ᑐᓴᕋᑦᓴᓕᕆᔩᑦ

ᐃᓄᐃᑦ ᐊᒻᒪᓗ ᐃᒪᕐᒥᐅᑕᓕᕆᔨᒃᑯᑦ ᓱᓕ ᐊᖏᖃᑎᒌᒍᑎᓕᐅᕋᓱᐊᖅᑐᑦ ᐊᓪᓚᓐᖑᐊᓄᑦ ᐸᕐᓇᐅᑎᓄᑦ

Released | July 27, 2012 |  Print this article

ᐊᕐᕋᒍᓗᐊᖅᑐᒥᒃ ᑲᑎᒪᓂᖃᖃᑦᑕᕋᓗᐊᖅᑎᓪᓗᒋᑦ ᐊᒻᒪᓗ ᑐᓴᕆᐊᕐᕕᖃᖃᑦᑕᕐᓱᑎᒃ ᐃᓄᖕᓂᒃ, ᐃᓄᐃᑦ ᐊᒻᒪᓗ ᐊᖏᔪᖅᑲᐅᑎᖏᑦ ᐃᒪᕐᒥᐅᑕᓕᕆᔨᒃᑯᑦ ᓱᓕ ᐊᖏᖃᑎᒌᒍᑎᓕᐅᕋᓱᐊᖅᑐᑦ ᑎᑎᕋᕆᐊᓐᖓᐅᑎᓕᐊᖑᓯᒪᔪᓂᒃ ᑲᑎᑕᐅᓯᒪᔪᓂᒃ ᐃᖃᓗᓕᕆᓂᕐᒧᑦ ᐊᐅᓚᑦᓯᔾᔪᑎᓄᑦ ᐸᕐᓇᐅᑎᓂᒃ ᐊᓪᓚᓐᖑᐊᓕᕆᓂᕐᒧᑦ ᓄᓇᕗᒻᒥ.

ᑎᑎᕋᕆᐊᓐᖓᐅᑎᓕᐊᕆᓚᐅᖅᑕᖓ ᐊᐅᓚᑦᓯᔾᔪᑎᑦᓴᓄᑦ ᐸᕐᓇᐅᑦ ᐃᒪᕐᒥᐅᑕᓕᕆᔨᒃᑯᑦ ᑐᓴᕋᓱᐊᖃᑦᑕᓚᐅᖅᑳᖅᑐᓂ ᓄᓇᕗᑦ ᑐᓐᖓᕕᒃ ᑎᒥᖓᓂᒃ, ᐊᕕᑦᑐᕐᓯᒪᓂᐅᔪᓂ ᐆᒪᔪᓕᕆᔨᒃᑯᑦ ᑲᑎᒪᔨᖏᓐᓂᒃ ᐊᒻᒪᓗ ᓄᓇᓕᖕᓂ ᐊᖑᓇᓱᑦᑐᓕᕆᔨᒃᑯᑦ ᑲᑐᔾᔨᖃᑎᒌᖏᓐᓂᒃ ᓴᖅᑭᑎᑦᓯᓇᓱᐊᖅᑐᑎᒃ ᑲᑎᓕᒫᕐᓗᒋᑦ ᐆᒪᔪᖅᑕᐅᔪᓐᓇᖅᑐᓂᒃ ᐊᓪᓚᓐᖑᐊᓂᒃ ᐊᑐᕐᓗᒋᑦ ᐃᓄᐃᑦ ᐊᖑᓇᓱᓐᓂᕐᒧᑦ ᐱᔪᓐᓇᐅᑎᖏᓐᓂᒃ ᐱᕚᓪᓕᕈᑎᒃᓴᐅᓯᓐᓈᕐᓗᓂ ᓄᖑᐊᑎᑦᓯᑦᑕᐃᓕᒪᓂᕐᒥᒃ ᐊᖑᓇᓱᓐᓂᒃᑯᑦ ᐊᒻᒪᓗ ᓂᐅᕐᕈᑎᖃᖃᑦᑕᓂᕐᒥᒃ ᐊᓪᓚᓐᖑᐊᒥᒃ. ᑐᒃᓯᕋᐅᑕᐅᔪᖅ ᐊᐅᓚᑦᓯᔾᔪᑎᒃᓴᓄᑦ ᐸᕐᓇᐅᑎ ᐱᓇᓱᐊᕈᑕᐅᓂᐊᖅᑐᖅ ᑲᑎᓕᒫᕐᓗᒋᑦ ᐆᒪᔪᖅᑕᐅᔪᓐᓇᖅᑐᓂᒃ ᐊᐅᔭᕐᓯᐅᕆᐊᕐᑐᕐᕕᐅᖃᑦᑕᖅᑐᓂᒃ, ᓄᑖᒥᒃ ᓂᕕᖓᑖᓄᑦ ᐊᐅᓚᑦᓯᔾᔪᑕᐅᓂᐊᖅᑐᒥᒃ ᐃᓚᖏᓐᓄᑦ ᓄᓇᓕᖕᓄᑦ, ᐊᒻᒪᓗ ᓄᑖᒥᒃ ᐅᓂᒃᑳᓕᐅᕐᓂᕐᒧᑦ ᐊᑐᖅᑕᐅᒋᐊᓕᖕᓂᒃ ᐊᖑᓇᓱᑦᑎᓄᑦ.

