐᓇᕐᓂᕐᒧᑦ ᐱᕙᓪᓕᐊᔪᓐᓇᕐᓂᖏᓐᓄᑦ ᓄᓇᕗᒻᒥ. ᑕᐃᒪᐃᓐᓂᖓᓄᑦ, ᓄᓇᕗᑦ ᑐᖓᔪᐹᓘᓲᖑᕗᖅ ᒐᕙᒪᒃᑯᓐ ᐃᓚᒋᔭᐅᖃᑦᑕᕆᐊᖃᕐᓂᖏᓐᓄᑦ. ᑕᒪᓐᓇ ᐃᓕᑕᕆᔭᐅᓯᒪᔪᖅ ᐃᓗᓕᖏᓐᓂᒃ 24-ᖓᓂ ᓄᓇᕗᒻᒥ ᓄᓇᑖᕈᑎᓂ, ᒪᓕᒐᖃᖅᓱᑎᒃ ᒐᕙᒪᒃᑯᑦ ᐃᑲᔪᖅᑎᐅᔭᕆᐊᖃᕐᓂᖏᓐᓂᒃ ᑮᓇᐅᔾᔭᒃᓴᐅᑎᒃᓴᑎᒍᑦ ᐱᕈᖅᑎᑦᑎᔭᕆᐊᖃᕐᓂᕐᒧᑦ.
ᑕᐃᒪᐃᒃᑲᓗᐊᖅᑎᓪᓗᒋᑦ, ᓄᓇᕗᒻᒥ ᐊᖏᔪᑲᓪᓚᖕᓂᒃ ᐱᑕᖃᖅᑐᑦ ᓴᕕᕋᔭᒃᓴᐅᑎᓂᒃ, ᑕᕆᐅᕐᒥ ᐃᖃᓗᒃᓯᐅᒐᒃᓴᓂᒃ, ᓴᓇᖑᐊᖅᓯᒪᔪᓂᒃ ᐃᓕᖅᑯᓯᓕᕆᓂᕐᒥᒡᓗ ᐱᓕᕆᐊᖃᖅᑐᓂᒃ ᐱᕈᕈᓐᓇᓪᓚᕆᒃᑐᓂᒃ, ᐊᒻᒪᓗ ᐃᓄᖁᑎᖃᖅᓱᑎᒃ ᓴᕿᔮᖅᑎᑦᑎᓯᒪᔪᓂᒃ ᐊᔪᖏᓐᓂᕐᒥᓂᒃ ᑎᒍᒥᐊᕈᓐᓇᕐᓂᖅ ᐊᔪᕐᓇᕐᓂᖅᐹᖑᖁᑕᐅᔪᒥᒃ ᐊᕙᑎᖃᖅᑐᒥ, ᑲᓇᑕᓕᒫᒥ ᐊᒻᒪᓗ ᒐᕙᒪᓕᕆᓂᒃᑯᑦ ᓯᓚᑦᑐᓂᕐᒥᒃ ᐊᔩᖃᑎᒌᒍᓐᓇᕐᓂᖅ ᐊᖏᔪᐊᓕᖕᒥᒃ ᐱᑖᕈᑎᒋᔭᖏᓐᓂᒃ ᓄᓇᑖᕈᑎᓂᒃ ᐊᖏᕈᑎᒃᓴᓂᒃ. 2003-ᖑᑎᓪᓗᒍ, ᑕᒪᐃᓐᓄᐊᖓᔪᖅ ᑮᓇᐅᔾᔭᒃᓴᐅᑎᒃᓴᓂᒃ ᐱᕙᓪᓕᐊᑎᑦᑎᓂᕐᒧᑦ ᖃᓄᐃᓕᐅᕈᑕᐅᓂᐊᖅᑐᑦ ᓴᕿᑕᐅᓚᐅᖅᑐᑦ ᑕᒪᐃᓐᓄᑦ ᐱᒻᒪᕆᐅᔪᓄᑦ ᐃᓚᒋᔭᐅᕙᒃᑐᓄᑦ ᓄᓇᕗᒻᒥ ᐱᕙᓪᓕᐊᔪᓕᕆᓂᒃᑯᑦ.
ᐃᓄᐃᑦ ᐅᖃᐅᓯᑐᖃᖓ
ᐃᓄᒃᑎᑐᑦ ᐅᖃᐅᓯᖅ ᐊᒥᓲᓂᖅᓴᓄᑦ ᐅᖃᐅᓯᑐᖃᕆᔭᐅᖕᒪᑦ ᓄᓇᕗᒻᒥ. ᓯᕗᓪᓕᐅᓗᓂ ᐅᖃᐅᓯᑐᖃᕆᔭᐅᔪᖅ ᐊᒥᓲᓂᖅᓴᓄᑦ ᐃᓄᖁᑎᒋᔭᐅᔪᓄᑦ, ᐊᑐᖅᑕᐅᓪᓗᓂᓗ ᓇᓂᑐᐃᓐᓇᖅ ᐅᑭᐅᖅᑕᖅᑐᒥ. ᐊᒥᓲᖕᒪᑕ ᐅᖃᐅᓯᖃᖃᑎᒌᓪᓚᕆᖏᓐᓂᐅᔪᑦ ᐊᕕᒃᑐᖅᓯᒪᓂᐅᔪᓂ ᐊᒻᒪᓗ ᓄᓇᓕᖕᓂ, ᑭᓯᐊᓂ ᑕᒪᕐᒥᒃ ᑕᑯᓪᓗᒋᑦ, ᐃᓄᐃᑦ ᐊᑯᑭᑦᑐᕐᒥᐅᑕᐃᑦ ᑎᑭᓪᓗᒋᑦ ᓴᐃᐱᐅᕆᔭᒧᑦ, ᕋᓯᐊᒥ ᓄᓇᓕᖕᓄᑦ ᑐᑭᓯᐊᖃᑦᑕᐅᑎᔪᓐᓇᖅᑐᑦ.ᐱᑕᖃᐃᓐᓇᕐᓂᖏᑦ ᐊᑐᕐᓂᖅᓴᐅᓕᕐᓂᖏᓐᓂᒡᓗ ᐃᓄᒃᑎᑑᕐᓂᖅ ᑐᕌᒐᕆᔭᐅᓂᖅᐸᖑᖃᑕᐅᕗᖅ ᑐᓐᖓᕕᑯᓐᓂ.
