1920-ᖏᑦ ᐱᒋᐊᓕᕋᑖᖅᑎᓪᓗᒋᑦ, ᑲᓇᑕ ᓴᖅᑮᓚᐅᖅᓯᒪᒻᒪᑕ ᐸᓖᓯᒃᑯᓐᓂᒃ Craig Harbour-ᒥ, 55-ᑭᓛᒥᑕᓂᒃ ᐅᖓᓯᓐᓂᓕᒃ ᐱᖓᓐᓇᖓᓂ ᐅᐃᓱᑦᑑᑉ. 1950-ᖑᓕᖅᑎᓪᓗᒍ, ᐃᓱᒫᓘᑎᖃᖅᓱᑎᒃ ᐅᑭᐅᖅᑕᖅᑑᑉ ᓇᐅᑦᓱᖅᑕᐅᓂᖓᓐᓂᒃ ᐅᓇᑕᖅᑐᖃᖅᑎᓪᓗᒍ, ᑲᓇᑕᒥ ᐊᖓᔪᖅᑲᐅᑏᑦ ᖃᓄᖅᑑᓕᓚᐅᖅᓯᒪᒻᒪᑕ ᐃᓄᖃᐃᓐᓇᖁᔨᓕᖅᓱᑎᒃ ᑲᓇᓐᓇᖓᓂ ᐅᑭᐅᖅᑑᑉ ᕿᑭᖅᑕᖏᑦᑕ. ᖃᐅᔨᒪᓪᓗᑎᒃ ᐃᓄᐃᑦ ᐅᖓᕙᒥᐅᑦ ᐅᑭᐅᖅᑕᖅᑐᖓ ᑯᐸᐃ ᐊᑦᓱᕈᖅᓯᒪᒋᐊᖓ ᐊᓐᓇᒐᓱᐊᕐᓂᕐᒧᑦ ᐊᖑᓇᓱᓐᓂᖅᑎᒍᑦ, ᑲᓇᑕᒥ ᒐᕙᒪᒃᑯᑦ ᖃᓄᖅᑑᕈᑎᖓᑦ ᐱᔭᕆᐊᑭᑦᑑᓚᐅᖅᓯᒪᔪᖅ: ᓄᑦᑎᖅᓯᑐᐃᓐᓇᕐᓗᑎᒃ ᐱᖓᓱᓂᒃ ᐃᓚᒌᓂᒃ ᓯᓚᑖᓂᒃ ᐃᓄᔾᔪᐊᑉ ᐊᒻᒪᓗ ᐃᓕᑐᐃᓐᓇᕐᓗᒋᑦ ᐊᐅᔪᐃᑦᑑᑉ ᕿᑭᖅᑕᖓᓄᑦ, ᑕᐃᔭᐅᔪᖅ ᐃᓚᖓᓐᓄᑦ ᐅᕙᑦᓯᐊᕈᕐᓂᑕᓕᕆᔨᓄᑦ “ᐊᑦᓱᕈᕐᓇᓂᖅᐹᖅ ᓄᓇ ᐃᓄᓐᓄᑦ ᓄᓇᓕᒋᔭᐅᖏᓐᓇᖅᓯᒪᔪᓂ”.1 ᒐᕙᒪᒃᑯᑦ ᐅᖃᓚᐅᖅᓯᒪᔪᑦ ᓱᓕᓪᓚᕆᓐᓂᕋᖅᓱᑎᒃ ᐊᒥᒐᓐᖏᑦᑐᓂᒃ ᐆᒪᔪᖃᕐᒪᑦ ᐊᒻᒪᓗ ᒪᓂᒪᑎᑦᓯᑦᓱᑎᒃ ᐊᕐᕌᒍᓕᒫᖅ ᐊᓂᒍᖅᐸᑦ ᐅᑎᕆᓐᓇᕐᓂᕋᐃᑦᓱᑎᒃ ᐃᓄᓐᓂᒃ ᖁᕕᐊᓱᓐᖏᑉᐸᑕ.