ᑐᓐᖓᕕᒃᑯᑦ ᐊᖏᔪᖅᑳᖓᑕ ᑐᒡᓕᐊ ᔭᐃᒥᓯ ᐃᑦᑐᓗᒃ ᐅᖃᓚᐅᖅᑐᖅ ᐱᔾᔪᑎᓪᓗᐊᑕᐅᔪᖅ ᐊᖏᖃᑎᒌᒍᓐᓇᐃᓕᖅᑲᓂᕐᒧᑦ ᐃᒪᕐᒥᐅᑕᓕᕆᔨᒃᑯᑦ ᐃᓱᒪᓕᐅᕈᑎᒋᓯᒪᔭᖓ ᑐᓐᖓᕕᖃᕈᒪᓂᖏᓐᓄᑦ ᐊᐅᓚᑦᓯᔾᔪᑎᓄᑦ ᐸᕐᓇᐅᑎᓂᒃ ᐊᐅᔭᕐᓯᐅᕆᐊᕐᑐᕐᕕᒋᓯᒪᖃᑦᑕᖅᑕᖏᓐᓂ ᐊᓪᓚᓐᖑᐊᑦ. ᐃᓄᐃᑦ ᖃᐅᔨᒪᔭᑐᖃᖏᑎᒍᑦ ᐊᖏᖃᑎᒋᔭᐅᓐᖏᒻᒪᑕ ᐃᒪᕐᒥᐅᑕᓕᕆᔨᒃᑯᑦ ᓇᓗᓇᐃᕐᓯᒪᔭᖏᑦ ᐊᐅᔭᒃᑯᑦ, ᐊᓪᓚᓐᖑᐊᑦ ᐊᕕᖃᑦᑕᓲᖑᓂᖏᓐᓂᒃ ᐊᔾᔨᒌᓐᖏᑦᑐᓃᓐᖔᖅᑐᓂᒃ ᓇᓂᑐᐃᓐᓇᖅ, ᐊᒻᒪᓗ ᑖᒃᑯᓄᖓ ᓱᓕ ᐅᑎᖅᑕᐃᓐᓇᓲᖑᓪᓗᑎᒃ ᐃᓚᒋᕙᑦᑕᖏᓐᓄᑦ ᐊᒻᒪᓗ ᐃᓂᒋᕙᑦᑕᖏᓐᓄᑦ. ᐃᒪᕐᒥᐅᑕᓕᕆᔨᒃᑯᑦ ᓇᖕᒥᓂᖅ ᖃᐅᔨᓴᖅᑎᕐᔪᐊᑎᒍᑦ ᖃᐅᔨᓴᕐᓯᒪᓂᖏᑦ ᓇᓗᓇᐃᕐᓯᓯᒪᓐᖏᓚᑦ ᑕᒪᑦᓱᒥᖓ ᐃᓱᒪᒋᔭᐅᔪᒥᒃ, ᑐᓐᖓᕕᓕᐊᖑᓯᒪᔪᓂᒃ ᐃᓘᓐᓈᓄᑦ ᐊᐅᓚᑦᓯᔾᔪᑎᓄᑦ ᐸᕐᓇᐅᑎᒃᓴᑦ ᓴᖅᑭᓚᐅᖅᑕᖏᓐᓂ ᑭᒃᑯᑐᐃᓐᓇᕐᓂᒃ ᓈᓚᓐᓂᕐᒥ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔩᑦ ᐃᖃᓗᓐᓂ ᐱᓇᓱᐊᕈᓯᑦᑎᓐᓂ.

