(ᒪᐃ 28, 2012 – ᑲᖏᕐᖠᓂᖅ, ᓄᓇᕗᑦ) ᓄᓇᕗᑦ ᑐᓐᖓᕕᒃ ᑎᒥᖓᑕ ᐊᖏᔪᖅᑳᖓ ᑳᑎ ᑕᐅᑐᓐᖏ, ᐊᐅᓚᑦᓯᔨᖏᑦ ᐊᒻᒪᓗ ᐃᖅᑲᓇᐃᔭᖅᑎᖏᑦ ᓈᒃᑭᒍᓱᖕᓂᕐᒥᓂᒃ ᐃᓚᓐᖓᖅᑐᓂᒃ ᑭᐊᓕ ᐃᓚᒌᓂᒃ ᑐᓴᖅᓯᒪᓕᕐᒥᑎᓪᓗᑕ ᐃᓚᓐᖓᓚᐅᕐᓂᑎᓐᓂᒃ ᔫᓇ ᑭᐊᓕᒥᒃ, ᒪᐃ 26, 2012 ᐋᑐᕚ ᐋᓐᓂᐊᕕᔾᔪᐊᖓᓂ.

“ᐃᓱᒪᒋᕙᕗᑦ ᑐᒃᓯᐅᑎᕙᕗᓪᓗ ᑭᐊᓕ ᐃᓚᒌᑦ ᒫᓐᓇ ᕿᑦᓵᓇᖅᑐᒦᑎᓪᓗᑕ,” ᑳᑎ ᐅᖃᖅᑲᐅᔪᖅ. “ᔫᓇ ᑐᓂᓯᒪᓚᐅᖅᑐᖅ ᐊᖏᖅᓯᒪᓂᕐᒥᒍᑦ ᐊᒻᒪᓗ ᐊᔪᐃᓐᓇᖅᑐᓂ ᐅᑭᐅᖅᑕᖅᑐᒥᐅᓅᖓᔪᓂᒃ ᐊᒻᒪᓗ ᐅᖃᐅᓯᑦᑎᓐᓂᒃ ᓇᓕᒧᒋᔭᐅᖁᔨᓪᓗᓂ ᑐᓴᒐᑦᓴᓕᐊᖑᕙᑦᑐᓂᒃ ᐊᒻᒪᓗ ᓈᓚᐅᑎᒃᑰᖅᑕᐅᕙᑦᑐᓂᒃ. ᓈᓚᐅᑎᒃᑯᑦ ᐃᓄᒃᑎᑑᖅᑐᑦ ᓈᓚᐅᑦᑕᕙᑉᐳᑦ ᖃᐅᑕᒫᑦ ᓄᓇᕗᒻᒥᐅᑦ ᐊᖏᕐᕋᖏᓐᓂ ᐱᓕᕆᓚᐅᕐᓂᖏᓐᓄᑦ ᑕᐃᒪᐃᓪᓗᐊᖃᑎᒌᑦ ᐃᖅᑲᓇᐃᔮᖏᑎᒍᑦ.

