Nunavut Tunngavik Inc.

ᐃᓄᐃᑦ ᐱᕙᓪᓕᐊᔪᓕᕆᓂᕐᒧᑦ, ᐃᓅᓯᓕᕆᓂᕐᒧᑦ ᐊᒻᒪᓗ ᐱᖅᑯᓯᓕᕆᓂᕐᒧᑦ ᐃᓅᑦᑎᐊᕆᐊᖃᕐᓂᕐᒧᑦ ᒪᑯᐊ ᐃᓂᓪᓚᒃᑕᐅᕙᓪᓕᐊᔪᑦ ᐊᑐᓕᖅᑎᑕᐅᓇᓱᒃᑐᓄᑦ ᐃᓗᐊᓂ ᐅᑯᐊ ᓄᓇᕗᒥ ᓄᓇᑖᕐᓂᕐᒧᑦ ᐊᖏᕈᑎᓂ.

ᑐᓴᕋᑦᓴᓕᕆᔩᑦ

ᖃᓪᓗᓈᑦ ᖃᐅᔨᓴᖅᑎᕐᔪᐊᖏᓐᓃᖔᖅᑐᓂᒃ ᖃᐅᔨᔭᐅᔪᖅ ᓄᓇᕗᑦ ᓇᓄᖃᑦᓯᐊᕐᓂᖓᓂᒃ ᖃᓄᐃᓐᖏᓯᐊᖅᑐᓂᒃ

Released | April 3, 2012 | Print this article Print this article

 

ᓄᓇᕗᑦ ᑐᓐᖓᕕᒃ ᑎᒥᖓᑕ ᐊᖏᔪᖅᑳᖓᑕ ᑐᒡᓕᐊ ᔭᐃᒥᓯ ᐃᑦᑐᓗᒃ ᐅᓪᓗᒥ ᖁᕕᐊᒋᔭᖃᖅᑲᐅᔪᖅ ᓄᓇᕗᑦ ᒐᕙᒪᖓ ᓴᖅᑭᑎᑦᓯᓂᖓᓂᒃ ᒫᓐᓇᕐᓂᓴᐅᔪᓂᒃ ᑕᓯᐅᔭᕐᔪᐊᖅ ᐱᖓᓐᓈᓂ ᓇᓄᖏᓐᓂᒃ ᖃᖓᑕᔫᒃᑯᑦ ᖃᐅᔨᓴᕈᑕᐅᓚᐅᖅᑐᓂᒃ. ᖃᐅᔨᓴᕈᑎᒥᓃᑦ ᖃᐅᔨᔾᔪᑕᐅᔪᑦ ᓇᓄᖃᑦᓯᐊᕐᓂᖓᓂᒃ ᖃᓄᐃᓐᖏᓯᐊᖅᑐᓂᒃ ᖃᐅᔨᓴᕐᕕᐅᓚᐅᖅᑐᒥ ᑕᒫᓂ, ᐊᒻᒪᓗ ᐃᓅᓴᓪᓕᕙᓪᓕᐊᖏᓐᓂᖏᓐᓂᒃ ᐅᖃᐅᓯᕆᔭᐅᕙᓚᐅᕐᓂᖏᑐᑦ ᓇᓄᕐᓂᒃ ᖃᓪᓗᓈᑦ ᖃᐅᔨᓴᖅᑎᕐᔪᐊᖏᓐᓂᒃ.

 