ᐃᓚᖓᑦ ᑎᑎᕋᖅᑏᑦ ᑎᑎᕋᖅᑐᖅ:
ᐃᓄᐃᑦ ᕿᓚᒥᕈᓕᒃ ᑐᑭᓯᓕᓚᐅᖅᓯᒪᕗᑦ ᐳᐃᔩᒃ ᐊᒥᒐᖅᑑᒋᐊᖏᑦ, ᑐᑦᑐᐃᓪᓗ, ᑎᕆᒐᓐᓂᐊᑦ ᐊᒻᒪᓗ ᐃᒪᑦᓯᐊᖅ. ᐊᓐᓄᕌᓐᖏᑦ ᐅᖅᑰᓐᖏᓗᐊᖅᓱᑎᒃ, ᐊᒻᒪᓗ ᖃᒧᑎᖏᑦ ᐊᓄᖏᓪᓗ ᓈᒻᒪᓈᖅᓯᒪᒐᑎᒃ ᒪᓃᑦᑐᐊᓗᒻᒧᑦ ᐅᔭᕋᓛᓗᒻᒧᑦ. ᐊᖅᑯᓇᓐᖏᓐᓇᖅᑐᖅ ᐊᔪᕐᓇᖅᓱᓂ ᖃᔭᖅᑐᕐᕕᒋᒋᐊᖓ ᐊᒻᒪᓗ ᐸᓂᖅᑐᐊᓗᒃ ᐊᓄᕆ ᕿᒻᒥᖏᑦᑕ ᐳᕙᖏᓐᓂᒃ ᐊᐅᓈᒃᑲᐃᓕᖅᓱᓂ. ᐊᐳᑎ ᐃᓪᓗᓕᒍᑎᑦᓴᖅ ᑎᑭᑦᑕᓯᓐᓇᓕᖅᐸᑦᓱᓂ, ᓄᓇᓕᓐᖑᖅᑐᖅ ᑐᐱᕐᒥᐅᑕᐅᓕᖅᓱᑎᒃ ᖃᓪᓗᓈᖅᑕᓂ ᐅᑭᐅᑐᖄᓗᓄᑦ. ᐅᖅᓱᐊᓗᐃᓐᓂᐊᖅᓱᑎᒃ ᐃᑯᐊᓚᑦᓯᒍᑎᑦᓴᓂᒃ. ᓯᓚ 30 ᑎᒍᕇᔅ-ᓂᒃ ᓂᓪᓚᓱᓐᓂᖅᓴᐅᑦᓱᓂ ᐊᖏᕐᕋᖓᓐᓂᒃ, ᐊᒻᒪᓗ ᐊᓄᕆᒐᓚᐃᓐᓇᖅᑐᖅ ᓂᓪᓚᓱᒋᐊᓪᓚᒍᑕᐅᑦᓱᓂ 50-ᑎᒍᕇᔅ-ᓄᑦ…. ᐊᐅᔪᑦᑑᑉ ᕿᑭᖅᑕᖓ ᐱᑕᖃᖅᑑᒐᓗᐊᖅ ᐊᒥᓲᓐᖏᑦᑐᓂᒃ ᐅᒥᒻᒪᓐᓂᒃ, ᑭᓯᐊᓂ ᐸᓖᓯᒃᑯᑦ, 40-ᒪᐃᓕᓂᒃ ᐅᖓᓯᓐᓂᓖᑦ ᐃᓄᐃᑦ ᓄᓇᓕᖓᓐᓂᒃ, ᑐᖁᕋᖅᑕᐅᖁᔨᔾᔭᖏᓐᓂᕗᑦ. ᐱᕐᓕᓕᖅᑐᑦ ᐃᓄᐃᑦ ᓂᕆᖃᑦᑕᓕᖅᓱᑎᒃ ᑎᒻᒥᐊᑦ ᓱᓗᖏᓐᓂᒃ, ᖃᔪᓕᐅᖅᐸᑦᓱᑎᒃ ᑲᒥᖏᑦᑕ ᖁᓕᖏᓐᓂᒃ.2
ᒐᕙᒪᒃᑯᑦ ᐅᑎᓚᐅᖅᓯᒪᓐᖏᑦᑐᑦ ᐊᐃᑦᓯᕐᓗᑎᒃ ᐃᓚᒌᓐᓂᒃ ᐊᕐᕌᒍ ᐊᓂᒍᕋᓗᐊᕐᒪᑦ ᓱᓖᓛ, ᐃᓚᖏᑦ ᐅᖃᓲᖑᕗᑦ, ᑲᒪᓇᑦᓯᐊᖅᑐᒥᒃ, ᐊᓐᓇᑦᓯᒪᔪᑦ. ᑖᓐᓇ ᐃᓂᒋᔭᓪᓗᐊᑕᐅᔪᖅ ᓱᓕ ᓈᒻᒪᒋᔭᐅᓐᖏᒐᔪᓐᓂᖅᐸᐅᔪᖅ. ᕋᐃᔪᓪ ᑲᒥᓴᓐ-ᑯᑦ ᓄᓇᖃᖅᑳᖅᓯᒪᔪᓄᑦ ᑕᐃᓯᓯᒪᔪᑦ ᐃᓂᒋᔭᐅᔪᒥᒃ “ᐃᓚᖓᑦ ᐃᓄᐃᑦ ᐱᔪᓐᓇᐅᑎᖏᓐᓂᒃ ᓯᖁᒥᑦᓯᓯᒪᓂᖅᐸᐅᔪᖅ ᐱᐅᓯᕆᓯᒪᔭᖓᓐᓂᒃ ᑲᓇᑕᐅᑉ.” ᐃᓚᖏᑦ ᓯᕗᓕᖅᑏᑦ ᑮᓇᐅᔭᖅᑖᖅᑎᑕᐅᑦᑕᕋᑕᓕᖅᓯᒪᒐᓗᐊᖅᓱᑎᒃ ᑲᓇᑕᐅᑉ ᑮᓇᐅᔭᖏᑦᑎᒍᑦ $10-ᒥᓕᐊᓂᒃ ᐊᓐᓇᑦᓯᒪᔪᓄᑦ ᐃᓚᖏᓐᓄᓪᓗ, ᓱᓕ ᒪᒥᐊᒪᐅᖅᓯᒪᓐᖏᑦᑐᑦ.