ᔫᓇ ᑕᐃᑲᓐᖓᓂᐊᓗᒃ ᐃᖅᑲᓇᐃᔭᖅᑐᑐᖃᐅᓚᐅᖅᐳᖅ ᓰᐲᓰᒃᑯᓐᓂ, ᖃᐅᔨᒪᔭᐅᒍᑎᖃᓚᐅᖅᑐᓂ ᐅᖃᖃᑦᑕᓚᐅᕐᓂᖓ ᑕᐃᒪ, ᑕᕝᕙ, ᑖᒃᑯᐊ ᓈᓚᐅᑎᒃᑯᑦ ᐅᑭᐅᖅᑕᖅᑐᓕᒫᒥ ᐅᑭᐅᓂᒃ 30 ᐅᖓᑖᓄᑦ. ᐃᖅᑲᓇᐃᔭᖃᑦᑕᓚᐅᕐᓂᕐᒥᒍᑦ ᑐᓂᓯᒪᑦᓯᐊᓚᐅᖅᑐᖅ ᐊᖏᕈᑎᖃᖅᓯᒪᓪᓗᓂ ᐃᓄᒃᑎᑐᑦ ᐅᖃᐅᓯᖅ ᒪᓕᑦᓯᐊᖁᓪᓗᒍ ᐊᓯᔾᔨᐸᓪᓕᐊᓂᐅᔪᒧᑦ ᓈᓚᐅᑎᒃᑯᑦ ᓈᓚᑦᑕᐅᖃᑦᑕᕐᓗᓂ, ᐊᒻᒪᓗ ᓇᓪᓕᐅᓂᖅᓯᐅᕐᓃᑦ ᐱᖕᒪᕆᐅᔪᑦ ᐃᓄᐃᑦ ᓄᓇᖓᓂ ᐃᓚᓕᐅᔾᔭᐅᓯᒪᐃᓐᓇᖁᓪᓗᒋᑦ ᓈᓚᐅᑎᒃᑰᖅᑎᑕᐅᕙᑦᑐᓂ. ᓄᓇᓕᓐᓂ, ᑲᓇᑕᒥ ᐊᒻᒪᓗ ᓯᓚᕐᔪᐊᒥᓗ ᐱᕙᓪᓕᐊᔪᑦ ᐅᖃᐅᓯᕆᔭᐅᖃᑦᑕᕐᓗᑎᒃ ᑐᑭᓯᔭᐅᔪᓐᓇᕐᓗᑎᒃ ᓈᓚᐅᑎᒃᑯᑦ ᐱᕙᓪᓕᐊᔪᓕᕆᔨᑎᒍᑦ ᐃᓄᒃᑎᑐᑦ ᐅᖃᐅᓯᖃᑎᒌᓐᖏᑦᑐᓄᑦ, ᐊᒻᒪᓗ ᐊᑕᐅᓯᐅᖃᑎᒌᓪᓗᑎᒃ ᐱᓇᓱᐊᕐᓗᑎᒃ ᐃᓄᐃᑦ ᐱᔾᔪᑎᓗᒋᑦ. ᖃᓪᓗᓈᓃᑦᑐᑦ ᐱᕙᓪᓕᐊᔪᓕᕆᔩᑦ ᐅᖃᐅᔾᔭᐅᓚᐅᖅᑐᖅ “ᑕᑯᑦᓴᐅᑎᑕᐅᖃᑦᑕᖅᑐᑦ ᑕᓚᕖᓴᒃᑯᑦ ᑯᐃᓐ ᐅᖃᐅᓯᖓᑐᑦ ᐅᖃᓕᒪᓲᑦ”, ᐊᒻᒪᓗ ᐃᓄᒃᑎᑑᖅᑐᑦ “ᑭᐊᓕ ᐅᖃᐅᓯᖓᑐᑦ ᐅᖃᐅᓯᓖᑦ.”

“ᔫᓇ ᐅᖃᖅᑎᐅᓚᐅᖅᑐᖅ ᐅᖃᐅᓯᑦᑎᒍᑦ” ᐅᖃᓚᐅᖅᑐᖅ ᐊᖏᔪᖅᑳᖅ ᑕᐅᑐᓐᖏ, ᐱᕙᓪᓕᐊᔪᓂᒃ “ᑐᑭᓯᓇᖅᓯᑎᑦᓯᒍᓐᓇᖃᑦᑕᓚᐅᖅᑐᖅ ᐊᒻᒪᓗ ᓯᓚᕐᔪᐊᒥ ᐱᕙᓪᓕᐊᔪᓂᒃ ᑐᑭᖃᓕᖅᑎᓯᑦᓯᐊᖅᑐᓂ ᑐᑭᓯᐊᔭᑦᑎᒍᑦ, ᐊᒻᒪᓗ ᓄᓇᓕᓐᓂ ᐃᓱᒫᓘᑎᑦᑎᓐᓂ ᐊᒻᒪᓗ ᐃᓄᐃᑦ ᐃᓕᖅᑯᓯᖓᓂᒃ ᑲᓇᑕᒥᐅᓕᒫᓄᑦ ᖃᐅᔨᒪᔭᐅᓕᖅᑎᑦᓯᕚᓪᓕᕐᓯᒪᓚᐅᖅᑐᖅ. ᐱᖕᒪᕆᐊᓗᖕᒥᒃ ᐱᓕᕆᐊᖃᓚᐅᖅᑐᖅ ᐊᑐᕆᐊᓕᒻᒪᕆᐊᓘᔪᒥᒃ ᑲᓲᒪᒍᑎᑦᑎᓐᓄᑦ ᓄᓇᕗᒻᒥ ᓄᓇᓖᑦ, ᐊᒻᒪᓗ ᐃᓚᒋᔭᐅᓕᖅᐸᓪᓕᕈᑎᒃᓴᓂᒃ, ᑐᑭᓯᔭᐅᒃᑲᓐᓂᕈᑎᒃᓴᓂᒃ, ᐊᒻᒪᓗ ᖃᐅᔨᒃᑲᓐᓂᕈᑎᒃᓴᑎᓐᓂᒃ.
– ᑕᐃᒪ, ᑕᕝᕙ, ᑖᒃᑯᐊ-