“ᑕᒪᓐᓇ ᑐᓴᕋᑦᓴᑦᓯᐊᕙᒻᒪᕆᐊᓗᒃ. ᐃᓄᐃᑦ ᐅᖃᖃᑦᑕᐃᓇᕐᒪᑕ ᓇᓄᐃᑦ ᐃᓅᓴᓪᓕᕙᓪᓕᐊᖏᓐᓂᖏᓐᓂᒃ. ᐅᖃᐅᓯᖃᐃᓐᓇᑎᓪᓗᑕ ᐅᑭᐅᕋᓵᓗᖕᓂᒃ ᓇᓄᖃᓕᖅᐸᓪᓕᐊᑐᐃᓐᓇᕐᓂᖓᓂᒃ ᑕᑯᖃᑦᑕᓂᑦᑎᒍᑦ ᓄᓇᒥ ᐊᒻᒪᓗ ᓄᓇᓕᖕᓂ, ᐃᓱᒫᓗᑕᐅᖃᑦᑕᖅᓯᒪᓕᖅᑐᖅ ᐊᑦᑕᓇᖅᑐᒦᒍᑕᐅᑐᐃᓐᓇᕆᐊᖃᕐᓂᖓᓂᒃ. ᐃᓄᐃᑦ ᐅᖃᐅᔾᔭᐅᖃᑦᑕᓚᐅᖅᑐᑦ ᖃᓪᓗᓈᑦ ᖃᐅᔨᓴᕐᑎᕐᔪᐊᖏᓐᓂᒃ ᓇᓄᐃᑦ ᓄᓇᓕᖕᓅᖃᑦᑕᓗᐊᓕᕐᓂᖏᓐᓂᒃ ᐃᓅᓴᓪᓕᕙᓪᓕᐊᑐᐃᓐᓇᓕᕐᓂᖏᓐᓄᑦ, ᑭᓯᐊᓂ ᐃᓄᐃᑦ ᐊᖏᖃᑎᖃᖃᑦᑕᓚᐅᓐᖏᑦᑐᑦ ᐅᖃᐅᓯᕆᔭᖏᓐᓂᒃ ᑐᑭᓕᐅᕈᑎᒋᓯᒪᔭᒥᒍᑦ,” ᐅᖃᖅᑲᐅᔪᖅ ᐃᑦᑐᓗᒃ. “ᐅᑭᐅᕋᓵᓗᖕᓂᒃ, ᐃᓄᐃᑦ ᐅᑭᐅᖅᑕᖅᑐᒥ ᒐᕙᒪᐅᔪᒥᒃ ᐊᐅᔭᒃᑯᑦ ᓇᓄᖃᕐᓂᐅᕙᑦᑐᓂᒃ ᖃᐅᔨᓴᖁᔨᖃᑦᑕᓚᐅᖅᑐᑦ ᖃᖓᑕᔫᒃᑯᑦ. ᐊᓱᐃᓛᕋᑕᖅ, 2011-ᒥ, ᖃᖓᑕᔫᒃᑯᑦ ᖃᐅᔨᓴᓕᓚᐅᖅᑐᑦ ᐊᒻᒪᓗ ᐃᓄᐃᑦ ᖃᐅᔨᒪᐃᓐᓇᓚᐅᖅᑕᖓ ᓇᓕᖅᑯᓯᓪᓗᓂ, ᓇᓄᖃᑦᓯᐊᖅᑐᓂ ᖃᓄᐃᓐᖏᓯᐊᖅᑐᓂᒃ.”

 