ᓄᓇᕗᑦ ᑐᓐᖓᕕᒃᑯᑦ ᑎᒥᖓᑦ ᑮᓇᐅᔭᖃᖅᑎᑦᓯᒍᒪᒻᒪᑕ ᓇᑉᐸᖅᑕᐅᔪᖃᕐᓗᓂ ᒪᕐᕉᓐᓂᒃ – ᐊᑕᐅᓯᖅ ᐊᐅᓱᐃᑦᑐᕐᒥ ᐊᒻᒪᓗ ᐊᐃᑉᐸᖓ ᖃᐅᓱᐃᑦᑐᕐᒥ – ᐃᖅᑲᐅᒪᔾᔪᑕᐅᓪᓗᑎᒃ ᐊᑦᓱᕈᕐᓂᕆᔭᐅᓯᒪᔪᓂᒃ ᐃᓄᓐᓄᑦ ᓄᑦᑎᖅᑕᐅᓯᒪᔪᓄᑦ ᑖᒃᑯᓄᖓ ᓄᓇᓖᓐᓄᑦ. ᐸᕐᓇᓯᒪᕗᒍᑦ ᓴᖅᑭᖅᑕᐅᒐᔭᕆᐊᖏᑦ ᐊᐅᔭᖓᓂ 2009 ᓂᕆᐅᓐᓂᖃᖅᓱᑕᓗ ᑲᓇᑕᓕᒫᒥ ᓄᓇᕐᔪᐊᓕᒫᒥᓪᓗ ᐃᑉᐱᒋᔭᐅᓂᐊᕆᐊᖓ ᑕᒪᓐᓇ ᐱᓯᐅᓯᐅᓯᒪᔪᖅ ᐃᓄᓐᓄᑦ. “ᑲᓇᑕᒥ ᐊᐅᓚᑦᓯᓂᖅ” ᐃᓱᒪᒋᔭᐅᑎᓪᓗᒍ ᑲᑎᒪᔨᓄᑦ, ᑐᓴᕋᑦᓴᓕᕆᔨᓄᑦ, ᐊᒻᒪᓗ ᐱᓇᓱᐊᕐᕕᖃᕈᒪᔪᓄᑦ ᓇᒻᒥᓂᓪᓗᑦ ᓂᕆᐅᓐᓂᖃᖅᑐᓄᑦ ᓯᑯᐃᕈᓛᖅᑐᒥᒃ ᑕᓪᓕᕈᑎᐅᑉ ᐊᖅᑯᑎᖓᓂ, ᐊᑲᐅᓈᖅᓯᒪᓂᖅᐸᐅᓕᖅᐳᖅ ᐃᖅᑲᐃᑎᑦᓯᓂᖅ: ᓄᓇ ᐱᒋᔭᐅᔪᖅ ᑲᓇᑕᒧᑦ ᑎᑎᖅᓯᒪᓂᖓ ᓄᓇᕐᔪᐊᕐᒥ ᐱᓪᓗᒎᓐᖏᑦᑐᖅ ᑭᓯᐊᓂ ᐃᓄᓐᓄᑦ ᐊᑦᓱᕉᑕᐅᓯᒪᒻᒪᑕ ᓱᓇᓕᒫᓂᒃ ᕿᒪᐃᑦᓱᓂ ᑕᒫᓂᒥᐅᖑᓂᐊᕋᒥᒃ.
1 McGrath, Melanie, The Long Exile: A True Story of Deception and Survival amongst the Inuit of the Canadian Arctic, London: Fourth Estate, pg. 302.
2 Royte, Elizabeth, “Trail of Tears”, New York Times Book Review; Apr 8; Research Library, pg. 10.