“ᐃᓄᐃᑦ ᑕᑯᓐᓇᕐᒪᑕ ᐊᓪᓚᓐᖑᐊᑦ ᓇᒧᑐᐃᓐᓈᖃᑦᑕᓲᖑᒻᒪᑕ ᓄᑖᓄᑦ ᐅᐸᖃᑦᑕᓲᖏᓐᓄᓪᓗ ᑕᐃᒪᓐᖓᓕᒫᖅ, ᑕᒪᓐᓇ ᓇᓕᖅᑯᑦᓯᓯᒪᓐᖏᓯᐊᕐᒪᑦ ᖃᓪᓗᓈᑦ ᖃᐅᔨᓴᖅᑎᕐᔪᐊᖏᑕ ᐊᑐᖅᑕᐅᖃᑦᑕᖅᑐᓂᒃ ᐃᒪᕐᒥᐅᑕᓕᕆᔨᒃᑯᓐᓂᒃ ᐸᕐᓇᐅᓯᐊᕆᔭᒥᓄᑦ. ᓲᕐᓗ ᐊᔾᔨᐅᑎᓪᓗᒍ, ᐊᐃᑉᐸᕆᓕᖅᑕᖓ ᐊᕐᕌᒍ ᐊᓪᓚᓐᖑᐊᑦ ᑕᑯᔭᐅᖃᑦᑕᕐᓯᒪᓂᖓ ᐃᖃᓗᑦᑑᑦᑎᐊᖅ ᖃᓂᒋᔮᓂ ᐃᒪᖏᓐᓂ. ᓱᖅᑯᐃᒪᓇᓐᖏᓚᖅ ᑖᒃᑯᐊ ᓇᓕᖏᓐᓂᒃ ᐱᓯᒪᒻᒪᖔᑕ ᐊᐅᔭᕐᓯᐅᕆᐊᕐᑐᕐᕕᐅᕙᑦᑐᓂ ᐊᓪᓚᓐᖑᐊᓄᑦ. ᐃᖃᓗᑦᑑᑦᑎᐊᒥ ᐊᖑᓇᓱᑦᑐᓕᕆᔨᖏᑦ ᐃᑲᔪᖅᑕᐅᔪᒪᓯᒪᓕᖅᑐᑦ ᐊᖑᓇᓱᑦᑎᖁᑎᒥᓐᓂᒃ ᐊᓪᓚᖑᐊᕐᓂᐊᕈᓐᓇᖁᓪᓗᒋᑦ ᐃᓕᓐᓂᐊᑎᑦᓯᖁᔨᓪᓗᑎᒃ ᐊᓪᓚᓐᖑᐊᕐᓂᐊᕈᓯᕐᓂᒃ ᐃᓕᓐᓂᐊᑎᑕᐅᖁᔨᓪᓗᑎᒃ ᐃᑲᔫᑎᖃᕐᓂᐹᒃᑯᑦ,” ᐅᖃᖅᑐᖅ ᐃᑦᑐᓗᒃ.

