ᑐᓴᕋᑦᓴᓕᕆᔩᑦ

ᑐᓐᖓᕕᒃᑯᑦ ᐃᓱᒫᓘᑎᖃᕐᓂᕐᒥᓂᒃ ᓇᓗᓇᐃᕆᔪᑦ ᓄᓇᕗᑦ ᒐᕙᒪᖓᑕ ᐃᖅᑲᓇᐃᔭᖅᑐᓕᕆᔨᒃᑯᑦ ᐃᓱᒪᓕᐅᕈᑎᖏᓐᓂᒃ

Released | July 13, 2012 |  Print this article

ᓄᓇᕗᑦ ᑐᓐᖓᕕᒃᑯᑦ ᐊᖏᔪᖅᑳᖓ ᑳᑎ ᑕᐅᑐᓐᖏ ᐅᓪᓗᒥ ᐃᓱᒫᓘᑎᖃᕐᓂᕐᒥᓂᒃ ᓇᓗᓇᐃᕆᔪᖅ ᓄᓇᕗᑦ ᒐᕙᒪᖓᑕ ᐃᖅᑲᓇᐃᔭᖅᑐᓕᕆᔨᒃᑯᑦ ᐃᓱᒪᓕᐅᕈᑎᖏᓐᓂᒃ ᐲᖅᓯᒍᒪᓂᖏᓐᓂᒃ ᐃᖅᑲᓇᐃᔭᖅᑐᓕᕆᔨᒃᑯᑦ ᐱᓕᕆᕝᕕᐊᓂᒃ, ᐸᕐᓇᑕᐅᔪᖅ ᐄᑉᕈ 1, 2013. ᑖᓐᓇ ᓄᓇᕗᑦ ᒐᕙᒪᖓᑕ ᐃᓱᒪᓕᐅᕈᑎᒋᒋᐊᓐᖓᓚᐅᖅᑕᖓᓃᓐᖔᖅᑐᖅ ᐲᖅᓯᔪᒪᓂᖏᓐᓂᒃ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᓐᓄᑦ ᐃᖅᑲᓇᐃᔭᕐᕕᖕᒥᒃ, ᐊᒻᒪᓗ ᑲᑕᑉᐸᓪᓕᐊᕌᕐᔪᖃᑦᑕᕐᓯᒪᓂᖏᓐᓂᒃ ᐃᓄᐃᑦ ᐃᖅᑲᓇᐃᔭᖅᑎᑕᐅᓂᖏᑦ ᐅᖃᐅᓯᐅᓯᒪᔪᒥ ᓄᓇᕗᑦ ᒐᕙᒪᖓᑕ ᑭᒡᓕᓯᓂᐊᕈᑎᒥᓂᖏᓐᓂᒃ.

ᐊᖓᔪᖅᑲᐅᑏᑦ ᓲᕐᓗ ᑕᒻᒪᕐᓯᒪᔪᕐᓯᐅᑎᕐᔪᐊᖅ ᑲᓇᑕᒥ ᑎᓕᐅᕇᓐᓇᖃᑦᑕᕐᓯᒪᔪᖅ ᓄᓇᕗᑦ ᒐᕙᒪᖓᓂᒃ ᐋᖅᑭᒋᐊᕆᖁᔨᓪᓗᓂ ᐃᖅᑲᓇᐃᔭᖅᑎᑖᕐᓂᕐᒧᑦ ᐊᑐᖃᑦᑕᕐᑕᖏᓐᓂᒃ. ᑕᒪᒃᑯᐊ ᐅᓂᒃᑳᑦ ᓇᓗᓇᐃᖅᓯᔪᑦ ᑐᓐᖓᕕᒃᑯᑦ ᐃᓱᒫᓘᑎᒋᖃᑦᑕᕐᓯᒪᔭᖓᓂᒃ ᐲᖅᑕᐅᑉᐸᑦ ᐱᓕᕆᕝᕕᐅᔪᖅ ᓄᖒᑦᓯᕙᓪᓕᐊᑐᐃᓐᓇᓚᒐᔪᖅ ᓄᓇᕗᑦ ᒐᕙᒪᖓᑕ ᐱᔪᓐᓇᐅᑎᖓᓂᒃ ᐊᔪᐃᓐᓇᖃᑦᑕᓂᕐᒧᑦ ᐊᒻᒪᓗ ᐱᓇᓱᐊᕈᑎᒋᒻᓚᕆᑉᐸᑦᑕᖓᓂᒃ ᐊᑐᖃᑦᑕᓂᕐᒥᒃ ᓯᕗᓪᓕᐅᔾᔭᐅᔭᕆᐊᓕᖕᓂᒃ ᐃᖅᑲᓇᐃᔭᖅᑎᓴᕐᓯᐅᓂᕐᒧᑦ ᐊᑐᐊᒐᕐᓂᒃ. ᓯᕗᓪᓕᐅᔾᔭᐅᔭᕆᐊᓖᑦ ᐃᖅᑲᓇᐃᔭᖅᑎᓴᕐᓯᐅᓂᕐᒧᑦ ᐊᑐᐊᒐᑦ ᑐᓐᖓᕕᒋᔭᐅᔭᕆᐊᖃᕐᓯᒪᔪᑦ ᓄᓇᕗᑦ ᒐᕙᒪᖓᑕ ᐱᓇᓱᐊᒐᑦᓴᖏᓐᓄᑦ ᑲᔪᓯᑎᑦᓯᕙᓪᓕᐊᓂᕐᒧᑦ ᐃᓛᒃᑯᑦ 23 ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᓂ, ᒐᕙᒪᒃᑯᑦ ᐃᓄᖕᓂᒃ ᐃᖅᑲᓇᐃᔭᖅᑎᑖᖃᑦᑕᐸᓪᓕᐊᒋᐊᖃᕐᓂᖏᓐᓂᒃ.