ᐃᓄᐃᑦ ᐃᓕᖅᑯᓯᖏᑦ
ᐅᒃᑯᓯᒃᓴᓂᒃ ᓴᓇᖑᐊᖃᑦᑕᕐᓂᕐᒥᒃ, ᐃᓕᑕᕆᔭᐅᓂᖅᑖᖅᓯᒪᓂᖏᓐᓄᑦ ᑕᕐᕆᔭᐅᓯᐅᕐᓂᕐᒧᑦ ᐊᑕᓈᕐᔪᐊᕐᒥᒃ, ᓴᓇᖑᐊᖃᑕᕐᓂᖅ ᓱᓇᑐᐃᓐᓇᕐᒥᒃ ᓄᓇᕗᒻᒥ ᑕᑯᔭᐅᓯᒪᔪᑦ ᐅᖓᑖᓂ 50-ᓂᒃ ᐊᕐᕌᒍᓂᒃ ᓴᕿᔮᕐᓂᖏᓐᓂᒃ ᐃᓄᐃᑦ ᐃᓕᖅᑯᓯᑐᖃᕐᒥᓂᒃ ᐱᓕᕆᐊᕆᕙᒃᑕᖏᑦ ᑐᖓᕕᐅᓕᕈᓐᓇᕐᒪᑕ ᐊᔾᔨᒌᖏᑦᑑᑎᓂᒃ ᑮᓇᐅᔭᓕᐅᕈᑕᐅᔪᓐᓇᖅᑐᓄᑦ. ᓴᓇᖑᐊᒐᐃᑦ, ᐅᓂᒃᑳᕐᓂᖅ ᐅᔭᕋᕐᓂᒃ ᐊᑐᕐᓗᑎᒃ ᐊᔾᔨᖑᐊᓕᐅᕐᓂᒃᑯᑦ, ᓯᕗᓪᓕᐅᓚᐅᖅᓯᒪᔪᑦ ᐃᓄᖕᓂᒃ ᑎᑭᓴᖅᑕᐅᖃᑦᑕᕆᐊᓕᓚᐅᖅᓯᒪᔪᓂᒃ. ᐃᓄᐃᑦ ᖃᐅᔨᒪᔭᑐᖃᖏᑦ ᐃᑲᔫᑕᐅᖏᓐᓇᖅᑐᑦ ᐃᓪᓕᖁᓯᑐᖃᕐᒥᓂᒃ ᐊᑐᕐᓂᒃᑯᑦ ᑮᓇᐅᔭᓕᐅᕈᑕᐅᔪᓄᑦ, ᐊᒻᒪᓗ ᐅᓪᓗᒥᐅᓕᖅᑐᖅ, ᓂᐅᕕᖅᑕᐅᖃᑦᑕᕐᓂᖏᓐᓂᒃ ᐊᔾᔨᐅᖏᓪᓚᕆᒃᑐᐃᑦ ᓴᓇᔭᐅᓯᒪᓂᑰᔪᑦ, ᑮᓇᐅᔭᓕᐅᕈᑕᐅᓯᒪᓪᓗᓂ ᐅᖓᑖᓂ $30 ᒥᓕᔭᓐᓂ ᐊᕐᕌᒍᑕᒫᖅ ᓂᐅᕕᖅᑕᐅᕙᓪᓕᐊᓂᑰᔪᓂᒃ. ᐅᖓᑕᓂ 4,200 ᐃᓄᐃᑦ - ᐊᑕᐅᓯᖅ 7-ᖑᔪᓂᒃ ᐃᓄᖕᓂᒃ ᓄᓇᕗᒻᒥ - ᓇᓗᓇᐃᖅᓯᕙᒃᑐᑦ ᐃᖕᒥᓂᒃ ᓴᓇᖑᐊᖅᑎᐅᓂᕐᒥᒃ. ᓄᓇᕗᑦ ᑕᐅᑐᒃᑕᐅᓂᖓ ᑲᓇᑕᒪ ᓄᓇᕐᔪᐊᓕᒫᒥᓗ ᓴᖏᔪᒻᒪᕆᖕᒥ ᑕᐃᒪᐃᓚᕿᓯᒪᔪᖅ ᐃᓄᖕᓄᑦ ᓴᓇᖑᐊᖅᐸᒃᑐᓄᑦ ᓱᓇᑐᐃᓐᓇᕐᓂᒃ ᐊᒻᒪᓗ ᓴᓇᖑᐊᕐᓂᖅ ᐃᓚᒋᔭᐅᓪᓚᕆᒃᓱᓂ ᐊᓯᖏᓐᓂᒃ ᑮᓇᐅᔭᓕᐅᕈᑕᐅᕙᒃᑐᓂ, ᓲᕐᓗ ᐳᓚᕋᑦᑐᓕᕆᓂᕐᒥᒃ.
ᐱᓕᕆᕝᕖᑦ