ᖃᓪᓗᓈᑦ ᖃᐅᔨᓴᖅᑎᕐᔪᐊᖏᓐᓂᒃ ᖃᐅᔨᓴᕈᑎᒥᓃᑦ ᖃᖓᑕᔫᒃᑯᑦ ᐃᓅᓴᓪᓕᕙᓪᓕᐊᓂᕋᖅᑕᐅᓯᒪᔪᓂᒃ ᑭᐳᓯᒪᑦᓯᐊᕐᒪᑕ ᓇᓄᖃᕐᓂᐅᔪᑦ ᐃᓱᒪᒋᔭᐅᓯᒪᓂᖏᓐᓂᒃ ᐊᕙᑎᓕᕆᔨᕐᔪᐊᒃᑯᑦ ᑲᓇᑕᒥ ᖃᓪᓗᓈᑦ ᖃᐅᔨᓴᖅᑎᕐᔪᐊᖏᓐᓄᑦ 2004-ᒥ. ᑕᐃᒃᑯᐊ ᐃᓱᒪᒋᔭᐅᓯᒪᔪᑦ ᑕᐃᒃᑯᓇᓐᖔᖅᓯᒪᒻᒪᑕ ᖃᐅᔨᓴᕈᑎᒥᓂᕐᓂᒃ ᑲᑎᖅᓱᖅᑕᐅᓯᒪᔪᓂᒃ ᖃᓪᓗᓈᑦ ᖃᐅᔨᓴᖅᑎᕐᔪᐊᖏᑕ ᓄᐊᖃᑦᑕᖅᓯᒪᔭᖏᓐᓂᒃ ᖃᐅᔨᓴᖅᑕᐅᑎᓪᓗᒋᑦ ᑎᒍᔭᐅᕙᑦᑐᑎᒃ ᖃᓂᑖᓂ ᑰᔾᔪᐊᕌᓗᒃ, ᒫᓂᑑᕙ ᓇᓗᓇᐃᒃᑯᓯᖅᑐᖅᑕᐅᖃᑦᑕᓚᐅᖅᑐᒥᓂᕐᓂᒃ. ᖃᓪᓗᓈᑦ ᖃᐅᔨᓴᖅᑎᕐᔪᐊᖏᑕ ᑐᑭᓕᐅᕈᑎᒋᓯᒪᔭᖏᑦ ᖃᐅᔨᓴᕈᑎᒥᓂᕐᓃᖔᖅᓯᒪᔪᑦ ᖃᐅᔨᑎᑦᓯᓇᓱᐊᕈᑎᒋᓪᓗᒋᑦ ᐅᐱᕐᖔᒃᑯᑦ ᑐᕙᐃᓴᕋᐃᓐᓂᖅᓴᐅᖃᑦᑕᓕᕐᓂᖓᓄᑦ ᐊᒻᒪᓗ ᓯᑯᓇᓵᕐᓂᖅᓴᐅᖃᑦᑕᓕᕐᓂᖓᓄᑦ, ᓇᓄᖏᑦ ᑕᓯᐅᔭᕐᔪᐊᖅ ᐱᖓᓐᓈᓂ ᐃᓅᓴᓪᓕᕙᓪᓕᖅᓯᒪᒋᐊᖏᑦ 935-ᓄᑦ ᐃᓅᓴᓪᓕᕙᓪᓕᖅᑐᒥᓂᐅᓂᕋᐃᓪᓗᑎᒃ ᐊᒻᒪᓗ ᓱᓕ ᐃᓅᓴᓪᓕᕙᓪᓕᕋᔭᕐᓂᖏᓐᓂᒃ 610-ᓄᑦ 2011-ᒥ ᐊᓪᓛᑦ ᓇᓐᓄᑐᖃᖃᑦᑕᖏᒃᑲᓗᐊᖅᐸᑦ. ᓄᓇᕗᑦ ᒐᕙᒪᖓᑕ ᖃᖓᑕᔫᒃᑯᑦ ᖃᐅᔨᓴᕈᑎᒋᓚᐅᖅᑕᖏᓐᓂᒃ ᖃᐅᔨᓇᖅᑐᖅ ᓇᓄᖃᕆᐊᖓ 1,000-ᓃᑦᑐᓂᒃ ᑕᒫᓂ, ᑕᒻᒪᖅᓯᒪᓂᖓᓂᒃ ᖃᐅᔨᔾᔪᑕᐅᓪᓗᓂ ᖃᓪᓗᓈᑦ ᖃᐅᔨᓴᖅᑎᕐᔪᐊᖏᓐᓃᖔᓚᐅᖅᑐᓂᒃ.

 

ᑕᒪᒃᑯᐊ ᑕᒻᒪᖅᓯᒪᔪᑦ ᐃᓱᒪᒋᔭᐅᓯᒪᔪᑦ ᓱᕋᐃᕙᓪᓕᖅᓯᒪᓗᐊᓐᖑᐊᓚᐅᖅᑐᑦ ᐃᓄᐃᑦ ᓇᓐᓄᖃᑦᑕᕐᓂᖏᓐᓂᒃ ᐃᓱᒪᒋᔭᐅᓂᖏᑦ ᑎᑭᓯᒪᓚᐅᕐᒪᑕ ᐊᓪᓛᑦ ᐃᓱᒪᒋᔭᐅᓂᖓᓄᑦ ᓯᓚᕐᔪᐊᒥ ᐃᓅᓴᓪᓕᕙᓪᓕᖅᓯᒪᓕᕐᓂᖏᓐᓂᒃ ᓇᓄᐃᑦ ᐊᒻᒪᓗ ᐋᖅᑭᒋᐊᕈᑕᐅᒻᒪᕆᓕᖅᓱᑎᒃ ᐃᓅᓴᓪᓕᕙᓪᓕᕈᑕᐅᓪᓗᑎᒃ ᓇᓐᓄᑦᑕᐅᔪᓐᓇᖅᑐᑦ ᑰᑕᖏᓐᓄᑦ.

 