ᑕᒪᓐᓇᐅᑎᓪᓗᒍ ᐊᖏᖃᑎᒌᒍᓐᓇᐃᓕᖅᑲᓂᖅ ᐃᒪᕐᒥᐅᑕᓕᕆᔨᒃᑯᑦ ᐸᕐᓇᐅᑎᖏᓐᓂᒃ, ᑐᓐᖓᕕᒃᑯᑦ ᐊᑐᓕᖁᔨᔾᔪᑎᓕᐅᕐᓯᒪᔪᑦ ᓄᓇᕗᒻᒥ ᐆᒪᔪᓕᕆᔨᕐᔪᐊᑯᓐᓄᑦ ᓄᓇᕗᑦ ᐊᑐᖅᑕᐅᓚᐅᐱᓪᓚᓪᓗᓂ ᑎᑎᕋᕆᐊᓐᖓᐅᑦ ᖃᐅᔨᓴᕈᑕᐅᓗᓂ ᐅᑭᐅᓂᒃ ᐱᖓᓱᓂᒃ ᐊᓱᐃᓛᒃ ᑭᖑᓂᐊᒍᑦ ᕿᒥᕐᕈᓇᑦᑕᐅᓕᕐᓗᓂ ᑲᔪᓯᐊᑦᓯᐊᕐᒪᖔᖅ. ᑕᒪᓐᓇ ᖃᐅᔨᔾᔪᑕᐅᓂᐊᖅᑐᖅ ᓄᑖᖅ ᐊᓪᓚᓐᖑᐊᓕᕆᓂᕐᒧᑦ ᐸᕐᓇᐅᑎ ᐋᖅᑭᑦᓯᒪᓂᖓ ᐊᑐᑦᓯᐊᕐᒪᖔᖅ ᑲᑎᒪᓚᐅᓐᖏᓐᓂᖏᓐᓂ ᑲᑎᒪᔨᕐᔪᐊᑦ ᓯᓚᕐᔪᐊᒥ ᑕᐅᕐᓰᖄᑦᑕᐅᑎᓂᕐᒧᑦ ᐅᓗᕆᐊᓇᖅᑐᒦᑦᑐᓂᒃ ᐆᒪᔪᓂᒃ (ᓴᐃᑏᔅ) ᑲᑎᒪᓂᕆᓛᖅᑕᖓᓂ ᒫᑦᓯ, 2013, ᐋᖅᑭᒋᐊᕆᐊᖃᖅᐸᑦ ᐱᕝᕕᒃᓴᖃᑦᓯᐊᕈᓐᓇᓂᐊᖅᑐᖅ ᖃᐅᔨᓴᖅᑕᐅᓚᐅᖅᑳᑎᓪᓗᒍ.

ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᕿᒥᕐᕈᓇᓐᓂᐊᓕᖅᑕᖓ ᑎᑎᕋᕆᐊᓐᖓᐅᑦ ᐸᕐᓇᐅᑎᓄᑦ ᐊᒻᒪᓗ ᐊᑐᓕᖁᔨᔾᔪᑎᓕᐅᕐᓗᑎᒃ ᐃᒪᕐᒥᐅᑕᓕᕆᔨᒃᑯᑦ ᒥᓂᔅᑕᖓᓄᑦ ᐊᖏᖅᑕᐅᔭᕆᐊᖃᕐᒪᖔᖅ ᐊᖏᖅᑕᐅᔭᕆᐊᖃᓐᖏᒻᒪᖔᕐᓗ. ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᐊᖏᕐᓯᒪᔪᑦ ᓴᖅᑭᑎᑦᓯᓂᐊᕐᓂᕐᒥᒃ ᐃᓱᒪᓕᐅᕈᑎᒥᓂᒃ ᐅᑭᐊᑦᓵᖑᓂᐊᖅᑐᖅ.

ᐃᓄᐃᑦ ᐊᒻᒪᓗ ᐃᒪᕐᒥᐅᑕᓕᕆᔨᒃᑯᑦ ᓱᓕ ᐊᖏᖃᑎᒌᒍᑎᓕᐅᕋᓱᐊᖅᑐᑦ ᐊᓪᓚᓐᖑᐊᓄᑦ ᐸᕐᓇᐅᑎᓄᑦ (pdf)