“ᐃᓱᒫᓘᑎᒋᒐᑉᑯ ᐲᖅᑕᐅᑉᐸᑦ ᐱᓕᕆᕕᒃ ᒐᕙᒪᒃᑯᑦ ᐊᔪᓕᑐᐃᓐᓇᕆᐊᖃᕐᓂᖏᓐᓂᒃ ᐊᖏᕈᑎᓃᑦᑐᓂᒃ ᐃᖅᑲᓇᐃᔭᖅᑎᑖᖅᐸᓪᓕᐊᓂᕐᒧᑦ ᓯᕗᓪᓕᐅᔾᔭᐅᔭᕆᐊᓕᖕᓂᒃ, ᑎᑎᕋᕐᓯᒪᔪᓂ ᒪᓕᑦᑕᐅᔭᕆᐊᓕᖕᓂᒃ ᐱᓕᒻᒪᒃᓴᕐᑎᑦᓯᓂᕐᒧᑦ ᐊᒻᒪᓗ ᐊᔪᕈᓐᓃᕐᓴᖅᑎᑦᓯᓂᕐᒧᑦ ᐃᖅᑲᓇᐃᔭᖅᑎᖏᓐᓂᒃ, ᐊᒻᒪᓗ ᐱᓇᓱᐊᒐᑦᓴᓂᒃ ᑲᔪᓯᑎᑕᐅᒋᐊᓕᓐᓂᒃ ᐊᖏᕈᑕᐅᓯᒪᔪᓂ ᐃᓛᒃᑯᑦ 23 ᐊᖏᕈᑎᓃᑦᑐᓂᒃ,” ᐅᖃᖅᑐᖅ ᑕᐅᑐᓐᖏ.

ᐊᕝᕙᒐᓚᖏᑦ ᓄᓇᕗᑦ ᒐᕙᒪᖓᑕ ᐃᖅᑲᓇᐃᔮᖏᑦ ᐊᔪᓐᖏᑐᕐᔪᐊᖑᒋᐊᓕᓐᓄᑦ ᐊᒻᒪᓗ ᐊᐅᓚᑦᓯᔨᐅᓂᕐᒧᑦ ᐃᓄᐃᑦ ᐃᖅᑲᓇᐃᔭᖅᑐᑦ ᓱᓕ ᓱᕐᕋᓚᐅᖅᓯᒪᓐᖏᑦᑐᑦ 25 ᐳᓴᖏᑦ, ᐊᒻᒪᓗ ᐱᕙᓪᓕᐊᓂᖃᕋᑎᒃ. ᑕᐅᑐᓐᖏᑦ ᐅᖃᖅᑐᖅ ᑐᓐᖓᕕᒃᑯᑦ ᐅᔾᔨᕈᓱᒐᓱᐊᑦᓯᐊᓚᖓᒋᐊᖏᑦ ᐊᒻᒪᓗ ᖃᐅᔨᓴᐃᓐᓇᕐᓗᑎᒃ ᓄᓇᕗᑦ ᒐᕙᒪᖓᑕ ᐃᖅᑲᓇᐃᔮᖏᓐᓂᒃ ᑖᒃᑯᓄᖓ ᐱᓕᕆᕝᕕᐅᔪᖅ ᓄᒃᑎᖅᑕᐅᓚᐅᖅᑎᓪᓗᒍ ᑮᓇᐅᔭᓕᕆᔨᒃᑯᓐᓄᑦ ᐊᒻᒪᓗ ᐊᖏᔪᖅᑲᐅᑏᑦ ᐱᓕᕆᕝᕕᖏᓐᓄᑦ.

ᑐᓐᖓᕕᒃᑯᑦ ᐃᓱᒫᓘᑎᖃᕐᓂᕐᒥᓂᒃ ᓇᓗᓇᐃᕆᔪᑦ ᓄᓇᕗᑦ ᒐᕙᒪᖓᑕ ᐃᖅᑲᓇᐃᔭᖅᑐᓕᕆᔨᒃᑯᑦ ᐃᓱᒪᓕᐅᕈᑎᖏᓐᓂᒃ (pdf)