“ᑕᒪᓐᓇᓕ ᓯᓚᐅᑉ ᐊᓯᔾᔨᐸᓪᓕᐊᓂᖓᓅᖓᓐᖏᑦᑐᖅ. ᓇᓄᐃᓪᓕ ᐊᑐᖅᑕᐅᑐᐃᓐᓇᓚᐅᖅᑐᑦ ᐅᔾᔨᕈᓱᑦᑎᑦᓯᒐᓱᐊᕈᑕᐅᓪᓗᓂ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ. ᐊᓯᔾᔨᕐᓂᐅᔪᑦ ᐋᖅᑭᑦᓯᒍᑕᐅᓚᐅᓐᖏᑦᑐᑦ ᐃᓅᓴᓪᓕᕙᓪᓕᕈᑕᐅᑎᑕᐅᓇᓱᐊᖅᑐᑎᒃ ᐱᔾᔪᑕᐅᔪᓂᒃ ᐅᕝᕙᓘᓐᓃᑦ ᐊᒃᑐᐃᓂᕆᓯᒪᔭᖓᓂᒃ ᓯᓚᐅᑉ ᐊᓯᔾᔨᐸᓪᓕᐊᓂᖓᓄᑦ, ᑭᓯᐊᓂ ᐊᓯᔾᔨᕈᑕᐅᓚᐅᖅᑐᑦ ᓇᓐᓄᒍᓐᓇᓂᕐᒧᑦ ᑰᑕᓄᑦ. ᐅᓗᕆᐊᓇᓚᐅᖅᑐᖅ ᐊᒻᒪᓗ ᑕᒻᒪᓚᐅᖅᑐᑦ ᖃᓪᓗᓈᑦ ᖃᐅᔨᓴᖅᑎᕐᔪᐊᖏᑦ ᐊᑐᖅᑎᓪᓗᒋᑦ ᐱᐊᓂᒃᓯᒪᓐᖏᑦᑐᓂᒃ ᖃᐅᔨᓴᕈᑎᒥᓂᕐᓂᒃ ᑲᑎᖅᓱᖅᑕᐅᓯᒪᔪᓂᒃ ᐃᓱᒪᓕᐅᕈᑎᖃᖅᑐᑎᒃ,” ᐅᖃᓚᐅᖅᑐᖅ ᐃᑦᑐᓗᒃ. “ᓂᕐᔪᑎᓂᒃ ᐊᐅᓚᑦᓯᒍᑎᓃᖃᑕᐅᒋᐊᓕᒻᒪᕆᐅᔪᖅᑕᐅᖅ ᐱᖕᒪᕆᐊᓘᓪᓗᓂ ᖃᐅᔨᒪᓂᕆᔭᖓ ᐃᓄᐃᑦ ᐅᖃᐅᓯᖃᖅᑎᓪᓗᒋᑦ ᐆᒪᔪᖁᑎᑦᑎᓐᓂᒃ,” ᐅᖃᓚᐅᖅᑐᖅ ᐃᑦᑐᓗᒃ.

 

ᐃᑦᑐᓗᒃ ᖁᕕᐊᒋᔭᖃᓚᐅᕐᒥᔪᖅ ᓄᓇᕗᑦ ᒐᕙᒪᒃᑯᖏᑦ ᐸᕐᓇᐸᓪᓕᐊᖏᓐᓇᕐᓂᕆᔭᖏᓐᓂᒃ ᐊᒻᒪᓗ ᖃᖓᑕᔫᒃᑯᑦ ᖃᐅᔨᓴᕆᐊᒃᑲᓂᕐᓂᐊᕐᓂᖏᓐᓂᒃ ᓇᓄᕐᓂᒃ, ᐅᖃᕆᐊᒃᑲᓂᖅᑐᓂ ᐃᓄᐃᑦ ᐅᖃᐃᓐᓇᖃᑦᑕᖅᓯᒪᓂᖏᓐᓂᒃ ᖃᐅᔨᓴᕐᓂᖅᑕᖃᓕᕋᐃᑉᐸᑦ ᐆᒪᔪᓂᒃ ᓱᕐᕋᐃᓗᐊᕋᔭᓐᖏᑦᑐᓂᒃ ᐊᑐᖃᑦᑕᖁᔨᓪᓗᑎᒃ ᐸᕝᕕᓵᖃᕐᓂᒃᑯᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ ᓱᓕ:

ᑭᐊᕆ ᒪᒃᖤᔅᑭ
ᐊᐅᓚᑦᓯᔨ, ᑐᓴᐅᒪᔪᓕᕆᔨᒃᑯᑦ

ᓄᓇᕗᑦ ᑐᓐᖓᕕᒃᑯᑦ ᑎᒥᖁᑎᖓᑦ
ᐅᖄᓚᐅᑦ: (867) 975-4914
ᐅᖓᓯᒃᑐᒥᒃ ᐊᑭᖃᖏᑦᑐᖅ: 1-888-646-0006
kmccluskey

ᖃᓪᓗᓈᑦ ᖃᐅᔨᓴᖅᑎᕐᔪᐊᖏᓐᓃᖔᖅᑐᓂᒃ ᖃᐅᔨᔭᐅᔪᖅ ᓄᓇᕗᑦ ᓇᓄᖃᑦᓯᐊᕐᓂᖓᓂᒃ ᖃᓄᐃᓐᖏᓯᐊᖅᑐᓂᒃ (pdf)